សំណួរពីអ្នកអាន
នៅថ្ងៃអនាគតឆាប់ៗខាងមុខនេះ តើព្រះយេហូវ៉ានឹងបណ្ដាលចិត្តប្រជាជាតិនានាឲ្យមាន«គំនិត»អ្វី?
ស្ដីអំពីការចាប់ផ្ដើមនៃគ្រាទុក្ខវេទនាជាខ្លាំង ការបើកបង្ហាញ ១៧:១៦, ១៧ចែងថា៖ «សត្វសាហាវដែលមានស្នែង១០ដែលអ្នកបានឃើញ នឹងស្អប់ស្ត្រីពេស្យានោះ ហើយនឹងបំផ្លាញនាង ព្រមទាំងធ្វើឲ្យនាងនៅអាក្រាត ក៏នឹងស៊ីសាច់នាង ហើយដុតនាងចោលក្នុងភ្លើង។ ព្រោះព្រះបណ្ដាលចិត្តពួកគេឲ្យធ្វើតាមគំនិតរបស់លោក គឺឲ្យពួកគេមានគំនិតតែមួយ ហើយធ្វើតាមគំនិតនោះ ដោយប្រគល់រាជាណាចក្ររបស់ពួកគេដល់សត្វសាហាវ»។ ពីមុន សៀវភៅរបស់យើងធ្លាប់ចែងថា ព្រះយេហូវ៉ានឹងបណ្ដាលចិត្តប្រជាជាតិនានាឲ្យមាន«គំនិត» គឺឲ្យពួកគេបំផ្លាញសាសនាមិនពិត។
ប៉ុន្តែ យើងត្រូវកែតម្រូវការយល់ដឹងនេះរបស់យើង។ ព្រះយេហូវ៉ានឹងបណ្ដាលចិត្តប្រជាជាតិនានាឲ្យមាន«គំនិត» គឺឲ្យពួកគេ«ប្រគល់រាជាណាចក្ររបស់ពួកគេដល់សត្វសាហាវ»។ ដើម្បីយល់អំពីរបៀបដែលនេះនឹងត្រូវសម្រេច សូមឲ្យយើងពិចារណាចម្លើយចំពោះសំណួរដូចតទៅនេះ។
តើអ្នកណាជាតួឯកក្នុងទំនាយនេះ? «ស្ត្រីពេស្យា»បានត្រូវហៅដែរថាជា «បាប៊ីឡូនដ៏ខ្លាំងក្លា»។ នាងជាតំណាងសាសនាទាំងឡាយនៅទូទាំងពិភពលោកដែលប្រឆាំងព្រះយេហូវ៉ា។ «សត្វសាហាវមួយដែលមានសម្បុរក្រហមឆ្អៅ»ជាតំណាងអង្គការសហប្រជាជាតិ។ អង្គការនោះបានត្រូវបង្កើតឡើងនៅដើមដំបូងនាឆ្នាំ១៩១៩ដើម្បីរក្សាសន្តិភាពនៅទូទាំងពិភពលោក ហើយធ្លាប់ហៅថាអង្គការសម្ព័ន្ធប្រជាជាតិ។ (បប. ១៧:៣-៥) «ស្នែង១០»ជាតំណាងរដ្ឋាភិបាលទាំងអស់ដែលគាំទ្រសត្វសាហាវនោះ។
តើអ្វីគឺជាទំនាក់ទំនងរវាងស្ត្រីពេស្យានិងសត្វសាហាវដែលមានសម្បុរក្រហមឆ្អៅ? ស្ត្រីពេស្យា«កំពុងអង្គុយលើ»សត្វសាហាវ នោះមានន័យថា នាងគាំទ្រវា ហើយព្យាយាមកាន់កាប់លើវា។
តើអ្វីនឹងកើតឡើងដល់ស្ត្រីពេស្យា? សត្វសាហាវ ព្រមទាំងស្នែង១០ដែលគាំទ្រវា «នឹងស្អប់ស្ត្រីពេស្យានោះ»។ ពួកវានឹងបង្ហាញការស្អប់ដោយរឹបអូសយកទ្រព្យសម្បត្តិ និងបកអាក្រាតអំពើអាក្រក់របស់នាង។ ក្រោយមក ពួកវានឹងបំផ្លាញនាងចោល ដែលជាអ្វីដែលព្រះយេហូវ៉ាបានមានប្រសាសន៍ថានឹងកើតឡើង។ (បប. ១៧:១; ១៨:៨) នោះគឺជាទីបញ្ចប់នៃសាសនាមិនពិត។ ប៉ុន្តែ មុននោះកើតឡើង ព្រះយេហូវ៉ានឹងបណ្ដាលឲ្យប្រជាជាតិនានាធ្វើអ្វីមួយដែលមិនធ្លាប់កើតឡើងក្នុងប្រវត្តិសាស្ត្ររបស់មនុស្សជាតិ។
តើព្រះយេហូវ៉ានឹងបណ្ដាលឲ្យប្រជាជាតិនានាធ្វើអ្វី? លោកនឹងបណ្ដាលចិត្តរបស់ស្នែង១០ឬរដ្ឋាភិបាល ឲ្យធ្វើតាម«គំនិតរបស់លោក» ពោលគឺឲ្យ«ពួកគេផ្ដល់កម្លាំងនិងអំណាចរបស់ពួកគេដល់សត្វសាហាវ[ដែលមានសម្បុរក្រហមឆ្អៅ]» ដែលជាតំណាងអង្គការសហប្រជាជាតិ។ (បប. ១៧:១៣) នេះមានន័យថា គំនិតផ្ដល់កម្លាំងនិងអំណាចរបស់ពួកគេដល់សត្វសាហាវគឺមិនមែនមកពីរដ្ឋាភិបាលទេ។ ទំនាយនេះបង្ហាញថា ព្រះផ្ទាល់នឹងនាំឲ្យពួកគេធ្វើដូច្នេះ។ (សុភ. ២១:១; សូមពិនិត្យបន្ថែម អេសាយ ៤៤:២៨) តើពួកគេនឹងប្រគល់អំណាចដល់សត្វសាហាវបន្តិចម្ដងៗឬទេ? មិនមែនទេ! តាមមើលទៅ ការផ្លាស់ប្ដូរនេះនឹងកើតឡើងភ្លាមៗមួយរំពេច។ ក្រោយមក សត្វសាហាវនោះនឹងបំផ្លាញសាសនាមិនពិតទាំងឡាយ។
ដូច្នេះ តើយើងគួររំពឹងថានឹងមានអ្វីកើតឡើងនៅថ្ងៃអនាគត? យើងមិនគួររំពឹងថា នឹងមានការផ្សាយព័ត៌មានថារដ្ឋាភិបាលគាំទ្រអង្គការសហប្រជាជាតិកាន់តែខ្លាំងឡើងៗទេ។ ប៉ុន្តែ អ្វីដែលយើងអាចរំពឹងគឺ៖ ភ្លាមៗមួយរំពេច ព្រះយេហូវ៉ានឹងបណ្ដាលចិត្តប្រជាជាតិនានាឲ្យប្រគល់អំណាចរបស់ពួកគេដល់សត្វសាហាវ។ ពេលនេះកើតឡើង យើងនឹងដឹងថាគ្រាទុក្ខវេទនាជាខ្លាំងហៀបនឹងចាប់ផ្ដើម។ ទម្រាំដល់ពេលនោះ «ចូរឲ្យយើងភ្ញាក់ហើយដឹងខ្លួនជានិច្ច» ដោយសារការផ្លាស់ប្ដូរនឹងស្រាប់តែមកភ្លាមៗ!—១ថែ. ៥:៦