«អំពើសុចរិតដែលមនុស្សម្នាក់ធ្វើ បង្ហាញថាអ្នកនោះមានប្រាជ្ញា»
១. តើមនុស្សខ្លះមានទស្សនៈយ៉ាងណាចំពោះសាក្សីព្រះយេហូវ៉ា?
១ ជួនកាលយើងជួបម្ចាស់ផ្ទះដែលមិនពេញចិត្តនឹងយើង ដោយសារមានការយល់ច្រឡំ ឬក៏បានឮគេនិយាយមិនពិតអំពីសាក្សីព្រះយេហូវ៉ា។ ប្រហែលជាទស្សនៈរបស់ពួកគេបានទទួលឥទ្ធិពលពីការចុះផ្សាយព័ត៌មានអំពីសាក្សីព្រះយេហូវ៉ាដោយអគតិ។ នៅប្រទេសខ្លះ គេហៅយើងថា«និកាយគ្រោះថ្នាក់»ទៀត។ តើយើងគួរប្រព្រឹត្តយ៉ាងណាពេលមានគេទិតៀនយើង?
២. តើអ្វីនឹងជួយបង្ការកុំឲ្យយើងធ្លាក់ទឹកចិត្តពេលមានគេទិតៀនយើង?
២ កុំធ្លាក់ទឹកចិត្ត: នៅសតវត្សរ៍ទី១ មនុស្សច្រើនតែយល់ច្រឡំនិងនិយាយអាក្រក់អំពីលោកយេស៊ូនិងអ្នកបម្រើឯទៀតរបស់ព្រះយេហូវ៉ា។ (សកម្ម. ២៨:២២) ប៉ុន្តែពួកគាត់មិនបានអៀនខ្មាសក្នុងកិច្ចផ្សព្វផ្សាយ ដោយសារការទិតៀននោះទេ។ លោកយេស៊ូមានប្រសាសន៍ថា៖ «អំពើសុចរិតដែលមនុស្សម្នាក់ធ្វើ បង្ហាញថាអ្នកនោះមានប្រាជ្ញា»។ (ម៉ាថ. ១១:១៨, ១៩) ដូច្នេះលោកបានបន្តខ្នះខ្នែងធ្វើតាមបំណងប្រាថ្នារបស់បិតា ដោយជឿជាក់ថាមនុស្សដែលពិតជាចង់ស្គាល់សេចក្ដីពិតនឹងយល់នូវតម្លៃនៃដំណឹងល្អដែលលោកផ្សព្វផ្សាយ។ យើងអាចបង្ការកុំឲ្យធ្លាក់ទឹកចិត្តបាន បើចាំថាបុត្ររបស់ព្រះក៏ធ្លាប់ពិសោធកាលៈទេសៈដូចយើងដែរ។
៣. ហេតុអ្វីគ្មានហេតុឲ្យយើងភ្ញាក់ផ្អើលបើមនុស្សប្រឆាំងឬនិយាយអាក្រក់អំពីយើង?
៣ លោកយេស៊ូបានបញ្ជាក់ថាពិភពលោកនឹងស្អប់ពួកអ្នកកាន់តាមលោក ដូចគេបានស្អប់លោកដែរ។ (យ៉ូន. ១៥:១៨-២០) ដូច្នេះ សព្វថ្ងៃនេះគ្មានហេតុឲ្យយើងភ្ញាក់ផ្អើលទេ ពេលយើងទទួលការប្រឆាំងឬមានគេនិយាយអាក្រក់អំពីយើង។ តាមពិត យើងគួរដឹងទុកជាមុនថាមនុស្សនឹងធ្វើដូច្នោះច្រើនជាងមុនទៅទៀត ដោយសារសាថានមានកំហឹងកាន់តែខ្លាំងឡើងៗ ហើយទីបញ្ចប់នៃគ្រាចុងក្រោយនេះមកកាន់តែជិត។ (បប. ១២:១២) យើងអាចសប្បាយចិត្តបាន ពីព្រោះនេះជាភ័ស្តុតាងថា មិនយូរទៀតពិភពលោករបស់សាថាននឹងត្រូវបំផ្លាញចោល។
៤. បើយើងជួបម្ចាស់ផ្ទះដែលមិនពេញចិត្តនឹងយើង តើយើងគួរតបឆ្លើយយ៉ាងណា?
៤ តបឆ្លើយដោយប្រើសម្ដីសប្បុរស: បើម្ចាស់ផ្ទះមិនពេញចិត្តនឹងយើង យើងគួរតបឆ្លើយដោយប្រើសម្ដីសប្បុរស ហើយដោយស្រទន់ឬសុភាព។ (សុភ. ១៥:១; កូឡ. ៤:៥, ៦) បើម្ចាស់ផ្ទះពិតជាចង់ដឹងការពិត ហើយយើងអាចពិភាក្សាជាមួយនឹងគាត់បាន នោះយើងប្រហែលជាអាចពន្យល់គាត់ថា មានព័ត៌មានមិនពិតជាច្រើនដែលគេចុះផ្សាយអំពីសាក្សីព្រះយេហូវ៉ា ឬក៏យើងអាចសួរគាត់អំពីមូលហេតុដែលគាត់មានគំនិតបែបនោះ។ សម្ដីសប្បុរសរបស់យើងអាចបណ្ដាលឲ្យគាត់គិតពិចារណាថាតើអ្វីដែលគាត់បានឮអំពីសាក្សីព្រះយេហូវ៉ាគឺពិតឬមិនពិត ក៏អាចនាំឲ្យគាត់សុខចិត្តស្ដាប់ពេលមានសាក្សីព្រះយេហូវ៉ាមកផ្ទះគាត់នៅថ្ងៃក្រោយទៀត។ ប៉ុន្តែបើម្ចាស់ផ្ទះខឹងខ្លាំង ប្រហែលយកល្អ យើងជម្រាបលាគាត់ហើយដើរចេញ។ ទោះជាមនុស្សមានទស្សនៈអ្វីក៏ដោយ យើងអាចដឹងប្រាកដថា ព្រះយេហូវ៉ានៅតែឲ្យតម្លៃចំពោះកិច្ចបម្រើរបស់យើង។—អេ. ៥២:៧