ពាក្យផ្ដើម
ចម្លើយដែលស្រាយចម្ងល់!
‹តើខ្ញុំអាចនិយាយជាមួយឪពុកម្ដាយខ្ញុំដោយរបៀបណា?› ‹តើខ្ញុំគួរធ្វើយ៉ាងណាដើម្បីមានមិត្តភក្តិល្អ?› ‹តើការរួមភេទដើម្បីឲ្យតែបានសប្បាយជាការខុសទេ?› ‹ហេតុអ្វីបានជាខ្ញុំក្រៀមក្រំម្ល៉េះ?›។
មិនមែនមានតែប្អូនទេដែលសួរសំណួរបែបនេះ។ ប្អូននឹងទទួលបានចម្លើយខុសៗគ្នាអាស្រ័យទៅលើមនុស្សដែលប្អូនសួរ។ ប្អូនដឹងទេ ចាប់តាំងពីខែមករា ឆ្នាំ១៩៨២ ទស្សនាវដ្ដីភ្ញាក់រឭក! បានចាប់ផ្ដើមបោះពុម្ពផ្សាយអត្ថបទតភាគដែលមានមូលដ្ឋានលើគម្ពីរ ចំណងជើងថា«យុវវ័យចង់ដឹង . . . »។ នេះគឺដើម្បីជួយប្អូនៗយុវវ័យឲ្យរកឃើញចម្លើយដែលអាចទុកចិត្តបាន។ ជាច្រើនទសវត្សរ៍មកហើយ អត្ថបទតភាគនេះនៅតែទទួលបានការចាប់អារម្មណ៍ជាច្រើនពីប្រិយមិត្តអ្នកអាន។ អត្ថបទនីមួយៗបានឆ្លងកាត់ការស្រាវជ្រាវយ៉ាងហ្មត់ចត់។ តាមពិតទៅ អ្នកនិពន្ធទស្សនាវដ្ដីភ្ញាក់រឭក! បានសម្ភាសន៍ប្អូនៗយុវវ័យរាប់រយនាក់នៅជុំវិញពិភពលោក ដើម្បីអាចដឹងអំពីគំនិតនិងអារម្មណ៍របស់ពួកគេ! ប៉ុន្តែ អ្វីដែលសំខាន់ជាងនោះទៅទៀត យោបល់នៅក្នុងអត្ថបទ«យុវវ័យចង់ដឹង»មានមូលដ្ឋានលើគម្ពីរដែលជាបណ្ដាំរបស់ព្រះ។
សៀវភៅដែលប្អូនកំពុងកាន់នេះ បានត្រូវបោះពុម្ពជាលើកដំបូងក្នុងឆ្នាំ១៩៨៩។ ក៏ប៉ុន្តែ ជំពូកខ្លះបានត្រូវកែទាំងស្រុង ដើម្បីឲ្យស្របនឹងស្ថានភាពបច្ចុប្បន្ន។ ជាង៣០ជំពូកបានត្រូវកែសម្រួលពីអត្ថបទ«យុវវ័យចង់ដឹង» ដែលបានចេញផ្សាយនៅចន្លោះឆ្នាំ២០០៤និង២០១១។
សៀវភៅសំណួរយុវវ័យចង់ដឹង និងចម្លើយដែលស្រាយចម្ងល់ ក្បាលទី១ មានព័ត៌មានដែលប្អូនត្រូវការដើម្បីក្លាយជាមនុស្សពេញវ័យដែលមានទំនួលខុសត្រូវ។ យើងសង្ឃឹមថាប្អូននឹងធ្វើតាមយោបល់ក្នុងសៀវភៅនេះ។ បើប្អូនធ្វើតាម ប្អូននឹងដូចយុវវ័យនិងមនុស្សពេញវ័យរាប់លាននាក់ផ្សេងទៀត ដែល‹តែងតែប្រើប្រាស់សមត្ថភាពវែកញែកដែលបានត្រូវបង្វឹកបង្ហាត់ ដើម្បីសម្គាល់អ្វីដែលខុសនិងអ្វីដែលត្រូវ›។—ហេប្រឺ ៥:១៤
អ្នកបោះពុម្ពផ្សាយ