តើផែនដីអាចស្ថិតស្ថេរយូរទៀតទេ?
តើអ្នកគិតថាចម្លើយមួយណាត្រឹមត្រូវចំពោះសំណួរខាងក្រោមនេះ?
នៅអនាគតឆាប់ៗខាងមុខនេះ តើស្ថានភាពដែលមាននៅផែនដីនឹង
(ក) កាន់តែល្អប្រសើរឡើង?
(ខ) នៅដដែល?
(គ) កាន់តែអាក្រក់ទៅៗ?
តើអ្នកខំរក្សាឲ្យមានទស្សនៈសុទិដ្ឋិនិយមឬល្អចំពោះអនាគតទេ? ធ្វើដូច្នេះនាំឲ្យយើងទទួលប្រយោជន៍ច្រើន។ ការស្រាវជ្រាវមួយចំនួនបានបង្ហាញថាអ្នកដែលមានទស្សនៈល្អចំពោះអនាគត មានការរីកចម្រើនប្រសើរជាងខាងការរៀនសូត្រ ខាងរាងកាយនិងសតិអារម្មណ៍។ ការសិក្សាស្រាវជ្រាវអស់ពេលយ៉ាងយូរមួយបានរកឃើញថា អ្នកដែលរក្សាឲ្យមានទស្សនៈសុទិដ្ឋិនិយមកាត់បន្ថយលទ្ធភាពមានជំងឺបេះដូង ខុសគ្នាពីមនុស្សដែលមានទស្សនៈប្រកបដោយទុទ្ទិដ្ឋិនិយមឬមិនល្អចំពោះជីវិត។ លទ្ធផលពីការស្រាវជ្រាវទាំងនេះគឺសមស្របទៅនឹងអ្វីដែលគម្ពីរបានចែងអស់រយៈរាប់រយឆ្នាំមកហើយថា៖ «ចិត្តដែលសប្បាយជាថ្នាំយ៉ាងវិសេស តែវិញ្ញាណបាក់បែករមែងឲ្យឆ្អឹងរីងស្ងួតទៅ»។—សុភាសិត ១៧:២២
យ៉ាងណាក៏ដោយ ដោយសារអ្វីដែលអ្នកឯកទេសខាងវិទ្យាសាស្ត្របានទាយ ស្តីអំពីអនាគតនៃភពផែនដីយើង នោះមនុស្សជាច្រើនពិបាករក្សាឲ្យមានចិត្តរីករាយនិងទស្សនៈល្អ។ សូមពិចារណាពីការប៉ាន់ស្មានខ្លះៗដែលនាំឲ្យមានទស្សនៈមិនល្អ។
ភពផែនដីកំពុងប្រឈមមុខនឹងគ្រោះថ្នាក់
នៅឆ្នាំ២០០២វិទ្យាស្ថានខាងបរិស្ថានមួយដែលមានកិត្ដិនាមល្អបានព្រមានថា បើមិនកាត់បន្ថយនូវការប៉ះទង្គិចទៅលើបរិស្ថាន ដោយសារចង់តែមានការអភិវឌ្ឍន៍ខាងសេដ្ឋកិច្ច នោះប្រហែលជានាំឲ្យមាន«ហេតុការណ៍ដែលអាចផ្លាស់ប្ដូរធាតុអាកាស និងប្រព័ន្ធនានានៃបរិស្ថានទាំងស្រុង»។ (Stockholm Environment Institute) សេចក្ដីរាយការណ៍នេះបានបន្តទៀតថាភាពក្រីក្រនៅក្នុងពិភពលោក ការមិនស្មើភាពគ្នាដែលនៅតែមាន និងការបង្ខូចបរិស្ថានអាចធ្វើឲ្យសង្គមមាន«វិបត្ដិខាងបរិស្ថាន ក្នុងសង្គម និងសន្ដិសុខផ្ទួនៗគ្នា»។
នៅឆ្នាំ២០០៥អង្គការសហប្រជាជាតិបានចេញលទ្ធផលពីការសិក្សាស្រាវជ្រាវអស់រយៈបួនឆ្នាំស្តីអំពីបរិស្ថាននៃផែនដី។ (Millennium Ecosystem Assessment Synthesis Report) ការសិក្សាស្រាវជ្រាវនេះ រួមមានអ្នកឯកទេសចំនួន១.៣៦០នាក់ ដែលមកពី៩៥ប្រទេស។ ក្នុងរបាយការណ៍នោះមានសេចក្ដីព្រមានយ៉ាងម៉ឹងម៉ាត់ថា៖«ការរស់នៅរបស់មនុស្សជាតិប្រើប្រាសធនធានធម្មជាតិច្រើនលើសចំណុះពីផែនដី។ ហេតុនេះហើយបានជាយើងលែងប្រាកដថា ប្រព័ន្ធនានានៃបរិស្ថានរបស់ភពផែនដីអាចទ្រទ្រង់ជីវិតមនុស្សនៅជំនាន់ក្រោយៗ»។ ដើម្បីជៀសវាងពីវិបត្ដិភ័យទាំងនេះ នោះការសិក្សាស្រាវជ្រាវនេះបន្តរាយការណ៍ថា ត្រូវតែមាន«ការផ្លាស់ប្ដូរយ៉ាងច្រើនខាងគោលការណ៍នយោបាយ ស្ថាប័ន និងការអនុវត្តច្បាប់។ ប៉ុន្តែ ការផ្លាស់ប្ដូរទាំងនេះមិនទាន់បានចាប់ផ្ដើមពេលឥឡូវនេះនៅឡើយ»។
នាយកនីតិប្រតិបត្ដិនៃអង្គការសហប្រជាជាតិ ខាងលំនៅដ្ឋានមនុស្សជាតិ (លោកស្រី Anna Tibaijuka) បាននិយាយពីអ្វីដែលអ្នកស្រាវជ្រាវកាន់តែច្រើននាក់ជឿ។ គាត់មានប្រសាសន៍ថា៖ «បើយើងនៅតែបន្តដូចជាធម្មតា អនាគតគេចមិនផុតពីការហិនវិនាសឡើយ»។
ហេតុដែលគួរមានទស្សនៈសុទិដ្ឋិនិយមចំពោះអនាគត
សាក្សីព្រះយេហូវ៉ាដែលបានបោះពុម្ពទស្សនាវដ្ដីនេះ ក៏ជឿថានឹងមានការផ្លាស់ប្ដូរយ៉ាងធំមកលើផែនដីនៅពេលឆាប់ៗខាងមុខ។ យ៉ាងណាក៏ដោយ ពួកគេជឿថាជាជាងបណ្ដាលឲ្យមានសេចក្ដីហិនវិនាសនៅអនាគត ព្រឹត្ដិការណ៍ទាំងអស់នេះនឹងនាំឲ្យមានស្ថានភាពដ៏ល្អអស្ចារ្យបំផុតដែលពិភពលោកមិនធ្លាប់មានឡើយ។ ហេតុអ្វីបានជាពួកគេមានទស្សនៈល្អដូចនេះ? ពីព្រោះ ពួកគេទុកចិត្តទៅលើសេចក្ដីសន្យាដែលមានក្នុងបណ្ដាំរបស់ព្រះ ពោលគឺគម្ពីរ។ សូមគិតពីសេចក្ដីសន្យាមួយនេះដែលថា៖ «ដល់បន្ដិចទៀត មនុស្សអាក្រក់នឹងមិនមានទៀតទេ អើ អ្នកនឹងខំមើលកន្លែងគេ តែគេមិននៅទេ។ ឯមនុស្សរាបសា គេនឹងបានផែនដីជាមរដក ហើយនឹងបានចិត្តរីករាយ ដោយសេចក្ដីក្សេមក្សាន្តដ៏បរិបូរ»។—ទំនុកដំកើង ៣៧:១០, ១១
តើសេចក្ដីសង្ឃឹមបែបនេះគ្រាន់តែជាការយល់សប្ដិទេឬ? មុននឹងឆ្លើយសំណួរនេះ សូមពិចារណាឲ្យបានហ្មត់ចត់នូវពាក្យអះអាងនេះដែលថា តាំងពីច្រើនឆ្នាំមកហើយគម្ពីរបានទាយទុកជាមុនយ៉ាងត្រឹមត្រូវអំពីបញ្ហាធំៗ ដែលឥឡូវយើងឃើញថានាំឲ្យមានទុក្ខលំបាកដល់ផែនដីនិងមនុស្សជាតិ។ សូមអញ្ជើញអានខគម្ពីរដែលមានក្នុងអត្ថបទបន្ទាប់ ហើយប្រៀបធៀបមើលអ្វីដែលគេបាននិយាយទៅនឹងអ្វីដែលកំពុងតែកើតឡើងក្នុងពិភពលោកនេះ។ ពេលអ្នកធ្វើដូច្នេះ អ្នកនឹងមានទំនុកចិត្តកាន់តែច្រើនឡើងទៅលើគម្ពីរដែលទាយយ៉ាងត្រឹមត្រូវស្តីអំពីព្រឹត្ដិការណ៍នៅអនាគត។