ចូរបន្ត«ធ្វើការល្អ»
១ អ្នកបានធ្វើការល្អមែន ពេលដែលអ្នកបានក្លាយទៅជាអ្នកបំរើម្នាក់របស់ព្រះយេហូវ៉ា។ ក៏ប៉ុន្តែ នាបច្ចុប្បន្នកាលក្នុងគ្រាដ៏លំបាកណាស់នេះ នោះជាការពិបាកវិញ ឲ្យយើងបន្ត«ធ្វើការល្អ»។ (កាឡាទី ៦:៩) អ្នកអាចធ្វើអ៊ីចឹងបាន ថ្វីបើនេះតម្រូវឲ្យខិតខំជាខ្លាំងក៏ដោយ។ តើតាមរបៀបណាទៅ?
២ ចូរបណ្ដុះឲ្យមានគំនិតគិតដូចព្រះយេស៊ូ: អ្នកក៏អាចស៊ូទ្រាំនឹងសេចក្ដីទុក្ខលំបាកដូចព្រះយេស៊ូដែរ ប្រសិនបើអ្នកបន្តផ្ចង់អារម្មណ៍លើសេចក្ដីសង្ឃឹមខាងព្រះរាជាណាចក្រ។ (ហេព្រើរ ១២:២, ៣) សូមឲ្យប្រាកដក្នុងចិត្តថា ព្រះយេហូវ៉ាស្រឡាញ់អ្នក ហើយទ្រង់ចង់ឲ្យអ្នកមានជោគជ័យ។ (ពេត្រុសទី២ ៣:៩) ចូរទុកចិត្តលើទ្រង់ទាំងស្រុងចុះ! ទាំងប្រាកដក្នុងខ្លួនថា ទ្រង់នឹងជួយអ្នកជាពុំខាន។ (កូរិនថូសទី១ ១០:១៣) ចូរព្យាយាមអធិស្ឋាន ទាំងទូលសុំព្រះយេហូវ៉ាជួយអ្នកចេះស៊ូទ្រាំ។ (រ៉ូម ១២:១២) សូមត្រេកអរដោយជឿពិតប្រាកដថា ការស៊ូទ្រាំរបស់អ្នកនឹងនាំឲ្យមានជំហរដែលព្រះយល់ព្រម។ (រ៉ូម ៥:៣-៥) ដោយអ្នកមានចិត្តស្មោះត្រង់ក្នុងការបណ្ដុះឲ្យមាន«គំនិតតែ១ តាមព្រះគ្រីស្ទយេស៊ូវ» នោះនឹងនាំឲ្យអ្នកមានចិត្តសោមនស្ស និងធ្វើឲ្យព្រះយេហូវ៉ាមានព្រះទ័យអរសប្បាយដែរ។—រ៉ូម ១៥:៥; សុភាសិត ២៧:១១
៣ ចូរបន្តធ្វើការដ៏ល្អៗ: សូមឆ្លៀតយកប្រយោជន៍យ៉ាងពេញលេញពីសំវិធានការនានាដែលព្រះយេហូវ៉ាបានរៀបចំសំរាប់រាស្ត្រទ្រង់ ដើម្បីជួយពួកគេឲ្យបន្តធ្វើការដ៏ល្អនោះ។ ចូររក្សាតាមទម្រង់ការដ៏ល្អមួយខាងការអានព្រះបន្ទូលផ្ទាល់ខ្លួន និងការសិក្សាប្រកាសនវត្ថុដែលមានមូលដ្ឋានលើព្រះគម្ពីរ ដែលផ្ដល់មកតាមរយៈអ្នកបំរើស្មោះត្រង់ដែលមានវិនិច្ឆ័យល្អ។ ដោយចិត្តស្មោះសនោះ សូមរៀបចំ ព្រមទាំងទៅនិងចូលរួមក្នុងកិច្ចប្រជុំទាំងអស់ក្នុងក្រុមជំនុំ។ ពីមុននិងក្រោយកិច្ចប្រជុំគ្រីស្ទាន សូមនិយាយសំណេះសំណាលជាមួយបងប្អូនប្រុសស្រីខាងវិញ្ញាណរបស់អ្នក។ សូមរៀបទុកគោលដៅសមរម្យខាងឯកិច្ចបំរើរបស់អ្នក ដើម្បីរួមចំណែកយ៉ាងណាដែលមានខ្លឹមសារ និងដើម្បីធ្វើឲ្យប្រសើរឡើងខាងការប៉ិនប្រសប់របស់អ្នក ពេលផ្សព្វផ្សាយដំណឹងល្អដល់អ្នកដទៃ។
៤ នេះហើយជាវិធីដែលអ្នកអាចបន្តធ្វើការដ៏ល្អ និងនៅពេលដំណាលគ្នានោះ អ្នកនឹងពិសោធន៍បានអំណរយ៉ាងច្រើនដែរ។ ក្នុងករណីនេះ បងប្រុសម្នាក់នៅប្រទេសអ៊ីតាលី បាននិយាយថា៖ «កាលណាដល់ពេលល្ងាច ហើយខ្ញុំត្រឡប់ទៅផ្ទះវិញ ក្រោយពីបានចំណាយមួយថ្ងៃក្នុងកិច្ចបំរើរបស់ព្រះយេហូវ៉ា នោះខ្ញុំអស់កម្លាំងមែន។ ក៏ប៉ុន្តែ ខ្ញុំមានចិត្តសប្បាយ ហើយខ្ញុំថ្លែងអំណរគុណដល់ព្រះយេហូវ៉ា ដែលទ្រង់ប្រទានឲ្យខ្ញុំនូវអំណរដែលគ្មានអ្នកណាអាចដកចេញបានឡើយ»។ ហេតុដូច្នោះហើយ ចូរបន្តធ្វើការល្អចុះ ហើយអ្នកក៏នឹងពិសោធន៍នូវអំណរដ៏ខ្លាំងដែរ។