Photo by Stringer/Getty Images
ចូរចាំយាម!
សង្គ្រាមនៅមជ្ឈិមបូព៌ា តើគម្ពីរចែងយ៉ាងណា?
មនុស្សទូទាំងពិភពលោកកំពុងព្រួយបារម្ភចំពោះអ្វីដែលកើតឡើងរវាងសហរដ្ឋអាម៉េរិក ប្រទេសអ៊ីស្រាអែល និងប្រទេសអ៊ីរ៉ង់។ តើស្ថានភាពនេះកាន់តែអាក្រក់ទៅៗ ហើយអាចក្លាយទៅជាសង្គ្រាមមួយដែលមានឥទ្ធិពលលើប្រទេសជាច្រើនឬទេ? តើរដ្ឋាភិបាលនានាអាចរារាំងកុំឲ្យមានសង្គ្រាមកើតឡើងទេ? ហើយតើពួកគេអាចធ្វើឲ្យពិភពលោកទាំងមូលមានសន្តិភាពបានទេ?
មនុស្សដែលអានទំនាយក្នុងគម្ពីរ ប្រហែលជាឆ្ងល់ថាតើសង្គ្រាមនៅមជ្ឈិមបូព៌ានេះ អាចជាទីចាប់ផ្ដើមនៃសង្គ្រាមអាម៉ាគេដូនដែលបានត្រូវរៀបរាប់ក្នុងសៀវភៅការបើកបង្ហាញឬ?
តើគម្ពីរចែងយ៉ាងណា?
តើរដ្ឋាភិបាលទាំងឡាយនឹងបញ្ឈប់សង្គ្រាមនៅមជ្ឈិមបូព៌ាបានទេ?
គម្ពីរចែងថា៖«កុំទុកចិត្តពួកមានឋានៈខ្ពស់ កុំទុកចិត្តមនុស្ស ព្រោះពួកគេមិនអាចជួយសង្គ្រោះបានឡើយ»។—ចម្រៀងសរសើរព្រះ ១៤៦:៣
យើងមិនដឹងច្បាស់ថារដ្ឋាភិបាលនានានឹងអាចធ្វើឲ្យស្ថានភាពនៅមជ្ឈិមបូព៌ាមានសន្តិភាពឬយ៉ាងណាទេ។ ប៉ុន្តែ គម្ពីរបង្ហាញយ៉ាងច្បាស់ថាគ្មានអ្នកដឹកនាំនយោបាយណា រដ្ឋាភិបាលណា ឬក្រុមមនុស្សណាអាចបំបាត់ចោលសង្គ្រាម ហើយធ្វើឲ្យមានសន្តិភាពជារៀងរហូតបានឡើយ។ គឺមានតែព្រះប៉ុណ្ណោះដែលអាច«ធ្វើឲ្យផែនដីទាំងមូលលែងមានសង្គ្រាមទៀត»។—ចម្រៀងសរសើរព្រះ ៤៦:៩
ដើម្បីរៀនថែមទៀត សូមអានទស្សនាវដ្ដីប៉មយាមដែលមានចំណងជើងថា«សង្គ្រាមនឹងលែងមានទៀត តើតាមរបៀបណា?»។
តើសង្គ្រាមនៅមជ្ឈិមបូព៌ាបានកើតឡើងដូចទំនាយឬ?
គម្ពីរចែងថា៖«អ្នកនឹងឮសូរសង្គ្រាម ហើយនឹងឮគេនិយាយអំពីសង្គ្រាម . . . ប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ ហើយរាជាណាចក្រមួយនឹងលើកទ័ពទៅច្បាំងនឹងរាជាណាចក្រមួយ»។—ម៉ាថាយ ២៤:៦, ៧
សង្គ្រាមដែលកំពុងកើតឡើងនៅមជ្ឈិមបូព៌ា គឺជាព្រឹត្តិការណ៍មួយទៀតដែលបញ្ជាក់អំពី«គ្រាចុងបញ្ចប់នៃរបៀបរបបពិភពលោក» ហើយក៏ជាភស្តុតាងថែមទៀតដែលបញ្ជាក់ថាយើងកំពុងរស់នៅ«គ្រាចុងក្រោយបង្អស់»។ (ម៉ាថាយ ២៤:៣; ធីម៉ូថេទី២ ៣:១) សង្គ្រាមដែលយើងឃើញនៅសព្វថ្ងៃនេះបង្ហាញថាមិនយូរទៀតព្រះនឹងបំបាត់ចោលសង្គ្រាម រួមទាំងបញ្ហាផ្សេងៗដែលធ្វើឲ្យមនុស្សរងទុក្ខវេទនា។
ដើម្បីរៀនថែមទៀត សូមអានអត្ថបទដែលមានចំណងជើងថា«តើអ្វីជាសញ្ញាសម្គាល់នៃ‹គ្រាចុងក្រោយបង្អស់› ឬ‹ទីបញ្ចប់ពិភពលោក›?»។
តើសង្គ្រាមអាម៉ាគេដូននឹងចាប់ផ្ដើមពីមជ្ឈិមបូព៌ាឬ?
គម្ពីរចែងថា៖«ពួកគេបានប្រមូលស្ដេចទាំងនោះទៅឯកន្លែងដែលភាសាហេប្រឺហៅថាអាម៉ាគេដូន»។—ការបើកបង្ហាញ ១៦:១៦
សង្គ្រាមអាម៉ាគេដូនមិនមែនជាសង្គ្រាមរវាងរដ្ឋាភិបាលផ្សេងៗដែលចាប់ផ្ដើមពីមជ្ឈិមបូព៌ាទេ។ ប៉ុន្តែ វាជាសង្គ្រាមពិភពលោករវាងរដ្ឋាភិបាលរបស់មនុស្សនិងព្រះ។
ដើម្បីរៀនថែមទៀត សូមអានអត្ថបទដែលមានចំណងជើងថា«តើសង្គ្រាមអាម៉ាគេដូនជាអ្វី?»។
តើអ្វីអាចជួយយើងឲ្យរក្សាចិត្តស្ងប់ក្នុងគ្រាដ៏ច្របូកច្របល់នេះ?
គម្ពីរចែងថា៖«កុំខ្វល់ចិត្តអំពីអ្វីឡើយ តែចូរជម្រាបព្រះអំពីសំណូមពររបស់អ្នករាល់គ្នាក្នុងគ្រប់ការទាំងអស់ ដោយអធិដ្ឋាន អង្វរសុំ និងថ្លែងអំណរគុណ»។—ភីលីព ៤:៦
ព្រះយេហូវ៉ាaអញ្ជើញយើងឲ្យអធិដ្ឋានទៅលោក ព្រោះលោករមែងគិតពីយើង។ លោកនឹងស្ដាប់សេចក្ដីអធិដ្ឋានរបស់យើង ហើយជួយយើងកុំឲ្យព្រួយបារម្ភហួសហេតុពេក។ (ពេត្រុសទី១ ៥:៧) របៀបមួយដែលលោកធ្វើដូច្នេះ គឺដោយជួយយើងឲ្យយល់ពីមូលហេតុដែលមានសង្គ្រាម។ មិនត្រឹមតែប៉ុណ្ណោះ លោកក៏ជួយយើងឲ្យដឹងថាសង្គ្រាមទាំងនោះនឹងលែងមានទៀតតាមរបៀបណា ព្រមទាំងអំពីអ្វីដែលលោកនឹងធ្វើដើម្បីបំបាត់ចោលទុក្ខព្រួយនិងការឈឺចាប់របស់យើង។—ការបើកបង្ហាញ ២១:៣, ៤
ដើម្បីរៀនថែមទៀតអំពីរបៀបដែលព្រះផ្ដល់ការសម្រាលទុក្ខដល់យើង សូមអានអត្ថបទដែលមានចំណងជើងថា«តើខ្ញុំអាចរកពាក្យដែលសម្រាលទុក្ខខ្ញុំក្នុងគម្ពីរបានទេ?»។
a យេហូវ៉ាគឺជានាមរបស់ព្រះ។—ចម្រៀងសរសើរព្រះ ៨៣:១៨