ភាគទី៤
ពីស្តេចទីមួយនៃសាសន៍អ៊ីស្រាអែល រហូតដល់ការជាប់ឃុំឃាំងនៅស្រុកបាប៊ីឡូន
សូលបានទៅជាស្តេចទីមួយនៃសាសន៍អ៊ីស្រាអែល។ ប៉ុន្តែ ព្រះយេហូវ៉ាបានកាត់កាល់ទ្រង់ចោល ហើយដាវីឌត្រូវបានរើសតាំងជាស្តេចជំនួសវិញ។ យើងនឹងរៀនដឹងរឿងជាច្រើនអំពីដាវីឌ។ កាលលោកនៅពីក្មេង លោកបានប្រយុទ្ធជាមួយនឹងមនុស្សមាឌដូចយក្សម្នាក់ឈ្មោះកូលីយ៉ាត។ ក្រោយមក លោកបានរត់ចេញពីស្តេចសូលដែលច្រណែននឹងលោក។ បន្ទាប់ពីនោះមក មានស្ត្រីដែលមានរូបឆោមស្រស់ម្នាក់ ឈ្មោះអ័ប៊ីកែល បានឃាត់លោកពីការប្រព្រឹត្តអំពើដ៏ផ្ដេសផ្ដាសមួយ។
បន្ទាប់ពីនេះ យើងនឹងរៀងដឹងរឿងជាច្រើនអំពីបុត្រារបស់ស្តេចដាវីឌនាមសាឡូម៉ូន ដែលបានឡើងសោយរាជ្យជាស្តេចនៃសាសន៍អ៊ីស្រាអែល ជំនួសស្តេចដាវីឌ។ ស្តេចទាំងបីដំបូងនៃសាសន៍អ៊ីស្រាអែល មួយអង្គៗបានសោយរាជ្យ៤០ឆ្នាំ។ ក្រោយពីមរណភាពរបស់ស្តេចសាឡូម៉ូន សាសន៍អ៊ីស្រាអែលត្រូវបានបែកខ្ញែកទៅជាព្រះរាជាណាចក្រពីរ គឺព្រះរាជាណាចក្រខាងជើង និងព្រះរាជាណាចក្រខាងត្បូង។
ព្រះរាជាណាចក្រខាងជើងដែលមានកុលសម្ព័ន្ធ១០បាននៅឋិតថេរអស់រយៈ២៥៧ឆ្នាំ មុននឹងពួកសាសន៍អាសស៊ើរបានបំផ្លាញចោលនោះ។ បន្ទាប់ពី១៣៣ឆ្នាំក្រោយមក ព្រះរាជាណាចក្រខាងត្បូងដែលមានកុលសម្ព័ន្ធពីរ ក៏ត្រូវបានបំផ្លាញចោលដែរ។ នៅពេលនោះ ប្រជាជនអ៊ីស្រាអែលជាច្រើន ត្រូវបានគេចាប់ធ្វើជាឈ្លើយយកទៅស្រុកបាប៊ីឡូន។ ដូច្នេះ ភាគទីបួន នឹងសម្ដែងប្រាប់អំពីប្រវត្ដិសាស្ត្ររវាង៥១០ឆ្នាំ ដែលនៅកំឡុងពេលនោះ យើងនឹងឃើញព្រឹត្ដិការណ៍ដ៏រំភើបជាច្រើនបានកើតឡើង។