Surasak Suwanmake/Moment via Getty Images
ចូរចាំយាម!
រដូវក្ដៅឆ្នាំ២០២៣កាន់តែក្ដៅឡើងនៅជុំវិញពិភពលោក តើគម្ពីរចែងយ៉ាងណា?
មនុស្សនៅជុំវិញពិភពលោកកំពុងប្រឈមនឹងអាកាសធាតុដ៏ក្ដៅបំផុត និងគ្រោះមហន្តរាយធម្មជាតិដែលបណ្ដាលមកពីបម្រែបម្រួលអាកាសធាតុ។ សូមមើលរបាយការណ៍ខាងក្រោម៖
កាលពីថ្ងៃទី១៣ ខែកក្កដា ឆ្នាំ២០២៣ រដ្ឋបាលមហាសមុទ្រនិងបរិយាកាសជាតិនៅអាម៉េរិក(NOAA) បានរាយការណ៍ថា៖«ខែមិថុនាឆ្នាំនេះ គឺជាខែដ៏ក្ដៅបំផុតក្នុងកំណត់ត្រាពិភពលោកតាំងពី១៧៤ឆ្នាំមុន»។
កាលពីថ្ងៃទី១៣ ខែកក្កដា ឆ្នាំ២០២៣ ភ្នាក់ងារអវកាសអឺរ៉ុប បានរាយការណ៍ថា៖«ប្រទេសអ៊ីតាលី អេស្ប៉ាញ បារាំង អាល្លឺម៉ង់ និងប៉ូឡូញកំពុងប្រឈមនឹងរលកកម្ដៅ ដែលគេរំពឹងថាសីតុណ្ហភាពនឹងកើនទៅដល់៤៨អង្សាសេនៅកោះស៊ីស៊ីលីនិងសាឌីនា។ នេះប្រហែលជាសីតុណ្ហភាពក្ដៅបំផុតដែលមិនធ្លាប់មាននៅទ្វីបអឺរ៉ុប»។
កាលពីថ្ងៃទី១៧ ខែកក្កដា ឆ្នាំ២០២៣ លោកស្ទីហ្វាន អ៊ូលឹនប៊្រុក ដែលជាប្រធានក្រសួងធនធានទឹកនៃអង្គការឧត្តុនិយមពិភពលោក(WMO) បានរៀបរាប់ថា៖«ពេលផែនដីកាន់តែក្ដៅឡើងៗ នោះនឹងមានភ្លៀងធ្លាក់កាន់តែញឹកញាប់និងខ្លាំងឡើងៗ ហើយនេះនឹងបង្កឲ្យមានទឹកជំនន់ធំៗកាន់តែច្រើនដែរ»។
តើរបាយការណ៍ទាំងនេះធ្វើឲ្យអ្នកព្រួយបារម្ភឬទេ? សូមពិចារណាអ្វីដែលគម្ពីរចែងអំពីរឿងបន្ទាន់នេះ។
តើបម្រែបម្រួលអាកាសធាតុនេះកំពុងកើតឡើងដូចគម្ពីរចែងឬ?
មែនហើយ។ រលកកម្ដៅនៅទូទាំងពិភពលោកនិងអាកាសធាតុក្ដៅខ្លាំង គឺស្របនឹងអ្វីដែលគម្ពីរបានប្រាប់ទុកជាមុនអំពីសម័យយើង។ ជាឧទាហរណ៍ លោកយេស៊ូបានប្រកាសទុកជាមុនថា យើងនឹងឃើញ«អ្វីដែលគួរឲ្យខ្លាច»។ (លូកា ២១:១១) ការកើនឡើងសីតុណ្ហភាពនៅទូទាំងពិភពលោក បានធ្វើឲ្យមនុស្សជាច្រើនភ័យខ្លាចថាមនុស្សយើងនឹងបំផ្លាញផែនដី។
តើផែនដីនឹងមិនអាចរស់នៅបានទៀតឬ?
មិនមែនទេ។ ព្រះបានបង្កើតផែនដីជាលំនៅដ៏ស្ថិតស្ថេរជារៀងរហូតសម្រាប់យើង។ លោកនឹងមិនអនុញ្ញាតឲ្យមនុស្សបំផ្លាញវាឡើយ។ (ចម្រៀងសរសើរព្រះ ១១៥:១៦; អ្នកទូន្មាន ១:៤) តាមពិត លោកបានសន្យាថាលោកនឹង«បំផ្លាញពួកអ្នកដែលកំពុងបង្ខូចផែនដី»។—ការបើកបង្ហាញ ១១:១៨
គម្ពីរបង្ហាញថាព្រះអាចការពារផែនដីពីមហន្តរាយធម្មជាតិ ហើយលោកនឹងធ្វើដូច្នោះមែន។
«[ព្រះ]ធ្វើឲ្យខ្យល់ព្យុះស្ងប់រម្ងាប់ រលកសមុទ្របានស្ងាត់ស្ងៀមទៅ»។ (ចម្រៀងសរសើរព្រះ ១០៧:២៩) ព្រះមានឫទ្ធានុភាពកាន់កាប់ទៅលើកម្លាំងធម្មជាតិ។ លោកមានសមត្ថភាពដោះស្រាយបញ្ហាបរិស្ថាននិងបម្រែបម្រួលអាកាសធាតុដែលកំពុងធ្វើឲ្យមនុស្សរងទុក្ខ។
«លោកថែរក្សាផែនដី លោកធ្វើឲ្យផែនដីបង្កើតភោគផលល្អៗយ៉ាងបរិបូរ»។ (ចម្រៀងសរសើរព្រះ ៦៥:៩) ដោយមានជំនួយពីព្រះយេហូវ៉ា ផែនដីនឹងក្លាយទៅជាសួនឧទ្យាន។
ដើម្បីរៀនថែមទៀតអំពីសេចក្ដីសន្យាក្នុងគម្ពីរស្ដីអំពីការធ្វើឲ្យបរិស្ថានល្អឡើងវិញ សូមមើលអត្ថបទដែលមានចំណងជើងថា«តើអ្នកណានឹងស្រោចស្រង់ផែនដី?»។