ជូនចំពោះគ្រិស្តសាសនិកជនជាតិហេប្រឺ
១ នៅអតីតកាល ព្រះធ្លាប់មានប្រសាសន៍ទៅពួកបុព្វបុរសរបស់យើងជាច្រើនលើកនិងច្រើនវិធី តាមរយៈពួកអ្នកប្រកាសទំនាយ។+ ២ នៅចុងបញ្ចប់នៃគ្រានេះ ព្រះបានមានប្រសាសន៍មកយើងតាមរយៈបុត្ររបស់លោក+ ដែលលោកបានតែងតាំងឲ្យទទួលអ្វីៗទាំងអស់ជាមត៌ក+ ហើយតាមរយៈបុត្រនោះ លោកបានបង្កើតអ្វីៗក្នុងសកលលោក។*+ ៣ បុត្រនោះបង្ហាញឲ្យឃើញយ៉ាងល្អឥតខ្ចោះនូវសិរីរុងរឿងរបស់ព្រះ+ ហើយក៏មានបុគ្គលិកលក្ខណៈដូចព្រះទាំងស្រុង។+ បុត្រនោះទ្រទ្រង់អ្វីៗទាំងអស់ដោយប្រសាសន៍ដ៏មានឫទ្ធានុភាពរបស់លោក ហើយបានអង្គុយនៅខាងស្ដាំនៃព្រះដ៏ឧត្ដុង្គឧត្ដមនៅស្ថានសួគ៌+ បន្ទាប់ពីបានជម្រះយើងឲ្យស្អាតបរិសុទ្ធពីការខុសឆ្គង*របស់យើង។+ ៤ ដូច្នេះ លោកបានទៅជាខ្ពង់ខ្ពស់ជាងបណ្ដាទេវតា+ ពីព្រោះលោកបានទទួលមត៌ក ជានាមដ៏ប្រសើរជាងនាមរបស់ពួកគេ។+
៥ ជាឧទាហរណ៍ តើព្រះធ្លាប់មានប្រសាសន៍ទៅទេវតាណាផ្សេងទៀតឬទេថា៖ «អ្នកជាបុត្ររបស់ខ្ញុំ ហើយចាប់ពីថ្ងៃនេះទៅ ខ្ញុំជាបិតារបស់អ្នក»+ ឬថា៖ «ខ្ញុំនឹងទៅជាបិតារបស់គាត់ ហើយគាត់នឹងទៅជាបុត្ររបស់ខ្ញុំ»?+ ៦ ប៉ុន្តែ ពេលដែលព្រះចាត់បុត្រច្បងរបស់លោក+ឲ្យមកឯពិភពលោក*ម្ដងទៀត លោកមានប្រសាសន៍ថា៖ «ចូរឲ្យទេវតាទាំងអស់របស់ព្រះលំឱនកាយគោរពលោក»។
៧ ម្យ៉ាងទៀត លោកមានប្រសាសន៍អំពីបណ្ដាទេវតាថា៖ «លោកធ្វើឲ្យពួកទេវតារបស់លោកមានឫទ្ធានុភាពខ្លាំងក្លា* ហើយធ្វើឲ្យពួកអ្នកបម្រើ*+របស់លោកទៅជាអណ្ដាតភ្លើង»។+ ៨ ប៉ុន្តែ លោកមានប្រសាសន៍អំពីបុត្រនោះថា៖ «ព្រះជាបល្ល័ង្ករបស់អ្នក+ជារៀងរហូតតទៅ ហើយដំបងរាជ្យនៃរាជាណាចក្ររបស់អ្នក ជាដំបងរាជ្យនៃសេចក្ដីទៀងត្រង់។* ៩ អ្នកបានស្រឡាញ់សេចក្ដីសុចរិត ហើយបានស្អប់ការប្រឆាំងច្បាប់។ ហេតុនេះ ព្រះដែលជាព្រះរបស់អ្នក បានរើសតាំងអ្នក+ដោយចាក់ប្រេងនៃអំណរឲ្យអ្នកច្រើនជាងស្ដេចឯទៀត»*+ ១០ ហើយក៏ចែងដែរថា៖ «លោកម្ចាស់អើយ នៅដើមដំបូងលោកបានដាក់គ្រឹះផែនដី ហើយលោកក៏បានបង្កើតមេឃដែរ។ ១១ អ្វីទាំងនោះនឹងកន្លងបាត់ទៅ តែលោកនឹងស្ថិតស្ថេរនៅ។ អ្វីទាំងនោះនឹងសឹកដាចអស់ទៅប្រៀបដូចជាសម្លៀកបំពាក់ ១២ ហើយលោកនឹងមូរអ្វីៗទាំងអស់នោះដូចមូរសំពត់ដណ្ដប់ ហើយអ្វីៗទាំងអស់នោះនឹងត្រូវផ្លាស់ដូចជាផ្លាស់សម្លៀកបំពាក់។ ប៉ុន្តែ លោកនៅតែដូចដើម ហើយជីវិតរបស់លោកគ្មានទីបញ្ចប់ឡើយ»។+
១៣ ប៉ុន្តែ តើព្រះធ្លាប់មានប្រសាសន៍ទៅទេវតាណាផ្សេងទៀតឬទេថា៖ «ចូរអង្គុយនៅខាងស្ដាំដៃខ្ញុំ រហូតដល់ខ្ញុំដាក់ពួកសត្រូវរបស់អ្នកជាកំណល់កល់ជើងអ្នក»?+ ១៤ ទេវតាទាំងឡាយសុទ្ធតែជាវិញ្ញាណ ហើយពួកគេជាអ្នកបម្រើព្រះ។+ ព្រះចាត់ពួកគេឲ្យមកបម្រើអស់អ្នកដែលលោកនឹងសង្គ្រោះ។
២ ហេតុនេះ យើងត្រូវតែយកចិត្តទុកដាក់ឲ្យបានច្រើនជាងធម្មតាចំពោះអ្វីដែលយើងបានឮ+ ដើម្បីកុំឲ្យយើងរសាត់ចេញពីជំនឿ។+ ២ ព្រោះប្រសិនបើប្រសាសន៍របស់ព្រះដែលបានត្រូវថ្លែងប្រាប់តាមរយៈពួកទេវតា+ គឺជាការពិត ហើយបើអ្នកដែលប្រព្រឹត្តអំពើរំលងនិងអ្នកដែលមិនស្ដាប់បង្គាប់ បានទទួលទោសស្របតាមយុត្តិធម៌+ ៣ នោះតើយើងអាចគេចផុតពីទោសយ៉ាងដូចម្ដេច ប្រសិនបើយើងមិនអើពើចំពោះសេចក្ដីសង្គ្រោះដ៏អស្ចារ្យនេះ?+ ព្រោះលោកម្ចាស់របស់យើងជាអ្នកមានប្រសាសន៍មុនគេអំពីសេចក្ដីសង្គ្រោះនោះ+ ហើយពួកអ្នកដែលបានឮពីលោក ក៏បានបញ្ជាក់ឲ្យយើងដឹងថាការនោះគឺពិតមែន ៤ ពេលដែលព្រះបានចូលរួមធ្វើជាសាក្សីដោយធ្វើសញ្ញាសម្គាល់ ការអស្ចារ្យ និងការដែលប្រកបដោយឫទ្ធានុភាព+ ព្រមទាំងចែកចាយឫទ្ធានុភាពបរិសុទ្ធតាមបំណងប្រាថ្នារបស់លោក។+
៥ ព្រោះព្រះមិនបានឲ្យពួកទេវតាគ្រប់គ្រងពិភពលោក*ដែលនឹងមកនៅថ្ងៃមុខ+ ដែលយើងកំពុងរៀបរាប់ទេ។ ៦ ប៉ុន្តែ សាក្សីម្នាក់បានសរសេរថា៖ «តើមនុស្សជាអ្វីបានជាលោកត្រូវគិតដល់? ហើយតើកូនមនុស្សជាអ្នកណាបានជាលោកត្រូវថែរក្សា?+ ៧ លោកបានឲ្យគាត់តូចទាបជាងបណ្ដាទេវតាតែបន្តិចប៉ុណ្ណោះ ថែមទាំងឲ្យគាត់មានកិត្តិយសនិងសិរីរុងរឿងទៀតផង ហើយលោកបានតែងតាំងគាត់ឲ្យមើលការខុសត្រូវលើស្នាដៃរបស់លោក។ ៨ លោកបានដាក់អ្វីៗទាំងអស់ឲ្យចុះចូលនៅក្រោមបាតជើងគាត់»។+ ដោយសារព្រះដាក់អ្វីៗទាំងអស់ឲ្យចុះចូលនឹងបុត្រលោក+ នោះគ្មានអ្វីដែលមិនចុះចូលនឹងបុត្រលោកឡើយ។+ ក៏ប៉ុន្តែ ឥឡូវនេះយើងមិនទាន់ឃើញអ្វីៗទាំងអស់ចុះចូលនឹងបុត្រលោកទេ។+ ៩ ប៉ុន្តែ យើងឃើញលោកយេស៊ូ ដែលបានត្រូវធ្វើឲ្យតូចទាបជាងបណ្ដាទេវតាបន្តិច+ ក៏បានទទួលសិរីរុងរឿងនិងកិត្តិយសទុកជាមកុដ ពីព្រោះលោកបានរងការឈឺចាប់រហូតដល់ស្លាប់+ ដើម្បីលោកអាចឆ្លងកាត់សេចក្ដីស្លាប់ជាប្រយោជន៍ដល់មនុស្សគ្រប់រូប ដោយសារគុណដ៏វិសេសលើសលប់របស់ព្រះ។+
១០ អ្វីៗទាំងអស់គឺមាននៅដើម្បីព្រះ ហើយអ្វីៗទាំងអស់គឺមាននៅដោយសារព្រះ។ ព្រះចង់ឲ្យកូនជាច្រើនមានសិរីរុងរឿង+ ដូច្នេះជាការសមរម្យដែលព្រះអនុញ្ញាតឲ្យមេដឹកនាំរងទុក្ខលំបាក+ ដើម្បីឲ្យមេដឹកនាំមានលក្ខណៈគ្រប់គ្រាន់ក្នុងការសង្គ្រោះពួកគេ។+ ១១ ព្រោះទាំងលោកដែលធ្វើឲ្យបរិសុទ្ធ ទាំងពួកអ្នកដែលទៅជាបរិសុទ្ធ+ មានបិតាតែមួយ។+ ហេតុនេះ លោកមិនខ្មាសក្នុងការហៅពួកគាត់ថាបងប្អូនទេ+ ១២ ដូចលោកមានប្រសាសន៍ថា៖ «ខ្ញុំនឹងប្រកាសប្រាប់បងប្អូនខ្ញុំឲ្យស្គាល់នាមរបស់លោក។ ខ្ញុំនឹងច្រៀងសរសើរលោកនៅក្នុងក្រុមជំនុំ»។+ ១៣ លោកក៏មានប្រសាសន៍ដែរថា៖ «ខ្ញុំនឹងទុកចិត្តលោក»+ ហើយមានប្រសាសន៍ទៀតថា៖ «មើល! ខ្ញុំនិងកូនតូចៗ ដែលព្រះយេហូវ៉ា*បានប្រគល់ឲ្យខ្ញុំ»។+
១៤ ដូច្នេះ ដោយសារ«កូនតូចៗ»ជាសាច់ឈាម នោះលោកក៏បានក្លាយទៅជាសាច់ឈាមដែរ+ ដើម្បីតាមរយៈសេចក្ដីស្លាប់របស់លោក លោកអាចបំផ្លាញចោលអ្នកដែលមានសមត្ថភាពបណ្ដាលឲ្យស្លាប់+ ពោលគឺមេកំណាច*+ ១៥ ហើយដើម្បីលោកអាចរំដោះអស់អ្នកដែលជាខ្ញុំបម្រើអស់មួយជីវិតដោយសារខ្លាចសេចក្ដីស្លាប់។+ ១៦ ព្រោះតាមការពិតលោកមិនមែនជួយពួកទេវតាទេ តែលោកកំពុងជួយកូនចៅ*របស់អាប្រាហាំ។+ ១៧ ដូច្នេះ លោកត្រូវក្លាយទៅជាដូច«បងប្អូន»របស់លោកទាំងស្រុង+ ដើម្បីលោកអាចក្លាយទៅជាសម្ដេចសង្ឃដែលស្មោះត្រង់ និងមានសេចក្ដីមេត្តាករុណាក្នុងកិច្ចបម្រើព្រះ ដើម្បីជូនគ្រឿងបូជាសម្រាប់ផ្សះផ្សាចំណងមិត្តភាពរវាងមនុស្សនិងព្រះ+ ព្រមទាំងលោះមនុស្សពីការខុសឆ្គងរបស់ពួកគេទៀតផង។+ ១៨ ដោយសារលោកបានរងទុក្ខពេលដែលទទួលការល្បងល+ នោះលោកក៏អាចចូលមកជួយពួកអ្នកដែលកំពុងទទួលការល្បងលដែរ។+
៣ ដូច្នេះ បងប្អូនបរិសុទ្ធ ដែលជាអ្នករួមចំណែកជាមួយនឹងអ្នកដែលបានត្រូវហៅ*ឲ្យឡើងទៅស្ថានសួគ៌+ ចូរពិចារណាអំពីសាវ័ក*និងអំពីសម្ដេចសង្ឃដែលយើងប្រកាសទទួលស្គាល់ ពោលគឺលោកយេស៊ូ។+ ២ លោកស្មោះត្រង់ចំពោះព្រះដែលបានតែងតាំងលោក+ ដូចម៉ូសេបានស្មោះត្រង់ចំពោះព្រះ ពេលដែលគាត់បម្រើក្នុងផ្ទះ*ទាំងមូលរបស់លោក។+ ៣ ពីព្រោះលោក*បានត្រូវចាត់ទុកថាសមនឹងទទួលកិត្តិយស+ច្រើនជាងម៉ូសេ ដោយសារអ្នកដែលសង់ផ្ទះ មានកិត្តិយសច្រើនជាងផ្ទះនោះ។ ៤ ពិតមែនតែផ្ទះទាំងអស់មានអ្នកសង់ ប៉ុន្តែអ្នកដែលបានសង់អ្វីៗទាំងអស់គឺព្រះ។ ៥ ម៉ូសេបានស្មោះត្រង់ក្នុងផ្ទះទាំងមូលរបស់ព្រះ ក្នុងឋានៈជាអ្នកបម្រើ ហើយកិច្ចបម្រើរបស់គាត់ជាសាក្សីបញ្ជាក់*អំពីអ្វីដែលនឹងត្រូវប្រកាសប្រាប់នៅពេលក្រោយ។ ៦ ប៉ុន្តែ គ្រិស្ត*បានស្មោះត្រង់ក្នុងការគ្រប់គ្រងផ្ទះរបស់ព្រះ ក្នុងឋានៈជាបុត្រ។+ យើងជាផ្ទះរបស់លោក+ ប្រសិនបើយើងបន្តនិយាយដោយក្លាហាន និងបន្តអួតអំពីសេចក្ដីសង្ឃឹមរបស់យើងរហូតដល់ទីបញ្ចប់។
៧ ហេតុនេះ ដូចឫទ្ធានុភាពបរិសុទ្ធរបស់ព្រះប្រាប់ថា៖+ «ថ្ងៃនេះ ប្រសិនបើអ្នករាល់គ្នាស្ដាប់សំឡេងរបស់លោក ៨ កុំមានចិត្តរឹងចចេស ដូចគ្រាដែលបុព្វបុរសរបស់អ្នករាល់គ្នាបានធ្វើឲ្យខ្ញុំខឹងយ៉ាងខ្លាំង នៅថ្ងៃដែលបានល្បងលខ្ញុំនៅតំបន់ស្ងាត់ជ្រងំ។+ ៩ ទោះជាពួកគេបានឃើញការដែលខ្ញុំបានធ្វើនៅតំបន់ស្ងាត់ជ្រងំអស់៤០ឆ្នាំក៏ដោយ ក៏ពួកគេបានល្បងលខ្ញុំដែរ។+ ១០ ហេតុនេះ ខ្ញុំបានជិនឆ្អន់នឹងមនុស្សជំនាន់នេះ ហើយខ្ញុំពោលថា៖ ‹ពួកគេតែងតែធ្វើតាមទំនើងចិត្តខ្លួន ហើយពួកគេមិនដើរតាមផ្លូវរបស់ខ្ញុំទេ›។ ១១ ដូច្នេះ ខ្ញុំខឹងខ្លាំងណាស់ទាំងស្បថថា៖ ‹ពួកគេនឹងមិនចូលក្នុងការសម្រាករបស់ខ្ញុំឡើយ›»។+
១២ បងប្អូនអើយ ចូរប្រុងប្រយ័ត្ន ក្រែងលោអ្នករាល់គ្នាណាម្នាក់មានចិត្តទុច្ចរិតហើយគ្មានជំនឿ ដោយសារថយចេញពីព្រះដែលមានជីវិតរស់នៅ។+ ១៣ ប៉ុន្តែ ចូរបន្តលើកទឹកចិត្តគ្នាទៅវិញទៅមកជារៀងរាល់ថ្ងៃ ដរាបណាដែលយើងកំពុងរស់នៅក្នុងគ្រាដែលហៅថា«ថ្ងៃនេះ»+ ដើម្បីកុំឲ្យអ្នករាល់គ្នាណាម្នាក់ទៅជាមនុស្សរឹងចចេសដោយសារការល្បួងនៃភាពខុសឆ្គង។ ១៤ បើយើងរក្សាទំនុកចិត្តដែលយើងមាននៅដើមដំបូងឲ្យរឹងមាំរហូតដល់ទីបញ្ចប់ នោះយើងនឹងទៅជាអ្នករួមចំណែកជាមួយនឹងគ្រិស្ត+ ១៥ ដូចដែលបទគម្ពីរចែងថា៖ «ថ្ងៃនេះ ប្រសិនបើអ្នករាល់គ្នាស្ដាប់សំឡេងរបស់លោក កុំមានចិត្តរឹងចចេស ដូចគ្រាដែលបុព្វបុរសរបស់អ្នករាល់គ្នាបានធ្វើឲ្យខ្ញុំខឹងយ៉ាងខ្លាំង»។+
១៦ ព្រោះតើពួកអ្នកដែលបានឮសំឡេងរបស់ព្រះ ប៉ុន្តែនៅតែធ្វើឲ្យលោកខឹងយ៉ាងខ្លាំងនោះជាអ្នកណា? គឺអស់អ្នកដែលបានចេញពីស្រុកអេហ្ស៊ីបក្រោមការដឹកនាំរបស់ម៉ូសេ មែនទេ?+ ១៧ ម្យ៉ាងទៀត តើព្រះបានជិនឆ្អន់នឹងអ្នកណាអស់៤០ឆ្នាំ?+ គឺពួកអ្នកដែលបានធ្វើខុស ហើយបានស្លាប់ចោលឆ្អឹងនៅតំបន់ស្ងាត់ជ្រងំ មែនទេ?+ ១៨ ហើយតើលោកបានស្បថនឹងអ្នកណាថា លោកនឹងមិនឲ្យពួកគេចូលក្នុងការសម្រាករបស់លោក? គឺពួកអ្នកដែលមិនស្ដាប់បង្គាប់ មែនទេ? ១៩ ដូច្នេះ យើងឃើញថាពួកគេមិនអាចចូលបានទេ ដោយសារពួកគេគ្មានជំនឿ។+
៤ ដូច្នេះ ដោយសារនៅមានសេចក្ដីសន្យាដែលថា រាស្ត្ររបស់ព្រះនឹងចូលក្នុងការសម្រាករបស់លោក ចូរយើងប្រុងប្រយ័ត្ន ដើម្បីកុំឲ្យអ្នករាល់គ្នាណាម្នាក់បាត់បង់សេចក្ដីសន្យានោះ។+ ២ ព្រោះយើងបានឮដំណឹងល្អ+ ដូចពួកបុព្វបុរសរបស់យើងបានឮដែរ។ ប៉ុន្តែ បណ្ដាំដែលពួកគាត់បានឮ មិនមានប្រយោជន៍ដល់ពួកគាត់ឡើយ ពីព្រោះពួកគាត់មិនមានជំនឿដូចពួកអ្នកដែលបានស្ដាប់បង្គាប់ទេ។ ៣ ក៏ប៉ុន្តែ យើងដែលបង្ហាញជំនឿ បានចូលក្នុងការសម្រាកនោះ។ ចំណែកពួកគេវិញ លោកបានមានប្រសាសន៍ថា៖ «ហេតុនេះ ខ្ញុំខឹងខ្លាំងណាស់ទាំងស្បថថា៖ ‹ពួកគេនឹងមិនចូលក្នុងការសម្រាករបស់ខ្ញុំឡើយ›»។+ លោកមានប្រសាសន៍ដូច្នេះ ទោះជាលោកបានសម្រាក ក្រោយពីលោកបញ្ចប់កិច្ចការរបស់លោកតាំងពីកំណើតពិភពលោកក៏ដោយ។+ ៤ ព្រោះនៅបទគម្ពីរមួយ លោកមានប្រសាសន៍អំពីថ្ងៃទី៧ថា៖ «ព្រះបានសម្រាកពីកិច្ចការទាំងអស់របស់លោកនៅថ្ងៃទី៧»+ ៥ ហើយលោកមានប្រសាសន៍ម្ដងទៀតថា៖ «ពួកគេនឹងមិនចូលក្នុងការសម្រាករបស់ខ្ញុំឡើយ»។+
៦ ដូច្នេះ ពួកអ្នកដែលបានឮដំណឹងល្អនៅដើមដំបូងមិនបានចូលទៅក្នុងការសម្រាកទេ ពីព្រោះពួកគេមិនស្ដាប់បង្គាប់ តែអ្នកខ្លះទៀតនៅតែមានឱកាសចូលទៅ។+ ៧ ហេតុនេះ ជាយូរក្រោយមកព្រះបានកំណត់ថ្ងៃមួយម្ដងទៀតក្នុងបទចម្រៀងរបស់ដាវីឌ ដោយប្រើពាក្យថា«ថ្ងៃនេះ» ដូចដែលបានរៀបរាប់ក្នុងសំបុត្រនេះថា៖ «ថ្ងៃនេះ ប្រសិនបើអ្នករាល់គ្នាស្ដាប់សំឡេងរបស់លោក កុំមានចិត្តរឹងចចេស»។+ ៨ ព្រោះប្រសិនបើយ៉ូស្វេ+បាននាំពួកគេទៅកន្លែងសម្រាក នោះក្រោយមកព្រះមិនបានមានប្រសាសន៍អំពីថ្ងៃមួយម្ដងទៀតទេ។ ៩ ដូច្នេះ នៅតែមានថ្ងៃឈប់សម្រាកសម្រាប់រាស្ដ្ររបស់ព្រះ។+ ១០ ព្រោះអ្នកណាដែលបានចូលក្នុងការសម្រាករបស់ព្រះហើយ អ្នកនោះបានសម្រាកពីកិច្ចការរបស់ខ្លួន ដូចព្រះក៏បានសម្រាកពីកិច្ចការរបស់លោកដែរ។+
១១ ហេតុនេះ ចូរយើងខំអស់ពីសមត្ថភាពដើម្បីចូលក្នុងការសម្រាកនោះ ដើម្បីកុំឲ្យអ្នកណាម្នាក់ធ្លាក់ខ្លួនដើរតាមគន្លងរបស់ពួកអ្នកដែលមិនបានស្ដាប់បង្គាប់។+ ១២ ព្រោះបណ្ដាំរបស់ព្រះគឺមានជីវិតរស់នៅ ហើយមានឫទ្ធានុភាព+ ក៏មុតជាងដាវដែលមានមុខពីរ+ រួចទម្លុះរហូតដល់ញែកលក្ខណៈខាងក្រៅចេញពីធាតុពិត ហើយញែកសន្លាក់ឆ្អឹងចេញពីខួរឆ្អឹង ក៏អាចបង្ហាញឲ្យឃើញគំនិតនិងបំណងចិត្ត។ ១៣ ក្នុងចំណោមអ្វីៗទាំងអស់ដែលបានត្រូវបង្កើតមក គ្មានអ្វីសោះដែលលោកមិនអាចមើលឃើញឡើយ+ តែអ្វីៗទាំងអស់នៅចំហនិងមិនកំបាំងពីភ្នែករបស់លោក ជាអ្នកដែលយើងត្រូវជម្រាបអំពីការដែលយើងបានធ្វើ។+
១៤ ដូច្នេះ ដោយសារយើងមានសម្ដេចសង្ឃដ៏ឧត្ដុង្គឧត្ដមដែលបានឡើងទៅស្ថានសួគ៌ ពោលគឺលោកយេស៊ូដែលជាបុត្រព្រះ+ នោះចូរយើងប្ដេជ្ញាចិត្តក្នុងការប្រកាសអំពីលោកជាសាធារណៈ។+ ១៥ ព្រោះសម្ដេចសង្ឃរបស់យើងមិនមែនជាអ្នកដែលមិនអាចយល់ភាពទន់ខ្សោយរបស់យើងទេ+ តែគឺជាអ្នកដែលបានត្រូវល្បងលគ្រប់ជំពូកដូចយើងដែរ ប៉ុន្តែលោកមិនបានធ្វើអំពើខុសឆ្គងឡើយ។+ ១៦ ហេតុនេះ ចូរយើងចូលទៅនិយាយដោយក្លាហាននៅមុខបល្ល័ង្កនៃគុណដ៏វិសេសលើសលប់+ ដើម្បីយើងអាចទទួលសេចក្ដីមេត្តាករុណា និងគុណដ៏វិសេសលើសលប់នៅពេលដែលយើងត្រូវការជំនួយ។
៥ ព្រោះសម្ដេចសង្ឃម្នាក់ៗដែលបានត្រូវជ្រើសរើសពីចំណោមមនុស្ស គាត់ទទួលការតែងតាំងដើម្បីបំពេញកិច្ចបម្រើរបស់ព្រះជាប្រយោជន៍ដល់មនុស្ស+ ដើម្បីជូនជំនូននិងគ្រឿងបូជាសម្រាប់ការខុសឆ្គង។+ ២ គាត់អាចប្រព្រឹត្តដោយសេចក្ដីមេត្តាករុណាចំពោះពួកអ្នកដែលធ្វើខុសដោយសារគ្មានការយល់ដឹង ពីព្រោះរូបគាត់ផ្ទាល់ក៏មានភាពទន់ខ្សោយដែរ។ ៣ ហេតុនេះហើយបានជាគាត់ត្រូវជូនគ្រឿងបូជាសម្រាប់ការខុសឆ្គងរបស់ខ្លួន ដូចដែលគាត់បានធ្វើសម្រាប់បណ្ដាជនដែរ។+
៤ មនុស្សមិនអាចតែងតាំងខ្លួនឯងឲ្យមានកិត្តិយសនេះបានទេ លុះត្រាតែព្រះតែងតាំងអ្នកនោះ ដូចលោកបានតែងតាំងអេរ៉ុន។+ ៥ ដូចគ្នាដែរ គ្រិស្តមិនបានតម្កើងខ្លួន+ឲ្យមានឋានៈជាសម្ដេចសង្ឃទេ ប៉ុន្តែលោកបានត្រូវតម្កើងដោយព្រះដែលបានមានប្រសាសន៍ទៅលោកថា៖ «អ្នកជាបុត្ររបស់ខ្ញុំ ហើយចាប់ពីថ្ងៃនេះទៅ ខ្ញុំជាបិតារបស់អ្នក»។+ ៦ ម្យ៉ាងទៀត ព្រះមានប្រសាសន៍នៅបទគម្ពីរមួយផ្សេងទៀតថា៖ «អ្នកជាសង្ឃជារៀងរហូត តាមរបៀបដូចម៉េលគីសេដិក»។+
៧ ពេលដែលគ្រិស្តរស់នៅផែនដី លោកបានធ្វើសំណូមពរនិងអង្វរទាំងទឹកភ្នែក ព្រមទាំងបន្លឺសំឡេងយ៉ាងខ្លាំង+ទៅព្រះដែលមានសមត្ថភាពសង្គ្រោះលោកពីសេចក្ដីស្លាប់ ហើយព្រះបានទទួលសំណូមពររបស់លោក ដោយសារលោកកោតខ្លាចព្រះ។ ៨ ទោះជាលោកជាបុត្ររបស់ព្រះក៏ដោយ លោកបានរៀនឲ្យចេះស្ដាប់បង្គាប់ព្រះ ដោយសារអ្វីៗដែលលោកបានរងទុក្ខ។+ ៩ ក្រោយពីលោកមានគុណសម្បត្តិពេញលេញ*ហើយ+ លោកបានទទួលភារកិច្ចផ្ដល់សេចក្ដីសង្គ្រោះដែលគ្មានទីបញ្ចប់ដល់អស់អ្នកដែលស្ដាប់បង្គាប់លោក+ ១០ ពីព្រោះព្រះបានជ្រើសរើសលោកឲ្យធ្វើជាសម្ដេចសង្ឃតាមរបៀបដូចម៉េលគីសេដិក។+
១១ យើងមានអ្វីជាច្រើនដែលត្រូវនិយាយអំពីលោក ប៉ុន្តែអ្វីទាំងនោះគឺពិបាកពន្យល់ ពីព្រោះអ្នករាល់គ្នាបានទៅជាមនុស្សដែលក្រនឹងយល់។* ១២ ព្រោះតាមការពិត បើគិតអំពីគ្រានេះ អ្នករាល់គ្នាគួរធ្វើជាអ្នកបង្រៀនគេ តែអ្នករាល់គ្នាត្រូវការឲ្យគេបង្រៀនអ្នករាល់គ្នាម្ដងទៀតអំពីបឋមសេចក្ដី+នៃប្រសាសន៍ដ៏ពិសិដ្ឋរបស់ព្រះ។ ដូច្នេះ អ្នករាល់គ្នាត្រឡប់ទៅជាអ្នកដែលត្រូវការទឹកដោះ មិនមែនអាហាររឹងទេ។ ១៣ ព្រោះអ្នកណាដែលបន្តទទួលទានតែទឹកដោះប៉ុណ្ណោះ អ្នកនោះមិនស្គាល់បណ្ដាំនៃសេចក្ដីសុចរិតទេ ពីព្រោះអ្នកនោះជាកូនក្មេង។+ ១៤ ប៉ុន្តែ អាហាររឹងគឺសម្រាប់មនុស្សពេញវ័យ*ដែលតែងតែប្រើប្រាស់សមត្ថភាពវែកញែក។* ដោយធ្វើដូច្នេះ ពួកគេបង្វឹកបង្ហាត់សមត្ថភាពវែកញែករបស់ខ្លួន ដើម្បីសម្គាល់អ្វីដែលខុសនិងអ្វីដែលត្រូវ។
៦ ឥឡូវ យើងបានរៀនសេចក្ដីបង្រៀនជាមូលដ្ឋាន+អំពីគ្រិស្តរួចហើយ។ ដូច្នេះ ចូរយើងខំប្រឹងឈានទៅរកភាពចាស់ទុំ+ ហើយកុំឲ្យយើងរៀនសេចក្ដីបង្រៀនជាមូលដ្ឋានម្ដងទៀត ដោយរៀនអំពីការប្រែចិត្តពីការប្រព្រឹត្តដែលឥតប្រយោជន៍ និងអំពីជំនឿទៅលើព្រះ ២ សេចក្ដីបង្រៀនអំពីការជ្រមុជទឹក ការដាក់ដៃលើ+ ការប្រោសមនុស្សស្លាប់ឲ្យរស់ឡើងវិញ+ និងការវិនិច្ឆ័យទោសដែលនៅជាប់ជារៀងរហូត។ ៣ ប្រសិនបើព្រះអនុញ្ញាត យើងនឹងឈានទៅរកភាពចាស់ទុំពិតប្រាកដ។
៤ ព្រោះចំពោះពួកអ្នកដែលធ្លាប់ទទួលការបំភ្លឺម្ដងរួចហើយ+ និងដែលបានភ្លក់អំណោយទានពីស្ថានសួគ៌ ហើយបានទទួលឫទ្ធានុភាពបរិសុទ្ធ ៥ ក៏បានទទួលបណ្ដាំដ៏ល្អប្រសើររបស់ព្រះ ថែមទាំងបានឃើញលទ្ធផលពីឫទ្ធានុភាពដែលនឹងត្រូវបង្ហាញក្នុងរបៀបរបបពិភពលោកដែលនឹងមកដល់* ៦ តែពួកគេបានបែរចេញពីជំនឿ+ នោះគ្មានផ្លូវអាចជួយពួកគេឲ្យភ្ញាក់ខ្លួន ហើយប្រែចិត្តបានទេ ពីព្រោះពួកគេព្យួរបុត្ររបស់ព្រះសាជាថ្មីដោយខ្លួនគេ ហើយធ្វើឲ្យលោកអាប់ឱនកិត្តិយសនៅមុខមនុស្សទូទៅ។+ ៧ ជាឧទាហរណ៍ ដីណាដែលទទួលទឹកភ្លៀងជារឿយៗ ហើយធ្វើឲ្យដុះរុក្ខជាតិល្អសម្រាប់អ្នកដែលដាំដុះ ដីនោះទទួលពរពីព្រះ។ ៨ ប៉ុន្តែ ប្រសិនបើដីនោះធ្វើឲ្យដុះដើមបន្លាវិញ ដីនោះនឹងត្រូវគេបោះបង់ចោល ហើយជិតត្រូវបណ្ដាសា។ នៅទីបំផុត ដីនោះនឹងត្រូវគេដុតចោល។
៩ ប៉ុន្តែ អ្នករាល់គ្នាជាទីស្រឡាញ់អើយ ទោះជាយើងនិយាយដូច្នោះក៏ដោយ យើងជឿជាក់ថា ករណីអ្នករាល់គ្នាគឺប្រសើរជាងពួកអ្នកដែលបានបែរចេញពីជំនឿ ហើយអ្នករាល់គ្នាកំពុងធ្វើអ្វីដែលនាំឲ្យអ្នករាល់គ្នាទទួលសេចក្ដីសង្គ្រោះពីព្រះ។ ១០ ព្រោះព្រះមិនប្រព្រឹត្តដោយអយុត្ដិធម៌ ដោយបំភ្លេចការដែលអ្នករាល់គ្នាបានធ្វើ និងសេចក្ដីស្រឡាញ់ដែលអ្នករាល់គ្នាបានបង្ហាញចំពោះនាមរបស់លោកឡើយ+ គឺអ្នករាល់គ្នាបានបម្រើពួកអ្នកបរិសុទ្ធ ហើយនៅតែបម្រើពួកគាត់ជានិច្ច។ ១១ ប៉ុន្តែ យើងចង់ឲ្យអ្នករាល់គ្នាបង្ហាញចិត្តឧស្សាហ៍ដូចកាលពីដើម ដើម្បីឲ្យអ្នករាល់គ្នាមានសេចក្ដីសង្ឃឹមយ៉ាងពិតប្រាកដ+រហូតដល់ទីបញ្ចប់+ ១២ និងដើម្បីកុំឲ្យអ្នករាល់គ្នាក្លាយទៅជាមនុស្សខ្ជិលឡើយ+ តែចូរយកតម្រាប់ពួកអ្នកដែលបានទទួលសេចក្ដីសន្យាជាមត៌ក ដោយសារពួកគេមានជំនឿនិងចិត្តអត់ធ្មត់។
១៣ ពីព្រោះពេលដែលព្រះសន្យាជាមួយនឹងអាប្រាហាំ លោកធានាសេចក្ដីសន្យារបស់លោកដោយអាង*ជីវិតខ្លួនលោក ព្រោះគ្មានអ្នកណាធំជាងលោកដែលលោកអាចអាងដើម្បីធានាសេចក្ដីសន្យានោះឡើយ។+ ១៤ លោកបានមានប្រសាសន៍ថា៖ «ខ្ញុំប្រាកដជានឹងឲ្យពរដល់អ្នក ហើយខ្ញុំប្រាកដជានឹងធ្វើឲ្យអ្នកមានគ្នាច្រើនឡើង»។+ ១៥ ដូច្នេះ ក្រោយពីអាប្រាហាំបានបង្ហាញចិត្តអត់ធ្មត់ គាត់ក៏ទទួលសេចក្ដីសន្យានោះ។ ១៦ ព្រោះមនុស្សស្បថដោយអាងអ្នកដែលធំជាង ហើយសម្បថរបស់ពួកគេបញ្ចប់គ្រប់ជម្លោះ ពីព្រោះសម្បថនោះជាការធានារ៉ាប់រងតាមច្បាប់ចំពោះពួកគេ។+ ១៧ តាមរបៀបនោះដែរ ពេលដែលព្រះបានសម្រេចចិត្តបង្ហាញឲ្យពួកអ្នកដែលនឹងទទួលសេចក្ដីសន្យាជាមត៌ក ឃើញកាន់តែច្បាស់ថា+ គោលបំណងរបស់លោកមិនអាចប្រែប្រួល នោះលោកបានធានាដោយស្បថបន្ថែមពីលើសេចក្ដីសន្យានោះ។ ១៨ ដូច្នេះ តាមរយៈការទាំងពីរនោះដែលពុំអាចប្រែប្រួល និងដែលបង្ហាញថាព្រះមិនអាចកុហកបាន+ នោះយើងដែលជាអ្នកបានរត់ទៅទីជ្រកកោនរបស់លោក អាចទទួលការលើកទឹកចិត្តយ៉ាងខ្លាំង ដើម្បីឈោងចាប់សេចក្ដីសង្ឃឹមដែលបានត្រូវដាក់នៅមុខយើង។ ១៩ សេចក្ដីសង្ឃឹមនេះ+ជាយុថ្កាសម្រាប់ជីវិតយើង ក៏រឹងមាំនិងពិតប្រាកដ ហើយសេចក្ដីសង្ឃឹមនេះនាំយើងចូលហួសវាំងនន+ ២០ ជាកន្លែងដែលអ្នកបើកផ្លូវបានចូលដើម្បីជាប្រយោជន៍ដល់យើង គឺលោកយេស៊ូ+ដែលបានក្លាយទៅជាសម្ដេចសង្ឃជារៀងរហូត តាមរបៀបដូចម៉េលគីសេដិក។+
៧ ព្រោះម៉េលគីសេដិកដែលជាស្ដេចក្រុងសាឡិម និងជាសង្ឃរបស់ព្រះដ៏ខ្ពង់ខ្ពស់បំផុត បានជួបអាប្រាហាំហើយឲ្យពរដល់គាត់ ក្រោយដែលអាប្រាហាំបានត្រឡប់មកពីវាយឈ្នះស្ដេចមួយចំនួន។+ ២ អាប្រាហាំបានឲ្យ១ភាគ១០នៃអ្វីៗទាំងអស់ដល់ម៉េលគីសេដិក ដែលឈ្មោះរបស់គាត់មានន័យថា«ស្ដេចនៃសេចក្ដីសុចរិត» ហើយគាត់ជាស្ដេចនៃក្រុងសាឡិម ឬ«ស្ដេចនៃសន្តិភាព»។ ៣ មិនមានកំណត់ត្រាអំពីឪពុក ម្ដាយ ពង្សាវតារ និងអំពីថ្ងៃកើតឬថ្ងៃស្លាប់របស់ស្ដេចនោះទេ តែស្ដេចនោះបានត្រូវធ្វើឲ្យដូចជាបុត្ររបស់ព្រះ។ ហេតុនេះ គាត់គឺជាសង្ឃជាដរាប។+
៤ ដូច្នេះ តើអ្នករាល់គ្នាឃើញឬទេ? បុរសនេះគឺឧត្ដុង្គឧត្ដមណាស់។ ហេតុនេះហើយបានជាអាប្រាហាំដែលជាមេគ្រួសារ បានឲ្យគាត់១ភាគ១០នៃរបស់ល្អបំផុតដែលរឹបអូសបាន។+ ៥ ពិតមែន អស់អ្នកពីចំណោមកូន*លេវី+ ដែលមានតំណែងជាសង្ឃ បានត្រូវបង្គាប់តាមច្បាប់*ឲ្យប្រមូល១ភាគ១០ពីបណ្ដាជន+ គឺពីបងប្អូនរបស់ពួកគេ ទោះជាបងប្អូនទាំងនោះជាកូនចៅរបស់អាប្រាហាំក៏ដោយ។ ៦ ប៉ុន្តែ បុរសនេះដែលមិនមែនមកពីវង្សត្រកូលលេវី បានយក១ភាគ១០ពីអាប្រាហាំ ហើយបានឲ្យពរដល់គាត់ដែលជាអ្នកទទួលសេចក្ដីសន្យា។+ ៧ មនុស្សទាំងអស់យល់ស្របថា អ្នកតូចជាងទទួលពរពីអ្នកដែលធំជាង។ ៨ លេវីបានទទួល១ភាគ១០ ហើយជាមនុស្សដែលអាចស្លាប់ តែបុរសម្នាក់ទៀតដែលបានទទួល១ភាគ១០ បទគម្ពីរបញ្ជាក់ថាគាត់បន្តមានជីវិតរស់នៅ។+ ៩ ដូច្នេះ អាចនិយាយបានថា សូម្បីតែលេវីដែលទទួល១ភាគ១០ ក៏បានឲ្យ១ភាគ១០ដែរ តាមរយៈអាប្រាហាំ ១០ ព្រោះលេវីមិនទាន់កើតមកពីពូជពង្សអាប្រាហាំនៅឡើយ ពេលដែលម៉េលគីសេដិកជួបអាប្រាហាំ។+
១១ ការរៀបចំឲ្យមានសង្ឃពីកុលសម្ព័ន្ធលេវី គឺជាផ្នែកមួយនៃច្បាប់ម៉ូសេដែលជនជាតិអ៊ីស្រាអែលបានទទួល។ បើសង្ឃពីកុលសម្ព័ន្ធលេវីអាចនាំឲ្យមានភាពល្អឥតខ្ចោះ+ តើយើងត្រូវការសង្ឃម្នាក់ទៀតតាមរបៀបដូចម៉េលគីសេដិកឬទេ?+ តើការមានសង្ឃតាមរបៀបដូចអេរ៉ុន មិនគ្រប់គ្រាន់ឬ? ១២ ដោយសាររបៀបរៀបចំជាសង្ឃបានត្រូវផ្លាស់ប្ដូរ នោះច្បាប់ក៏ចាំបាច់ត្រូវផ្លាស់ប្ដូរដែរ។+ ១៣ ព្រោះបុរសម្នាក់នោះដែលបានត្រូវពិពណ៌នាដូច្នេះ គាត់មកពីកុលសម្ព័ន្ធមួយផ្សេងទៀត ដែលមិនធ្លាប់មានអ្នកណាម្នាក់បំពេញកិច្ចបម្រើនៅទីបូជាទេ។+ ១៤ ព្រោះប្រាកដហើយថា លោកម្ចាស់របស់យើងបានកើតមកពីកុលសម្ព័ន្ធយូដា+ តែម៉ូសេមិនបានប្រាប់ថានឹងមានសង្ឃចេញមកពីកុលសម្ព័ន្ធនោះទេ។
១៥ យើងយល់អំពីការនោះកាន់តែច្បាស់ ពេលសង្ឃម្នាក់ទៀត+ដែលស្រដៀងនឹងម៉េលគីសេដិកលេចមក។+ ១៦ លោកបានក្លាយទៅជាសង្ឃ មិនមែនដោយសារលោកមានពង្សាវតារដែលច្បាប់កំណត់ឲ្យនោះទេ តែដោយសារឫទ្ធានុភាពដែលធ្វើឲ្យលោកមានជីវិតដែលមិនអាចត្រូវបំផ្លាញបានឡើយ+ ១៧ ព្រោះបទគម្ពីរបញ្ជាក់ថា៖ «អ្នកជាសង្ឃជារៀងរហូត តាមរបៀបដូចម៉េលគីសេដិក»។+
១៨ ដូច្នេះ បញ្ញត្ដិមុនបានត្រូវធ្វើឲ្យទៅជាមោឃ ដោយសារវាខ្សោយនិងគ្មានប្រសិទ្ធភាព។+ ១៩ ព្រោះច្បាប់មិនបានធ្វើឲ្យអ្វីក្លាយទៅជាល្អឥតខ្ចោះទេ+ តែសេចក្ដីសង្ឃឹមដែលប្រសើរជាងនោះដែលព្រះផ្ដល់ឲ្យ+ បានធ្វើឲ្យក្លាយទៅជាល្អឥតខ្ចោះ ហើយតាមរយៈសេចក្ដីសង្ឃឹមនោះ យើងកំពុងចូលទៅជិតព្រះ។+ ២០ ដោយសារព្រះបានធ្វើសម្បថ ពេលលោកតែងតាំងលោកយេស៊ូជាសង្ឃ ២១ (ពិតមែនតែមានបុរសខ្លះដែលបានក្លាយទៅជាសង្ឃដោយគ្មានសម្បថពីព្រះ ប៉ុន្តែមានម្នាក់ដែលបានក្លាយទៅជាសង្ឃដោយមានសម្បថពីព្រះ។ លោកមានប្រសាសន៍អំពីអ្នកនោះថា៖ «ព្រះយេហូវ៉ា*បានស្បថថា៖ ‹អ្នកជាសង្ឃជារៀងរហូត› ហើយលោកនឹងមិនផ្លាស់ប្ដូរគំនិត*ឡើយ»)។+ ២២ ហេតុនោះ លោកយេស៊ូបានក្លាយទៅជាអ្នកធានាកិច្ចព្រមព្រៀងដែលប្រសើរជាងនោះ។+ ២៣ ម្យ៉ាងទៀត មនុស្សជាច្រើនត្រូវធ្វើជាសង្ឃតៗគ្នា+ ព្រោះពួកគេរមែងស្លាប់ ហើយមិនអាចកាន់តំណែងជាដរាបបានទេ។ ២៤ ប៉ុន្តែ ដោយសារលោករស់ជារៀងរហូត+ នោះលោកកាន់តំណែងជាសង្ឃដោយមិនត្រូវការអ្នកណាបន្តតំណែងឡើយ។ ២៥ ដូច្នេះ លោកអាចសង្គ្រោះយ៉ាងពេញលេញនូវអស់អ្នកដែលចូលទៅជិតព្រះតាមរយៈលោក ពីព្រោះលោករស់ជារៀងរហូត ដើម្បីអង្វរជំនួសពួកគេ។+
២៦ ព្រោះសម្ដេចសង្ឃបែបនេះគឺសមនឹងយើង ពោលគឺសម្ដេចសង្ឃដែលមានភក្ដីភាព គ្មានកលល្បិច ឥតសៅហ្មង+ ខុសពីមនុស្សដែលប្រព្រឹត្តអំពើខុសឆ្គងហើយលោកបានទៅជាខ្ពង់ខ្ពស់ជាងមេឃ។+ ២៧ លោកមិនចាំបាច់ជូនគ្រឿងបូជារៀងរាល់ថ្ងៃ+ សម្រាប់ការខុសឆ្គងរបស់លោកនិងរបស់បណ្ដាជនដូចសម្ដេចសង្ឃឯទៀតនោះទេ+ ព្រោះលោកបានធ្វើដូច្នេះមួយដងជាការស្រេចដោយប្រគល់ខ្លួនជាគ្រឿងបូជា។+ ២៨ ពីព្រោះច្បាប់តែងតាំងបុរសដែលមានភាពទន់ខ្សោយឲ្យធ្វើជាសម្ដេចសង្ឃ+ តែសម្បថ+ដែលមកក្រោយច្បាប់តែងតាំងបុត្រមួយ ដែលបានត្រូវធ្វើឲ្យល្អឥតខ្ចោះ+ជារៀងរហូត។
៨ ចំណុចសំខាន់នៃអ្វីៗដែលយើងកំពុងរៀបរាប់គឺ យើងមានសម្ដេចសង្ឃបែបនេះ+ ដែលបានអង្គុយនៅខាងស្ដាំបល្ល័ង្កនៃព្រះដ៏ឧត្ដុង្គឧត្ដមនៅស្ថានសួគ៌។+ ២ លោកជាអ្នកបម្រើដែលបំពេញការងារក្នុងកន្លែងបរិសុទ្ធ+ ពោលគឺត្រសាលដ៏ពិត ជាត្រសាលដែលព្រះយេហូវ៉ា*បានដំឡើង មិនមែនមនុស្សទេ។ ៣ ព្រោះសម្ដេចសង្ឃម្នាក់ៗទទួលការតែងតាំងដើម្បីជូនអំណោយនិងគ្រឿងបូជា។ ហេតុនេះ លោកក៏ត្រូវមានអ្វីដើម្បីជូនដែរ។+ ៤ ប្រសិនបើលោកនៅផែនដី លោកមិនមែនជាសង្ឃទេ+ ពីព្រោះតាមច្បាប់មានសង្ឃឯទៀតដែលជូនគ្រឿងបូជា។ ៥ ប៉ុន្តែ បុរសទាំងនោះបំពេញកិច្ចបម្រើពិសិដ្ឋដែលគ្រាន់តែជានិមិត្តរូប និងជាស្រមោល+នៃអ្វីៗនៅស្ថានសួគ៌។+ ដូចពេលដែលម៉ូសេបម្រុងនឹងធ្វើត្រសាល គាត់បានទទួលបង្គាប់ពីព្រះថា៖ «អ្នកត្រូវធ្វើអ្វីៗទាំងអស់តាមគំរូទាំងប៉ុន្មានដែលខ្ញុំបានបង្ហាញអ្នកនៅលើភ្នំ»។+ ៦ ប៉ុន្តែ ឥឡូវលោកយេស៊ូបានទទួលកិច្ចបម្រើដែលប្រសើរជាង ពីព្រោះលោកជាអ្នកសម្រុះសម្រួល+ក្នុងកិច្ចព្រមព្រៀងដែលប្រសើរជាងកិច្ចព្រមព្រៀងមុន+ ហើយដែលបានត្រូវធ្វើឲ្យមានសុពលភាពតាមច្បាប់ ដោយមានមូលដ្ឋានលើសេចក្ដីសន្យាដែលប្រសើរជាងសេចក្ដីសន្យាមុន។+
៧ ប្រសិនបើកិច្ចព្រមព្រៀងដំបូងបានពេញលក្ខណៈ* នោះមិនចាំបាច់មានកិច្ចព្រមព្រៀងមួយផ្សេងទៀតទេ។+ ៨ ព្រោះព្រះបន្ទោសបណ្ដាជន ពេលដែលលោកមានប្រសាសន៍ថា៖ «ព្រះយេហូវ៉ា*មានប្រសាសន៍ថា៖ ‹មើល! នឹងមានគ្រាមកដល់ ដែលខ្ញុំនឹងធ្វើកិច្ចព្រមព្រៀងថ្មីជាមួយនឹងពូជពង្សអ៊ីស្រាអែលនិងពូជពង្សយូដា។ ៩ កិច្ចព្រមព្រៀងថ្មីនោះ មិនមែនដូចកិច្ចព្រមព្រៀងដែលខ្ញុំបានធ្វើជាមួយនឹងបុព្វបុរសរបស់អ្នករាល់គ្នា នៅថ្ងៃដែលខ្ញុំកាន់ដៃពួកគេនាំចេញពីស្រុកអេហ្ស៊ីបមកនោះទេ+ ពីព្រោះពួកគេបានបំពានលើកិច្ចព្រមព្រៀងរបស់ខ្ញុំ។ ហេតុនេះ ខ្ញុំក៏ឈប់យកចិត្តទុកដាក់នឹងពួកគេទៀត›។ នេះជាប្រសាសន៍របស់ព្រះយេហូវ៉ា។*
១០ «ព្រះយេហូវ៉ា*មានប្រសាសន៍ថា៖ ‹ព្រោះនេះជាកិច្ចព្រមព្រៀងដែលខ្ញុំនឹងធ្វើជាមួយនឹងពូជពង្សអ៊ីស្រាអែល ក្រោយពីគ្រាទាំងនោះ។ ខ្ញុំនឹងដាក់ច្បាប់របស់ខ្ញុំនៅក្នុងគំនិតរបស់ពួកគេ ហើយខ្ញុំនឹងចារឹកច្បាប់ទាំងនោះក្នុងចិត្តរបស់ពួកគេ។+ ខ្ញុំនឹងធ្វើជាព្រះរបស់ពួកគេ ហើយពួកគេនឹងធ្វើជារាស្ដ្ររបស់ខ្ញុំ។+
១១ «‹ពួកគេនឹងឈប់បង្រៀនជនរួមជាតិ ឬបងប្អូនរបស់ពួកគេតទៅទៀតថា៖ «ចូរស្គាល់ព្រះយេហូវ៉ា!» ព្រោះពួកគេទាំងអស់គ្នានឹងស្គាល់ខ្ញុំ ចាប់ពីអ្នកតូចជាងគេ រហូតដល់អ្នកធំជាងគេបំផុត។ ១២ ព្រោះខ្ញុំនឹងអភ័យទោសចំពោះអំពើមិនសុចរិតរបស់ពួកគេ ហើយខ្ញុំនឹងមិននឹកចាំការខុសឆ្គងរបស់ពួកគេទៀតឡើយ›»។+
១៣ កាលដែលលោកមានប្រសាសន៍អំពី«កិច្ចព្រមព្រៀងថ្មី» នោះលោកបានធ្វើឲ្យកិច្ចព្រមព្រៀងដំបូងទៅជាមោឃវិញ។+ ឥឡូវ អ្វីដែលបានទៅជាមោឃ និងដែលកំពុងប្រែជាចាស់ទៅ គឺជិតបាត់សូន្យហើយ។+
៩ ឯកិច្ចព្រមព្រៀងមុន ធ្លាប់មានតម្រូវការតាមច្បាប់អំពីការបំពេញកិច្ចបម្រើពិសិដ្ឋ និងធ្លាប់មានកន្លែងបរិសុទ្ធ+នៅផែនដី។ ២ ព្រោះបន្ទប់ទី១នៃត្រសាលបានត្រូវរៀបចំ ដោយមានជើងចង្កៀង+ តុ និងនំប៉័ងតាំងទុកជាគ្រឿងបូជា។+ បន្ទប់នោះបានត្រូវហៅថា កន្លែងបរិសុទ្ធ។+ ៣ ប៉ុន្តែ ខាងក្រោយវាំងននទី២+ មានបន្ទប់ដែលត្រូវហៅថា កន្លែងបរិសុទ្ធបំផុត។+ ៤ បន្ទប់នេះមានប្រដាប់សម្រាប់ដុតគ្រឿងក្រអូបធ្វើពីមាស+ ព្រមទាំងហឹបនៃកិច្ចព្រមព្រៀង+ដែលស្រោបមាស+ ហើយក្នុងហឹបនោះមានម៉ាណាក្នុងក្រឡមាសមួយ+ និងមានដំបងរបស់អេរ៉ុនដែលចេញពន្លក+ ព្រមទាំងមានបន្ទះថ្ម+នៃកិច្ចព្រមព្រៀងផងដែរ។ ៥ នៅលើហឹបនោះមានរូបចេរូប៊ីនពីរដ៏រុងរឿងដែលចោលស្រមោលលើគម្រប*ហឹបនោះ។+ ប៉ុន្តែ នៅពេលនេះយើងមិនត្រូវរៀបរាប់យ៉ាងល្អិតល្អន់អំពីរឿងទាំងនេះទេ។
៦ ក្រោយពីរបស់ទាំងនោះបានត្រូវរៀបចំតាមរបៀបនេះហើយ ពួកសង្ឃរមែងចូលក្នុងបន្ទប់ទី១នៃត្រសាលដើម្បីបំពេញកិច្ចបម្រើពិសិដ្ឋ។+ ៧ ប៉ុន្តែ មានតែសម្ដេចសង្ឃប៉ុណ្ណោះដែលចូលក្នុងបន្ទប់ទី២ គាត់ចូលមួយដងក្នុងមួយឆ្នាំ+ ដោយយកឈាមទៅជាមួយ។+ គាត់ជូនឈាមនោះសម្រាប់ការខុសឆ្គងរបស់គាត់+ និងការខុសឆ្គងដែលបណ្ដាជន+បានប្រព្រឹត្តដោយមិនដឹងខ្លួន។ ៨ ដូច្នេះ ឫទ្ធានុភាពបរិសុទ្ធបញ្ជាក់យ៉ាងច្បាស់ថា កាលដែលនៅមានត្រសាលដំបូង ផ្លូវចូលកន្លែងបរិសុទ្ធ*មិនទាន់ត្រូវបើកនៅឡើយ។+ ៩ ត្រសាលនោះឯងជានិមិត្តរូប*ដែលទាក់ទងនឹងពេលបច្ចុប្បន្ន+ ហើយតាមរយៈការរៀបចំនេះ នៅតែមានការជូនអំណោយនិងគ្រឿងបូជា។+ ក៏ប៉ុន្តែ អ្វីទាំងនោះមិនអាចធ្វើឲ្យបុរសដែលបំពេញកិច្ចបម្រើពិសិដ្ឋនោះ មានសមត្ថភាពវិនិច្ឆ័យស្អាតស្អំឡើយ។+ ១០ អំណោយនិងគ្រឿងបូជាទាំងនោះទាក់ទងនឹងអាហារ ភេសជ្ជៈ និងការលាងជម្រះផ្សេងៗ*តែប៉ុណ្ណោះ។+ ការទាំងនោះជាតម្រូវការនៃច្បាប់ដែលទាក់ទងនឹងរូបកាយ+ ហើយត្រូវធ្វើរហូតដល់ពេលកំណត់សម្រាប់ការកែលម្អ។
១១ ក៏ប៉ុន្តែ គ្រិស្តបានមកក្នុងឋានៈជាសម្ដេចសង្ឃ ដើម្បីផ្ដល់ពរទាំងប៉ុន្មានដែលយើងបានទទួលហើយ។ ពេលលោកទៅជាសម្ដេចសង្ឃ លោកបានចូលក្នុងត្រសាលដែលឧត្ដុង្គឧត្ដមនិងល្អឥតខ្ចោះជាង ជាត្រសាលដែលមិនមែនធ្វើដោយដៃមនុស្សទេ គឺថាមិនមែនជាអ្វីដែលបានត្រូវបង្កើតឡើងក្នុងពិភពលោកនេះឡើយ។ ១២ លោកចូលក្នុងកន្លែងបរិសុទ្ធមិនមែនដោយយកឈាមពពែនិងគោឈ្មោល*ទេ តែបានយកឈាមរបស់លោកផ្ទាល់+ចូលក្នុងកន្លែងនោះមួយដងជាការស្រេច ហើយតាមរយៈលោក យើងបានទទួលសេចក្ដីសង្គ្រោះ*ដែលគ្មានទីបញ្ចប់។+ ១៣ ព្រោះប្រសិនបើការប្រោះឈាមពពែ ឈាមគោឈ្មោល+ និងផេះគោញី*ទៅលើអ្នកដែលស្មោកគ្រោក បានជម្រះរូបកាយពួកគេឲ្យទៅជាស្អាតបរិសុទ្ធទៅហើយ+ ១៤ នោះឈាមរបស់គ្រិស្ត+ច្បាស់ជាមានតម្លៃជាងនោះទៅទៀត ព្រោះលោកបានប្រគល់ខ្លួនលោកដែលឥតខ្ចោះទៅព្រះ ក្រោមការដឹកនាំនៃឫទ្ធានុភាពដែលស្ថិតស្ថេរជារៀងរហូត។ ហេតុនេះហើយបានជាឈាមរបស់លោកនឹងជម្រះសមត្ថភាពវិនិច្ឆ័យរបស់យើងឲ្យស្អាតពីការប្រព្រឹត្តដ៏ឥតប្រយោជន៍+ ដើម្បីឲ្យយើងបំពេញកិច្ចបម្រើពិសិដ្ឋជូនព្រះដែលមានជីវិតរស់នៅ។+
១៥ ម្ល៉ោះហើយ លោកជាអ្នកសម្រុះសម្រួលកិច្ចព្រមព្រៀងថ្មី+ ដើម្បីឲ្យពួកអ្នកដែលបានត្រូវហៅ អាចទទួលសេចក្ដីសន្យាអំពីមត៌កដែលស្ថិតស្ថេរជារៀងរហូត។+ ការទាំងអស់នេះអាចកើតឡើងបានដោយសារមរណភាពរបស់លោក ដើម្បីលោះពួកគេ+ពីការរំលងដែលពួកគេបានធ្វើនៅក្រោមកិច្ចព្រមព្រៀងមុន។ ១៦ ព្រោះពេលណាមានកិច្ចព្រមព្រៀងជាមួយនឹងព្រះ មនុស្សដែលធ្វើកិច្ចព្រមព្រៀងនោះត្រូវតែស្លាប់។ ១៧ ដរាបណាមនុស្សដែលធ្វើកិច្ចព្រមព្រៀងនោះនៅរស់ ដរាបនោះកិច្ចព្រមព្រៀងគ្មានសុពលភាពទេ ដោយសារសុពលភាពនៃកិច្ចព្រមព្រៀងមានមូលដ្ឋានលើសេចក្ដីស្លាប់។ ១៨ ដូច្នេះ កិច្ចព្រមព្រៀងមុនក៏មិនបានចាប់ផ្ដើមមានសុពលភាពដោយគ្មានឈាមដែរ។ ១៩ ក្រោយពីម៉ូសេបានប្រាប់បញ្ញត្ដិទាំងអស់ក្នុងច្បាប់ដល់បណ្ដាជន នោះគាត់យកឈាមគោឈ្មោល ឈាមពពែ ទឹក រោមចៀមជ្រលក់ពណ៌ក្រហម* និងដើមហ៊ីសុប មកប្រោះលើសៀវភៅកិច្ចព្រមព្រៀង និងលើបណ្ដាជន ២០ ហើយនិយាយថា៖ «នេះជាឈាមនៃកិច្ចព្រមព្រៀងដែលព្រះបានបង្គាប់ឲ្យអ្នករាល់គ្នាធ្វើតាម»។+ ២១ រួចគាត់យកឈាមនោះ មកប្រោះលើត្រសាលនិងប្រដាប់ប្រដាទាំងអស់សម្រាប់កិច្ចបម្រើបរិសុទ្ធ។*+ ២២ ពិតមែនហើយ តាមច្បាប់ អ្វីៗស្ទើរតែទាំងអស់ត្រូវសម្អាតដោយឈាម+ ហើយបើគ្មានការច្រួចឈាមទេ នោះគ្មានការអភ័យទោសចំពោះអំពើខុសឆ្គងឡើយ។+
២៣ ដូច្នេះ គឺចាំបាច់ឲ្យសម្អាតរបស់ដែលជានិមិត្តរូប+នៃអ្វីៗនៅស្ថានសួគ៌ដោយឈាមរបស់សត្វដែលជាគ្រឿងបូជា+ តែអ្វីៗនៅស្ថានសួគ៌ត្រូវសម្អាតដោយគ្រឿងបូជាដែលប្រសើរជាង។ ២៤ ព្រោះគ្រិស្តមិនបានចូលក្នុងកន្លែងបរិសុទ្ធដែលធ្វើដោយដៃមនុស្ស+ និងដែលធ្វើតាមគំរូអំពីអ្វីដែលពិតប្រាកដនោះឡើយ+ តែលោកបានចូលក្នុងស្ថានសួគ៌តែម្ដង+ ដើម្បីបង្ហាញខ្លួននៅចំពោះមុខព្រះផ្ទាល់ជាប្រយោជន៍ដល់យើង។+ ២៥ លោកមិនបានប្រគល់ខ្លួនជាច្រើនដង ដូចសម្ដេចសង្ឃដែលរៀងរាល់ឆ្នាំ+តែងតែយកឈាមដែលមិនមែនជាឈាមរបស់ខ្លួន ចូលក្នុងកន្លែងបរិសុទ្ធឡើយ។ ២៦ បើមិនដូច្នោះទេ លោកត្រូវរងទុក្ខជាច្រើនដងតាំងពីកំណើតពិភពលោក។ ប៉ុន្តែ លោកបានមកមួយដងជាការស្រេចនៅគ្រាចុងបញ្ចប់នៃរបៀបរបបពិភពលោក* ដើម្បីបំបាត់ភាពខុសឆ្គងដោយប្រគល់ខ្លួនលោកជាគ្រឿងបូជា។+ ២៧ ដូចមនុស្សត្រូវស្លាប់មួយដងជាការស្រេច តែក្រោយពីនោះនឹងមានការវិនិច្ឆ័យ ២៨ នោះគ្រិស្តបានប្រគល់ខ្លួនលោកមួយដងជាការស្រេចដែរ ដើម្បីទទួលយកការខុសឆ្គងរបស់មនុស្សជាច្រើន+ ហើយពេលដែលលោកលេចមកជាលើកទី២ លោកនឹងមិនបំបាត់ភាពខុសឆ្គងទេ តែលោកនឹងលេចមកដើម្បីសង្គ្រោះពួកអ្នកដែលកំពុងស្វះស្វែងរកលោក។+
១០ ច្បាប់ជាស្រមោល+នៃពរដែលនឹងមកដល់+ តែមិនមែនជារូបពិតនោះទេ។ ហេតុនេះហើយបានជាច្បាប់*និងគ្រឿងបូជាដដែលៗដែលពួកគេជូនជារៀងរាល់ឆ្នាំ មិនអាចធ្វើឲ្យអ្នកដែលចូលទៅជិតព្រះមានភាពល្អឥតខ្ចោះឡើយ។+ ២ បើគ្រឿងបូជាអាចធ្វើឲ្យពួកគេមានភាពល្អឥតខ្ចោះ ពួកគេនឹងឈប់ជូនគ្រឿងបូជាទៀត ព្រោះអស់អ្នកដែលជូនគ្រឿងបូជា*នឹងលែងដឹងអំពីការខុសឆ្គងរបស់ខ្លួនទៀត ដោយសារបានទទួលការសម្អាតមួយដងជាការស្រេច។ ៣ ផ្ទុយទៅវិញ គ្រឿងបូជាទាំងនេះរំលឹកពួកគេជារៀងរាល់ឆ្នាំថាពួកគេមានការខុសឆ្គង+ ៤ ព្រោះឈាមគោឈ្មោលនិងឈាមពពែមិនអាចដកការខុសឆ្គងចេញបានឡើយ។
៥ ដូច្នេះ ពេលដែលគ្រិស្តមកក្នុងពិភពលោក លោកមានប្រសាសន៍ថា៖ «‹លោកមិនត្រូវការគ្រឿងបូជានិងជំនូនទេ តែលោកបានរៀបចំរូបកាយមួយសម្រាប់ខ្ញុំ។ ៦ លោកមិនបានពេញចិត្តគ្រឿងបូជាដុត* និងគ្រឿងបូជាសម្រាប់ការខុសឆ្គងឡើយ›។+ ៧ រួចខ្ញុំក៏និយាយថា៖ ‹មើល! ខ្ញុំមកហើយ (បទគម្ពីរចែងអំពីខ្ញុំ)។ ឱព្រះអើយ! ខ្ញុំមកដើម្បីធ្វើតាមបំណងប្រាថ្នារបស់លោក›»។+ ៨ ក្រោយពីលោកមានប្រសាសន៍ថា៖ «លោកមិនចង់បានគ្រឿងបូជា ហើយក៏មិនពេញចិត្តជំនូន គ្រឿងបូជាដុត និងគ្រឿងបូជាសម្រាប់ការខុសឆ្គង» (គ្រឿងបូជាដែលច្បាប់តម្រូវឲ្យជូន) ៩ នោះលោកមានប្រសាសន៍ថា៖ «មើល! ខ្ញុំមកដើម្បីធ្វើតាមបំណងប្រាថ្នារបស់លោក»។+ លោកបំបាត់ចោលរបៀបរៀបចំចាស់ ដើម្បីលោកអាចស្ថាបនារបៀបរៀបចំថ្មី។ ១០ ដោយសារ«បំណងប្រាថ្នា»នោះ+ យើងបានត្រូវញែកចេញជាបរិសុទ្ធតាមរយៈការប្រគល់រូបកាយរបស់លោកយេស៊ូគ្រិស្ត មួយដងជាការស្រេច។+
១១ ម្យ៉ាងទៀត សង្ឃម្នាក់ៗចូលទៅឈរនៅកន្លែងរបស់ខ្លួនជារៀងរាល់ថ្ងៃ ដើម្បីបំពេញកិច្ចបម្រើបរិសុទ្ធ*+ ហើយជូនគ្រឿងបូជាដដែលៗជាច្រើនដង+ តែគ្រឿងបូជាទាំងនោះមិនអាចដកការខុសឆ្គងចេញទាំងស្រុងបានឡើយ។+ ១២ ចំណែកលោកវិញ លោកបានជូនគ្រឿងបូជាសម្រាប់ការខុសឆ្គងមួយដងជាការស្រេច រួចលោកបានអង្គុយនៅខាងស្ដាំព្រះ។+ ១៣ ចាប់ពីពេលនោះ លោករង់ចាំរហូតដល់ពួកសត្រូវរបស់លោកបានត្រូវដាក់ជាកំណល់កល់ជើងលោក។+ ១៤ តាមរយៈគ្រឿងបូជាតែមួយ លោកបានធ្វើឲ្យពួកអ្នកដែលត្រូវញែកជាបរិសុទ្ធ ទៅជាល្អឥតខ្ចោះ+ជាដរាប។ ១៥ បន្ថែមទៀត ឫទ្ធានុភាពបរិសុទ្ធក៏ធ្វើជាសាក្សីបញ្ជាក់ដល់យើងដែរ ដោយប្រាប់ថា៖ ១៦ «ព្រះយេហូវ៉ា*មានប្រសាសន៍ថា៖ ‹នេះជាកិច្ចព្រមព្រៀងដែលខ្ញុំនឹងធ្វើជាមួយនឹងពួកគេក្រោយពីគ្រានោះ។ ខ្ញុំនឹងដាក់ច្បាប់របស់ខ្ញុំនៅក្នុងចិត្តរបស់ពួកគេ ហើយខ្ញុំនឹងចារឹកសេចក្ដីនោះក្នុងគំនិតរបស់ពួកគេ›»។+ ១៧ បន្ទាប់មក ឫទ្ធានុភាពប្រាប់ថា៖ «ខ្ញុំនឹងមិននឹកចាំការប្រឆាំងច្បាប់និងការខុសឆ្គងរបស់ពួកគេទៀតឡើយ»។+ ១៨ ពេលដែលការខុសឆ្គងទាំងនោះបានត្រូវអភ័យទោស នោះលែងត្រូវការគ្រឿងបូជាសម្រាប់ការខុសឆ្គងទៀតហើយ។
១៩ ដូច្នេះ បងប្អូនអើយ ដោយសារយើងមានចិត្តក្លាហានចូលតាមផ្លូវទៅឯកន្លែងបរិសុទ្ធ+តាមរយៈឈាមរបស់លោកយេស៊ូ ២០ ជាផ្លូវថ្មីដែលនាំទៅឯជីវិត និងជាផ្លូវដែលលោកបានបើកឲ្យយើងចូលតាមវាំងនន+ ពោលគឺសាច់ឈាមរបស់លោក ២១ ហើយដោយសារយើងមានសម្ដេចសង្ឃឧត្ដុង្គឧត្ដមដែលត្រួតលើពួកអ្នកផ្ទះរបស់ព្រះ+ ២២ នោះចូរយើងចូលទៅជិតព្រះដោយមានចិត្តស្មោះនិងជំនឿរឹងមាំ ហើយមានចិត្តដែលបានត្រូវសម្អាត*ពីសមត្ថភាពវិនិច្ឆ័យដែលមិនស្អាតស្អំ+ ព្រមទាំងមានរូបកាយដែលបានត្រូវលាងសម្អាតដោយទឹកស្អាត។+ ២៣ ចូរយើងខំព្យាយាមឥតឈប់ដោយមិនរួញរាក្នុងការប្រកាសប្រាប់សេចក្ដីសង្ឃឹមរបស់យើងដល់មនុស្សទាំងអស់+ ពីព្រោះលោកដែលបានសន្យាគឺស្មោះត្រង់។ ២៤ ចូរយើងគិតអំពីគ្នាទៅវិញទៅមក ដើម្បីលើកទឹកចិត្តគ្នាឲ្យមានសេចក្ដីស្រឡាញ់ និងការប្រព្រឹត្តដែលល្អប្រសើរ+ ២៥ មិនមែនដោយគេចវេះការប្រជុំគ្នា+ ដូចអ្នកខ្លះមានទម្លាប់គេចវេះនោះទេ តែដោយលើកទឹកចិត្តគ្នាទៅវិញទៅមក+ឲ្យកាន់តែខ្លាំងឡើង ពេលដែលអ្នករាល់គ្នាឃើញថ្ងៃនោះកាន់តែខិតចូលមកដល់។+
២៦ ព្រោះប្រសិនបើយើងប្រព្រឹត្តអំពើខុសឆ្គងដោយចេតនាក្រោយពីយើងបានទទួលចំណេះត្រឹមត្រូវអំពីសេចក្ដីពិតហើយ+ នោះគ្មានគ្រឿងបូជាណាអាចត្រូវជូនសម្រាប់ការខុសឆ្គងរបស់យើងឡើយ+ ២៧ មានតែរង់ចាំការវិនិច្ឆ័យទោសដោយភ័យខ្លាច និងសេចក្ដីក្រោធខ្លាំងក្រៃលែងរបស់ព្រះដែលនឹងបំផ្លាញពួកអ្នកប្រឆាំងលោក។+ ២៨ អ្នកណាដែលបំពានលើច្បាប់ម៉ូសេ អ្នកនោះនឹងត្រូវសម្លាប់ចោលដោយឥតត្រាប្រណី បើមានសាក្សីពីរឬបីនាក់បញ្ជាក់អំពីការបំពាននោះ។+ ២៩ ដូច្នេះ អ្នកណាដែលបានជាន់ឈ្លីបុត្ររបស់ព្រះ ហើយចាត់ទុកឈាមនៃកិច្ចព្រមព្រៀង+ដែលបានញែកអ្នកនោះចេញជាបរិសុទ្ធថាជារបស់ធម្មតា ថែមទាំងបានប្រមាថមើលងាយយ៉ាងខ្លាំងចំពោះឫទ្ធានុភាពនៃគុណដ៏វិសេសលើសលប់ តើអ្នករាល់គ្នាគិតថាអ្នកនោះសមនឹងទទួលទោសធ្ងន់ដល់កម្រិតណា?+ ៣០ ព្រោះយើងស្គាល់លោកដែលមានប្រសាសន៍ថា៖ «ការសងសឹកជារបស់ខ្ញុំ ខ្ញុំនឹងសងគេវិញ» ហើយលោកក៏មានប្រសាសន៍ដែរថា៖ «ព្រះយេហូវ៉ា*នឹងវិនិច្ឆ័យរាស្ដ្ររបស់លោក»។+ ៣១ ការធ្លាក់ចូលក្នុងកណ្ដាប់ដៃរបស់ព្រះដែលមានជីវិតរស់នៅ ជាអ្វីដែលគួរឲ្យរន្ធត់ណាស់។
៣២ ក៏ប៉ុន្តែ ចូរនឹកចាំអំពីគ្រាមុនជានិច្ច ក្រោយពីអ្នករាល់គ្នាបានត្រូវបំភ្លឺ+ អ្នករាល់គ្នាបានស៊ូទ្រាំយ៉ាងខ្លាំង ទោះជារងទុក្ខលំបាកផ្សេងៗក៏ដោយ។ ៣៣ ពេលខ្លះអ្នករាល់គ្នាត្រូវគេធ្វើបាបនិងជេរប្រមាថជាសាធារណៈ ហើយពេលខ្លះទៀត អ្នករាល់គ្នាបានរួមទុក្ខជាមួយនឹងអ្នកដែលកំពុងជួបប្រទះទុក្ខលំបាកបែបនេះ។ ៣៤ ព្រោះអ្នករាល់គ្នាបានបង្ហាញចិត្តអាណិតអាសូរចំពោះអ្នកដែលជាប់គុក ក៏បានទ្រាំទាំងមានអំណរពេលដែលគេរឹបអូសទ្រព្យសម្បត្តិរបស់អ្នករាល់គ្នា+ ដោយសារអ្នករាល់គ្នាដឹងថាខ្លួនមានទ្រព្យដែលប្រសើរជាង និងជាទ្រព្យដែលស្ថិតស្ថេរ។+
៣៥ ដូច្នេះ ចូរបន្តមានចិត្តក្លាហាន* ព្រោះការនោះនឹងនាំឲ្យបានរង្វាន់យ៉ាងធំ។+ ៣៦ អ្នករាល់គ្នាត្រូវស៊ូទ្រាំ+ ដើម្បីឲ្យអ្នករាល់គ្នាទទួលតាមសេចក្ដីសន្យា ក្រោយពីបានធ្វើតាមបំណងប្រាថ្នារបស់ព្រះ។ ៣៧ ពីព្រោះនៅតែ«បន្តិចទៀត»+ នោះ«លោកដែលត្រូវមក នឹងមកដល់ ហើយមិនបង្អែបង្អង់ឡើយ»។+ ៣៨ «ប៉ុន្តែ អ្នកបម្រើសុចរិតរបស់ខ្ញុំនឹងរស់ដោយសារជំនឿ»+ ហើយ«ប្រសិនបើគាត់រាថយ ខ្ញុំមិនពេញចិត្តគាត់ទេ»។+ ៣៩ ក៏ប៉ុន្តែ យើងមិនមែនជាមនុស្សដែលរាថយឲ្យត្រូវបំផ្លាញនោះទេ+ តែយើងជាមនុស្សដែលមានជំនឿដើម្បីរក្សាជីវិត។
១១ ជំនឿគឺជាការទុកចិត្តដោយមានទីសំអាងមាំមួនថា អ្វីៗនឹងកើតឡើងដូចសង្ឃឹម+ ហើយជាការឃើញភ័ស្តុតាងដែលនាំឲ្យជឿជាក់ថា អ្វីដែលភ្នែកមើលមិនឃើញពិតជាមានមែន។ ២ ព្រោះដោយមានជំនឿដូចនេះ មនុស្សនៅសម័យបុរាណបានទទួលការបញ្ជាក់ថាព្រះពេញចិត្តពួកគេ។
៣ ដោយសារជំនឿ យើងយល់ឃើញថាអ្វីៗក្នុងសកលលោក*បានត្រូវរៀបចំឡើងដោយប្រសាសន៍របស់ព្រះ។ ហេតុនេះ អ្វីដែលយើងមើលឃើញបានកើតចេញពីអ្វីដែលយើងមើលមិនឃើញ។
៤ ដោយសារជំនឿ អេបិលបានជូនគ្រឿងបូជាដែលមានតម្លៃខ្ពស់ជាងគ្រឿងបូជារបស់កាអ៊ីន+ ហើយដោយសារជំនឿ ព្រះបានបញ្ជាក់ថាគាត់ជាមនុស្សសុចរិត ព្រោះលោកពេញចិត្តអំណោយរបស់គាត់។+ ទោះជាអេបិលស្លាប់ហើយក៏ដោយ គាត់នៅតែនិយាយនៅឡើយ+ តាមរយៈជំនឿរបស់គាត់។
៥ ដោយសារជំនឿ អេណុក+បានត្រូវយកចេញ ដើម្បីកុំឲ្យជួបសេចក្ដីស្លាប់ ហើយគេមិនអាចរកគាត់ឃើញឡើយ ពីព្រោះព្រះបានយកគាត់ចេញ។+ ប៉ុន្តែ មុនពេលដែលគាត់ត្រូវយកចេញ ព្រះបានបញ្ជាក់ថាគាត់ធ្វើឲ្យលោកពេញចិត្ត។ ៦ ម្យ៉ាងទៀត បើគ្មានជំនឿទេ នោះមិនអាចធ្វើឲ្យព្រះពេញចិត្តបានឡើយ ព្រោះអ្នកដែលចូលទៅជិតព្រះ ត្រូវតែជឿថាមានព្រះ ហើយជឿថាលោកឲ្យរង្វាន់ដល់អ្នកដែលខំស្វែងរកលោកអស់ពីចិត្ត។+
៧ ដោយសារជំនឿ ពេលណូអេ+ទទួលការព្រមានពីព្រះស្ដីអំពីការដែលគាត់មិនទាន់ឃើញនៅឡើយ+ នោះគាត់បង្ហាញការកោតខ្លាចចំពោះព្រះ ហើយសង់ទូកធំ+ដើម្បីសង្គ្រោះពួកអ្នកផ្ទះរបស់គាត់។ តាមរយៈជំនឿ គាត់បានបង្ហាញថាពិភពលោកសមនឹងត្រូវបំផ្លាញចោល+ ហើយគាត់បានទទួលមត៌កជាសេចក្ដីសុចរិតដែលមកពីជំនឿ។
៨ ដោយសារជំនឿ ពេលដែលអាប្រាហាំ+បានត្រូវហៅ នោះគាត់ស្ដាប់បង្គាប់ដោយចេញទៅកន្លែងដែលគាត់ត្រូវទទួលជាមត៌ក។ គាត់ចាកចេញទៅ ទោះជាគាត់មិនបានដឹងថាគាត់ទៅកន្លែងណាក៏ដោយ។+ ៩ ដោយសារជំនឿ គាត់បានស្នាក់នៅជាជនបរទេសក្នុងស្រុកដែលព្រះបានសន្យា+ ក៏បានរស់នៅក្នុងត្រសាល+ជាមួយនឹងអ៊ីសាកនិងយ៉ាកុប ជាអ្នកទទួលសេចក្ដីសន្យាដដែលនោះជាមត៌ករួមជាមួយនឹងគាត់។+ ១០ ព្រោះគាត់រង់ចាំក្រុងដែលមានគ្រឹះដ៏ពិត ជាក្រុងដែលមានព្រះជាអ្នកចេញប្លង់*និងជាអ្នកបង្កើត។+
១១ ដោយសារជំនឿ សារ៉ាបានទទួលសមត្ថភាពមានផ្ទៃពោះបង្កើតកូន* ទោះជានាងហួសអាយុនឹងបង្កើតកូនក៏ដោយ+ ពីព្រោះនាងចាត់ទុកថាលោកដែលបានសន្យាការនោះគឺស្មោះត្រង់។* ១២ ម្ល៉ោះហើយ ពីបុរសតែម្នាក់ដែលប្រៀបដូចជាស្លាប់+ មានកូនកើតមក+ដែលមានចំនួនច្រើនដូចផ្កាយនៅលើមេឃ និងដែលរាប់មិនអស់ដូចគ្រាប់ខ្សាច់នៅឆ្នេរសមុទ្រ។+
១៣ អ្នកទាំងអស់នោះបានស្លាប់ដោយមានជំនឿ ទោះជាពួកគេមិនបានទទួលអ្វីដែលបានត្រូវសន្យាក៏ដោយ។+ ប៉ុន្តែ ពួកគេបានឃើញការនោះពីចម្ងាយ+ ហើយបានរីករាយនឹងការនោះ ថែមទាំងបានប្រកាសជាចំហថា ពួកគេជាជនបរទេសនិងជាអ្នកស្នាក់នៅបណ្ដោះអាសន្នក្នុងស្រុក។ ១៤ ព្រោះមនុស្សដែលនិយាយដូច្នោះ បញ្ជាក់ថាពួកគេកំពុងស្វែងរកយ៉ាងអស់ពីចិត្តនូវកន្លែងដែលនឹងទៅជារបស់ខ្លួន។ ១៥ ទោះជាយ៉ាងនោះក៏ដោយ ប្រសិនបើពួកគេបន្តនឹកនាដល់កន្លែងដែលពួកគេបានចាកចេញ+ ពួកគេនឹងមានឱកាសត្រឡប់ទៅវិញ។ ១៦ ប៉ុន្តែ ពួកគេកំពុងខំព្យាយាមដើម្បីឲ្យបានកន្លែងដែលប្រសើរជាង ជាកន្លែងរបស់ស្ថានសួគ៌។ ដូច្នេះ ព្រះមិនអៀនខ្មាសទេដែលលោកបានត្រូវហៅថាជាព្រះរបស់ពួកគេ+ ព្រោះលោកបានរៀបចំក្រុងមួយសម្រាប់ពួកគេ។+
១៧ ដោយសារជំនឿ ពេលដែលអាប្រាហាំបានត្រូវល្បងល+ គាត់បានបង្ហាញជំនឿរបស់គាត់ដោយបម្រុងនឹងបូជាអ៊ីសាក ពោលគឺអាប្រាហាំដែលបានទទួលសេចក្ដីសន្យាដោយអំណរ ហៀបនឹងបូជាកូនប្រុសតែមួយរបស់គាត់+ ១៨ ទោះជាព្រះបានមានប្រសាសន៍ទៅគាត់ថា៖ «អ្នកដែលនឹងត្រូវហៅថាកូនចៅ*របស់អ្នក នឹងកើតពីអ៊ីសាក»ក៏ដោយ។+ ១៩ ប៉ុន្តែ គាត់យល់ឃើញថា ព្រះអាចប្រោសឲ្យអ៊ីសាករស់ឡើងវិញ សូម្បីតែស្លាប់ទៅហើយ។ រួចគាត់បានទទួលអ៊ីសាកពីសេចក្ដីស្លាប់ក្នុងន័យធៀបមែន។+
២០ ដោយសារជំនឿ អ៊ីសាកបានឲ្យពរដល់យ៉ាកុប+និងអេសាវ+ស្ដីអំពីអ្វីៗនៅថ្ងៃមុខ។
២១ ដោយសារជំនឿ ពេលដែលយ៉ាកុបជិតស្លាប់+ គាត់ឲ្យពរដល់កូនប្រុសម្នាក់ៗរបស់យ៉ូសែប+ រួចលំឱនកាយគោរពព្រះ*កាលដែលច្រត់លើដំបងរបស់គាត់។+
២២ ដោយសារជំនឿ ពេលដែលយ៉ូសែបជិតស្លាប់ គាត់និយាយអំពីការចាកចេញរបស់កូនចៅអ៊ីស្រាអែល ហើយគាត់ឲ្យបង្គាប់ដល់ពួកគេស្ដីអំពីឆ្អឹងរបស់គាត់។+
២៣ ដោយសារជំនឿ ឪពុកម្ដាយរបស់ម៉ូសេបានលាក់គាត់អស់បីខែ+ក្រោយពីគាត់បានកើតមក ពីព្រោះពួកគាត់ឃើញថាកូនតូចនោះស្អាតណាស់+ ហើយពួកគាត់មិនខ្លាចបង្គាប់របស់ស្ដេចទេ។+ ២៤ ដោយសារជំនឿ ពេលដែលម៉ូសេធំពេញវ័យ+ គាត់មិនព្រមឲ្យគេហៅគាត់ថាជាកូនរបស់កូនស្រីផារ៉ូឡើយ។+ ២៥ គាត់សម្រេចចិត្តឲ្យគេធ្វើបាបគាត់ជាមួយនឹងរាស្ដ្ររបស់ព្រះ ជាជាងសប្បាយមួយរយៈពេលខ្លីនឹងអំពើខុសឆ្គង ២៦ ដោយសារគាត់ចាត់ទុកការរងការជេរប្រមាថក្នុងនាមជាអ្នកដែលព្រះបានតែងតាំង*ថា ជាទ្រព្យវិសេសជាងទ្រព្យទាំងអស់ក្នុងស្រុកអេហ្ស៊ីប ព្រោះគាត់សម្លឹងចំទៅរង្វាន់។ ២៧ ដោយសារជំនឿ គាត់ចេញពីស្រុកអេហ្ស៊ីប+ តែមិនមែនដោយខ្លាចកំហឹងរបស់ស្ដេចទេ+ ព្រោះគាត់បន្តស៊ូទ្រាំយ៉ាងអត់ធ្មត់ ហាក់ដូចជាមើលឃើញព្រះដែលមនុស្សមើលមិនឃើញ។+ ២៨ ដោយសារជំនឿ គាត់បានធ្វើបុណ្យរំលង ហើយប្រោះឈាម ដើម្បីកុំឲ្យទេវតារបស់ព្រះប៉ះពាល់កូនច្បងរបស់ពួកគេ។+
២៩ ដោយសារជំនឿ ពួកគេបានដើរកាត់សមុទ្រក្រហមដូចដើរលើដីគោក។+ ប៉ុន្តែ ពេលដែលជនជាតិអេហ្ស៊ីបដេញតាម នោះទឹកសមុទ្របានលេបពួកគេបាត់។+
៣០ ដោយសារជំនឿ ជនជាតិអ៊ីស្រាអែលបានដើរជុំវិញកំពែងក្រុងយេរីខូអស់៧ថ្ងៃ ហើយកំពែងនោះបានរលំ។+ ៣១ ដោយសារជំនឿ រ៉ាហាបដែលជាស្រីពេស្យាមិនបានវិនាសជីវិតជាមួយនឹងពួកអ្នកដែលមិនស្ដាប់បង្គាប់ឡើយ ពីព្រោះនាងបានទទួលពួកអ្នកស៊ើបការណ៍ដោយរាក់ទាក់។+
៣២ តើខ្ញុំគួររៀបរាប់អំពីអ្នកណាទៀត? ព្រោះគ្មានពេលគ្រប់គ្រាន់ឲ្យខ្ញុំរៀបរាប់អំពីគេឌាន+ បារ៉ាក់+ សាំសុន+ យែបថា+ ដាវីឌ+ ព្រមទាំងសាំយូអែល+ និងពួកអ្នកប្រកាសទំនាយឯទៀតទេ ៣៣ ព្រោះតាមរយៈជំនឿ ពួកគេបានច្បាំងឈ្នះរាជាណាចក្រផ្សេងៗ+ បានធ្វើឲ្យមានសេចក្ដីសុចរិត បានទទួលសេចក្ដីសន្យា+ បានបិទមាត់តោ+ ៣៤ បានទប់កម្ដៅភ្លើង+ បានរួចពីមុខដាវ+ ធ្លាប់ខ្សោយតែបានត្រូវធ្វើឲ្យមានកម្លាំងខ្លាំងក្លា+ បានទៅជាអ្នកច្បាំងអង់អាចក្នុងសង្គ្រាម+ និងបានបំបាក់ទ័ពឈ្លានពាន។+ ៣៥ ស្ត្រីខ្លះបានទទួលអស់អ្នកដែលស្លាប់មកវិញ តាមរយៈការប្រោសឲ្យរស់ឡើងវិញ។+ ប៉ុន្តែ បុរសឯទៀតត្រូវគេធ្វើទារុណកម្ម ដោយសារពួកគេមិនព្រមលះបង់ជំនឿដើម្បីឲ្យរួចខ្លួនទេ។ យ៉ាងនេះ ពួកគេអាចទទួលការប្រោសឲ្យរស់ឡើងវិញដែលប្រសើរជាង។ ៣៦ ចំណែកអ្នកឯទៀតបានត្រូវល្បងលដោយការចំអកមើលងាយ ត្រូវគេវាយ ថែមទាំងត្រូវគេដាក់គុកដាក់ច្រវាក់ទៀតផង។+ ៣៧ ពួកគេត្រូវគេគប់នឹងថ្ម+ ត្រូវគេល្បងល ត្រូវគេអារបណ្ដាច់ខ្លួន និងត្រូវគេសម្លាប់ដោយដាវ។+ ពួកគេស្លៀករោមចៀមនិងរោមពពែ+ ក៏បានខ្វះខាត រងទុក្ខលំបាក+ និងត្រូវគេធ្វើបាប+ ៣៨ ហើយពិភពលោកមិនសមនឹងពួកគេឡើយ។ ពួកគេរស់នៅតាមរអាង+ តំបន់ស្ងាត់ជ្រងំ ភ្នំ និងរូងដី។
៣៩ ប៉ុន្តែ អ្នកទាំងអស់នោះមិនបានទទួលអ្វីដែលព្រះបានសន្យាទេ ទោះជាលោកបានបញ្ជាក់ថាលោកពេញចិត្តពួកគេក៏ដោយ។ ៤០ ពួកគេមិនអាចទៅជាល្អឥតខ្ចោះមុនយើងទេ*+ ព្រោះព្រះឃើញទុកជាមុននូវអ្វីដែលប្រសើរជាងសម្រាប់យើង។
១២ ដូច្នេះ ដោយសារមានសាក្សីមួយក្រុមធំ*យ៉ាងនេះនៅជុំវិញយើង ចូរយើងចោលអ្វីៗទាំងអស់ដែលធ្ងន់ និងការខុសឆ្គងដែលទាក់យើងយ៉ាងងាយនោះ+ ហើយចូរយើងរត់ដោយស៊ូទ្រាំក្នុងការប្រណាំងដែលព្រះបានកំណត់ឲ្យយើង។+ ២ ដំណាលគ្នានោះ យើងសម្លឹងមើលទៅលោកយេស៊ូ ជាមេដឹកនាំដែលធ្វើឲ្យយើងមានជំនឿ និងដែលធ្វើឲ្យជំនឿរបស់យើងបានពេញលក្ខណៈ។+ ដោយសារអំណរដែលនៅខាងមុខលោក លោកបានស៊ូទ្រាំលើបង្គោលទារុណកម្ម* ក៏មិនបានអាម៉ាស់ខ្មាសដែរ ហើយឥឡូវលោកបានអង្គុយនៅខាងស្ដាំបល្ល័ង្កនៃព្រះ។+ ៣ ចូរពិចារណាឲ្យបានដិតដល់អំពីលោកដែលបានស៊ូទ្រាំនឹងសម្ដីប្រឆាំងពីពួកអ្នកប្រព្រឹត្តអំពើខុសឆ្គង+ ជាសម្ដីដែលពួកគេផ្ដន្ទាទោសខ្លួនឯង។ ការដែលអ្នករាល់គ្នាធ្វើដូច្នេះ អ្នករាល់គ្នានឹងមិនល្វើយ ហើយមិនឈប់ព្យាយាម។+
៤ ក្នុងការតស៊ូនឹងភាពខុសឆ្គងនោះ អ្នករាល់គ្នាមិនទាន់តស៊ូរហូតដល់ស្លាប់ទេ។ ៥ ម្យ៉ាងទៀត អ្នករាល់គ្នាបានភ្លេចទាំងស្រុងនូវដំបូន្មានទៅកាន់អ្នករាល់គ្នា ដូចជាពាក្យទូន្មានរបស់ឪពុកទៅកាន់កូនថា៖ «កូនអើយ កុំមើលងាយការប្រដៅពីព្រះយេហូវ៉ា*ឡើយ ហើយកុំឈប់ព្យាយាម ពេលដែលលោកកែតម្រង់កូន។ ៦ ព្រោះព្រះយេហូវ៉ា*ប្រៀនប្រដៅអស់អ្នកដែលលោកស្រឡាញ់ តាមការពិត អស់អ្នកដែលលោកទទួលជាកូន លោកវាយនឹងរំពាត់»។+
៧ អ្នករាល់គ្នាត្រូវស៊ូទ្រាំ ព្រោះនោះទុកជាការប្រៀនប្រដៅ។* ព្រះកំពុងប្រព្រឹត្តចំពោះអ្នករាល់គ្នាដូចកូន។+ តើមានឪពុកណាដែលមិនប្រៀនប្រដៅកូនឬទេ?+ ៨ ក៏ប៉ុន្តែ ប្រសិនបើអ្នករាល់គ្នាមិនទទួលការប្រៀនប្រដៅ នោះអ្នករាល់គ្នាជាកូនឥតស្របច្បាប់ ហើយមិនមែនជាកូនពិតទេ។ ៩ ម្យ៉ាងទៀត យើងមានឪពុកជាមនុស្សដែលធ្លាប់ប្រដៅយើង ហើយយើងបានគោរពពួកគាត់ ទម្រាំតែបិតាដែលណែនាំជីវិតយើងដោយឫទ្ធានុភាពរបស់លោកដើម្បីឲ្យយើងនៅរស់ យើងក៏ត្រូវចុះចូលនឹងលោកជាងនោះទៅទៀត មែនទេ?+ ១០ ព្រោះអស់មួយរយៈពេលខ្លី ពួកគាត់ធ្លាប់ប្រៀនប្រដៅយើងតាមតែពួកគាត់គិតថាល្អ តែព្រះប្រៀនប្រដៅយើងជាប្រយោជន៍ដល់យើង ដើម្បីឲ្យយើងរួមចំណែកក្នុងសេចក្ដីបរិសុទ្ធរបស់លោក។+ ១១ ពិតមែន ពេលទទួលការប្រៀនប្រដៅ នោះធ្វើឲ្យកើតទុក្ខ* មិនមែនធ្វើឲ្យមានអំណរទេ។ ប៉ុន្តែ ក្រោយមកអ្នកដែលសុខចិត្តទទួលការប្រៀនប្រដៅនោះ នឹងទទួលផលជាសេចក្ដីសុខសាន្តនិងរបៀបរស់នៅដ៏សុចរិត។
១២ ដូច្នេះ ចូរធ្វើឲ្យដៃដែលស្រយុតនិងជង្គង់ដែលទន់បានមាំមួនឡើង+ ១៣ ហើយចូរបន្តធ្វើផ្លូវឲ្យត្រង់សម្រាប់ជើងអ្នករាល់គ្នា+ ដើម្បីកុំឲ្យអវយវៈដែលរបួសនោះភ្លាត់ឆ្អឹង តែដើម្បីឲ្យជាឡើងវិញ។ ១៤ ចូរខំប្រឹងឲ្យមានសន្តិភាពជាមួយនឹងមនុស្សទាំងអស់+ ហើយខំប្រឹងឲ្យមានសេចក្ដីបរិសុទ្ធ+ ព្រោះអ្នកណាដែលគ្មានសេចក្ដីបរិសុទ្ធ អ្នកនោះនឹងមិនឃើញលោកម្ចាស់ទេ។ ១៥ ចូរប្រុងប្រយ័ត្ន កុំឲ្យអ្នកណាបាត់បង់គុណដ៏វិសេសលើសលប់របស់ព្រះ ដើម្បីកុំឲ្យឫសដែលមានពិសពុលអាចដុះឡើងបង្កើតបញ្ហា ហើយធ្វើឲ្យមនុស្សជាច្រើនស្មោកគ្រោក។+ ១៦ ចូរប្រយ័ត្ន កុំឲ្យមានអ្នកណាក្នុងចំណោមអ្នករាល់គ្នាប្រព្រឹត្តអំពើប្រាសចាកសីលធម៌ខាងផ្លូវភេទ* ឬមានអ្នកណាដែលមិនឲ្យតម្លៃទៅលើអ្វីដែលពិសិដ្ឋ ដូចអេសាវនោះឡើយ ព្រោះគាត់បានប្រគល់សិទ្ធិជាកូនច្បងដើម្បីប្ដូរយកអាហារតែមួយពេល។+ ១៧ ពីព្រោះអ្នករាល់គ្នាដឹងថា ក្រោយមកពេលដែលគាត់ចង់ទទួលពរនោះជាមត៌ក គាត់បានត្រូវបដិសេធ។ ទោះជាគាត់ស្រក់ទឹកភ្នែក ហើយខំប្រឹងអស់ពីចិត្តដើម្បីធ្វើឲ្យឪពុកដូរគំនិតក៏ដោយ+ គាត់ធ្វើមិនបានសម្រេចទេ។
១៨ ព្រោះអ្នករាល់គ្នាមិនបានចូលទៅជិតភ្នំមួយដែលអ្នករាល់គ្នាអាចពាល់បាន+ ហើយជាភ្នំដែលបានត្រូវធ្វើឲ្យមានភ្លើងឆេះ+ មានពពកខ្មៅ មានភាពងងឹតសូន្យសុង និងមានព្យុះបក់បោកទេ+ ១៩ ហើយក៏មិនបានចូលទៅជិតភ្នំនោះដែលមានសំឡេងត្រែ+ និងមានសំឡេងមួយបន្លឺទៅកាន់ពួកគេដែរ។+ ក្រោយពីឮសំឡេងនោះហើយ ពួកគេអង្វរសុំកុំឲ្យសំឡេងនោះបន្លឺទៅកាន់ពួកគេទៀត។+ ២០ ព្រោះពួកគេខ្លាចបង្គាប់ដែលថា៖ «ប្រសិនបើមានសត្វណាប៉ះភ្នំនេះ ត្រូវគប់ថ្មសម្លាប់សត្វនោះចោល»។+ ២១ ម្យ៉ាងទៀត ការនោះគួរឲ្យខ្លាចដល់ម្ល៉េះបានជាម៉ូសេនិយាយថា៖ «ខ្ញុំភ័យខ្លាច ក៏ញ័ររន្ធត់ផង»។+ ២២ ប៉ុន្តែ អ្នករាល់គ្នាបានចូលទៅជិតភ្នំស៊ីយ៉ូន+ និងក្រុងរបស់ព្រះដែលមានជីវិតរស់នៅ ជាក្រុងយេរូសាឡិមនាស្ថានសួគ៌+ ព្រមទាំងទេវតាជាច្រើនអនេក*ដែលនៅជុំគ្នា+ ២៣ និងក្រុមជំនុំរបស់បុត្រច្បងដែលមានឈ្មោះកត់ទុកនៅស្ថានសួគ៌ ព្រមទាំងព្រះដែលជាចៅក្រមរបស់បុគ្គលគ្រប់រូប+ និងមនុស្សសុចរិតដែលបានកើតពីឫទ្ធានុភាព+ ហើយដែលបានត្រូវធ្វើឲ្យល្អឥតខ្ចោះ+ ២៤ និងលោកយេស៊ូជាអ្នកសម្រុះសម្រួល+កិច្ចព្រមព្រៀងថ្មី+ ព្រមទាំងឈាមដែលលោកបានប្រោះមកលើយើង ជាឈាមដែលនិយាយអំពីអ្វីដែលប្រសើរជាងឈាមរបស់អេបិល។+
២៥ ចូរប្រយ័ត្ន កុំឲ្យអ្នករាល់គ្នារកលេសមិនស្ដាប់បង្គាប់លោកដែលកំពុងមានប្រសាសន៍ឡើយ។ ព្រោះប្រសិនបើអស់អ្នកដែលបានរកលេសមិនស្ដាប់បង្គាប់អ្នកដែលប្រាប់សេចក្ដីព្រមានរបស់ព្រះនៅផែនដី ពួកគេមិនអាចគេចពីទោសនៅពេលនោះ ទម្រាំតែយើងវិញ យើងច្បាស់ជាមិនអាចគេចពីទោសបានឡើយ ប្រសិនបើយើងបែរចេញពីលោកដែលមានប្រសាសន៍ចេញពីស្ថានសួគ៌!+ ២៦ នៅពេលនោះ សំឡេងរបស់លោកបានធ្វើឲ្យផែនដីរញ្ជួយ+ ប៉ុន្តែឥឡូវលោកបានសន្យាថា៖ «ខ្ញុំនឹងអង្រួនមេឃនិងផែនដីម្ដងទៀត»។+ ២៧ ពាក្យថា«ម្ដងទៀត» បញ្ជាក់អំពីការដកចេញនូវអ្វីដែលនឹងត្រូវធ្វើឲ្យរញ្ជួយ ជាអ្វីដែលបានត្រូវបង្កើត ដើម្បីឲ្យអ្វីដែលនឹងមិនត្រូវធ្វើឲ្យរញ្ជួយនៅស្ថិតស្ថេរ។ ២៨ យើងឃើញថាយើងនឹងទទួលរាជាណាចក្រដែលមិនអាចត្រូវធ្វើឲ្យរញ្ជួយឡើយ។ ហេតុនេះ ចូរយើងបន្តទទួលគុណដ៏វិសេសលើសលប់ជានិច្ច ហើយតាមរយៈគុណដ៏វិសេសលើសលប់នោះ យើងអាចបំពេញកិច្ចបម្រើពិសិដ្ឋជូនព្រះតាមរបៀបដែលលោកពេញចិត្ត។ យើងធ្វើដូច្នេះដោយកោតខ្លាចនិងស្ញប់ស្ញែង។ ២៩ ព្រោះព្រះរបស់យើងប្រៀបដូចជាភ្លើងឆេះសន្ធោសន្ធៅ។+
១៣ ចូរបន្តស្រឡាញ់គ្នាជាបងប្អូន។+ ២ កុំភ្លេចទទួលអ្នកឯទៀតដោយរាក់ទាក់*+ ព្រោះការធ្វើបែបនេះ អ្នកខ្លះបានទទួលទេវតាដោយមិនដឹងខ្លួន។+ ៣ ចូរចាំជានិច្ចអំពីពួកអ្នកដែលជាប់គុក+ ហាក់ដូចជាខ្លួនអ្នកកំពុងជាប់គុកជាមួយនឹងពួកគេដែរ+ ហើយចូរចាំជានិច្ចអំពីពួកអ្នកដែលកំពុងត្រូវគេធ្វើបាប ព្រោះអ្នករាល់គ្នានៅក្នុងរូបកាយតែមួយ។* ៤ ចូរឲ្យមនុស្សទាំងអស់គ្នាចាត់ទុកអាពាហ៍ពិពាហ៍ជាអ្វីដែលមានតម្លៃ ហើយចូរឲ្យការរួមរស់ជាប្ដីប្រពន្ធឥតសៅហ្មង+ ព្រោះព្រះនឹងវិនិច្ឆ័យទោសអ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ*និងអ្នកផិតក្បត់។+ ៥ ចូរមានរបៀបរស់នៅដែលប្រាសចាកពីការស្រឡាញ់ប្រាក់+ ហើយចូរស្កប់ចិត្តនឹងអ្វីដែលអ្នករាល់គ្នាមាន។+ ព្រោះព្រះបានមានប្រសាសន៍ថា៖ «ខ្ញុំប្រាកដជាមិនចាកចេញពីអ្នកឡើយ ហើយខ្ញុំក៏ប្រាកដជាមិនបោះបង់ចោលអ្នកដែរ»។+ ៦ ហេតុនេះហើយបានជាយើងអាចមានទំនុកចិត្តទាំងស្រុងថា៖ «ព្រះយេហូវ៉ា*ជាអ្នកជួយខ្ញុំ ខ្ញុំនឹងមិនខ្លាចឡើយ។ តើមនុស្សអាចធ្វើអ្វីដល់ខ្ញុំ?»។+
៧ ចូរចាំអំពីពួកអ្នកដែលកំពុងនាំមុខអ្នករាល់គ្នា+ ជាអ្នកដែលបានប្រាប់បណ្ដាំរបស់ព្រះដល់អ្នករាល់គ្នា ហើយពេលពិចារណាមើលការប្រព្រឹត្តល្អរបស់ពួកគាត់ ចូរយកតម្រាប់ជំនឿរបស់ពួកគាត់។+
៨ លោកយេស៊ូគ្រិស្តគឺនៅដដែល ម្សិលមិញ ថ្ងៃនេះ និងជារៀងរហូតតទៅ។
៩ ចូរកុំបែរចេញទៅតាមសេចក្ដីបង្រៀនចម្លែកផ្សេងៗឡើយ ព្រោះអ្វីដែលជួយអ្នករាល់គ្នាឲ្យរឹងមាំ*គឺគុណដ៏វិសេសលើសលប់របស់ព្រះ មិនមែនម្ហូបអាហារ*ទេ ដោយសារពួកអ្នកដែលផ្ដោតអារម្មណ៍ទៅលើម្ហូបអាហារ ពួកគេមិនទទួលប្រយោជន៍ឡើយ។+
១០ យើងមានទីបូជាមួយ តែមនុស្សដែលបំពេញកិច្ចបម្រើពិសិដ្ឋនៅត្រសាល គ្មានសិទ្ធិបរិភោគគ្រឿងបូជាពីទីបូជានោះទេ។+ ១១ ព្រោះសម្ដេចសង្ឃបានយកឈាមសត្វចូលក្នុងកន្លែងបរិសុទ្ធសម្រាប់ការខុសឆ្គង ប៉ុន្តែខ្មោចសត្វត្រូវដុតចោលខាងក្រៅជំរំវិញ។+ ១២ ដូចគ្នាដែរ លោកយេស៊ូបានរងទុក្ខនៅខាងក្រៅទ្វារក្រុង+ ដើម្បីធ្វើឲ្យបណ្ដាជនបានបរិសុទ្ធតាមរយៈឈាមរបស់លោកផ្ទាល់។+ ១៣ ដូច្នេះ ចូរយើងទៅឯលោកនៅខាងក្រៅជំរំ ហើយរងការជេរប្រមាថដែលលោកបានរង+ ១៤ ព្រោះយើងមិនមានក្រុងមួយដែលស្ថិតស្ថេរទេ តែយើងកំពុងទន្ទឹងរង់ចាំក្រុងដែលនឹងមាននៅថ្ងៃមុខដោយចិត្តរំភើប។+ ១៥ ដូច្នេះ តាមរយៈលោកយេស៊ូ ចូរយើងជូនព្រះនូវសេចក្ដីសរសើរជាគ្រឿងបូជាជានិច្ច+ ពោលគឺផលនៃបបូរមាត់+ ដែលប្រកាសប្រាប់នាមរបស់លោកដល់អ្នកឯទៀត។+ ១៦ ម្យ៉ាងទៀត កុំភ្លេចធ្វើការល្អ ហើយចែករំលែកដល់អ្នកឯទៀត+ ព្រោះព្រះពេញចិត្តគ្រឿងបូជាបែបនេះ។+
១៧ ចូរស្ដាប់បង្គាប់ ហើយចុះចូលនឹងពួកអ្នកដែលនាំមុខអ្នករាល់គ្នា+ ព្រោះពួកគាត់កំពុងថែរក្សាអ្នករាល់គ្នា ហើយពួកគាត់នឹងទទួលខុសត្រូវអំពីរបៀបដែលពួកគាត់បានធ្វើការនោះ។+ ដូច្នេះ ពួកគាត់អាចធ្វើការនោះដោយមានអំណរ មិនមែនដោយដកដង្ហើមធំទេ ដើម្បីកុំឲ្យអ្នករាល់គ្នាបង់ប្រយោជន៍។
១៨ ចូរបន្តអធិដ្ឋានឲ្យយើង ព្រោះយើងជឿជាក់ថាសមត្ថភាពវិនិច្ឆ័យរបស់យើងនឹងមិនផ្ដន្ទាទោសយើងទេ ដោយសារយើងចង់ធ្វើការទាំងអស់ដោយទៀងត្រង់។+ ១៩ ប៉ុន្តែ ជាពិសេស ខ្ញុំសូមជំរុញចិត្តអ្នករាល់គ្នាអធិដ្ឋានឲ្យខ្ញុំ ដើម្បីខ្ញុំអាចមកឯអ្នករាល់គ្នាឆាប់ៗ។
២០ សូមឲ្យព្រះនៃសេចក្ដីសុខសាន្ត ដែលបានប្រោសគង្វាលដ៏ឧត្ដុង្គឧត្ដម+ឲ្យរស់ពីស្លាប់ឡើងវិញ គឺលោកយេស៊ូជាម្ចាស់របស់យើង ដោយឈាមនៃកិច្ចព្រមព្រៀងដែលមានសុពលភាពជាដរាប ២១ ផ្ដល់អ្វីល្អៗគ្រប់យ៉ាងដើម្បីឲ្យអ្នករាល់គ្នាធ្វើតាមបំណងប្រាថ្នារបស់លោក។ តាមរយៈលោកយេស៊ូគ្រិស្ត សូមព្រះជំរុញចិត្តយើងឲ្យធ្វើអ្វីដែលលោកពេញចិត្ត។ សូមឲ្យលោកមានសិរីរុងរឿងជារៀងរហូតតទៅ។ អាមេន។
២២ បងប្អូនអើយ ឥឡូវខ្ញុំសូមអ្នករាល់គ្នាមេត្តាស្ដាប់ពាក្យដ៏លើកទឹកចិត្តនេះ ព្រោះខ្ញុំបានសរសេរសំបុត្រមួយយ៉ាងខ្លីទៅកាន់អ្នករាល់គ្នា។ ២៣ ខ្ញុំសូមប្រាប់អ្នករាល់គ្នាថា ធីម៉ូថេដែលជាបងប្អូនរបស់យើងបានត្រូវដោះលែងហើយ។ ប្រសិនបើគាត់មកឆាប់ៗ នោះខ្ញុំនឹងទៅជួបអ្នករាល់គ្នាជាមួយនឹងគាត់។
២៤ សូមផ្ដាំសួរសុខទុក្ខអស់អ្នកដែលនាំមុខអ្នករាល់គ្នា និងពួកអ្នកបរិសុទ្ធទាំងអស់។ អស់អ្នកនៅស្រុកអ៊ីតាលី+ក៏ផ្ដាំសួរសុខទុក្ខអ្នករាល់គ្នាដែរ។
២៥ សូមឲ្យអ្នករាល់គ្នាបានប្រកបដោយគុណដ៏វិសេសលើសលប់។
ឬ«យុគសម័យ»។ មើលនិយមន័យពាក្យ«របៀបរបបពិភពលោក»
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ន័យត្រង់«ទីអាស្រ័យនៅផែនដី»
ន័យត្រង់«លោកធ្វើឲ្យពួកទេវតារបស់លោកទៅជាវិញ្ញាណ»
ឬ«អ្នកបម្រើសាធារណជន»
ឬ«យុត្តិធម៌»
សំដៅលើស្ដេចឯទៀតក្នុងតំណនៃវង្សត្រកូលដាវីឌ
ន័យត្រង់«ទីអាស្រ័យនៅផែនដី»
មើលសេចក្ដីពន្យល់បន្ថែម ផ្នែកក៥
ភាសាក្រិច«ឌីអាបូឡូស»មានន័យថា«អ្នកបង្កាច់បង្ខូច»
ន័យត្រង់«ពូជ»
ឬ«អញ្ជើញ»
ភាសាក្រិច«អាប៉ូស្តូឡូស»មានន័យថា«អ្នកដែលត្រូវគេចាត់ឲ្យទៅ»
ពាក្យ«ផ្ទះ»សំដៅលើប្រជាជាតិអ៊ីស្រាអែល
នេះសំដៅលើលោកយេស៊ូ
ឬ«ជាសក្ខីភាព»
មើលនិយមន័យពាក្យ«គ្រិស្ត»
ន័យត្រង់«បានក្លាយទៅជាល្អឥតខ្ចោះ»
ន័យត្រង់«មនុស្សធ្ងន់ត្រចៀក»
ឬ«មានភាពចាស់ទុំ»
ឬ«សមត្ថភាពយល់ដឹង»
ឬ«យុគសម័យដែលនឹងមកដល់»។ មើលនិយមន័យពាក្យ«របៀបរបបពិភពលោក»
ន័យត្រង់«ស្បថ»
ក្នុងគម្ពីរពាក្យ«កូន»ឬ«បុត្រ»អាចសំដៅលើអ្នកណាក៏ដោយដែលកើតក្នុងវង្សត្រកូល
មើលកំណត់សម្គាល់ម៉ាថ ៥:១៧
មើលសេចក្ដីពន្យល់បន្ថែម ផ្នែកក៥
ឬ«លោកនឹងមិនស្ដាយក្រោយ»
មើលសេចក្ដីពន្យល់បន្ថែម ផ្នែកក៥
ន័យត្រង់«គ្មានកំហុស»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ពាក្យភាសាក្រិចដែលបកប្រែនៅទីនេះថា«គម្រប» ក៏អាចសំដៅលើគ្រឿងបូជាដែលផ្សះផ្សាចំណងមិត្តភាពជាមួយនឹងព្រះ
តាមមើលទៅនេះសំដៅលើកន្លែងបរិសុទ្ធនៅស្ថានសួគ៌
ឬ«ការប្រៀបប្រដូច»
ការលាងសម្អាតមនុស្សនិងរបស់របរផ្សេងៗតាមតម្រូវការច្បាប់ម៉ូសេ
ឬ«គោស្ទាវ»
ន័យត្រង់«ថ្លៃលោះ»
ឬ«គោក្រមុំ»
ឬ«ក្រហមឆ្អៅ»
ឬ«កិច្ចបម្រើសាធារណៈ»
ឬ«យុគសម័យ»។ មើលនិយមន័យពាក្យ«របៀបរបបពិភពលោក»
ឬប្រហែលជាមានន័យថា«មនុស្ស»
ឬ«បំពេញកិច្ចបម្រើពិសិដ្ឋ»
គ្រឿងបូជានេះបានត្រូវដុតទាំងមូល
ឬ«កិច្ចបម្រើសាធារណៈ»
មើលសេចក្ដីពន្យល់បន្ថែម ផ្នែកក៥
ន័យត្រង់«ប្រោះ»សំដៅលើការយកឈាមរបស់គ្រិស្តមកប្រោះ
មើលសេចក្ដីពន្យល់បន្ថែម ផ្នែកក៥
ន័យត្រង់«បន្តនិយាយដោយក្លាហាន»
មើលនិយមន័យពាក្យ«របៀបរបបពិភពលោក»
ឬ«ស្ថាបត្យករ»
ន័យត្រង់«ពូជ»
ឬ«គួរឲ្យទុកចិត្ត»
ន័យត្រង់«ពូជ»
ឬ«គោរពប្រណិប័តន៍ព្រះ»
ន័យត្រង់«គ្រិស្ត»។ មើលនិយមន័យពាក្យ«គ្រិស្ត»
ន័យត្រង់«ដោយគ្មានយើងទេ»
ន័យត្រង់«ពួកសាក្សីដូចជាពពកមួយយ៉ាងធំ»
មើលនិយមន័យពាក្យ«បង្គោលទារុណកម្ម»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬ«ការបង្ហាត់បង្រៀន»
ឬ«ឈឺចិត្ត»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
ឬ«ទេវតារាប់ម៉ឺន»
ឬ«ដោយចិត្តសប្បុរស»
ឬប្រហែលជាមានន័យថា«ហាក់ដូចជាអ្នករាល់គ្នាកំពុងរងទុក្ខជាមួយនឹងពួកគេ»
មើលនិយមន័យពាក្យ«អំពើប្រាសចាកសីលធម៌ខាងផ្លូវភេទ»
មើលសេចក្ដីពន្យល់បន្ថែម ផ្នែកក៥
ន័យត្រង់«ចិត្តរបស់អ្នកបានត្រូវពង្រឹង»
ពោលគឺច្បាប់អំពីអាហារ