បណ្ណាល័យអ៊ីនធឺណិតរបស់ប៉មយាម

ការវាយប្រហារពីទិសខាងជើង!

ទស្សនាវដ្ដីប៉មយាម (សម្រាប់សិក្សា) ២០២០ | មេសា
- ១៤. តើបទគម្ពីរនៅយ៉ូអែល ២:២៨, ២៩ បានសម្រេចនៅពេលណា?
  
  ^១៤ គួរឲ្យចាប់អារម្មណ៍ យ៉ូអែលនាំដំណឹងអំពីការស្ថាបនាឡើងវិញ។ ស្រុកនោះនឹងសម្បូរភោគផលម្ដងទៀត។ (យ៉ូល. ២:២៣-២៦) នឹងមានសេចក្ដីបង្រៀនដែលប្រៀបដូចជាអាហារយ៉ាងបរិបូរ។ ព្រះយេហូវ៉ាបានមានប្រសាសន៍ថា៖ ‹អញនឹងចាក់វិញ្ញាណរបស់អញទៅលើគ្រប់ទាំងមនុស្ស នោះកូនប្រុសស្រីរបស់ឯងនឹងទាយ។ អញនឹងចាក់វិញ្ញាណរបស់អញទៅលើទាំងពួកទាសាទាសីដែរ›។ (យ៉ូល. ២:២៨, ២៩) ព្រះមិនបានចាក់សកម្មពលរបស់លោកទៅលើជនជាតិអ៊ីស្រាអែលភ្លាមៗក្រោយពីពួកគេត្រឡប់ពីស្រុកបាប៊ីឡូនទៅស្រុកកំណើតរបស់ពួកគេវិញឡើយ។ ផ្ទុយទៅវិញ នេះបានកើតឡើងរាប់រយឆ្នាំក្រោយមក នៅបុណ្យថ្ងៃទី៥០ ឆ្នាំ៣៣ គ.ស.។ តើយើងដឹងយ៉ាងដូចម្ដេច?
  
  ១៥. យោងទៅតាមសកម្មភាព ២:១៦, ១៧ តើពេត្រុសបានផ្លាស់ប្ដូរពាក្យអ្វីនៅបទគម្ពីរយ៉ូអែល ២:២៨ ហើយតើនេះបង្ហាញអំពីអ្វី?
  
  ^១៥ ក្រោមការដឹកនាំរបស់ព្រះ សាវ័កពេត្រុសបាននិយាយថាបទគម្ពីរនៅយ៉ូអែល ២:២៨, ២៩ សំដៅលើព្រឹត្តិការណ៍ដ៏អស្ចារ្យមួយដែលបានកើតឡើងនៅបុណ្យថ្ងៃទី៥០នោះ។ ប្រហែលជាម៉ោង៩នៅព្រឹកនោះ ព្រះបានចាក់សកម្មពលបរិសុទ្ធរបស់លោក ហើយពួកអ្នកដែលបានទទួលសកម្មពលនោះបានចាប់ផ្ដើមនិយាយ«អំពីការដ៏រុងរឿងរបស់ព្រះ»។ (សកម្ម. ២:១១) ក្រោមការដឹកនាំពីព្រះ ពេត្រុសបានផ្លាស់ប្ដូរពាក្យបន្តិចបន្តួចពេលគាត់ដកស្រង់ទំនាយរបស់យ៉ូអែល។ តើអ្នកបានកត់សម្គាល់ឃើញពាក្យដែលគាត់បានផ្លាស់ប្ដូរឬទេ? (សូមអាន សកម្មភាព ២:១៦, ១៧) ពេត្រុសមិនបានប្រើពាក្យ«ក្រោយគ្រានោះ» ដូចក្នុងទំនាយរបស់យ៉ូអែលទេ ប៉ុន្តែគាត់បាននិយាយថា៖ «នៅគ្រាចុងក្រោយ» ពោលគឺគ្រាចុងក្រោយនៃរបៀបរបបយូដា។ នៅគ្រានោះ ព្រះបានចាក់សកម្មពលរបស់លោកទៅលើ«មនុស្សគ្រប់ប្រភេទ»។ នេះបង្ហាញថាមានរយៈពេលជាយូរដែលបានកន្លងទៅមុនទំនាយរបស់យ៉ូអែលបានត្រូវសម្រេច។
  
  ១៦. តើសកម្មពលរបស់ព្រះមានឥទ្ធិពលយ៉ាងណាលើកិច្ចការផ្សព្វផ្សាយនៅសតវត្សរ៍ទី១ ហើយចុះយ៉ាងណានៅសព្វថ្ងៃនេះវិញ?
  
  ^១៦ ក្រោយពីព្រះបានចាក់សកម្មពលបរិសុទ្ធរបស់លោកទៅលើគ្រិស្តសាសនិកនៅសតវត្សរ៍ទី១ ពួកគេបានចាប់ផ្ដើមកិច្ចការផ្សព្វផ្សាយដែលក្រោយមកនឹងត្រូវធ្វើឡើងនៅទូទាំងពិភពលោក។ ពេលដែលសាវ័កប៉ូលបានសរសេរសំបុត្ររបស់គាត់ទៅគ្រិស្តសាសនិកនៅក្រុងកូឡុស ប្រហែលជានៅឆ្នាំ៦១ គ.ស. គាត់អាចរៀបរាប់ថាដំណឹងល្អបានត្រូវប្រកាស«ក្នុងចំណោមមនុស្សទាំងអស់នៅក្រោមមេឃ»។ (កូឡ. ១:២៣) នៅសម័យរបស់ប៉ូល «មនុស្សទាំងអស់»គឺសំដៅទៅលើមនុស្សដែលប៉ូលនិងអ្នកឯទៀតអាចជួប។ ដោយមានជំនួយពីសកម្មពលបរិសុទ្ធដ៏ខ្លាំងក្លារបស់ព្រះយេហូវ៉ា កិច្ចការផ្សព្វផ្សាយបានរីកចម្រើននៅសម័យរបស់យើង «រហូតដល់កន្លែងឆ្ងាយបំផុតនៅផែនដី»!—សកម្ម. ១៣:៤៧; សូមមើលប្រអប់ដែលមានចំណងជើងថា ‹អញនឹងចាក់វិញ្ញាណរបស់អញ›។
  
  ‹អញនឹងចាក់វិញ្ញាណរបស់អញ›
  
  នៅបុណ្យថ្ងៃទី៥០ ឆ្នាំ៣៣ គ.ស. បុរសស្ត្រីប្រហែលជា៣.០០០នាក់បានទទួលការជ្រមុជទឹកជាអ្នកកាន់តាមលោកយេស៊ូគ្រិស្ត។ ភ្លាមៗនោះ ពួកគេបានចាប់ផ្ដើមប្រាប់សេចក្ដីពិតអំពីលោកយេស៊ូដល់អ្នកឯទៀត។ តើព្រះយេហូវ៉ាបានឲ្យពរទៅលើកិច្ចការដ៏ខ្នះខ្នែងរបស់ពួកគេឬទេ? លោកបានឲ្យពរមែន! មនុស្ស«រាប់ពាន់នាក់»បានទៅជាអ្នកកាន់តាមគ្រិស្ត។—សកម្ម. ២:៤១; ២១:២០
  
  តើមនុស្សប៉ុន្មានពាន់នាក់បានទៅជាគ្រិស្តសាសនិក? គម្ពីរមិនបានចែងទេ ប៉ុន្តែសូម្បីតែនៅចុងសតវត្សរ៍ទី១ ក៏ទំនងជាមានចំនួនគ្រិស្តសាសនិកតិចជាង១៤៤.០០០នាក់ឆ្ងាយណាស់។ នៅពេលនោះ ព្រះយេហូវ៉ាជ្រើសរើសបុរសស្ត្រីឲ្យមានសេចក្ដីសង្ឃឹមគ្រប់គ្រងក្នុងរាជាណាចក្រស្ថានសួគ៌ ប៉ុន្តែពួកអ្នកដែលបានត្រូវរើសតាំងភាគច្រើនបានត្រូវជ្រើសរើសនៅសម័យនេះ។ ក៏ប៉ុន្តែ ការរីកចម្រើនដ៏អស្ចារ្យនៅសតវត្សរ៍ទី១ បង្ហាញថាព្រះយេហូវ៉ាបានចាក់សកម្មពលរបស់លោកលើពួកអ្នកកាន់តាមទាំងនោះនៅសម័យដើម។—សកម្ម. ២:១៦-១៨
  
  តើមានភ័ស្តុតាងដែលបញ្ជាក់ថាព្រះយេហូវ៉ាបានចាក់សកម្មពលលើអ្នកបម្រើរបស់លោកនៅសព្វថ្ងៃនេះឬទេ? ច្បាស់ជាមាន! សូមគិតអំពីព័ត៌មានទាំងនេះ៖ យោងទៅតាមស្ថិតិខ្លះ នៅឆ្នាំ១៩១៩មានអ្នកផ្សាយដំណឹងល្អមិនដល់៦.០០០នាក់នៅទូទាំងពិភពលោក។ ទោះជាយ៉ាងនេះក្ដី ព្រះយេហូវ៉ាបានឲ្យពរទៅលើកិច្ចការផ្សព្វផ្សាយ ហើយតាំងពីឆ្នាំ១៩៨៣មក មនុស្សជាង១៤៤.០០០នាក់បានទទួលការជ្រមុជទឹកធ្វើជាសាក្សីព្រះយេហូវ៉ាជារៀងរាល់ឆ្នាំ! នេះច្បាស់ជាភ័ស្តុតាងដែលបញ្ជាក់ថាព្រះយេហូវ៉ាធ្វើតាមសេចក្ដីសន្យារបស់លោកអំពីអ្នកបម្រើលោកថា៖ ‹អញនឹងចាក់វិញ្ញាណរបស់អញ›!—យ៉ូល. ២:២៨, ២៩

ការវាយប្រហារពីទិសខាងជើង!

ទស្សនាវដ្ដីប៉មយាម (សម្រាប់សិក្សា) ២០២០ | មេសា