សំបុត្ររបស់យ៉ាកុប
១ ពីខ្ញុំ យ៉ាកុប+ ដែលជាខ្ញុំបម្រើរបស់ព្រះនិងរបស់លោកម្ចាស់យេស៊ូគ្រិស្ត ជូនចំពោះកុលសម្ព័ន្ធទាំង១២ដែលបែកខ្ញែកគ្នាទៅកន្លែងផ្សេងៗ៖
ជម្រាបសួរ!
២ បងប្អូនខ្ញុំអើយ ពេលអ្នករាល់គ្នាជួបទុក្ខលំបាកផ្សេងៗ ចូរចាត់ទុកថាការនោះជាអំណរសុទ្ធសាធ+ ៣ ព្រោះអ្នកដឹងថា ពេលជំនឿរបស់អ្នកបានត្រូវសាកល្បងយ៉ាងនេះ នោះធ្វើឲ្យអ្នកចេះស៊ូទ្រាំ។+ ៤ បើអ្នកបន្តស៊ូទ្រាំ នេះនឹងបង្វឹកបង្ហាត់អ្នកឲ្យបានពេញលក្ខណៈ* ហើយអ្នកនឹងគ្មានគុណវិបត្តិ ក៏មិនខ្វះគុណសម្បត្តិណាមួយសោះឡើយ។+
៥ ម្ល៉ោះហើយ ប្រសិនបើក្នុងចំណោមអ្នករាល់គ្នា មានអ្នកណាម្នាក់ខ្វះប្រាជ្ញា ចូរឲ្យអ្នកនោះសុំព្រះម្ដងហើយម្ដងទៀតចុះ+ ព្រោះលោកឲ្យដោយចិត្តទូលាយដល់មនុស្សទាំងអស់ ហើយលោកមិនស្ដីបន្ទោស*ឡើយ។+ ធ្វើដូច្នេះ អ្នកនោះនឹងទទួលប្រាជ្ញាមែន។+ ៦ ប៉ុន្តែ ចូរឲ្យអ្នកនោះបន្តសុំដោយមានជំនឿ+ និងដោយមិនសង្ស័យសោះ+ ព្រោះអ្នកណាដែលសង្ស័យ អ្នកនោះដូចជារលកសមុទ្រដែលរំពើកចុះឡើងទៅតាមខ្យល់។ ៧ តាមពិត អ្នកនោះមិនគួររំពឹងថាខ្លួននឹងទទួលអ្វីពីព្រះយេហូវ៉ា*ឡើយ។ ៨ អ្នកនោះមានចិត្តពីរ+ ហើយក៏មិននឹងធឹងក្នុងគ្រប់ការទាំងអស់ដែរ។
៩ ប៉ុន្តែ ចូរឲ្យបងប្អូនដែលជាអ្នកក្ររីករាយ ដោយសារបានត្រូវលើកតម្កើង+ ១០ ហើយចូរឲ្យបងប្អូនដែលជាអ្នកមានរីករាយ ដោយសារបានត្រូវបន្ទាប+ ពីព្រោះអ្នកមាននឹងរោយទៅដូចផ្កានៅឯវាល ១១ គាត់នឹងបាត់សូន្យទៅក្នុងកាលដែលគាត់កំពុងដេញតាមទ្រព្យសម្បត្តិ ដូចរុក្ខជាតិប្រែជាស្លោក ផ្កាវាក៏ជ្រុះ ហើយភាពស្រស់ស្អាតនៃរុក្ខជាតិនោះក៏បាត់សូន្យទៅ ក្រោយថ្ងៃរះបញ្ចេញកម្ដៅខ្លាំងក្រៃលែង។+
១២ អ្នកណាដែលបន្តស៊ូទ្រាំនឹងទុក្ខលំបាក អ្នកនោះមានសុភមង្គល+ ពីព្រោះពេលដែលព្រះយេហូវ៉ា*ពេញចិត្តអ្នកនោះ អ្នកនោះនឹងទទួលមកុដជីវិត+ ដែលព្រះបានសន្យាឲ្យដល់អស់អ្នកដែលរក្សាសេចក្ដីស្រឡាញ់ចំពោះលោក។+ ១៣ ពេលដែលជួបទុក្ខលំបាក កុំឲ្យអ្នកណានិយាយថា៖ «ព្រះកំពុងល្បងលខ្ញុំ»។ ព្រោះគ្មានអ្នកណាអាចល្បងលព្រះដោយសេចក្ដីអាក្រក់ឡើយ ហើយព្រះក៏មិនល្បងលអ្នកណាដោយសេចក្ដីអាក្រក់ដែរ។ ១៤ ប៉ុន្តែ មនុស្សម្នាក់ៗត្រូវល្បងលដោយសេចក្ដីប៉ងប្រាថ្នារបស់ខ្លួនទាក់ទាញនិងល្បួងលួងលោម។+ ១៥ រួចមក ពេលដែលសេចក្ដីប៉ងប្រាថ្នានោះចាប់មានគភ៌ នោះក៏សម្រាលចេញជាអំពើខុសឆ្គង* ហើយកាលណាអំពើខុសឆ្គងបានសម្រេចហើយ នោះនាំឲ្យស្លាប់។+
១៦ បងប្អូនជាទីស្រឡាញ់អើយ កុំភាន់ច្រឡំឡើយ។ ១៧ ព្រោះគ្រប់ទាំងរបស់ល្អនិងអំណោយដ៏ល្អឥតខ្ចោះ សុទ្ធតែមកពីស្ថានលើ+ ព្រោះរបស់ទាំងនោះមកពីបិតានៃពន្លឺនានានៅលើមេឃ+ ហើយលោកមិនប្រែប្រួលដូចស្រមោលឡើយ។+ ១៨ ដោយសារជាបំណងប្រាថ្នារបស់លោក នោះលោកបាននាំយើងមកដោយបណ្ដាំនៃសេចក្ដីពិត។+ លោកធ្វើដូច្នេះ ដើម្បីឲ្យយើងបានដូចជាផលដំបូងពីចំណោមមនុស្សជាតិ។+
១៩ បងប្អូនជាទីស្រឡាញ់អើយ ចូរដឹងថាមនុស្សម្នាក់ៗត្រូវរហ័សស្ដាប់ មិនរហ័សនិយាយ+ មិនរហ័សខឹង+ ២០ ព្រោះកំហឹងរបស់មនុស្សមិននាំឲ្យធ្វើអ្វីត្រឹមត្រូវដែលព្រះពេញចិត្តទេ។*+ ២១ ដូច្នេះ ចូរលះចោលអ្វីៗទាំងអស់ដែលកខ្វក់ និងអំពើអាក្រក់គ្រប់បែបយ៉ាង*+ ហើយចូរទទួលដោយចិត្តស្លូតបូតនូវបណ្ដាំរបស់ព្រះដែលបានត្រូវដាំក្នុងអ្នករាល់គ្នា គឺជាបណ្ដាំដែលអាចសង្គ្រោះជីវិត*អ្នករាល់គ្នា។
២២ ក៏ប៉ុន្តែ ចូរអ្នករាល់គ្នាទៅជាអ្នកដែលប្រព្រឹត្តតាមបណ្ដាំរបស់ព្រះ+ ហើយកុំបញ្ឆោតខ្លួនដោយវែកញែកខុសថា គ្រាន់តែឮគឺគ្រប់គ្រាន់ហើយ។ ២៣ ព្រោះប្រសិនបើអ្នកណាជាអ្នកដែលឮបណ្ដាំរបស់ព្រះ តែមិនមែនជាអ្នកប្រព្រឹត្តតាម+ អ្នកនោះគឺដូចជាមនុស្សម្នាក់ដែលឆ្លុះមុខ*ក្នុងកញ្ចក់។ ២៤ ព្រោះគាត់ឆ្លុះមុខខ្លួនឯង រួចចេញទៅ ហើយភ្លេចភ្លាមថា ខ្លួនគាត់ជាមនុស្សបែបណា។ ២៥ ប៉ុន្តែ អ្នកណាដែលពិនិត្យមើលច្បាប់ល្អឥតខ្ចោះ+ដែលនាំឲ្យមានសេរីភាព ហើយព្យាយាមធ្វើតាមជានិច្ច អ្នកនោះនឹងមានសុភមង្គលក្នុងការនោះ ពីព្រោះអ្នកនោះបានទៅជាអ្នកដែលធ្វើការនោះ មិនមែនជាអ្នកដែលឮ រួចភ្លេចទៅវិញទេ។+
២៦ ប្រសិនបើអ្នកណាគិតថាខ្លួនជាអ្នកគោរពប្រណិប័តន៍ព្រះ តែមិនទប់អណ្ដាតខ្លួន+ អ្នកនោះកំពុងបញ្ឆោតចិត្តខ្លួន ហើយការគោរពប្រណិប័តន៍របស់អ្នកនោះគឺគ្មានប្រយោជន៍ទេ។ ២៧ តាមទស្សនៈរបស់លោកដែលជាព្រះនិងជាបិតារបស់យើង របៀបគោរពប្រណិប័តន៍ដែលស្អាតស្អំនិងឥតសៅហ្មងនោះគឺ៖ យើងត្រូវថែរក្សាកូនកំព្រា+និងស្ត្រីមេម៉ាយ+ដែលកំពុងរងទុក្ខវេទនា+ ហើយយើងត្រូវរក្សាខ្លួនមិនឲ្យប្រឡូកប្រឡាក់នឹងពិភពលោកនេះ។+
២ បងប្អូនខ្ញុំអើយ តើអ្នករាល់គ្នាកំពុងបង្ហាញជំនឿលើលោកយេស៊ូគ្រិស្តជាម្ចាស់ដ៏រុងរឿងរបស់យើង ហើយដំណាលគ្នានោះអ្នករាល់គ្នាបែរជាប្រព្រឹត្តទៅលើអ្នកឯទៀតដោយលម្អៀងឬ?+ ២ ប្រសិនបើពេលដែលអ្នករាល់គ្នាប្រជុំ មានបុរសម្នាក់ចូលមកទាំងពាក់ចិញ្ចៀនមាសនិងសម្លៀកបំពាក់ល្អប្រណីត ហើយមានបុរសក្រីក្រម្នាក់ដែលមានសម្លៀកបំពាក់កខ្វក់ចូលមកដែរ ៣ រួចអ្នករាល់គ្នាមើលទៅបុរសដែលមានសម្លៀកបំពាក់ល្អប្រណីតដោយក្ដីពេញចិត្ត ហើយនិយាយថា«សូមអង្គុយកន្លែងល្អនេះ» រួចអ្នកនិយាយទៅបុរសក្រីក្រថា«ចូរឈរតទៅទៀត» ឬថា«ចូរអង្គុយទីនោះនៅជិតកំណល់កល់ជើងខ្ញុំ» តើអ្នករាល់គ្នានឹងធ្វើដូច្នេះឬទេ?+ ៤ បើធ្វើដូច្នេះមែន អ្នករាល់គ្នាបានបែងចែកវណ្ណៈ+ ហើយទៅជាចៅក្រមដែលកាត់ក្ដីដោយទុច្ចរិតហើយ។+
៥ បងប្អូនជាទីស្រឡាញ់របស់ខ្ញុំអើយ សូមស្ដាប់។ ព្រះបានជ្រើសរើសអ្នកក្រក្នុងពិភពលោកនេះ ដើម្បីឲ្យធ្វើជាអ្នកមានខាងជំនឿ+ និងធ្វើជាអ្នកទទួលរាជាណាចក្រជាមត៌ក ជាអ្វីដែលលោកបានសន្យាដល់ពួកអ្នកដែលស្រឡាញ់លោក មែនទេ?+ ៦ ក៏ប៉ុន្តែ អ្នករាល់គ្នាបានធ្វើឲ្យអ្នកក្រអាប់ឱនកិត្តិយស។ តើមិនមែនពួកអ្នកមានទេឬដែលជិះជាន់អ្នករាល់គ្នា+ ហើយអូសអ្នករាល់គ្នាទៅតុលាការ? ៧ តើមិនមែនពួកគេទេឬដែលជាអ្នកប្រមាថនាមល្អប្រសើរដែលអ្នករាល់គ្នាជាតំណាង? ៨ ឥឡូវ ប្រសិនបើអ្នករាល់គ្នាព្យាយាមប្រព្រឹត្តតាមច្បាប់របស់ស្ដេចស្របតាមបទគម្ពីរដែលថា៖ «អ្នកត្រូវស្រឡាញ់អ្នកជិតខាងដូចស្រឡាញ់ខ្លួនអ្នក»+ នោះអ្នករាល់គ្នាកំពុងប្រព្រឹត្តល្អហើយ។ ៩ ប៉ុន្តែ ប្រសិនបើអ្នករាល់គ្នាបន្តបង្ហាញចិត្តលម្អៀង+ នោះអ្នកកំពុងប្រព្រឹត្តអំពើខុសឆ្គងហើយ។ តាមច្បាប់នោះ អ្នកបានត្រូវចាត់ទុក*ថាជាអ្នករំលងច្បាប់។+
១០ ព្រោះបើអ្នកណាធ្វើតាមច្បាប់*ទាំងមូល តែល្មើសប្រការណាមួយ អ្នកនោះបានល្មើសច្បាប់ទាំងមូលហើយ។+ ១១ ព្រោះលោកដែលមានប្រសាសន៍ថា៖ «អ្នកមិនត្រូវសម្លាប់មនុស្ស»+ ក៏បានមានប្រសាសន៍ដែរថា៖ «អ្នកមិនត្រូវផិតក្បត់»។+ ឥឡូវ ប្រសិនបើអ្នករាល់គ្នាមិនផិតក្បត់ តែសម្លាប់មនុស្ស នោះអ្នករាល់គ្នាបានក្លាយទៅជាអ្នករំលងច្បាប់ហើយ។ ១២ ចូរបន្តនិយាយនិងប្រព្រឹត្តដូចអ្នកដែលនឹងត្រូវវិនិច្ឆ័យតាមច្បាប់សម្រាប់មនុស្សដែលមានសេរីភាព។*+ ១៣ ព្រោះអ្នកណាដែលមិនបង្ហាញសេចក្ដីមេត្តាករុណា អ្នកនោះក៏នឹងត្រូវវិនិច្ឆ័យដោយគ្មានសេចក្ដីមេត្តាករុណាដែរ។+ សេចក្ដីមេត្តាករុណាឈ្នះការវិនិច្ឆ័យ។
១៤ បងប្អូនខ្ញុំអើយ ប្រសិនបើអ្នកណាម្នាក់និយាយថាខ្លួនមានជំនឿ តែអ្នកនោះគ្មានការប្រព្រឹត្ត តើមានប្រយោជន៍អ្វី?+ ជំនឿរបស់អ្នកនោះមិនអាចសង្គ្រោះអ្នកនោះបានឡើយ មែនទេ?+ ១៥ ប្រសិនបើបងប្អូនប្រុសឬបងប្អូនស្រីណាម្នាក់គ្មានសម្លៀកបំពាក់ ឬអាហារគ្រប់គ្រាន់សម្រាប់ថ្ងៃនេះ ១៦ ប៉ុន្តែ អ្នករាល់គ្នាណាម្នាក់និយាយទៅអ្នកនោះថា«សូមអញ្ជើញទៅឲ្យបានសេចក្ដីសុខ ហើយសូមឲ្យខ្លួនប្រាណបានកក់ក្ដៅ និងឆ្អែតស្កប់ស្កល់ចុះ» តែអ្នកមិនឲ្យអ្វីដែលពួកគាត់ត្រូវការសម្រាប់រូបកាយ តើមានប្រយោជន៍អ្វី?+ ១៧ ដូចគ្នាដែរ ប្រសិនបើមានជំនឿ តែគ្មានការប្រព្រឹត្ត ជំនឿនោះគឺស្លាប់ហើយ។+
១៨ ទោះជាយ៉ាងនោះក៏ដោយ នឹងមានអ្នកណាម្នាក់និយាយថា៖ «អ្នកមានជំនឿ ឯខ្ញុំមានការប្រព្រឹត្ត។ តើអ្នកអាចបង្ហាញជំនឿរបស់អ្នកឲ្យខ្ញុំឃើញដូចម្ដេចបាន បើអ្នកគ្មានការប្រព្រឹត្ត? តែខ្ញុំនឹងបង្ហាញជំនឿរបស់ខ្ញុំឲ្យអ្នកឃើញ ដោយការប្រព្រឹត្តរបស់ខ្ញុំ»។ ១៩ អ្នកជឿថាមានព្រះតែមួយ មែនទេ? បើអ្នកជឿដូច្នោះ នោះល្អហើយ។ សូម្បីតែពួកវិញ្ញាណកំណាច* ក៏ជឿហើយញ័ររន្ធត់ដែរ។+ ២០ មនុស្សគំនិតរាក់កំភែលអើយ តើអ្នកមិនដឹងទេឬថា ជំនឿដែលគ្មានការប្រព្រឹត្ត នោះគ្មានប្រយោជន៍? ២១ អាប្រាហាំដែលជាឪពុករបស់យើងបានត្រូវប្រកាសថា ជាមនុស្សសុចរិតដោយសារការប្រព្រឹត្ត បន្ទាប់ពីគាត់បូជាអ៊ីសាកជាកូនលើទីបូជា មែនទេ?+ ២២ អ្នករាល់គ្នាឃើញថា ជំនឿរបស់គាត់បានសឲ្យឃើញតាមរយៈការប្រព្រឹត្តរបស់គាត់ ហើយការប្រព្រឹត្តរបស់គាត់បានបង្ហាញយ៉ាងច្បាស់ថា គាត់មានជំនឿពិតប្រាកដ។*+ ២៣ អ្វីដែលបានត្រូវកត់ទុកក្នុងបទគម្ពីរបានត្រូវសម្រេច ដែលថា៖ «អាប្រាហាំបានជឿព្រះយេហូវ៉ា* ហើយគាត់បានត្រូវចាត់ទុកថាជាមនុស្សសុចរិត»+ ហើយគាត់បានត្រូវហៅថា«សម្លាញ់របស់ព្រះយេហូវ៉ា»។*+
២៤ អ្នកឃើញថាមនុស្សម្នាក់នឹងត្រូវប្រកាសថា ជាមនុស្សសុចរិតដោយសារការប្រព្រឹត្ត មិនគ្រាន់តែដោយសារជំនឿប៉ុណ្ណោះទេ។ ២៥ ដូចគ្នាដែរ រ៉ាហាបដែលជាស្រីពេស្យាបានត្រូវប្រកាសថា ជាមនុស្សសុចរិតដោយសារការប្រព្រឹត្ត បន្ទាប់ពីនាងបានទទួលអ្នកនាំសារយ៉ាងរាក់ទាក់ រួចបានឲ្យពួកគេចេញទៅតាមផ្លូវផ្សេង មែនទេ?+ ២៦ ពិតណាស់ ជំនឿដែលគ្មានការប្រព្រឹត្តគឺស្លាប់ហើយ+ ដូចរូបកាយដែលគ្មានជីវិត។*+
៣ បងប្អូនខ្ញុំអើយ មិនគួរឲ្យអ្នករាល់គ្នាជាច្រើននាក់ធ្វើជាអ្នកបង្រៀនឡើយ ពីព្រោះអ្នករាល់គ្នាដឹងថាយើងនឹងទទួលខុសត្រូវធ្ងន់ជាងចំពោះព្រះ។+ ២ ព្រោះយើងទាំងអស់គ្នាជំពប់ដួល*ជាញឹកញយ។+ ប្រសិនបើអ្នកណាមិនដែលជំពប់ដួលខាងពាក្យសម្ដី អ្នកនោះជាមនុស្សល្អឥតខ្ចោះ ហើយអាចកាន់កាប់រូបកាយទាំងមូលរបស់ខ្លួន។ ៣ ប្រសិនបើយើងដាក់បង្ហៀរនៅមាត់សេះដើម្បីធ្វើឲ្យវាស្ដាប់បង្គាប់យើង នោះយើងអាចកាន់កាប់រូបកាយទាំងមូលរបស់វាបាន។ ៤ មើល! សំពៅក៏ដូច្នេះដែរ វាជារបស់ធំណាស់ ហើយក៏ត្រូវរុញច្រានដោយខ្យល់ដែលបក់បោកយ៉ាងខ្លាំង ប៉ុន្តែអ្នកបើកសំពៅអាចធ្វើឲ្យវាទៅកន្លែងណាក៏បានតាមដែលចិត្តគាត់ចង់ ដោយប្រើតែចង្កូតតូចមួយ។
៥ ដូចគ្នាដែរ អណ្ដាតជាសរីរាង្គដ៏តូចមួយ តែវាអួតខ្លាំងណាស់។ មើល! គ្រាន់តែភ្លើងដ៏តូចមួយ អាចធ្វើឲ្យព្រៃធំឆេះបាន! ៦ អណ្ដាតក៏ដូចជាភ្លើងដែរ។+ អណ្ដាតជាសរីរាង្គរូបកាយយើង ដែលពេញទៅដោយភាពមិនសុចរិត ព្រោះវាធ្វើឲ្យរូបកាយទាំងមូលស្មោកគ្រោក+ ហើយអាចបំផ្លាញជីវិតរបស់មនុស្ស និងនាំឲ្យវិនាសដូចដែលកេហេណា*នាំឲ្យវិនាសដែរ។ ៧ ព្រោះសត្វព្រៃ សត្វស្លាប សត្វលូនវារ និងសត្វសមុទ្រគ្រប់ពូជអាចផ្សាំងបាន ក៏បានត្រូវមនុស្សជាតិផ្សាំងហើយដែរ។ ៨ ប៉ុន្តែអណ្ដាតវិញ គ្មានមនុស្សណាអាចផ្សាំងបានទេ។ វាជារបស់មួយដែលធ្វើឲ្យអន្តរាយ ក៏ពោរពេញទៅដោយពិសពុលដែលនាំឲ្យស្លាប់។+ ៩ យើងប្រើអណ្ដាតដើម្បីសរសើរព្រះយេហូវ៉ា*ដែលជាបិតា តែយើងក៏ប្រើអណ្ដាតដើម្បីដាក់បណ្ដាសាមនុស្សដែលកើតមក«មានភាពដូចព្រះ»ដែរ។+ ១០ មានសេចក្ដីសរសើរនិងបណ្ដាសាចេញពីមាត់តែមួយ។
បងប្អូនខ្ញុំអើយ មិនគួរឲ្យការនោះកើតឡើងដូច្នេះទេ។+ ១១ ទឹកប្រៃនិងទឹកសាបមិនផុសចេញពីប្រភពទឹកតែមួយទេ មែនទេ? ១២ បងប្អូនខ្ញុំអើយ ដើមល្វាតូចមិនអាចបង្កើតផលជាផ្លែអូលីវទេ ហើយវល្លិទំពាំងបាយជូរក៏មិនអាចបង្កើតផលជាផ្លែល្វាតូចដែរ មែនទេ?+ ហើយទឹកប្រៃក៏មិនអាចបង្កើតទឹកសាបបានដែរ។
១៣ ក្នុងចំណោមអ្នករាល់គ្នា តើអ្នកណាមានប្រាជ្ញានិងការយល់ដឹង? ចូរឲ្យអ្នកនោះបង្ហាញការប្រព្រឹត្តដ៏ល្អប្រសើរ គឺធ្វើអ្វីៗទាំងអស់ដោយចិត្តស្លូតបូតដែលមកពីប្រាជ្ញា។ ១៤ ប៉ុន្តែ ប្រសិនបើអ្នករាល់គ្នាមានចិត្តច្រណែនឫស្យា+និងមានចិត្តចង់បង្កទំនាស់*+ នោះកុំអួតអាងថាខ្លួនមានប្រាជ្ញាឡើយ។+ បើអ្នកធ្វើដូច្នេះ នោះបង្ហាញថាអ្នកនិយាយកុហកហើយ។ ១៥ ការនោះមិនមែនជាប្រាជ្ញាដែលមកពីស្ថានលើទេ។ ការនោះជាប្រាជ្ញាដែលមកពីពិភពលោកនេះ+ ព្រមទាំងដូចសត្វតិរច្ឆាន និងដូចពួកវិញ្ញាណកំណាច។ ១៦ ព្រោះកន្លែងណាដែលមានចិត្តច្រណែននិងចិត្តចង់បង្កទំនាស់* កន្លែងនោះមានភាពច្របូកច្របល់ និងមានអំពើអាក្រក់គ្រប់យ៉ាង។+
១៧ ប៉ុន្តែប្រាជ្ញាពីស្ថានលើវិញ ដំបូងបង្អស់គឺបរិសុទ្ធ+ រួចធ្វើឲ្យមានសន្តិភាព+ សមហេតុសមផល+ រង់ចាំធ្វើតាមបង្គាប់ ពោរពេញទៅដោយសេចក្ដីមេត្តាករុណានិងផលល្អ+ មិនលម្អៀង*+ ហើយគ្មានពុតត្បុត។+ ១៨ ម្យ៉ាងទៀត សេចក្ដីសុចរិតជាផលដែលបានត្រូវសាបព្រោះក្នុងស្ថានភាពដែលមានសន្តិភាព+ ដើម្បីជាប្រយោជន៍ដល់*ពួកអ្នកដែលធ្វើឲ្យមានសន្តិភាព។+
៤ តើអ្វីបណ្ដាលឲ្យឈ្លោះប្រកែកនិងកើតវិវាទក្នុងចំណោមអ្នករាល់គ្នា? ការទាំងនោះបណ្ដាលមកពីសេចក្ដីប៉ងប្រាថ្នាខាងរូបកាយរបស់អ្នករាល់គ្នា ដែលកំពុងប្រយុទ្ធក្នុងរូបកាយរបស់អ្នករាល់គ្នា មែនទេ?+ ២ អ្នករាល់គ្នាចង់បាន តែមិនបានទេ។ អ្នករាល់គ្នាចេះតែស្អប់គ្នា*និងប៉ងប្រាថ្នាចង់បានរបស់អ្នកឯទៀត តែមិនអាចបានដូចបំណងទេ។ អ្នករាល់គ្នាចេះតែកើតវិវាទនឹងគ្នា ហើយឈ្លោះប្រកែកគ្នា។+ អ្នករាល់គ្នាមិនបានទទួល ដោយសារមិនបានសុំ។ ៣ ពេលដែលអ្នករាល់គ្នាសុំ នោះមិនបានទទួលទេ ពីព្រោះអ្នករាល់គ្នាសុំដោយមានបំណងអាក្រក់ ដើម្បីបំពេញសេចក្ដីប៉ងប្រាថ្នាខាងរូបកាយរបស់អ្នករាល់គ្នា។
៤ មនុស្សផិតក្បត់*អើយ តើអ្នករាល់គ្នាមិនដឹងទេឬថា ការធ្វើជាមិត្តរបស់ពិភពលោកនេះ មានន័យថាធ្វើជាសត្រូវរបស់ព្រះ? ដូច្នេះ អ្នកណាដែលចង់ធ្វើជាមិត្តរបស់ពិភពលោកនេះ អ្នកនោះតាំងខ្លួនជាសត្រូវរបស់ព្រះហើយ។+ ៥ ឬតើអ្នករាល់គ្នាគិតថាបទគម្ពីរចែងឥតប្រយោជន៍ឬ ដែលថា៖ «ដោយសារយើងមានភាពទោរទន់ទៅរកការច្រណែន នោះយើងតែងតែប៉ងប្រាថ្នាចង់បានអ្វីផ្សេងៗ»?+ ៦ ក៏ប៉ុន្តែ គុណដ៏វិសេសលើសលប់ដែលព្រះផ្ដល់ឲ្យ គឺខ្លាំងជាង។ ដូច្នេះ បទគម្ពីរចែងថា៖ «ព្រះប្រឆាំងមនុស្សក្រអឺតក្រទម+ តែលោកផ្ដល់គុណដ៏វិសេសលើសលប់ដល់មនុស្សដែលមានចិត្តរាបទាប»។+
៧ ហេតុនេះ ចូរចុះចូលនឹងព្រះ+ តែចូរតស៊ូនឹងមេកំណាច*+ នោះវានឹងរត់ចេញពីអ្នករាល់គ្នា។+ ៨ ចូរចូលទៅជិតព្រះ នោះលោកនឹងចូលមកជិតអ្នករាល់គ្នា។+ ពួកអ្នកប្រព្រឹត្តអំពើខុសឆ្គងអើយ+ ចូរសម្អាតដៃអ្នករាល់គ្នា ហើយពួកអ្នកដែលមានចិត្តពីរអើយ ចូរសម្អាតចិត្តអ្នករាល់គ្នា។+ ៩ ចូរកើតទុក្ខ សោកសៅ ហើយយំសោកចុះ។+ ចូរឲ្យសំណើចរបស់អ្នករាល់គ្នាក្លាយទៅជាការយំសោក ហើយអំណរក្លាយទៅជាការព្រួយចិត្តវិញ។ ១០ ចូរបន្ទាបខ្លួននៅចំពោះមុខព្រះយេហូវ៉ា*ចុះ+ ហើយលោកនឹងតម្កើងអ្នករាល់គ្នា។+
១១ បងប្អូនអើយ ឈប់និយាយអាក្រក់ពីគ្នាទៅវិញទៅមក។+ អ្នកណាដែលនិយាយអាក្រក់អំពីបងប្អូនឬវិនិច្ឆ័យបងប្អូន អ្នកនោះនិយាយអាក្រក់អំពីច្បាប់ ហើយវិនិច្ឆ័យច្បាប់។ ឥឡូវ ប្រសិនបើអ្នកវិនិច្ឆ័យច្បាប់ អ្នកមិនមែនជាអ្នកប្រព្រឹត្តតាមច្បាប់ទេ តែជាចៅក្រមវិញ។ ១២ លោកដែលបង្កើតច្បាប់និងជាចៅក្រម+ មានតែមួយទេ គឺលោកដែលអាចសង្គ្រោះនិងអាចបំផ្លាញ។+ ប៉ុន្តែអ្នកវិញ តើអ្នកជាអ្នកណាបានជាវិនិច្ឆ័យអ្នកជិតខាងរបស់ខ្លួន?+
១៣ ឯអ្នករាល់គ្នាដែលនិយាយថា៖ «ថ្ងៃនេះឬថ្ងៃស្អែក យើងនឹងទៅក្រុងនេះឬក្រុងនោះ រួចស្នាក់នៅទីនោះមួយឆ្នាំ ហើយរកស៊ីបានចំណេញ» សូមគិតទៅមើល+ ១៤ អ្នករាល់គ្នាមិនដឹងថាជីវិតរបស់អ្នករាល់គ្នានឹងទៅជាយ៉ាងណាទេនៅថ្ងៃស្អែក។+ ព្រោះអ្នករាល់គ្នាជាអ័ព្ទដែលនៅតែមួយរយៈពេលខ្លី រួចបាត់ទៅ។+ ១៥ ផ្ទុយទៅវិញ អ្នករាល់គ្នាគួរនិយាយថា៖ «ប្រសិនបើជាបំណងប្រាថ្នារបស់ព្រះយេហូវ៉ា*+ យើងនឹងរស់ ហើយធ្វើការនេះឬការនោះ»។ ១៦ ប៉ុន្តែឥឡូវនេះ អ្នករាល់គ្នាមានមោទនភាពដោយសារការអួតអាងរបស់អ្នករាល់គ្នា។ ការអួតអាងទាំងអស់បែបនេះគឺទុច្ចរិត។ ១៧ ដូច្នេះ ប្រសិនបើអ្នកណាចេះធ្វើអ្វីដែលត្រឹមត្រូវ តែបែរជាមិនធ្វើទៅវិញ នោះជាការខុសឆ្គងហើយ។+
៥ ឯអ្នករាល់គ្នាដែលជាអ្នកមានអើយ ចូរស្រែកយំដោយសារទុក្ខលំបាកដែលនឹងកើតឡើងដល់អ្នករាល់គ្នា។+ ២ ទ្រព្យរបស់អ្នករាល់គ្នាបានរលួយហើយ ឯសម្លៀកបំពាក់របស់អ្នករាល់គ្នាក៏សត្វល្អិតបានស៊ីបំផ្លាញដែរ។+ ៣ មាសនិងប្រាក់របស់អ្នករាល់គ្នាបានត្រូវច្រែះស៊ីធ្លុះអស់ ឯច្រែះនោះនឹងធ្វើជាសាក្សីប្រឆាំងអ្នករាល់គ្នា ហើយនឹងស៊ីសាច់អ្នករាល់គ្នា។ អ្វីដែលអ្នករាល់គ្នាបានប្រមូលទុកសម្រាប់គ្រាចុងក្រោយបង្អស់ នឹងប្រៀបដូចជាភ្លើង។+ ៤ មើល! កម្មករដែលបានប្រមូលផលពីស្រែចម្ការរបស់អ្នករាល់គ្នា ចេះតែស្រែកឡើងឥតឈប់ ដោយសារអ្នករាល់គ្នាមិនបើកប្រាក់ឈ្នួលឲ្យពួកគេ ហើយសម្រែកសុំជំនួយរបស់ពួកអ្នកច្រូតកាត់បានឮដល់ព្រះយេហូវ៉ា*នៃបណ្ដាកងទ័ពស្ថានសួគ៌។+ ៥ អ្នករាល់គ្នាបានរស់នៅផែនដីយ៉ាងសម្បូរសប្បាយ ហើយបំពេញតាមសេចក្ដីប៉ងប្រាថ្នារបស់ខ្លួន។ ចិត្តរបស់អ្នករាល់គ្នាគឺប្រៀបដូចជាសត្វដែលគេបំប៉នឲ្យធំធាត់ រហូតដល់ថ្ងៃដែលគេសម្លាប់។+ ៦ អ្នករាល់គ្នាបានផ្ដន្ទាទោសនិងធ្វើឃាតអ្នកសុចរិត។ ហេតុនោះហើយបានជាគាត់*កំពុងប្រឆាំងអ្នករាល់គ្នា។
៧ ដូច្នេះ បងប្អូនអើយ ចូរមានចិត្តអត់ធ្មត់រហូតដល់វត្តមានរបស់លោកម្ចាស់។+ មើល! កសិករបង្ហាញចិត្តអត់ធ្មត់កាលដែលរង់ចាំភោគផល*ពីផែនដី រហូតដល់រដូវភ្លៀងដើមឆ្នាំនិងរដូវភ្លៀងចុងឆ្នាំមកដល់។*+ ៨ ចូរអ្នករាល់គ្នាមានចិត្តអត់ធ្មត់ដែរ+ ហើយតាំងចិត្តរឹងមាំ ពីព្រោះវត្តមានរបស់លោកម្ចាស់គឺជិតដល់ហើយ។+
៩ បងប្អូនអើយ កុំត្អូញត្អែរ*អំពីគ្នាទៅវិញទៅមកឡើយ ដើម្បីកុំឲ្យអ្នករាល់គ្នាទទួលការវិនិច្ឆ័យ។+ មើល! ចៅក្រមកំពុងឈរនៅមាត់ទ្វារហើយ។ ១០ បងប្អូនអើយ ចូរទុកពួកអ្នកប្រកាសទំនាយដែលបាននិយាយតាងនាមព្រះយេហូវ៉ា*+ ថាជាគំរូពីការរងសេចក្ដីអាក្រក់+និងការបង្ហាញចិត្តអត់ធ្មត់។+ ១១ មើល! យើងចាត់ទុកពួកអ្នកដែលបានស៊ូទ្រាំថាជាអ្នកមានសុភមង្គល។+ អ្នករាល់គ្នាធ្លាប់ឮអំពីការស៊ូទ្រាំរបស់យ៉ូប+ ក៏ដឹងអំពីពរដែលព្រះយេហូវ៉ា*បានឲ្យដល់គាត់+ ហើយតាមរយៈការនោះ អ្នកឃើញថាព្រះយេហូវ៉ា*មានមនោសញ្ចេតនាដ៏ជ្រាលជ្រៅ និងពេញទៅដោយសេចក្ដីមេត្តាករុណា។+
១២ ជាពិសេសបងប្អូនខ្ញុំអើយ ឈប់ស្បថតទៅទៀត ទោះជាស្បថដោយយកស្ថានសួគ៌ ផែនដី ឬអ្វីផ្សេងទៀតជាសាក្សីក៏ដោយ។ ប៉ុន្តែ ចូររក្សាសម្ដី បើថា«មែន» គឺមែន បើថា«ទេ» គឺទេ+ ដើម្បីកុំឲ្យអ្នករាល់គ្នាទទួលការវិនិច្ឆ័យ។
១៣ ក្នុងចំណោមអ្នករាល់គ្នា តើមានអ្នកណាកំពុងរងទុក្ខលំបាកឬទេ? ចូរឲ្យអ្នកនោះបន្តអធិដ្ឋាន។+ តើមានអ្នកណាមានអារម្មណ៍ល្អឬទេ? ចូរឲ្យអ្នកនោះច្រៀងសរសើរព្រះ។+ ១៤ តើមានអ្នកណាឈឺក្នុងចំណោមអ្នករាល់គ្នាឬទេ? ចូរឲ្យអ្នកនោះហៅពួកអ្នកចាស់ទុំ+ក្នុងក្រុមជំនុំមក ហើយឲ្យពួកគាត់អធិដ្ឋានឲ្យអ្នកនោះ ព្រមទាំងលាបប្រេងឲ្យអ្នកនោះ+ក្នុងនាមព្រះយេហូវ៉ា។* ១៥ រួចសេចក្ដីអធិដ្ឋានដែលបានត្រូវពោលដោយជំនឿនឹងធ្វើឲ្យអ្នកដែលឈឺ*បានជាសះស្បើយ ហើយព្រះយេហូវ៉ា*នឹងធ្វើឲ្យអ្នកនោះមានសុខភាពល្អឡើងវិញ។ ម្យ៉ាងទៀត ប្រសិនបើអ្នកនោះបានប្រព្រឹត្តអំពើខុសឆ្គង អ្នកនោះនឹងត្រូវអភ័យទោសឲ្យ។
១៦ ដូច្នេះ ចូរសារភាពការខុសឆ្គងរបស់ខ្លួនដោយចំហ+ចំពោះគ្នាទៅវិញទៅមក ហើយអធិដ្ឋានឲ្យគ្នាទៅវិញទៅមក ដើម្បីឲ្យអ្នករាល់គ្នាបានជាសះស្បើយ។ សេចក្ដីអធិដ្ឋានអង្វររបស់មនុស្សសុចរិតមានប្រសិទ្ធភាពខ្លាំងណាស់។*+ ១៧ អេលីយ៉ាក៏ជាមនុស្សដូចយើងដែរ* តែពេលគាត់អធិដ្ឋានអស់ពីចិត្តសូមកុំឲ្យភ្លៀងធ្លាក់ នោះគ្មានភ្លៀងធ្លាក់មកលើស្រុកនោះអស់៣ឆ្នាំ៦ខែ។+ ១៨ បន្ទាប់មក គាត់អធិដ្ឋានម្ដងទៀត ហើយមេឃក៏បង្អុរភ្លៀងមក រួចដីបង្កើតភោគផល។+
១៩ បងប្អូនខ្ញុំអើយ ប្រសិនបើអ្នកណាម្នាក់ក្នុងចំណោមអ្នករាល់គ្នាត្រូវបង្វែរចេញពីសេចក្ដីពិត ហើយមានអ្នកណាម្នាក់ជួយនាំអ្នកនោះមកវិញ ២០ ចូរដឹងថា អ្នកណាដែលជួយនាំអ្នកប្រព្រឹត្តអំពើខុសឆ្គងមកពីផ្លូវអាក្រក់វិញ+ អ្នកនោះនឹងសង្គ្រោះជីវិត*គាត់*ឲ្យរួចពីសេចក្ដីស្លាប់ ហើយព្រះនឹងអភ័យទោសអំពើខុសឆ្គងជាច្រើនរបស់គាត់។+
ឬ«ចូរឲ្យការស៊ូទ្រាំសម្រេចគោលបំណងរបស់វា»
ឬ«មិនចាប់កំហុស»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
សំដៅលើអ្វីក៏ដោយដែលមិនសមស្របតាមបុគ្គលិកលក្ខណៈ ខ្នាតតម្រា ការប្រព្រឹត្ត ឬបំណងប្រាថ្នារបស់ព្រះ ហើយអ្វីក៏ដោយដែលធ្វើឲ្យល្អក់កករដល់ទំនាក់ទំនងជាមួយនឹងព្រះ
ន័យត្រង់«មិននាំឲ្យបានសេចក្ដីសុចរិតរបស់ព្រះទេ»
ឬប្រហែលជាមានន័យថា«អំពើអាក្រក់ច្រើនក្រៃលែង»
មើលនិយមន័យពាក្យ«ជីវិត»
ឬ«ឆ្លុះមុខរបស់គាត់ពីកំណើត»
ឬ«ផ្ដន្ទាទោស»
នេះសំដៅលើច្បាប់ដែលព្រះបានឲ្យជនជាតិអ៊ីស្រាអែលតាមរយៈម៉ូសេ
ន័យត្រង់«ច្បាប់នៃសេរីភាព»
ភាសាក្រិច«ដាយម៉ូនីអន»សំដៅលើពួកទេវតាអាក្រក់
ន័យត្រង់«ជំនឿរបស់គាត់គឺល្អឥតខ្ចោះ»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលនិយមន័យពាក្យ«ជីវិត»
ឬ«ធ្វើខុស»
មើលនិយមន័យពាក្យ«កេហេណា»
មើលសេចក្ដីពន្យល់បន្ថែម ផ្នែកក៥
ឬប្រហែលជាមានន័យថា«មានមហិច្ឆតា»
ឬប្រហែលជាមានន័យថា«មានមហិច្ឆតា»
ឬ«មិនរើសមុខ»
ឬប្រហែលជាមានន័យថា«តាមរយៈ»
ន័យត្រង់«ចេះតែសម្លាប់»
ឬ«មនុស្សមិនស្មោះត្រង់»
ភាសាក្រិច«ឌីអាបូឡូស»មានន័យថា«អ្នកបង្កាច់បង្ខូច»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬប្រហែលជាមានន័យថា«ព្រះ»
ឬ«ភោគផលវិសេស»
រដូវភ្លៀងដើមឆ្នាំចាប់ផ្ដើមពាក់កណ្ដាលខែតុលា។ រដូវភ្លៀងចុងឆ្នាំចាប់ផ្ដើមពាក់កណ្ដាលខែមេសា។ មើលសេចក្ដីពន្យល់បន្ថែម ផ្នែកខ១៥
ឬ«ថ្ងូរ» ឬ«រអ៊ូរទាំ»។ ន័យត្រង់«ដកដង្ហើមធំ»
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
មើលសេចក្ដីពន្យល់បន្ថែម ផ្នែកក៥
ឬប្រហែលជាមានន័យថា«អ្នកដែលអស់កម្លាំង»
មើលសេចក្ដីពន្យល់បន្ថែម ផ្នែកក៥
ន័យត្រង់«មានប្រសិទ្ធភាពខ្លាំងណាស់ ពេលដែលសេចក្ដីអធិដ្ឋាននោះបានត្រូវតបឆ្លើយ»
ឬ«ក៏ជាមនុស្សដែលមានអារម្មណ៍ដូចយើងដែរ»
មើលនិយមន័យពាក្យ«ជីវិត»
សំដៅលើអ្នកប្រព្រឹត្តអំពើខុសឆ្គង