តើអ្នកមានទស្សនៈយ៉ាងណាអំពីបាប?
«គ្មានបាបនិងសេចក្ដីវេទនានៅក្នុងខ្លួនអ្នកទេ តែអ្នកជាឃ្លាំងនៃអំណាចដែលប្រកបដោយសព្វនុភាព»។ លោក វ៉ីវេខាន្នាដា ដែលជាទស្សនវិទូហិណ្ឌូដ៏ល្បីឈ្មោះ បានថ្លែងសេចក្ដីនេះ ពេលដែលពន្យល់វគ្គមួយពីសៀវភៅបរិសុទ្ធហិណ្ឌូ ឈ្មោះបាហ្គាវាទ ហ្គីតា (Bhagavad Gita)។ យោងទៅតាមទស្សនវិជ្ជានៃពួកហិណ្ឌូ គាត់អះអាងថា៖ «ជាកំហុសដ៏ធំបំផុតមួយ ដោយនិយាយថាខ្លួនជាអ្នកទន់ខ្សោយ ថាខ្លួនជាមនុស្សមានបាប»។a
តើជាការពិតមែនឬ ដែលថាគ្មានបាបក្នុងមនុស្សជាតិនោះ? បើមានតើអ្វីទៅដែលបុគ្គលមានពីកំណើត? នីហ៊ីឡាន្នាដា ជាតាបសនៃសាសនាហិណ្ឌូ បានមានប្រសាសន៍ថា មានតែ«លក្ខណៈខាងកាយទេដែលបានកំណត់ពីកំណើត»។ លក្ខណៈឯទៀតបានកំណត់ដោយ«ការប្រព្រឹត្តក្នុងជាតិមុន»នៃបុគ្គលម្នាក់ៗ។ យោងទៅតាមលោក វ៉ីវេខាន្នាដា «អ្នកជាអ្នកបង្កើតនៃវាសនារបស់ខ្លួន»។ លទ្ធិហិណ្ឌូអត់បង្រៀនអ្វីសោះឡើយអំពីបាបពីកំណើត។
គំនិតដែលថាបាបពីកំណើត ក៏គ្មាននៅក្នុងចំណោមពួកហ្សូរ៉ូស្ទ្រាន ពួកសាសនាសិនតូ ពួកខុងជឺ និងពួកអ្នកកាន់ពុទ្ធសាសនាដែរ។ សូម្បីតែក្នុងសាសនាយូដា-គ្រីស្ទាន ដែលធ្លាប់បង្រៀនអំពីបាបពីកំណើត នោះអាកប្បកិរិយារបស់គេចំពោះបាបគឺកំពុងតែប្រែប្រួល។ សព្វថ្ងៃនេះមនុស្សជាច្រើនមិនបានគិតថាខ្លួនមានបាបទេ។
សាសនវិទូ លោកកូនេលាស ផ្លង់ទីហ្គា មានប្រសាសន៍ថា«មនសិការទំនើបមិនបានជំរុញឲ្យមានការបន្ទោសខាងសីលធម៍ទេ ជាពិសេស ការបន្ទោសខ្លួនឯង»។ និកាយនៃពិភពគ្រីស្ទសាសនាក៏មានកំហុសខ្លះដែរ ដោយចាត់ទុក
បាបជាអ្វីដែលមិនធ្ងន់ធ្ងរ។ សាសនាចារ្យម្នាក់នៃសកលវិទ្យាល័យឌុយ មានប្រសាសន៍ថា៖ «អ្នកនឹងមិនឮអំពីបាបក្នុងវិហារឡើយ»។ ហើយយោងទៅតាម លោកផ្លង់ទីហ្គា សាសនាខ្លះនិយាយពីបាបថាគ្រាន់តែជាបញ្ហាសង្គមប៉ុណ្ណោះ។
ច្បាស់ណាស់ សព្វថ្ងៃនេះ វិបត្ដិសង្គមមានជាច្រើន។ អំពើឃោរឃៅ បទឧក្រិដ្ឋ សង្គ្រាម ការទំនាស់ខាងពូជអំបូរ ការរំលោភគ្រឿងញៀន សេចក្ដីមិនទៀងត្រង់ ការជិះជាន់ និងអំពើឃោរឃៅលើក្មេងៗមានទូទៅ។ ដូច្នោះហើយបានជាសតវត្សទី២០នេះ មានឈ្មោះ ជាសតវត្សបង្ហូរឈាមជាងគេ ដែលមនុស្សមិនធ្លាប់មានសោះ។ រួមជាមួយគ្នា គឺការឈឺចាប់និងសេចក្ដីវេទនាដែលមានមកពីជម្ងឺ ភាពចាស់ជរា និងសេចក្ដីស្លាប់។ តើអ្នកណាទៅដែលមិនចង់បានការរំដោះពីបញ្ហាដ៏ធំ ដែលមានក្នុងពិភពលោកសព្វថ្ងៃនេះ?
ដូច្នេះ តើអ្វីទៅជាទស្សនៈរបស់អ្នកអំពីបាប? តើអំពើបាបមានមកពីកំណើតឬ? តើយើងនឹងត្រូវរំដោះពីការចុកចាប់ និងសេចក្ដីរងទុក្ខវេទនាទេ? អត្ថបទបន្ទាប់នឹងពិគ្រោះអំពីសំនួរទាំងនេះ។
[កំណត់សម្គាល់]
a ទស្សនវិជ្ជានៃពួកហិណ្ឌូបានសំអាងទៅលើអ៊ឺផាន៉ីហ្សែទ (Upanishads) ដែលមាននៅចុងក្រោយបទគម្ពីរហិណ្ឌូ ឈ្មោះ វ៉ីដាស។