ជូនចំពោះទីតុស
១ ពីខ្ញុំ ប៉ូល ជាខ្ញុំបម្រើរបស់ព្រះនិងជាសាវ័ក*របស់លោកយេស៊ូគ្រិស្ត* ស្របតាមជំនឿរបស់ពួកអ្នកដែលព្រះបានជ្រើសរើស និងស្របតាមចំណេះត្រឹមត្រូវអំពីសេចក្ដីពិតដែលសមស្របនឹងភក្ដីភាពចំពោះព្រះ ២ ហើយអ្វីទាំងអស់នេះមានមូលដ្ឋានលើសេចក្ដីសង្ឃឹមឲ្យបានជីវិតគ្មានទីបញ្ចប់+ ដែលព្រះបានសន្យាតាំងពីយូរយារមកហើយ លោកមិនអាចកុហកឡើយ។+ ៣ ប៉ុន្តែ នៅពេលកំណត់របស់លោក លោកបានបើកបង្ហាញបណ្ដាំរបស់លោកតាមរយៈកិច្ចផ្សព្វផ្សាយដែលបានត្រូវផ្ញើទុកនឹងខ្ញុំ+ ស្របតាមបង្គាប់របស់ព្រះដែលជាអ្នកសង្គ្រោះយើង។ ៤ ជូនចំពោះទីតុស ជាកូនពិតប្រាកដដែលរួមជំនឿជាមួយនឹងខ្ញុំ៖
សូមឲ្យអ្នកបានប្រកបដោយគុណដ៏វិសេសលើសលប់ និងសេចក្ដីសុខសាន្តពីព្រះដែលជាបិតា ព្រមទាំងពីគ្រិស្តយេស៊ូដែលជាអ្នកសង្គ្រោះយើង។
៥ ខ្ញុំបានទុកអ្នកនៅកោះក្រេត ដើម្បីឲ្យអ្នកកែតម្រូវអ្វីដែលខុស* ហើយតែងតាំងអ្នកចាស់ទុំនៅក្រុងនីមួយៗ ដូចខ្ញុំបានបង្គាប់អ្នកដូចតទៅ៖ ៦ បុរសដែលអាចធ្វើជាអ្នកចាស់ទុំ ត្រូវជាអ្នកដែលគ្មានកន្លែងចាប់កំហុស មានប្រពន្ធតែមួយ មានកូនដែលមិនបះបោរប្រឆាំង និងជាអ្នកជឿដែលគ្មានអ្នកណាចោទប្រកាន់ថាជាអ្នកប្រព្រឹត្តអំពើអបាយមុខ។+ ៧ ព្រោះក្នុងនាមជាអ្នកចាត់ចែង*របស់ព្រះ អ្នកចាស់ទុំ*ត្រូវគ្មានកន្លែងចាប់កំហុស មិនប្រកាន់គំនិតខ្លួន+ មិនឆាប់ខឹង+ មិនមែនជាអ្នកប្រមឹកស្រា មិនមែនជាមនុស្សឃោរឃៅ* មិនលោភលន់ដោយរកតែប្រយោជន៍ផ្ទាល់ខ្លួន ៨ តែចេះទទួលអ្នកឯទៀតដោយរាក់ទាក់+ ស្រឡាញ់គុណធម៌ ដឹងខុសត្រូវ*+ ជាមនុស្សសុចរិត មានភក្ដីភាព+ ចេះទប់ចិត្ត+ ៩ និងកាន់ខ្ជាប់តាមបណ្ដាំដ៏គួរឲ្យទុកចិត្តក្នុងរបៀបដែលគាត់បង្រៀន+ ដើម្បីគាត់អាចលើកទឹកចិត្ត*អ្នកឯទៀតតាមរយៈសេចក្ដីបង្រៀនដែលមានប្រយោជន៍+ ព្រមទាំងកែតម្រង់+អស់អ្នកដែលនិយាយប្រឆាំងសេចក្ដីបង្រៀនទាំងនោះ។
១០ ព្រោះមានបុរសជាច្រើនជាអ្នកបះបោរប្រឆាំង ជាអ្នកនិយាយឥតប្រយោជន៍ និងជាអ្នកបោកបញ្ឆោត ជាពិសេសគឺអស់អ្នកដែលកាន់ខ្ជាប់ការកាត់ចុងស្បែក។*+ ១១ គឺចាំបាច់ត្រូវបិទមាត់បុរសទាំងនោះ ព្រោះពួកគេចេះតែបំផ្លាញជំនឿបងប្អូនទាំងគ្រួសារៗ ដោយបង្រៀនសេចក្ដីដែលមិនគួរបង្រៀន ដើម្បីទទួលប្រយោជន៍ផ្ទាល់ខ្លួនតាមរបៀបមិនទៀងត្រង់។ ១២ អ្នកប្រកាសទំនាយម្នាក់ដែលជាជនរួមជាតិរបស់ពួកគេ បាននិយាយថា៖ «អ្នកកោះក្រេតសុទ្ធតែជាអ្នកភូតភរ ជាសត្វព្រៃដ៏សាហាវ និងជាអ្នកល្មោភស៊ីដែលមិនធ្វើការអ្វីសោះ»។
១៣ នេះជាការបញ្ជាក់ដ៏ពិតត្រង់។ ហេតុនេះ ចូរបន្តប្រដៅតម្រង់ពួកគេយ៉ាងម៉ឺងម៉ាត់ ដើម្បីពួកគេអាចមានជំនឿមាំមួន ១៤ ដោយមិនស្ដាប់រឿងព្រេងរបស់ជនជាតិយូដា និងមិនស្ដាប់បញ្ញត្ដិរបស់មនុស្សដែលបែរចេញពីសេចក្ដីពិតឡើយ។ ១៥ អ្វីៗទាំងអស់គឺស្អាតបរិសុទ្ធចំពោះមនុស្សដែលស្អាតបរិសុទ្ធ។+ ក៏ប៉ុន្តែ ចំពោះមនុស្សដែលមិនស្អាតបរិសុទ្ធ*និងគ្មានជំនឿ អ្វីៗទាំងអស់គឺមិនស្អាតបរិសុទ្ធទេ ព្រោះទាំងគំនិតទាំងសមត្ថភាពវិនិច្ឆ័យរបស់ពួកគេ សុទ្ធតែស្មោកគ្រោក។+ ១៦ ពួកគេប្រកាសជាសាធារណៈថាពួកគេស្គាល់ព្រះ តែការប្រព្រឹត្តរបស់ពួកគេបង្ហាញថាពួកគេមិនទទួលស្គាល់ព្រះទេ+ ពីព្រោះពួកគេជាមនុស្សគួរឲ្យស្អប់ខ្ពើម មិនស្ដាប់បង្គាប់ ហើយមិនសមនឹងការល្អណាមួយសោះឡើយ។
២ ចំណែកអ្នកវិញ ចូរបន្តនិយាយអ្វីដែលស្របតាមសេចក្ដីបង្រៀនដែលមានប្រយោជន៍។+ ២ បុរសវ័យចាស់ត្រូវចេះប្រមាណខ្លួន ត្រូវមានចិត្តគំនិតនឹងធឹង ដឹងខុសត្រូវ មានជំនឿមាំមួន មានសេចក្ដីស្រឡាញ់យ៉ាងខ្លាំង និងចេះស៊ូទ្រាំ។ ៣ ដូចគ្នាដែរ ស្ត្រីវ័យចាស់ត្រូវមានការប្រព្រឹត្តដែលលើកកិត្តិយសព្រះ មិននិយាយបង្កាច់បង្ខូច និងមិនញៀនស្រា តែជាអ្នកបង្រៀនអំពីអ្វីដែលល្អ ៤ ដើម្បីអាចផ្ដល់ឱវាទដល់*ស្ត្រីវ័យក្មេងឲ្យស្រឡាញ់ប្ដី ស្រឡាញ់កូន ៥ ឲ្យធ្វើជាមនុស្សបរិសុទ្ធ ដឹងខុសត្រូវ ឧស្សាហ៍ធ្វើកិច្ចការផ្ទះ ចិត្តល្អ ហើយចុះចូលនឹងប្ដីខ្លួន+ ដើម្បីកុំឲ្យអ្នកណានិយាយប្រមាថបណ្ដាំរបស់ព្រះ។
៦ ស្រដៀងគ្នាដែរ ចូរបន្តជំរុញចិត្តបុរសវ័យក្មេងឲ្យដឹងខុសត្រូវ+ ៧ ហើយចូរទុកគំរូដោយប្រព្រឹត្តល្អក្នុងគ្រប់ការទាំងអស់។ ចូរបង្រៀនអ្វីដែលបរិសុទ្ធ* ដោយមានចិត្តគំនិតនឹងធឹងគ្រប់ជំពូក។+ ៨ ចូរពោលតែសម្ដីល្អៗដែលគេមិនអាចរិះគន់+ ដើម្បីធ្វើឲ្យពួកអ្នកប្រឆាំងអៀនខ្មាស ព្រោះមិនអាចនិយាយអាក្រក់អំពីយើងបាន។+ ៩ ចូរឲ្យពួកខ្ញុំបម្រើចុះចូលនឹងម្ចាស់ខ្លួនក្នុងគ្រប់ការទាំងអស់+ ដោយព្យាយាមធ្វើឲ្យម្ចាស់ពេញចិត្ត ហើយមិនត្រូវតមាត់ឡើយ ១០ ក៏មិនត្រូវលួចពីម្ចាស់ដែរ+ តែត្រូវបង្ហាញថាខ្លួនគួរឲ្យទុកចិត្តទាំងស្រុង ដើម្បីធ្វើឲ្យសេចក្ដីបង្រៀនរបស់ព្រះជាអ្នកសង្គ្រោះយើង ទាក់ទាញចិត្តមនុស្សកាន់តែខ្លាំង។+
១១ ព្រោះគុណដ៏វិសេសលើសលប់របស់ព្រះបានត្រូវសឲ្យឃើញ ហើយនាំមនុស្សគ្រប់ប្រភេទឲ្យទទួលសេចក្ដីសង្គ្រោះ។+ ១២ គុណដ៏វិសេសលើសលប់នោះបានបង្រៀនយើងឲ្យបដិសេធអ្វីៗទាំងអស់ដែលខុសពីបំណងប្រាថ្នារបស់ព្រះ និងឲ្យបដិសេធសេចក្ដីប៉ងប្រាថ្នារបស់ពិភពលោកនេះ+ ហើយរស់នៅដោយដឹងខុសត្រូវ ដោយសេចក្ដីសុចរិត និងដោយមានភក្ដីភាពចំពោះព្រះក្នុងរបៀបរបបពិភពលោក*នេះ+ ១៣ កាលដែលយើងរង់ចាំសេចក្ដីសង្ឃឹមដ៏សប្បាយ+ និងការលេចមកដែលប្រកបដោយសិរីរុងរឿងរបស់ព្រះដ៏ឧត្ដុង្គឧត្ដមនិងយេស៊ូគ្រិស្តជាអ្នកសង្គ្រោះយើង ១៤ គឺលោកដែលបានប្រគល់ខ្លួន+ដើម្បីរំដោះយើង+ឲ្យរួចពីការប្រឆាំងច្បាប់គ្រប់បែបយ៉ាង ហើយសម្អាតយើងឲ្យធ្វើជារាស្ដ្រនិងជាទ្រព្យវិសេសរបស់លោកផ្ទាល់ ពោលគឺរាស្ដ្រដែលខ្នះខ្នែងធ្វើការដ៏ល្អប្រសើរ។+
១៥ ចូរបន្តនិយាយការទាំងនេះ ព្រមទាំងដាស់តឿន* និងកែតម្រង់ ដោយប្រើអំណាចរបស់អ្នកយ៉ាងពេញលេញ។+ កុំឲ្យអ្នកណាមើលងាយអ្នកឡើយ។
៣ ចូរបន្តរំលឹកពួកគេឲ្យចុះចូលស្ដាប់បង្គាប់រដ្ឋាភិបាលនិងពួកអាជ្ញាធរ+ ហើយប្រុងប្រៀបធ្វើការល្អគ្រប់យ៉ាង ២ មិនត្រូវនិយាយអាក្រក់អំពីអ្នកឯទៀត មិនត្រូវធ្វើជាមនុស្សដែលចូលចិត្តឈ្លោះប្រកែក តែត្រូវធ្វើជាមនុស្សសមហេតុសមផល+ ហើយបង្ហាញចិត្តស្លូតបូតជានិច្ចចំពោះមនុស្សទាំងអស់។+ ៣ ព្រោះយើងធ្លាប់ជាមនុស្សមិនចេះគិតពិចារណា មិនស្ដាប់បង្គាប់ ត្រូវគេបំភាន់ ក៏ធ្លាប់ជាខ្ញុំបម្រើនៃសេចក្ដីប៉ងប្រាថ្នាផ្សេងៗនិងការសប្បាយឥតបើគិត ថែមទាំងបានប្រព្រឹត្តអំពើអាក្រក់ ច្រណែនឈ្នានីស និងជាមនុស្សដែលគួរឲ្យស្អប់ខ្ពើម ហើយក៏ធ្លាប់ស្អប់គ្នាដែរ។
៤ ក៏ប៉ុន្តែ ព្រះជាអ្នកសង្គ្រោះយើងបានបង្ហាញសេចក្ដីសប្បុរស+និងសេចក្ដីស្រឡាញ់ចំពោះមនុស្ស ៥ (មិនមែនដោយសារយើងបានប្រព្រឹត្តសុចរិតទេ+ តែដោយសារលោកមានសេចក្ដីមេត្តាករុណា)។+ លោកបានសង្គ្រោះយើង តាមរយៈការលាងសម្អាតដើម្បីឲ្យយើងមានជីវិតឡើងវិញ+ និងដោយបង្កើតយើងជាថ្មីតាមរយៈឫទ្ធានុភាពបរិសុទ្ធ។+ ៦ លោកបានចាក់ឫទ្ធានុភាពនេះមកលើយើងយ៉ាងបរិបូរ* តាមរយៈលោកយេស៊ូគ្រិស្តជាអ្នកសង្គ្រោះយើង+ ៧ ដើម្បីឲ្យយើងទៅជាអ្នកទទួលមត៌ក+ សមស្របតាមសេចក្ដីសង្ឃឹមឲ្យបានជីវិតដែលគ្មានទីបញ្ចប់+ ក្រោយពីយើងបានត្រូវប្រកាសថាជាមនុស្សសុចរិតដោយគុណដ៏វិសេសលើសលប់របស់លោក។+
៨ ពាក្យទាំងនេះជាពាក្យពិត ហើយខ្ញុំចង់ឲ្យអ្នកបន្តលើកបញ្ជាក់អំពីរឿងទាំងនេះ ដើម្បីឲ្យអស់អ្នកដែលជឿព្រះ ផ្ដោតអារម្មណ៍ទៅលើការប្រព្រឹត្តល្អប្រសើរជានិច្ច។ អ្វីៗទាំងនោះគឺល្អប្រសើរ ហើយមានប្រយោជន៍ចំពោះមនុស្ស។
៩ ប៉ុន្តែ ចូរជៀសចេញពីការជជែកតវ៉ាផ្ដេសផ្ដាស ការស្រាវជ្រាវអំពីពង្សាវតារ ការទាស់ទែងគ្នា និងការឈ្លោះប្រកែកគ្នាអំពីច្បាប់ ព្រោះការទាំងនោះគ្មានប្រយោជន៍ ហើយឥតខ្លឹមសារ។+ ១០ រីឯបុរសណាដែលផ្សាយសេចក្ដីបង្រៀនមិនពិត+ ចូរឈប់សេពគប់គាត់+ បន្ទាប់ពីបានដាស់តឿន*គាត់អស់ពីរដង+ ១១ ព្រោះអ្នកដឹងថាបុរសបែបនោះបានបែរចេញពីផ្លូវត្រឹមត្រូវ ទៅធ្វើអំពើខុសឆ្គង ហើយកំហុសរបស់គាត់កំពុងផ្ដន្ទាទោសគាត់។
១២ ពេលដែលខ្ញុំចាត់អាតេម៉ាស ឬទីឃីកុស+ឲ្យទៅឯអ្នក ចូរអ្នកខំអស់ពីសមត្ថភាពដើម្បីមកឯខ្ញុំនៅក្រុងនីកូពើលិស ព្រោះខ្ញុំបានសម្រេចចិត្តស្នាក់នៅទីនោះក្នុងអំឡុងរដូវត្រជាក់។ ១៣ ចូរយកចិត្តទុកដាក់ផ្គត់ផ្គង់អាប៉ូឡុសនិងសេណាសដែលជាអ្នកចេះច្បាប់ស្ទាត់ ដើម្បីកុំឲ្យពួកគាត់ខ្វះអ្វីឡើយពេលធ្វើដំណើរ។+ ១៤ ប៉ុន្តែ បងប្អូនរបស់យើងក៏ត្រូវបន្តរៀនធ្វើការល្អប្រសើរជានិច្ចដែរ ដើម្បីបំពេញសេចក្ដីត្រូវការជាបន្ទាន់របស់អ្នកឯទៀត+ ប្រយោជន៍ឲ្យបងប្អូនអាចបង្កើតផលក្នុងកិច្ចបម្រើ។+
១៥ អស់អ្នកដែលនៅជាមួយនឹងខ្ញុំ ផ្ដាំសួរសុខទុក្ខ។ សូមសួរសុខទុក្ខពួកអ្នករួមជំនឿដែលស្រឡាញ់យើង។
សូមឲ្យអ្នកទាំងអស់គ្នាប្រកបដោយគុណដ៏វិសេសលើសលប់របស់ព្រះ។
ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
មើលនិយមន័យពាក្យ«គ្រិស្ត»
ឬ«អ្វីដែលខ្វះខាត»
ឬ«អ្នកចាត់ចែងកិច្ចការផ្ទះ»
ឬ«អ្នកត្រួតពិនិត្យ»
ឬ«អ្នកវាយតប់»
ឬ«ដោយចេះគិតពិចារណា» ឬ«ដោយមានគំនិតសមហេតុសមផល»
ឬ«ដាស់តឿន»
មើលនិយមន័យពាក្យ«ការកាត់ចុងស្បែក»
ឬ«ស្មោកគ្រោក»
ឬ«អាចបង្រៀនដល់»
ឬប្រហែលជាមានន័យថា«បង្រៀនដោយសេចក្ដីបរិសុទ្ធ»
មើលនិយមន័យពាក្យ«របៀបរបបពិភពលោក»
ឬ«លើកទឹកចិត្ត»
ឬ«ដោយចិត្តទូលាយ»
ឬ«ព្រមាន»