-
តើលោកអ្នកនឹងឃើញអ្វីខ្លះនៅកិច្ចប្រជុំគ្រិស្តសាសនិករបស់យើង?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៥
តើលោកអ្នកនឹងឃើញអ្វីខ្លះនៅកិច្ចប្រជុំគ្រិស្តសាសនិករបស់យើង?
អាហ្សង់ទីន
សេរ៉ាឡេអូន
បែលស៊ិច
ម៉ាឡេស៊ី
មនុស្សជាច្រើនឈប់ចូលរួមក្នុងសកម្មភាពខាងសាសនាទៀត ដោយសារពួកគេមិនបានទទួលចម្លើយចំពោះសំណួរសំខាន់បំផុតក្នុងជីវិតឬមិនបានទទួលការសម្រាលទុក្ខឡើយ។ បើដូច្នេះ ហេតុអ្វីលោកអ្នកគួរចូលរួមកិច្ចប្រជុំគ្រិស្តសាសនិកដែលបានរៀបចំឡើងដោយសាក្សីព្រះយេហូវ៉ា? តើលោកអ្នកនឹងឃើញអ្វីខ្លះនៅក្នុងកិច្ចប្រជុំនោះ?
លោកអ្នកនឹងរីករាយក្នុងចំណោមមនុស្សដែលបង្ហាញសេចក្ដីស្រឡាញ់ និងយកចិត្តទុកដាក់ចំពោះលោកអ្នក។ នៅសតវត្សរ៍ទី១ គ្រិស្តសាសនិកបានត្រូវរៀបចំជាក្រុមជំនុំផ្សេងៗ ហើយពួកគាត់មានកិច្ចប្រជុំដើម្បីគោរពប្រណិប័តន៍ព្រះ ដើម្បីរៀនគម្ពីរ និងដើម្បីលើកទឹកចិត្តគ្នាទៅវិញទៅមក។ (ហេប្រឺ ១០:២៤, ២៥) ពួកគាត់បានប្រជុំគ្នានៅក្នុងបរិយាកាសដែលពេញទៅដោយសេចក្ដីស្រឡាញ់ ហើយពួកគាត់មានអារម្មណ៍ថា ខ្លួននៅក្នុងចំណោមមិត្តជិតស្និទ្ធ ពោលគឺបងប្អូនរួមជំនឿ។ (ថែស្សាឡូនិចទី២ ១:៣; យ៉ូហានទី៣ ១៤) សព្វថ្ងៃនេះ យើងធ្វើតាមគំរូបងប្អូនគ្រិស្តសាសនិកនៅសតវត្សរ៍ទី១ ហើយយើងក៏មានចិត្តរីករាយដូចពួកគាត់ដែរ។
លោកអ្នកនឹងទទួលប្រយោជន៍ពីការធ្វើតាមគោលការណ៍ក្នុងគម្ពីរ។ ដូចនៅសម័យគម្ពីរ បុរស ស្ត្រី និងកូនក្មេងត្រូវចូលរួមប្រជុំជាមួយគ្នា។ ពួកអ្នកដែលមានគុណសម្បត្ដិគ្រប់គ្រាន់ក្នុងការបង្រៀន ពួកគាត់ប្រើគម្ពីរដើម្បីជួយយើងឲ្យចេះវែកញែករបៀបធ្វើតាមគោលការណ៍គម្ពីរក្នុងជីវិតប្រចាំថ្ងៃ។ (ចោទិយកថា ៣១:១២; នេហេមា ៨:៨) កាលដែលបងប្អូនទាំងអស់ចូលរួមឆ្លើយ និងច្រៀងចម្រៀង នោះជាឱកាសដែលយើងអាចបញ្ជាក់អំពីសេចក្ដីសង្ឃឹមរបស់យើងជាគ្រិស្តសាសនិក។—ហេប្រឺ ១០:២៣
លោកអ្នកនឹងទទួលពរគឺមានជំនឿមាំមួនទៅលើព្រះ។ នៅសម័យសាវ័កប៉ូល គាត់បានប្រាប់ក្រុមជំនុំមួយថា៖ «ខ្ញុំចង់ជួបអ្នករាល់គ្នាខ្លាំងណាស់ . . . ដើម្បីយើងម្នាក់ៗអាចលើកទឹកចិត្តគ្នាទៅវិញទៅមក ដោយជំនឿរបស់យើង គឺជំនឿរបស់អ្នករាល់គ្នា និងជំនឿរបស់ខ្ញុំ»។ (រ៉ូម ១:១១, ១២) នៅកិច្ចប្រជុំ កាលដែលយើងជួបជុំគ្នាជាមួយបងប្អូនរួមជំនឿ នោះអាចពង្រឹងជំនឿនិងពង្រឹងការតាំងចិត្តរបស់យើង ដើម្បីរស់នៅស្របតាមគោលការណ៍ក្នុងគម្ពីរ។
ដូច្នេះ យើងសូមអញ្ជើញលោកអ្នកឲ្យចូលរួមក្នុងកិច្ចប្រជុំនៅលើកក្រោយ ហើយពិសោធនូវអ្វីៗទាំងនេះដោយខ្លួនលោកអ្នកផ្ទាល់។ លោកអ្នកនឹងត្រូវទទួលស្វាគមន៍យ៉ាងកក់ក្ដៅ។ កិច្ចប្រជុំទាំងអស់គឺឥតគិតថ្លៃ ដោយគ្មានការរៃអង្គាសលុយឡើយ។
តើកិច្ចប្រជុំរបស់យើងធ្វើតាមគំរូអ្វី?
បើយើងចូលរួមក្នុងកិច្ចប្រជុំគ្រិស្តសាសនិក តើយើងនឹងទទួលប្រយោជន៍អ្វីខ្លះ?
-
-
តើការសេពគប់គ្រិស្តសាសនិករួមជំនឿជួយយើងយ៉ាងដូចម្ដេច?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៦
តើការសេពគប់គ្រិស្តសាសនិករួមជំនឿជួយយើងយ៉ាងដូចម្ដេច?
ម៉ាដាហ្គាស្កា
ន័រវ៉េ
លីបង់
អ៊ីតាលី
សូម្បីតែមានអាកាសធាតុមិនល្អ ឬត្រូវធ្វើដំណើរកាត់ព្រៃស្តុកក៏ដោយ ក៏យើងមកប្រជុំជាទៀតទាត់ដែរ។ ទោះជាមានបញ្ហាក្នុងជីវិត និងអស់កម្លាំងក្រោយពីធ្វើការពេញមួយថ្ងៃក្ដី ហេតុអ្វីសាក្សីព្រះយេហូវ៉ាខំព្យាយាមចូលរួមប្រជុំដើម្បីសេពគប់បងប្អូនរួមជំនឿ?
ជួយយើងឲ្យមានសេចក្ដីសុខសាន្តទាំងផ្លូវកាយទាំងផ្លូវចិត្ត។ ពេលប៉ូលនិយាយអំពីពួកអ្នកដែលយើងសេពគប់ក្នុងក្រុមជំនុំ នោះគាត់បានសរសេរថា៖ «ចូរយើងគិតអំពីគ្នាទៅវិញទៅមក»។ (ហេប្រឺ ១០:២៤) ពាក្យនេះបង្កប់អត្ថន័យថាយើងត្រូវព្យាយាមស្គាល់គ្នាទៅវិញទៅមកឲ្យបានច្បាស់ជាង។ ដូច្នេះ ពាក្យរបស់សាវ័កប៉ូលលើកទឹកចិត្តយើងឲ្យយកចិត្តទុកដាក់ចំពោះអ្នកឯទៀត។ ក្រុមគ្រួសារគ្រិស្តសាសនិកខ្លះក៏មានបញ្ហាស្រដៀងនឹងយើងដែរ ហើយពួកគាត់បានយកឈ្នះបញ្ហានោះ។ ដូច្នេះ កាលដែលយើងសេពគប់ពួកគាត់ នោះពួកគាត់ក៏អាចជួយយើងបានដែរ។
ជួយយើងឲ្យមានចំណងមិត្តភាពរឹងមាំ។ នៅកិច្ចប្រជុំ ពួកអ្នកដែលយើងជួបមិនគ្រាន់តែជាអ្នកដែលយើងស្គាល់ប៉ុណ្ណោះទេ តែជាមិត្តសំឡាញ់របស់យើង។ ម្យ៉ាងទៀត យើងក៏ចំណាយពេលជាមួយគ្នាក្នុងការសម្រាកលំហែកាយដែរ។ តើការសេពគប់ដូចនេះជួយយើងយ៉ាងដូចម្ដេច? ជួយយើងឲ្យចេះឲ្យតម្លៃចំពោះគ្នាទៅវិញទៅមកច្រើនជាងមុន ហើយនោះក៏ពង្រឹងចំណងនៃសេចក្ដីស្រឡាញ់របស់យើងដែរ។ ដោយសារយើងមានចំណងមិត្តភាពរឹងមាំរួចហើយ នោះយើងត្រៀមខ្លួនជាស្រេចដើម្បីជួយបងប្អូនយើង ពេលដែលពួកគាត់មានបញ្ហា។ (សុភាសិត ១៧:១៧) កាលដែលយើងសេពគប់សមាជិកទាំងអស់ក្នុងក្រុមជំនុំ នោះបង្ហាញថាយើង«យកចិត្តទុកដាក់ចំពោះគ្នាទៅវិញទៅមក»។—កូរិនថូសទី១ ១២:២៥, ២៦
យើងសូមលើកទឹកចិត្តលោកអ្នកឲ្យជ្រើសរើសមិត្តសម្លាញ់ដែលជាអ្នកធ្វើតាមបំណងប្រាថ្នារបស់ព្រះ។ លោកអ្នកអាចរកឃើញមិត្តភក្ដិបែបនេះក្នុងចំណោមសាក្សីព្រះយេហូវ៉ា។ សូមកុំឲ្យមានអ្វីមករារាំងលោកអ្នកពីការសេពគប់យើងឡើយ។
ហេតុអ្វីការសេពគប់គ្នានៅឯកិច្ចប្រជុំនាំឲ្យមានប្រយោជន៍?
តើពេលណាលោកអ្នកចង់ចូលរួមកិច្ចប្រជុំជាមួយយើង?
-
-
តើកិច្ចប្រជុំរបស់យើងមានលក្ខណៈយ៉ាងដូចម្ដេច?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៧
តើកិច្ចប្រជុំរបស់យើងមានលក្ខណៈយ៉ាងដូចម្ដេច?
ញូវហ្សេឡែន
ជប៉ុន
អ៊ូហ្គង់ដា
លីទុយអានី
អ្វីដ៏សំខាន់ដែលមានក្នុងកិច្ចប្រជុំរបស់គ្រិស្តសាសនិកជំនាន់ដើម គឺការច្រៀងចម្រៀង ការអធិដ្ឋាន ការអាននិងការពិគ្រោះបទគម្ពីរ។ (កូរិនថូសទី១ ១៤:២៦) អ្នកអាចឃើញថា អ្វីដែលបានរៀបរាប់ខាងលើនេះគឺស្រដៀងគ្នានឹងអ្វីដែលមាននៅកិច្ចប្រជុំរបស់យើង។
យើងទទួលការណែនាំដែលមានប្រយោជន៍ និងមានមូលដ្ឋានលើគម្ពីរ។ នៅចុងសប្ដាហ៍ ក្រុមជំនុំនីមួយៗមានសុន្ទរកថាពីគម្ពីរចំនួន៣០នាទី ដែលជួយពន្យល់អំពីរបៀបដែលបទគម្ពីរទាក់ទងនឹងជីវិតរបស់យើង និងគ្រាដែលយើងកំពុងរស់នៅ។ យើងទាំងអស់គ្នាបានទទួលការលើកទឹកចិត្តឲ្យផ្ទៀងតាមក្នុងគម្ពីររបស់យើងផ្ទាល់។ ក្រោយសុន្ទរកថានេះ មានការសិក្សា«ទស្សនាវដ្ដីប៉មយាម»អស់រយៈពេលមួយម៉ោង ហើយសមាជិកម្នាក់ៗក្នុងក្រុមជំនុំអាចចូលរួមឆ្លើយពីអត្ថបទសិក្សាដែលមានក្នុងទស្សនាវដ្ដីប៉មយាមនោះ។ ការពិគ្រោះគ្នានេះជួយយើងឲ្យធ្វើតាមការណែនាំក្នុងគម្ពីរ។ នៅទូទាំងពិភពលោក ក្រុមជំនុំជាង១១០.០០០សិក្សាទស្សនាវដ្ដីប៉មយាមនេះដូចគ្នា។
ជួយយើងឲ្យមានភាពប៉ិនប្រសប់ក្នុងការបង្រៀន។ ក្រៅពីថ្ងៃសៅរ៍ថ្ងៃអាទិត្យ យើងមានកិច្ចប្រជុំមួយទៀតនៅពេលល្ងាចដែលមានកម្មវិធីចែកជាបីផ្នែក ដែលហៅថា កិច្ចបម្រើនិងជីវិតជាគ្រិស្តសាសនិក។ កិច្ចប្រជុំនេះមានមូលដ្ឋានលើឯកសារកំណត់សម្រាប់កិច្ចប្រជុំ កិច្ចបម្រើនិងជីវិត ដែលចេញប្រចាំខែ។ ផ្នែកដំបូងគឺចំណេះវិសេសពីបណ្ដាំរបស់ព្រះដែលជួយយើងឲ្យស្គាល់ថែមទៀតនូវចំណុចមួយក្នុងគម្ពីរដែលបងប្អូនក្នុងក្រុមជំនុំបានអានទុកជាមុន។ ផ្នែកបន្ទាប់ គឺចូរខំព្យាយាមក្នុងកិច្ចបម្រើផ្សាយ ដែលរួមបញ្ចូលការសម្ដែងអំពីរបៀបពិភាក្សាគម្ពីរជាមួយអ្នកឯទៀត។ អ្នកជូនឱវាទនឹងឲ្យយោបល់ដើម្បីជួយយើងឲ្យកាន់តែប៉ិនប្រសប់ក្នុងការអាននិងនិយាយ។ (ធីម៉ូថេទី១ ៤:១៣) ផ្នែកចុងក្រោយ គឺរបៀបរស់នៅជាគ្រិស្តសាសនិកដែលជួយយើងឲ្យធ្វើតាមគោលការណ៍គម្ពីរក្នុងជីវិតប្រចាំថ្ងៃ។ ផ្នែកនេះរួមបញ្ចូលការពិគ្រោះដែលជួយយើងឲ្យយល់កាន់តែច្បាស់អំពីគម្ពីរ។
ពេលលោកអ្នកចូលរួមកិច្ចប្រជុំរបស់យើង លោកអ្នកច្បាស់ជានឹងកោតស្ងើចក្នុងចិត្តចំពោះអ្វីដែលលោកអ្នកនឹងទទួលពីការអប់រំដ៏ល្អក្នុងគម្ពីរ។—អេសាយ ៥៤:១៣
តើលោកអ្នកអាចរៀនអ្វីខ្លះនៅឯកិច្ចប្រជុំរបស់សាក្សីព្រះយេហូវ៉ា?
តើកិច្ចប្រជុំមួយណាដែលលោកអ្នកចង់ចូលរួមនៅលើកក្រោយ?
-
-
ហេតុអ្វីយើងត្រូវស្លៀកពាក់ស្អាតបាតពេលចូលរួមកិច្ចប្រជុំ?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៨
ហេតុអ្វីយើងត្រូវស្លៀកពាក់ស្អាតបាតពេលចូលរួមកិច្ចប្រជុំ?
អ៊ីស្លង់
ម៉ិចស៊ិច
ហ្គីណេប៊ីសៅ
ហ្វីលីពីន
តើលោកអ្នកបានកត់សម្គាល់រូបភាពក្នុងសៀវភៅស្តើងនេះឬទេ? សាក្សីព្រះយេហូវ៉ាស្លៀកពាក់ស្អាតបាតពេលដែលពួកគេចូលរួមកិច្ចប្រជុំ។ ហេតុអ្វីយើងត្រូវយកចិត្តទុកដាក់ចំពោះសម្លៀកបំពាក់និងការសម្អិតសម្អាងខ្លួនរបស់យើង?
ដើម្បីបង្ហាញការគោរពចំពោះព្រះ។ ជាការពិតណាស់ ព្រះមិនប្រមូលអារម្មណ៍ទៅលើសម្បកក្រៅរបស់យើងទេ។ (សាំយូអែលទី១ ១៦:៧) ក៏ប៉ុន្តែ ពេលដែលយើងប្រជុំគ្នាដើម្បីគោរពប្រណិប័តន៍លោក យើងចង់បង្ហាញការគោរពចំពោះលោកនិងចំពោះបងប្អូនរួមជំនឿ។ ជាឧទាហរណ៍ បើយើងត្រូវឈរនៅមុខចៅក្រមវិនិច្ឆ័យ យើងនឹងទំនងជាយកចិត្តទុកដាក់ចំពោះអាការៈក្រៅរបស់យើងដើម្បីបង្ហាញការគោរពចំពោះឋានៈរបស់គាត់។ ស្រដៀងគ្នាដែរ របៀបដែលយើងស្លៀកពាក់ពេលចូលរួមកិច្ចប្រជុំក៏បង្ហាញអំពីការគោរពរបស់យើងចំពោះព្រះយេហូវ៉ាដែលជា«ចៅក្រមនៃផែនដីទាំងមូល» និងចំពោះទីកន្លែងគោរពប្រណិប័តន៍លោកដែរ។—លោកុប្បត្តិ ១៨:២៥
ដើម្បីឲ្យស្របតាមគោលការណ៍គម្ពីរ។ គម្ពីរលើកទឹកចិត្តគ្រិស្តសាសនិកទាំងឡាយឲ្យស្លៀកពាក់«បែបរមទម និងដោយមានគំនិតសមហេតុសមផល»។ (ធីម៉ូថេទី១ ២:៩, ១០) ការស្លៀកពាក់«បែបរមទម»មានន័យថា យើងមិនត្រូវស្លៀកសម្លៀកបំពាក់ណាដែលប្រហែលជាធ្វើឲ្យអ្នកឯទៀតចាប់អារម្មណ៍មកលើយើង ដោយសារឆើតឆាយពេក ធ្វើឲ្យគេមានអារម្មណ៍ស្រើបស្រាល ឬលេចលើលេចក្រោមនោះទេ។ បន្ថែមទៅទៀត ការមាន«គំនិតសមហេតុផល»ជួយយើងឲ្យចេះជ្រើសរើសសម្លៀកបំពាក់ដែលមិនរយីករយាកពេក ឬឆើតឆាយពេក។ គោលការណ៍ទាំងនេះនៅតែគោរពការសម្រេចចិត្តរបស់មនុស្សម្នាក់ៗ ស្តីអំពីការស្លៀកពាក់និងការសម្អិតសម្អាងខ្លួន។ ពេលយើងស្លៀកពាក់ស្អាតបាត ហើយមិនធ្វើឲ្យអ្នកឯទៀតទាស់ភ្នែក នោះអាច‹ធ្វើឲ្យសេចក្ដីបង្រៀនរបស់ព្រះដែលជាអ្នកសង្គ្រោះយើងមានលម្អ› ហើយនាំឲ្យគេ«សរសើរព្រះ»ផងដែរ។ (ទីតុស ២:១០; ពេត្រុសទី១ ២:១២) បើយើងស្លៀកពាក់ស្អាតបាតពេលចូលរួមកិច្ចប្រជុំ នោះយើងអាចជះឥទ្ធិពលទៅលើរបៀបដែលអ្នកឯទៀតគិតអំពីការគោរពប្រណិប័តន៍ព្រះយេហូវ៉ា។
ទោះជាលោកអ្នកគ្មានសម្លៀកបំពាក់ស្អាតបាតក៏ដោយ ក៏លោកអ្នកនៅតែបានត្រូវស្វាគមន៍មកចូលរួមក្នុងកិច្ចប្រជុំដែរ។ សម្លៀកបំពាក់ដែលស្អាតសមរម្យមិនចាំបាច់មានតម្លៃថ្លៃឬមានម៉ូដក្បូរក្បាច់ច្រើននោះទេ។
តើរបៀបដែលយើងស្លៀកពាក់ពេលចូលរួមគោរពប្រណិប័តន៍ព្រះ គឺសំខាន់ប៉ុណ្ណា?
តើមានគោលការណ៍អ្វីខ្លះដែលជួយយើងឲ្យចេះជ្រើសរើសការសម្អិតសម្អាងខ្លួននិងការស្លៀកពាក់?
-
-
តើអ្វីជាវិធីដ៏ល្អបំផុតដើម្បីរៀបចំសម្រាប់កិច្ចប្រជុំ?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី៩
តើអ្វីជាវិធីដ៏ល្អបំផុតដើម្បីរៀបចំសម្រាប់កិច្ចប្រជុំ?
កម្ពុជា
អ៊ុយក្រែន
បើលោកអ្នកកំពុងរៀនគម្ពីរជាមួយសាក្សីព្រះយេហូវ៉ា លោកអ្នកទំនងជាបានរៀបចំមេរៀនទុកជាមុនសម្រាប់ការសិក្សានីមួយៗ។ ស្រដៀងគ្នាដែរ បើយើងរៀបចំទុកជាមុនសម្រាប់កិច្ចប្រជុំនៅក្រុមជំនុំ នោះយើងអាចទទួលប្រយោជន៍ច្រើនបំផុត។ កាលណាយើងមានទម្លាប់ល្អ នោះយើងក៏ទទួលបានលទ្ធផលល្អដែរ។
ជ្រើសរើសពេលវេលានិងទីកន្លែងដើម្បីសិក្សា។ តើលោកអ្នកអាចផ្ចង់អារម្មណ៍បានល្អបំផុតនៅពេលណា? ពេលព្រលឹមមុនទៅធ្វើការ ឬពេលយប់ក្រោយកូនចូលគេងហើយ? ទោះជាលោកអ្នកមិនអាចចំណាយពេលយូរដើម្បីសិក្សាក៏ដោយ សូមសម្រេចចិត្តថាលោកអ្នកអាចលៃទុកពេលប៉ុណ្ណា ហើយព្យាយាមកុំឲ្យមានអ្វីមករំខានលោកអ្នកឡើយ។ ចូររកកន្លែងស្ងាត់ ហើយបិទសំឡេងវិទ្យុ ទូរទស្សន៍ និងទូរស័ព្ទដៃ ដើម្បីកុំឲ្យមានអ្វីមកបង្វែរអារម្មណ៍។ ការអធិដ្ឋានមុនសិក្សានឹងជួយលោកអ្នកកុំឲ្យខ្វល់ខ្វាយអំពីរឿងផ្សេងៗនៅថ្ងៃនោះដើម្បីលោកអ្នកអាចផ្ចង់អារម្មណ៍ទៅលើការសិក្សាបណ្ដាំរបស់ព្រះ។—ភីលីព ៤:៦, ៧
គូសចម្លើយ និងរៀបចំដើម្បីឆ្លើយ។ មុនដំបូង សូមយល់អំពីសាច់រឿងទាំងអស់ដែលមាននៅក្នុងមេរៀន។ សូមគិតអំពីចំណងជើងនៃអត្ថបទ ឬជំពូក ហើយពិចារណាអំពីរបៀបដែលចំណងជើងតូចនីមួយៗទាក់ទងនឹងប្រធាន។ ពិនិត្យមើលរូបភាព និងសំណួរសាឡើងវិញដែលលើកបញ្ជាក់ចំណុចសំខាន់ៗក្នុងមេរៀន។ បន្ទាប់មក សូមអានវគ្គនីមួយៗ ហើយរកចម្លើយចំពោះសំណួរដែលមានក្នុងមេរៀននោះ។ សូមមើល និងអានបទគម្ពីរនានាដែលមានក្នុងអត្ថបទ ហើយគិតអំពីរបៀបដែលបទគម្ពីរទាក់ទងនឹងអត្ថបទ។ (សកម្មភាព ១៧:១១) ពេលរកឃើញចម្លើយហើយ សូមគូសពាក្យឬឃ្លាសំខាន់ខ្លះៗក្នុងវគ្គដែលនឹងជួយលោកអ្នកឲ្យនឹកឃើញចម្លើយក្នុងអំឡុងពេលប្រជុំ។ នៅកិច្ចប្រជុំ បើលោកអ្នកចង់ នោះអាចលើកដៃឆ្លើយ ហើយអាចឆ្លើយយ៉ាងខ្លីដែលចេញពីចិត្តរបស់លោកអ្នក។
ដោយពិចារណាអំពីប្រធានផ្សេងៗដែលបានសិក្សានៅឯកិច្ចប្រជុំជារៀងរាល់សប្ដាហ៍ នោះលោកអ្នកនឹងមានចំណេះថែមទៀតពីគម្ពីរ។ ចំណេះបែបនោះគឺប្រៀបដូចជា«ឃ្លាំងទ្រព្យ»របស់លោកអ្នក។—ម៉ាថាយ ១៣:៥១, ៥២
តើលោកអ្នកអាចមានទម្លាប់អ្វីខ្លះក្នុងការរៀបចំសម្រាប់កិច្ចប្រជុំ?
តើលោកអ្នកអាចរៀបចំចម្លើយដើម្បីឆ្លើយនៅកិច្ចប្រជុំយ៉ាងដូចម្ដេច?
-
-
តើអ្វីទៅដែលហៅថាការគោរពប្រណិប័តន៍ជាក្រុមគ្រួសារ?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី១០
តើអ្វីទៅដែលហៅថាការគោរពប្រណិប័តន៍ជាក្រុមគ្រួសារ?
កូរ៉េខាងត្បូង
ប្រេស៊ីល
អូស្ដ្រាលី
ហ្គីណេ
តាំងពីសម័យបុរាណ ព្រះយេហូវ៉ាចង់ឲ្យក្រុមគ្រួសារនីមួយៗចំណាយពេលជាមួយគ្នាដើម្បីពង្រឹងចំណងមិត្តភាពជាមួយលោក និងជាមួយសមាជិកក្រុមគ្រួសារ។ (ចោទិយកថា ៦:៦, ៧) នេះជាមូលហេតុដែលសាក្សីព្រះយេហូវ៉ាលៃទុកពេលមួយជារៀងរាល់សប្ដាហ៍ដើម្បីគោរពប្រណិប័តន៍ព្រះជាមួយគ្នា ពោលគឺក្នុងបរិយាកាសដែលធ្វើឲ្យមានអារម្មណ៍ស្រួល ពួកគេពិភាក្សាគ្នាតាមតម្រូវការរបស់ពួកគេស្តីអំពីរឿងដែលទាក់ទងនឹងព្រះ។ ទោះជាលោកអ្នករស់នៅតែម្នាក់ឯងក៏ដោយ លោកអ្នកអាចប្រើពេលវេលានេះដើម្បីចូលទៅជិតព្រះ ដោយជ្រើសរើសប្រធានបទមួយដើម្បីសិក្សាផ្ទាល់ខ្លួន។
ការគោរពប្រណិប័តន៍ជាក្រុមគ្រួសារជួយយើងឲ្យកាន់តែចូលទៅជិតព្រះយេហូវ៉ា។ គម្ពីរចែងថា៖ «ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ»។ (យ៉ាកុប ៤:៨) យើងនឹងស្គាល់ព្រះយេហូវ៉ាកាន់តែច្បាស់ជាង ពេលដែលយើងរៀនយ៉ាងល្អិតល្អន់អំពីគុណសម្បត្ដិនិងការប្រព្រឹត្តរបស់លោកតាមរយៈគម្ពីរដែលជាបណ្ដាំរបស់លោក។ វិធីដ៏ស្រួលមួយដើម្បីចាប់ផ្ដើមមានការគោរពប្រណិប័តន៍ជាក្រុមគ្រួសារ គឺចំណាយពេលអានគម្ពីរជាមួយគ្នាដោយបញ្ចេញសំឡេងឲ្យឮៗ។ លោកអ្នកប្រហែលជាអាចអានតាមអំណានគម្ពីរប្រចាំសប្ដាហ៍ដែលមានក្នុងកិច្ចប្រជុំ កិច្ចបម្រើនិងជីវិត។ សូមឲ្យសមាជិកម្នាក់ៗអានមួយផ្នែកនៃអំណាននោះ បន្ទាប់មក សមាជិកទាំងអស់អាចពិភាក្សាគ្នាអំពីចំណុចដែលពួកគេបានរៀនពីបទគម្ពីរ។
ការគោរពប្រណិប័តន៍ជាក្រុមគ្រួសារជួយយើងឲ្យកាន់តែជិតស្និទ្ធគ្នា។ កាលដែលប្ដីនិងប្រពន្ធ ឪពុកម្ដាយនិងកូនសិក្សាគម្ពីរជាក្រុមគ្រួសារ នោះជួយពង្រឹងចំណងមិត្តភាពរបស់ពួកគេ។ ពេលវេលានៃការគោរពប្រណិប័តន៍ព្រះគួរជាពេលដែលសប្បាយ ជាពេលមានសេចក្ដីសុខ និងជាពេលដែលសមាជិកម្នាក់ៗនៅក្នុងគ្រួសារទន្ទឹងចាំជារៀងរាល់សប្ដាហ៍។ ស្របតាមអាយុរបស់កូន ឪពុកម្ដាយអាចពិភាក្សាជាមួយកូនដោយជ្រើសរើសប្រធានបទដែលកូនអាចយកមកអនុវត្តក្នុងជីវិតប្រចាំថ្ងៃ ប្រហែលប្រើអត្ថបទក្នុងទស្សនាវដ្ដីប៉មយាម និងសៀវភៅផ្សេងទៀត ឬគេហទំព័រjw.org។ លោកអ្នកអាចពិភាក្សាអំពីបញ្ហាដែលកូនជួបប្រទះនៅឯសាលារៀន និងអំពីរបៀបដែលកូនអាចដោះស្រាយបញ្ហានោះ។ សូមមើលកម្មវិធីទូរទស្សន៍ក្នុងប្រព័ន្ធអ៊ីនធឺណិត JW Broadcasting (tv.jw.org) រួចមកពិគ្រោះគ្នាអំពីព័ត៌មាននោះ។ លោកអ្នកប្រហែលជាសប្បាយ បើលោកអ្នកអាចហាត់ច្រៀងចម្រៀងដែលមានក្នុងកិច្ចប្រជុំ ហើយអាចរៀបចំឲ្យមាននំចំណីបន្ដិចបន្តួចដើម្បីញ៉ាំជាមួយគ្នាក្រោយពេលគោរពប្រណិប័តន៍ជាក្រុមគ្រួសារ។
ការលៃទុកពេលយ៉ាងពិសេសជារៀងរាល់សប្ដាហ៍ដើម្បីគោរពប្រណិប័តន៍ព្រះយេហូវ៉ាជាមួយគ្នា នឹងជួយសមាជិកទាំងអស់ក្នុងក្រុមគ្រួសារឲ្យរីករាយក្នុងការសិក្សាបណ្ដាំរបស់ព្រះ ហើយលោកនឹងឲ្យពរជាបរិបូរដល់ការខំព្យាយាមរបស់លោកអ្នក។—ទំនុកតម្កើង ១:១-៣
ហេតុអ្វីយើងត្រូវលៃទុកពេលដើម្បីគោរពប្រណិប័តន៍ព្រះជាក្រុមគ្រួសារ?
តើឪពុកម្ដាយអាចធ្វើយ៉ាងណាដើម្បីជួយសមាជិកទាំងអស់ឲ្យរីករាយក្នុងឱកាសនេះ?
-
-
ហេតុអ្វីយើងចូលរួមកិច្ចប្រជុំធំៗ?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី១១
ហេតុអ្វីយើងចូលរួមកិច្ចប្រជុំធំៗ?
ម៉ិចស៊ិច
អាឡឺម៉ង់
បុតស្វាណា
នីការ៉ាហ្គា
អ៊ីតាលី
ហេតុអ្វីមនុស្សទាំងនេះមានទឹកមុខរីករាយម្ល៉េះ? ពួកគេកំពុងចូលរួមកិច្ចប្រជុំធំមួយរបស់យើង។ ដូចអ្នកបម្រើព្រះនៅសម័យបុរាណដែលបានទទួលបង្គាប់ឲ្យមកជួបជុំគ្នាបីដងក្នុងមួយឆ្នាំ នោះយើងក៏ទន្ទឹងចាំដើម្បីជួបជុំគ្នាជាក្រុមធំជាងដែរ។ (ចោទិយកថា ១៦:១៦) ជារៀងរាល់ឆ្នាំ យើងមានកិច្ចប្រជុំធំៗឬសន្និបាតចំនួនបីគឺ សន្និបាតប្រចាំមណ្ឌលមានរយៈពេលមួយថ្ងៃ តែនឹងត្រូវធ្វើឡើងពីរដងក្នុងមួយឆ្នាំ និងមហាសន្និបាតតាមភូមិភាគមានរយៈពេលបីថ្ងៃ។ ដូច្នេះ តើយើងអាចទទួលប្រយោជន៍ពីសន្និបាតទាំងនេះយ៉ាងដូចម្ដេច?
សន្និបាតទាំងនេះជួយពង្រឹងចំណងមិត្តភាពជាបងប្អូនគ្រិស្តសាសនិក។ ពេលបណ្ដាជនអ៊ីស្រាអែលសរសើរព្រះយេហូវ៉ា«នៅក្នុងពួកជំនុំទាំងប៉ុន្មាន» នោះពួកគេមានចិត្តរីករាយណាស់។ ស្រដៀងគ្នាដែរ យើងក៏មានចិត្តរីករាយក្នុងការគោរពប្រណិប័តន៍លោកជាមួយគ្នានៅឯសន្និបាតទាំងនោះដែរ។ (ទំនុកតម្កើង ២៦:១២; ១១១:១) សន្និបាតទាំងនេះ ជួយយើងឲ្យមានឱកាសជួបជុំគ្នា និងសំណេះសំណាលគ្នាជាមួយសាក្សីឯទៀតដែលមកពីក្រុមជំនុំផ្សេងៗ ឬពីប្រទេសផ្សេងទៀត។ ពេលយើងបរិភោគអាហារថ្ងៃត្រង់ជាមួយគ្នានៅកន្លែងសន្និបាតដែលយើងជួបជុំគ្នារៀនអំពីព្រះ នោះជួយឲ្យមានបរិយាកាសកាន់តែកក់ក្ដៅថែមទៀត។ (សកម្មភាព ២:៤២) នៅឯសន្និបាតទាំងនេះ យើងអាចឃើញដោយផ្ទាល់ភ្នែកនូវសេចក្ដីស្រឡាញ់ដែលបង្ហាញពីសាមគ្គីភាពរបស់«បងប្អូនរួមជំនឿទាំងអស់»ក្នុងពិភពលោក។—ពេត្រុសទី១ ២:១៧
សន្និបាតទាំងនេះជួយយើងឲ្យរីកចម្រើនក្នុងការគោរពប្រណិប័តន៍ព្រះ។ បណ្ដាជនអ៊ីស្រាអែលក៏បានទទួលប្រយោជន៍ដែរ ដោយសារពួកគេបាន«យល់ន័យសេចក្ដីទាំងប៉ុន្មាន»ក្នុងបទគម្ពីរ។ (នេហេមា ៨:៨, ១២) ដូចគ្នាដែរ យើងក៏ឲ្យតម្លៃចំពោះការណែនាំក្នុងគម្ពីរដែលយើងទទួលនៅឯសន្និបាតនានាដែរ។ កម្មវិធីនីមួយៗមានមូលដ្ឋានលើបទគម្ពីរដែលជាប្រធាននៃសន្និបាត។ តាមរយៈសុន្ទរកថាដ៏គួរឲ្យចាប់អារម្មណ៍ សុន្ទរកថាដែលចែកជាផ្នែកៗ និងការសម្ដែងដែលបង្ហាញពីបទពិសោធន៍ពិតៗ នោះយើងអាចរៀនអំពីរបៀបធ្វើតាមបំណងប្រាថ្នាព្រះក្នុងជីវិតយើង។ យើងបានទទួលការលើកទឹកចិត្ត ពេលដែលយើងស្ដាប់បទពិសោធន៍របស់អ្នកដែលបានយកឈ្នះបញ្ហាផ្សេងៗក្នុងជីវិតជាគ្រិស្តសាសនិកនៅគ្រាដ៏ពិបាកនេះ។ នៅឯមហាសន្និបាតតាមភូមិភាគ មានឈុតសម្ដែងដែលតុបតែងខ្លួនដូចនៅសម័យបុរាណដែលធ្វើឲ្យយើងឃើញដោយផ្ទាល់ភ្នែកនូវព្រឹត្ដិការណ៍ដែលបានកើតឡើងក្នុងគម្ពីរ ហើយក៏បង្រៀនយើងនូវមេរៀនដ៏មានប្រយោជន៍ដែរ។ នៅសន្និបាតនីមួយៗ មានពិធីជ្រមុជទឹកសម្រាប់អស់អ្នកដែលចង់បង្ហាញការប្រគល់ខ្លួនជូនព្រះ។
ហេតុអ្វីសន្និបាតជាឱកាសដែលនាំឲ្យយើងមានចិត្តរីករាយ?
តើយើងប្រហែលជាអាចទទួលប្រយោជន៍ពីការចូលរួមសន្និបាតយ៉ាងដូចម្ដេច?
-
-
តើកិច្ចការផ្សព្វផ្សាយដំណឹងល្អបានត្រូវចាត់ចែងយ៉ាងដូចម្ដេច?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី១២
តើកិច្ចការផ្សព្វផ្សាយដំណឹងល្អបានត្រូវចាត់ចែងយ៉ាងដូចម្ដេច?
អេស្ប៉ាញ
បេឡារុស្ស
ហុងកុង
ពេរូ
មិនយូរប៉ុន្មានមុនលោកយេស៊ូស្លាប់ លោកបានប្រកាសថា៖ «ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។ (ម៉ាថាយ ២៤:១៤) ប៉ុន្តែ តើយើងអាចផ្សព្វផ្សាយនៅទូទាំងពិភពលោកយ៉ាងដូចម្ដេច? គឺដោយយកតម្រាប់តាមគំរូរបស់លោកយេស៊ូ ពេលលោករស់នៅលើផែនដី។—លូកា ៨:១
យើងព្យាយាមជួបមនុស្សនៅតាមផ្ទះ។ លោកយេស៊ូបានបង្ហាត់បង្រៀនពួកអ្នកកាន់តាមលោកឲ្យចេះផ្សព្វផ្សាយដំណឹងល្អពីផ្ទះមួយទៅផ្ទះមួយ។ (ម៉ាថាយ ១០:១១-១៣; សកម្មភាព ៥:៤២; ២០:២០) ពួកអ្នកផ្សព្វផ្សាយនៅសតវត្សរ៍ទី១បានត្រូវចាត់ឲ្យទៅដោយមានតំបន់ផ្សាយជាក់លាក់។ (ម៉ាថាយ ១០:៥, ៦; កូរិនថូសទី២ ១០:១៣) ដូចនៅសព្វថ្ងៃនេះដែរ កិច្ចការផ្សព្វផ្សាយរបស់យើងបានត្រូវរៀបចំឡើងដោយមានរបៀបរៀបរយ ហើយក្រុមជំនុំនីមួយៗមានតំបន់ផ្សាយជាក់លាក់ដែលត្រូវផ្សព្វផ្សាយ។ នេះជួយយើងឲ្យធ្វើតាមបង្គាប់របស់លោកយេស៊ូដែលឲ្យយើង«ផ្សព្វផ្សាយប្រាប់បណ្ដាជន ថែមទាំងឲ្យធ្វើជាសាក្សីបញ្ជាក់សព្វគ្រប់»។—សកម្មភាព ១០:៤២
យើងព្យាយាមជួបមនុស្សនៅគ្រប់ទីកន្លែង។ លោកយេស៊ូក៏ទុកគំរូស្តីអំពីការផ្សព្វផ្សាយនៅតាមទីសាធារណៈដែរ ដូចជានៅតាមឆ្នេរសមុទ្រ និងនៅឯអណ្ដូងទឹកសាធារណៈមួយ។ (ម៉ាកុស ៤:១; យ៉ូហាន ៤:៥-១៥) ដូចគ្នាដែរ យើងនិយាយជាមួយមនុស្សអំពីគម្ពីរនៅគ្រប់ទីកន្លែង ដូចជានៅតាមផ្លូវ នៅតំបន់ធ្វើពាណិជ្ជកម្ម នៅសួនសាធារណៈ និងទូរស័ព្ទជាដើម។ ពេលណាយើងមានឱកាសសមរម្យ យើងក៏ផ្សព្វផ្សាយដល់អ្នកជិតខាងរបស់យើង អ្នករួមការងារ មិត្តរួមថ្នាក់ និងសាច់ញាតិរបស់យើងដែរ។ តាមរយៈការខំព្យាយាមធ្វើតាមវិធីទាំងអស់នេះ នោះបានធ្វើឲ្យមនុស្សរាប់លាននាក់រួចហើយនៅទូទាំងផែនដីឲ្យឮដំណឹងល្អអំពី«សេចក្ដីសង្គ្រោះ»។—ទំនុកតម្កើង ៩៦:២
តើលោកអ្នកអាចគិតថា លោកអ្នកចង់ប្រាប់នរណាម្នាក់នូវដំណឹងល្អអំពីរាជាណាចក្ររបស់ព្រះ និងអំពីអនាគតឬទេ? កុំដឹងដំណឹងនេះតែម្នាក់ឯងឡើយ។ សូមប្រាប់ដំណឹងនេះដល់មនុស្សឲ្យបានច្រើនបំផុតតាមដែលអាចធ្វើបាន!
តើ«ដំណឹងល្អ»អ្វីដែលយើងត្រូវប្រកាស?
ស្តីអំពីកិច្ចការផ្សព្វផ្សាយ តើសាក្សីព្រះយេហូវ៉ាធ្វើតាមគំរូរបស់លោកយេស៊ូយ៉ាងដូចម្ដេច?
-
-
តើពួកអ្នកត្រួសត្រាយធ្វើអ្វី?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី១៣
តើពួកអ្នកត្រួសត្រាយធ្វើអ្វី?
កាណាដា
ផ្សាយតាមផ្ទះ
ការបង្រៀនគម្ពីរ
ការសិក្សាផ្ទាល់ខ្លួន
ពាក្យ«អ្នកត្រួសត្រាយ»ច្រើនតែសំដៅទៅលើអ្នកដែលដើរខាងមុខគេ ហើយត្រាយផ្លូវដើម្បីឲ្យអ្នកឯទៀតដើរតាមក្រោយ។ លោកយេស៊ូជាអ្នកត្រួសត្រាយក្នុងន័យម្យ៉ាង ដោយសារព្រះបានចាត់លោកឲ្យមកផែនដីដើម្បីប្រើជីវិតរបស់លោកក្នុងការផ្សព្វផ្សាយ និងដើម្បីបើកផ្លូវឲ្យមនុស្សទទួលសេចក្ដីសង្គ្រោះ។ (ម៉ាថាយ ២០:២៨) សព្វថ្ងៃនេះ ពួកអ្នកកាន់តាមកំពុងយកតម្រាប់តាមលោក ដោយចំណាយពេលច្រើនបំផុតតាមដែលពួកគេអាចធ្វើបានដើម្បី‹បង្រៀនមនុស្សឲ្យក្លាយទៅជាអ្នកកាន់តាម›លោកយេស៊ូ។ (ម៉ាថាយ ២៨:១៩, ២០) អ្នកខ្លះបានចូលរួមធ្វើជាអ្នកត្រួសត្រាយ។
អ្នកត្រួសត្រាយគឺជាអ្នកផ្សព្វផ្សាយពេញពេល។ សាក្សីព្រះយេហូវ៉ាទាំងអស់គឺជាអ្នកផ្សព្វផ្សាយដំណឹងល្អ។ ក៏ប៉ុន្តែ អ្នកខ្លះបានរៀបចំជីវិតរបស់ពួកគេដើម្បីធ្វើជាអ្នកត្រួសត្រាយពេញពេល ហើយពួកគេចំណាយពេល៧០ម៉ោង ជារៀងរាល់ខែក្នុងកិច្ចផ្សព្វផ្សាយ។ ដើម្បីធ្វើដូច្នេះ សាក្សីព្រះយេហូវ៉ាជាច្រើននាក់សម្រេចចិត្តមិនធ្វើការពេញពេលឡើយ។ អ្នកខ្លះទៀតបានត្រូវតែងតាំងឲ្យបម្រើជាអ្នកត្រួសត្រាយពិសេស ដើម្បីផ្សព្វផ្សាយនៅតំបន់ដែលត្រូវការអ្នកផ្សព្វផ្សាយច្រើនជាង ហើយពួកគេចំណាយពេល១៣០ម៉ោងឬលើស ជារៀងរាល់ខែក្នុងកិច្ចផ្សព្វផ្សាយ។ ពួកអ្នកត្រួសត្រាយត្រូវស្កប់ចិត្តនឹងរបៀបរស់នៅសាមញ្ញ ដោយមានទំនុកចិត្តថា ព្រះយេហូវ៉ានឹងផ្គត់ផ្គង់នូវអ្វីដែលចាំបាច់ដើម្បីចិញ្ចឹមជីវិតរបស់ពួកគេ។ (ម៉ាថាយ ៦:៣១-៣៣; ធីម៉ូថេទី១ ៦:៦-៨) ចំពោះពួកអ្នកដែលមិនអាចធ្វើជាអ្នកត្រួសត្រាយពេញពេល ពួកគេអាចបម្រើជាអ្នកត្រួសត្រាយជំនួយនៅពេលដែលពួកគេអាចធ្វើបាន ដោយបង្កើនចំនួនម៉ោងផ្សព្វផ្សាយឲ្យបាន៣០ឬ៥០ម៉ោងក្នុងមួយខែ។
អ្នកត្រួសត្រាយផ្សព្វផ្សាយដោយសារស្រឡាញ់ព្រះនិងមនុស្ស។ ដូចលោកយេស៊ូ យើងកត់សម្គាល់ឃើញថា មនុស្សសព្វថ្ងៃនេះត្រូវការយ៉ាងខ្លាំងនូវចំណេះអំពីព្រះនិងអំពីគោលបំណងរបស់លោក។ (ម៉ាកុស ៦:៣៤) ប៉ុន្តែ យើងក៏មានចំណេះដែលអាចជួយពួកគេនៅសព្វថ្ងៃនេះដែរ គឺជួយឲ្យមានសេចក្ដីសង្ឃឹមដ៏ពិតប្រាកដថា នឹងមានអនាគតល្អ។ ដោយសារអ្នកត្រួសត្រាយស្រឡាញ់អ្នកជិតខាង នោះពួកគេចំណាយពេលវេលានិងកម្លាំងដោយមិនសំចៃដើម្បីជួយមនុស្សឲ្យដឹងអំពីដំណឹងល្អនេះ។ (ម៉ាថាយ ២២:៣៩; ថែស្សាឡូនិចទី១ ២:៨) ពេលពួកអ្នកត្រួសត្រាយធ្វើដូច្នេះ នេះជួយពង្រឹងជំនឿរបស់ពួកគេ ធ្វើឲ្យពួកគេចូលទៅជិតព្រះជាង និងជួយពួកគេឲ្យមានសុភមង្គលច្រើនថែមទៀត។—សកម្មភាព ២០:៣៥
តើអ្នកនឹងពន្យល់យ៉ាងណាអំពីពួកអ្នកត្រួសត្រាយ?
ហេតុអ្វីអ្នកខ្លះសម្រេចចិត្តធ្វើជាអ្នកត្រួសត្រាយពេញពេល?
-
-
តើមានសាលាអ្វីខ្លះសម្រាប់អ្នកត្រួសត្រាយពេញពេល?នៅសព្វថ្ងៃនេះ តើអ្នកណាកំពុងធ្វើតាមបំណងប្រាថ្នារបស់ព្រះយេហូវ៉ា?
-
-
មេរៀនទី១៤
តើមានសាលាអ្វីខ្លះសម្រាប់អ្នកត្រួសត្រាយពេញពេល?
សហរដ្ឋអាម៉េរិក
សាលាគីលាត ក្រុងផាតឺសិន រដ្ឋញូវយ៉ក
ប៉ាណាម៉ា
តាំងពីយូរមកហើយ ព្រះយេហូវ៉ាបានផ្ដល់ការអប់រំដល់សាក្សីរបស់លោក ហើយនេះជាលក្ខណៈដ៏លេចធ្លោមួយរបស់សាក្សីព្រះយេហូវ៉ា។ មានវគ្គសិក្សាផ្សេងៗដែលបានត្រូវរៀបចំឡើងសម្រាប់អ្នកស្ម័គ្រចិត្តបម្រើពេញពេលក្នុងកិច្ចការផ្សព្វផ្សាយរាជាណាចក្រព្រះ ដើម្បីពួកគេអាច‹បំពេញកិច្ចបម្រើរបស់ពួកគេគ្រប់ជំពូក›។—ធីម៉ូថេទី២ ៤:៥
សាលាសម្រាប់អ្នកត្រួសត្រាយ។ ក្រោយពីធ្វើជាអ្នកត្រួសត្រាយពេញពេលមួយឆ្នាំហើយ គាត់អាចចូលរួមសាលាសម្រាប់អ្នកត្រួសត្រាយដែលមានរយៈពេលសិក្សាប្រាំមួយថ្ងៃ ហើយប្រហែលជាត្រូវធ្វើឡើងនៅសាលប្រជុំជិតៗនោះ។ សាលានេះគឺមានគោលបំណងដើម្បីជួយអ្នកត្រួសត្រាយឲ្យមានចំណងមិត្តភាពកាន់តែរឹងមាំជាមួយនឹងព្រះ ហើយជួយពួកគេឲ្យមានប្រសិទ្ធភាពក្នុងគ្រប់ផ្នែកនៃកិច្ចបម្រើផ្សាយ ព្រមទាំងនៅស្មោះត្រង់ជានិច្ចក្នុងកិច្ចបម្រើព្រះ។
សាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ។ សាលានេះមានរយៈពេលពីរខែ។ សាលានេះបានត្រូវរៀបចំឡើងដើម្បីបង្ហាត់បង្រៀនអ្នកត្រួសត្រាយដែលមានបទពិសោធន៍ និងដែលស្ម័គ្រចិត្តចាកចេញពីតំបន់ដែលខ្លួនរស់នៅ ដើម្បីទៅបម្រើនៅតំបន់ដែលត្រូវការអ្នកផ្សព្វផ្សាយច្រើនជាង។ ដូច្នេះ ពួកគេហាក់ដូចជានិយាយថា៖ ‹ខ្ញុំនៅឯណេះហើយ សូមចាត់ខ្ញុំចុះ!›តាមគំរូលោកយេស៊ូ ដែលជាអ្នកផ្សាយដ៏ប្រសើរបំផុតដែលធ្លាប់បម្រើនៅផែនដី។ (អេសាយ ៦:៨; យ៉ូហាន ៧:២៩) ការរើទៅតំបន់ដែលនៅឆ្ងាយពីកន្លែងដែលខ្លួនធ្លាប់រស់នៅ ប្រហែលជាតម្រូវឲ្យមានជីវភាពសាមញ្ញជាងមុន។ ម្យ៉ាងទៀត គាត់ប្រហែលជាត្រូវសម្របខ្លួនទៅតាមវប្បធម៌ អាកាសធាតុ និងចំណីអាហារនៅកន្លែងថ្មីនោះ។ គាត់ក៏ប្រហែលជាត្រូវរៀនភាសាថ្មីដែរ។ សាលានេះបង្ហាត់បង្រៀនបងប្អូនប្រុសស្រីដែលនៅលីវ និងគូប្ដីប្រពន្ធ ដែលមានអាយុរវាង២៣ឆ្នាំដល់៦៥ឆ្នាំ។ សាលានេះជួយពួកគេឲ្យបណ្ដុះនូវគុណសម្បត្ដិជាគ្រិស្តសាសនិក ដែលពួកគេនឹងត្រូវការក្នុងកិច្ចបម្រើព្រះ។ សាលានេះក៏ជួយពួកគេឲ្យមានភាពប៉ិនប្រសប់ក្នុងកិច្ចបម្រើព្រះដែលនឹងផ្ដល់លទ្ធភាពឲ្យពួកគេបម្រើព្រះយេហូវ៉ានិងអង្គការរបស់លោកពេញលេញជាងមុន។
សាលាគម្ពីរគីលាតនៃសមាគមប៉មយាម។ ក្នុងភាសាហេប្រឺ ពាក្យ«គីលាត»ជាប់ទាក់ទងនឹងពាក្យ«សាក្សី»។ តាំងពីឆ្នាំ១៩៤៣ សាសនទូតជាង៨.០០០នាក់ដែលបានទទួលការបង្ហាត់បង្រៀននៅសាលាគីលាត បានត្រូវចាត់ឲ្យធ្វើជាសាក្សីបញ្ជាក់«រហូតដល់កន្លែងឆ្ងាយបំផុតនៅផែនដី» ហើយកិច្ចការរបស់ពួកគេបានទទួលជោគជ័យយ៉ាងអស្ចារ្យ។ (សកម្មភាព ១៣:៤៧) ជាឧទាហរណ៍ ពេលសាសនទូតបានមកដល់ប្រទេសពេរូជាលើកដំបូង នោះគ្មានក្រុមជំនុំនៅទីនោះទេ ប៉ុន្តែសព្វថ្ងៃនេះ មានជាង១.០០០ក្រុមជំនុំ។ ពេលសាសនទូតចាប់ផ្ដើមបម្រើនៅប្រទេសជប៉ុន នោះសាក្សីព្រះយេហូវ៉ាមានចំនួនតិចជាង១០នាក់ប៉ុណ្ណោះ តែឥឡូវនេះវិញ មានសាក្សីច្រើនជាង២០០.០០០នាក់។ សាលាគម្ពីរគីលាតមានវគ្គសិក្សារយៈពេលប្រាំខែដែលសិក្សាបណ្ដាំរបស់ព្រះយ៉ាងស៊ីជម្រៅ។ អស់អ្នកដែលបម្រើជាអ្នកត្រួសត្រាយពិសេស ឬបម្រើនៅការិយាល័យសាខា ឬជាសាសនទូត ឬបម្រើជាអ្នកត្រួតពិនិត្យប្រចាំមណ្ឌល បានត្រូវអញ្ជើញឲ្យចូលរួមក្នុងសាលានោះ។ វគ្គសិក្សានោះជួយពួកគេឲ្យផ្សព្វផ្សាយកាន់តែខ្លាំង និងពង្រឹងកិច្ចបម្រើផ្សាយទូទាំងពិភពលោក។
តើសាលាសម្រាប់អ្នកត្រួសត្រាយមានគោលបំណងអ្វី?
តើអ្នកណាខ្លះអាចចូលរួមសាលាបង្ហាត់បង្រៀនអ្នកផ្សាយដំណឹងល្អអំពីរាជាណាចក្រព្រះ?
-