សេចក្ដីសង្ឃឹម តើសេចក្ដីសង្ឃឹមអាចមានឥទ្ធិពលមកលើជីវិតយើងទេ?
ដានីយ៉ែលមានអាយុត្រឹមតែ១០ឆ្នាំប៉ុណ្ណោះ តែគាត់រងទុក្ខនឹងជំងឺមហារីកអស់រយៈពេលមួយឆ្នាំ។ គ្រូពេទ្យនិងអស់អ្នកដែលស្គាល់ដានីយ៉ែលសុទ្ធតែអស់សង្ឃឹមហើយ។ ប៉ុន្តែ ដានីយ៉ែលមិនទាន់អស់សង្ឃឹមទេ។ គាត់ជឿថាគាត់អាចធំឡើងក្លាយទៅជាអ្នកស្រាវជ្រាវ ហើយនៅថ្ងៃណាមួយ គាត់ជួយរកឃើញវិធីព្យាបាលជំងឺមហារីក។ ពេលដឹងថាមានគ្រូពេទ្យជំនាញខាងជំងឺមហារីកគាត់ នឹងមកពិនិត្យ គាត់មានសង្ឃឹមខ្លាំងណាស់។ ប៉ុន្តែ នៅថ្ងៃត្រូវពិនិត្យ គ្រូពេទ្យជំនាញបានលុបចោលការណាត់ ដោយសារអាកាសធាតុមិនល្អ។ ដូច្នេះ ដានីយ៉ែលក៏អស់សង្ឃឹមយ៉ាងខ្លាំង។ នោះជាលើកទី១ហើយដែលដានីយ៉ែលអស់កម្លាំងចិត្ត។ ប៉ុន្មានថ្ងៃក្រោយមក គាត់ក៏បានស្លាប់ទៅ។
បទពិសោធន៍នេះបានត្រូវរៀបរាប់ដោយអ្នកស្រាវជ្រាវផ្នែកសុខភាពនិងសិក្សាអំពីការមានសេចក្ដីសង្ឃឹម និងការអស់សង្ឃឹមប៉ះពាល់យ៉ាងណាដល់សុខភាព។ លោកអ្នកប្រហែលធ្លាប់ឮបទពិសោធន៍ស្រដៀងនេះ។ ជាឧទាហរណ៍ មនុស្សវ័យចាស់ម្នាក់កំពុងសម្រាន្តជិតស្លាប់ តែគាត់កំពុងទន្ទឹងចាំអ្វីមួយដ៏សំខាន់ ដូចជាទន្ទឹងចាំថ្ងៃខួបអាពាហ៍ពិពាហ៍របស់គាត់ ឬចាំមនុស្សជាទីស្រឡាញ់មកជួប។ ពេលអ្វីដ៏សំខាន់នោះបានសម្រេចហើយ គាត់ក៏ស្លាប់ទៅ។ តើអ្វីបានផ្ដល់កម្លាំងចិត្តឲ្យគាត់នៅរស់បានយូរបន្តិច? តើសេចក្ដីសង្ឃឹមពិតជាអាចផ្ដល់កម្លាំងចិត្តដូចអ្នកខ្លះជឿនោះទេ?
អ្នកស្រាវជ្រាវខាងសុខភាពកាន់តែច្រើនបានឲ្យយោបល់ថា ការមានគំនិតសុទិដ្ឋិនិយម សេចក្ដីសង្ឃឹម និងទស្សនៈវិជ្ជមាន ពិតជាអាចមានឥទ្ធិពលយ៉ាងខ្លាំងទៅលើជីវិត និងសុខភាពរបស់បុគ្គលម្នាក់។ ប៉ុន្តែ មិនមែនអ្នកស្រាវជ្រាវទាំងអស់ យល់ស្របនឹងទស្សនៈនេះទេ។ អ្នកស្រាវជ្រាវខ្លះចាត់ទុកការអះអាងទាំងនេះថាជារឿងនិទានដែលមិនទាក់ទងនឹងវិទ្យាសាស្ត្រឡើយ។ ពួកគេគិតថាបញ្ហាសុខភាពខាងផ្លូវកាយតែងតែមានមូលហេតុច្បាស់លាស់។
បន្ថែមទៅទៀត នៅសម័យមុន គេក៏មិនជឿថាសេចក្ដីសង្ឃឹមអាចមានឥទ្ធិពលមកលើសុខភាពយើងដែរ។ ជាឧទាហរណ៍ ប៉ុន្មានពាន់ឆ្នាំមុនទស្សនៈវិទូជនជាតិក្រិចឈ្មោះអារីស្តូត បានត្រូវគេសុំឲ្យគាត់បកស្រាយអត្ថន័យនៃសេចក្ដីសង្ឃឹម។ គាត់បានឆ្លើយថា៖«សេចក្ដីសង្ឃឹមគឺជាការស្រមើស្រមៃទេ»។ ក្រោយមក មន្ត្រីជនជាតិអាម៉េរិកម្នាក់ឈ្មោះបេនយ៉ាមីន ហ្វ្រេងឃ្លីនបាននិយាយចំៗថា៖«អ្នកណាដែលរស់ដោយសេចក្ដីសង្ឃឹម នឹងស្លាប់ដោយការអត់ឃ្លាន»។
ដូច្នេះ តើអ្វីទៅជាការពិតអំពីសេចក្ដីសង្ឃឹម? តើវាតែងតែជាគំនិតស្រមើស្រមៃដែលមនុស្សមានដើម្បីបានការសម្រាលទុក្ខឬ? តើមានមូលហេតុត្រឹមត្រូវឲ្យយើងជឿថាសេចក្ដីសង្ឃឹមគឺជាការពិតមិនគ្រាន់តែជាការស្រមើស្រមៃឬ? តើសេចក្ដីសង្ឃឹមពិតជាអ្វីដែលយើងត្រូវការដើម្បីមានសុខភាពល្អនិងសុភមង្គលឬ? តើសេចក្ដីសង្ឃឹមមានមូលដ្ឋានច្បាស់លាស់ ហើយផ្ដល់ប្រយោជន៍ពិតមែនឬ?