សំបុត្រទី២ជូនចំពោះគ្រិស្តសាសនិកនៅក្រុងថែស្សាឡូនិច
១ ពីខ្ញុំ ប៉ូល និងស៊ីលវេនុស* ព្រមទាំងធីម៉ូថេ+ ជូនចំពោះក្រុមជំនុំនៅក្រុងថែស្សាឡូនិចដែលរួបរួមជាមួយនឹងព្រះជាបិតារបស់យើង និងលោកម្ចាស់យេស៊ូគ្រិស្ត៖*
២ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់និងសេចក្ដីសុខសាន្តពីព្រះដែលជាបិតា និងពីលោកម្ចាស់យេស៊ូគ្រិស្ត។
៣ បងប្អូនអើយ យើងមានភារកិច្ចអរគុណព្រះសម្រាប់អ្នករាល់គ្នាជានិច្ច។ យើងធ្វើដូច្នេះគឺត្រឹមត្រូវ ពីព្រោះអ្នករាល់គ្នាមានជំនឿកាន់តែរឹងមាំ ហើយអ្នកទាំងអស់គ្នាក៏ស្រឡាញ់គ្នាទៅវិញទៅមកកាន់តែខ្លាំងដែរ។+ ៤ ហេតុនេះ ក្នុងចំណោមក្រុមជំនុំទាំងឡាយរបស់ព្រះ យើងមានមោទនភាពចំពោះអ្នករាល់គ្នា+ ដោយសារអ្នករាល់គ្នាបង្ហាញជំនឿនិងការស៊ូទ្រាំ ទោះជាអ្នករាល់គ្នាកំពុងជួបការបៀតបៀននិងទុក្ខលំបាក*គ្រប់បែបយ៉ាងក៏ដោយ។+ ៥ នេះជាភ័ស្តុតាងដែលបញ្ជាក់ថាព្រះវិនិច្ឆ័យដោយសុចរិតយុត្តិធម៌ ហើយដោយសារការនោះ អ្នករាល់គ្នាបានត្រូវចាត់ទុកថាជាអ្នកដែលសមនឹងទទួលរាជាណាចក្រព្រះ ព្រោះនោះជាមូលហេតុដែលអ្នករាល់គ្នាកំពុងរងទុក្ខ។+
៦ ដោយសារការវិនិច្ឆ័យរបស់ព្រះគឺសុចរិតយុត្តិធម៌ នោះលោកនឹងសងទុក្ខវេទនាដល់ពួកអ្នកដែលធ្វើឲ្យអ្នករាល់គ្នារងទុក្ខវេទនា។+ ៧ ពេលដែលលោកម្ចាស់យេស៊ូលេចមកពីស្ថានសួគ៌ជាមួយនឹងបណ្ដាទេវតាខ្លាំងក្លារបស់លោក+ក្នុងអណ្ដាតភ្លើង នោះអ្នករាល់គ្នាដែលកំពុងរងទុក្ខវេទនា នឹងទទួលបានការធូរស្បើយជាមួយនឹងយើង។+ ៨ នៅគ្រានោះ លោកនឹងសងសឹកចំពោះពួកអ្នកដែលមិនស្គាល់ព្រះ និងពួកអ្នកដែលមិនស្ដាប់ដំណឹងល្អអំពីលោកយេស៊ូជាម្ចាស់របស់យើង។+ ៩ អ្នកទាំងនោះនឹងត្រូវកាត់ទោសឲ្យទទួលសេចក្ដីហិនវិនាសជារៀងរហូត+ ឲ្យផុតបាត់ពីមុខលោកម្ចាស់និងឫទ្ធានុភាពដ៏រុងរឿងរបស់លោក ១០ នៅពេលដែលលោកមកដើម្បីទទួលសិរីរុងរឿងជាមួយនឹងពួកអ្នកបរិសុទ្ធរបស់លោក នោះអស់អ្នកដែលបានបង្ហាញជំនឿលើលោកនឹងកោតស្ញប់ស្ញែងចំពោះលោក ហើយដោយសារអ្នករាល់គ្នាបានជឿអ្វីៗដែលយើងបានប្រាប់ នោះអ្នករាល់គ្នាក៏នឹងនៅក្នុងចំណោមអ្នកទាំងនោះដែរ។
១១ ហេតុនោះ យើងតែងតែអធិដ្ឋានដើម្បីអ្នករាល់គ្នាជានិច្ច និងសូមឲ្យព្រះរបស់យើងចាត់ទុកអ្នករាល់គ្នាថាជាអ្នកដែលលោកសមនឹងហៅ+ ហើយដោយឫទ្ធានុភាពរបស់លោក សូមឲ្យលោកសម្រេចការល្អទាំងអស់ដែលលោកចង់ធ្វើចំពោះអ្នករាល់គ្នា ព្រមទាំងធ្វើឲ្យកិច្ចការដែលអ្នករាល់គ្នាធ្វើដោយជំនឿបានទទួលជោគជ័យ។ ១២ នេះគឺដើម្បីឲ្យនាមរបស់លោកយេស៊ូជាម្ចាស់របស់យើងទទួលការលើកតម្កើងតាមរយៈអ្នករាល់គ្នា ហើយឲ្យអ្នករាល់គ្នាទទួលសិរីរុងរឿងដោយរួបរួមជាមួយនឹងលោក ស្របតាមគុណដ៏វិសេសលើសលប់នៃព្រះរបស់យើងនិងលោកម្ចាស់យេស៊ូគ្រិស្ត។
២ ប៉ុន្តែ បងប្អូន បើនិយាយអំពីវត្តមាននៃលោកយេស៊ូគ្រិស្តជាម្ចាស់របស់យើង+ និងអំពីការប្រមូលយើងមកឯលោក+ យើងសុំអ្នករាល់គ្នា ២ កុំឲ្យការវែកញែករបស់អ្នករាល់គ្នាងាយរង្គោះរង្គើ ហើយកុំឆាប់ជ្រួលច្របល់ក្នុងចិត្ត ដោយសារមានការអះអាងថាថ្ងៃរបស់ព្រះយេហូវ៉ា*+បានមកដល់ហើយ ទោះជាការអះអាងនោះមកតាមរយៈទំនាយ*+ ពាក្យសម្ដី ឬសំបុត្រណាមួយដែលហាក់ដូចជាមកពីយើងក៏ដោយ។
៣ កុំឲ្យអ្នកណានាំអ្នករាល់គ្នាវង្វេងចេញឲ្យសោះ* ព្រោះទាល់តែមានការក្បត់ជំនឿ+ និងបុរសប្រឆាំងច្បាប់+ដែលជាកូននៃសេចក្ដីហិនវិនាសលេចមកជាមុនសិន ទើបថ្ងៃនោះមកដល់។+ ៤ អ្នកនោះជាអ្នកប្រឆាំង ហើយគាត់លើកតម្កើងខ្លួនខ្ពស់ជាងអស់អ្នកណាដែលគេហៅថាព្រះ ឬខ្ពស់ជាងអ្វីដែលមនុស្សគោរពបូជា។ ម្ល៉ោះហើយ អ្នកនោះអង្គុយក្នុងវិហាររបស់ព្រះ ដោយបង្ហាញជាសាធារណៈថាខ្លួនជាព្រះមួយរូប។ ៥ អ្នករាល់គ្នាចាំទេ ពេលដែលខ្ញុំនៅជាមួយ តើខ្ញុំមិនធ្លាប់ប្រាប់អ្នករាល់គ្នាអំពីការទាំងនេះទេឬ?
៦ ឥឡូវ អ្នករាល់គ្នាដឹងអំពីអ្វីដែលកំពុងឃាត់ឃាំងបុរសប្រឆាំងច្បាប់ ដើម្បីឲ្យអ្នកនោះត្រូវលេចមកនៅពេលកំណត់របស់ខ្លួន។ ៧ ពិតមែនតែអាថ៌កំបាំងអំពីការប្រឆាំងច្បាប់នេះកំពុងមានសកម្មភាព+ តែវានៅតែជាអាថ៌កំបាំង រហូតដល់លែងមានអ្នកឃាត់ឃាំងទៀត។ ៨ បន្ទាប់មក អ្នកប្រឆាំងច្បាប់នោះនឹងត្រូវបង្ហាញឲ្យឃើញ គឺអ្នកដែលលោកម្ចាស់យេស៊ូនឹងបំបាត់ចោលដោយឫទ្ធានុភាពដែលចេញពីមាត់លោក+ ហើយធ្វើឲ្យសាបសូន្យពេលដែលលោកមានវត្តមាន។+ ៩ ប៉ុន្តែ អ្នកប្រឆាំងច្បាប់នោះលេចមកតាមរយៈអំណាចរបស់សាថាន*+ ដោយធ្វើអព្ភូតហេតុជាច្រើន ធ្វើសញ្ញាសម្គាល់ក្លែងក្លាយ និងការអស្ចារ្យផ្សេងៗ+ ១០ ព្រមទាំងប្រើការមិនសុចរិតគ្រប់បែបយ៉ាង+ ដើម្បីបោកបញ្ឆោតពួកអ្នកដែលកំពុងវិនាស ទុកជាការសងសឹក ពីព្រោះពួកគេមិនព្រមស្រឡាញ់សេចក្ដីពិតដែលនាំឲ្យទទួលសេចក្ដីសង្គ្រោះទេ។ ១១ ហេតុនេះហើយបានជាព្រះអនុញ្ញាតឲ្យឥទ្ធិពលដែលបោកបញ្ឆោតមកបំភាន់ពួកគេ ដើម្បីឲ្យពួកគេជឿការភូតភរ។+ ១២ យ៉ាងនេះ ពួកគេទាំងអស់នឹងទទួលការវិនិច្ឆ័យទោស ព្រោះពួកគេមិនបានជឿសេចក្ដីពិតទេ តែបែរជាពេញចិត្តអ្វីដែលមិនសុចរិតទៅវិញ។
១៣ ប៉ុន្តែ បងប្អូនដែលព្រះយេហូវ៉ា*ស្រឡាញ់អើយ យើងមានភារកិច្ចអរគុណព្រះដើម្បីអ្នករាល់គ្នាជានិច្ច ពីព្រោះតាំងពីដំបូងព្រះបានជ្រើសរើសអ្នករាល់គ្នា+ឲ្យទទួលសេចក្ដីសង្គ្រោះ ដោយញែកអ្នករាល់គ្នាជាបរិសុទ្ធ+តាមរយៈឫទ្ធានុភាពរបស់លោក និងដោយសារជំនឿដែលអ្នករាល់គ្នាមានលើសេចក្ដីពិត។ ១៤ លោកបានហៅអ្នករាល់គ្នាក្នុងបំណងនេះ តាមរយៈដំណឹងល្អដែលយើងប្រកាស ដើម្បីឲ្យអ្នករាល់គ្នាទទួលសិរីរុងរឿងរបស់លោកយេស៊ូគ្រិស្តជាម្ចាស់របស់យើង។+ ១៥ ដូច្នេះ បងប្អូនអើយ ចូរកាន់ជំហរមាំមួន+ ហើយកាន់ខ្ជាប់តាមទំនៀមទម្លាប់ដែលអ្នករាល់គ្នាបានរៀន+ ទោះជាតាមរយៈពាក្យសម្ដី ឬសំបុត្ររបស់យើងក៏ដោយ។ ១៦ ម្យ៉ាងទៀត ព្រះដែលជាបិតារបស់យើង លោកស្រឡាញ់យើង+ ហើយដោយសារគុណដ៏វិសេសលើសលប់របស់លោក លោកបានផ្ដល់ឲ្យយើងនូវការសម្រាលទុក្ខជារៀងរហូតនិងសេចក្ដីសង្ឃឹមដ៏អស្ចារ្យ។+ យើងអធិដ្ឋានសូមឲ្យព្រះនិងលោកយេស៊ូគ្រិស្តជាម្ចាស់របស់យើង ១៧ សម្រាលទុក្ខអ្នករាល់គ្នា ហើយធ្វើឲ្យអ្នករាល់គ្នាមាំមួនឡើង ដើម្បីឲ្យអ្នករាល់គ្នាតែងតែមានពាក្យសម្ដីល្អ និងការប្រព្រឹត្តល្អជានិច្ច។
៣ ក្រោយបង្អស់ បងប្អូនអើយ ចូរបន្តអធិដ្ឋានឲ្យយើង+ ដើម្បីឲ្យបណ្ដាំរបស់ព្រះយេហូវ៉ា*បន្តផ្សាយចេញយ៉ាងលឿន+ ហើយឲ្យបណ្ដាំនោះទទួលការលើកតម្កើង ដូចដែលកំពុងទទួលការលើកតម្កើងពីចំណោមអ្នករាល់គ្នា។ ២ ចូរបន្តអធិដ្ឋានឲ្យយើងបានរួចពីមនុស្សអាក្រក់និងមនុស្សទុច្ចរិត+ ព្រោះមិនមែនមនុស្សទាំងអស់មានជំនឿទេ។+ ៣ ប៉ុន្តែ លោកម្ចាស់គឺស្មោះត្រង់ ហើយលោកនឹងធ្វើឲ្យអ្នករាល់គ្នាមាំមួន ព្រមទាំងការពារអ្នករាល់គ្នាពីមេកំណាច។ ៤ បន្ថែមទៅទៀត ក្នុងនាមជាអ្នកកាន់តាមលោកម្ចាស់ យើងជឿជាក់ថាអ្នករាល់គ្នាកំពុងធ្វើអ្វីដែលយើងបានបង្គាប់ ហើយនឹងធ្វើការទាំងនោះតទៅទៀត។ ៥ សូមឲ្យលោកម្ចាស់បន្តដឹកនាំចិត្តរបស់អ្នករាល់គ្នាឲ្យស្រឡាញ់ព្រះជានិច្ច+ និងឲ្យស៊ូទ្រាំ+ដើម្បីបន្តកាន់តាមគ្រិស្ត។
៦ បងប្អូនអើយ ក្នុងនាមលោកម្ចាស់យេស៊ូគ្រិស្ត យើងបង្គាប់អ្នករាល់គ្នាឲ្យដកខ្លួនចេញពីបងប្អូនណាដែលមានរបៀបរស់នៅខុសគន្លង+ និងដែលមានការប្រព្រឹត្តមិនស្របតាមបង្គាប់*ដែលអ្នករាល់គ្នា*បានទទួលពីយើង។+ ៧ ព្រោះអ្នករាល់គ្នាដឹងរបៀបដែលអ្នករាល់គ្នាត្រូវយកតម្រាប់យើង+ ពីព្រោះយើងមិនបានប្រព្រឹត្តខុសគន្លងក្នុងចំណោមអ្នករាល់គ្នាទេ។ ៨ យើងក៏មិនបានបរិភោគអាហាររបស់អ្នកណាដោយទទេ*ដែរ។+ ផ្ទុយទៅវិញ យើងបានធ្វើការយ៉ាងនឿយហត់ទាំងយប់ទាំងថ្ងៃ ដើម្បីកុំឲ្យអ្នករាល់គ្នាណាម្នាក់ត្រូវចំណាយប្រាក់ច្រើនមកលើយើង។+ ៩ នេះមិនមែនដោយសារយើងគ្មានសិទ្ធិសុំជំនួយពីអ្នករាល់គ្នាទេ+ តែយើងចង់ទុកគំរូឲ្យអ្នករាល់គ្នាធ្វើតាម។+ ១០ តាមការពិតពេលដែលយើងនៅជាមួយនឹងអ្នករាល់គ្នា យើងតែងបង្គាប់ដូច្នេះថា៖ «ប្រសិនបើអ្នកណាមិនចង់ធ្វើការ មិនត្រូវឲ្យអ្នកនោះបរិភោគឡើយ»។+ ១១ ព្រោះយើងឮថា ក្នុងចំណោមអ្នករាល់គ្នា មានអ្នកខ្លះមានរបៀបរស់នៅខុសគន្លង+ ពួកគេមិនធ្វើការសោះ ប៉ុន្តែចេះតែជ្រៀតជ្រែកក្នុងរឿងដែលមិនទាក់ទងនឹងពួកគេទៅវិញ។+ ១២ យើងបង្គាប់និងដាស់តឿនពួកមនុស្សបែបនោះក្នុងនាមលោកម្ចាស់យេស៊ូគ្រិស្តថា ពួកគេត្រូវធ្វើការដោយស្ងប់ស្ងាត់ ហើយបរិភោគអាហារដែលបានមកពីការខំប្រឹងរបស់ខ្លួន។+
១៣ ចំណែកអ្នករាល់គ្នាវិញ បងប្អូនអើយ កុំឈប់តស៊ូធ្វើអ្វីដែលត្រឹមត្រូវឡើយ។ ១៤ ប៉ុន្តែ ប្រសិនបើមានអ្នកណាមិនធ្វើតាមពាក្យរបស់យើងក្នុងសំបុត្រនេះ ចូរចំណាំអ្នកនោះទុក ហើយឈប់សេពគប់គាត់+ ដើម្បីឲ្យគាត់អៀនខ្មាស។ ១៥ ទោះជាយ៉ាងនោះក៏ដោយ កុំចាត់ទុកគាត់ជាសត្រូវ តែចូរបន្តដាស់តឿនគាត់+ក្នុងនាមជាបងប្អូនវិញ។
១៦ សូមឲ្យលោកម្ចាស់នៃសេចក្ដីសុខសាន្ត ផ្ដល់សេចក្ដីសុខសាន្តដល់អ្នករាល់គ្នាក្នុងគ្រប់ការទាំងអស់។+ សូមឲ្យលោកម្ចាស់នៅជាមួយនឹងអ្នករាល់គ្នា។
១៧ ខ្ញុំ ប៉ូល សរសេរពាក្យសួរសុខទុក្ខនេះដោយផ្ទាល់ដៃ+ នេះជាអក្សរដែលសម្គាល់គ្រប់សំបុត្រទាំងអស់របស់ខ្ញុំ។ នេះជារបៀបដែលខ្ញុំសរសេរ។
១៨ សូមឲ្យគុណដ៏វិសេសលើសលប់របស់លោកយេស៊ូគ្រិស្តជាម្ចាស់របស់យើង នៅជាមួយនឹងអ្នករាល់គ្នា។
ក៏មានឈ្មោះថាស៊ីឡាសដែរ
មើលនិយមន័យពាក្យ«គ្រិស្ត»
ឬ«សេចក្ដីវេទនា»
មើលសេចក្ដីពន្យល់បន្ថែម ផ្នែកក៥
ឬ«បណ្ដាំ»
ឬ«កុំឲ្យអ្នកណាល្បួងលួងលោមអ្នករាល់គ្នាឲ្យសោះ»
ភាសាក្រិច«សាថាណាស»មានន័យថា«អ្នកប្រឆាំង»ឬ«សត្រូវ»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬ«ទំនៀមទម្លាប់»
ឬប្រហែលជាមានន័យថា«ពួកគេ»
ឬ«ដោយមិនបង់ប្រាក់»