Dya Kayadi Dya Malunda
10 Lobowamu wayile ku Xikeme, mukonda akwa Izalayele yayile kwenyoko, phala ku mutumbika ku usobha. 2 Kyoso Jelobowamu mon’a Nebate kyevu o maka yá, watundu ku Ijitu yu wavutuka. (Jelobowamu wakexile hanji ku Ijitu, mukonda walengele sobha Solomá.) 3 Kyenyiki, atumu ku mwixana. Jelobowamu ni Izalayele yoso ayi kwa Lobowamu ya a mwambela, exi: 4 “Tat’enu wabhonzesa kyavulu o mwenyu wetu. Maji se eye k’ubhonzesa o mwenyu wetu kala kyabhangele tat’enu, anga u tubhana o kutululuka, twanda kusidivila.”
5 Kyenyiki, mwene wa ambela wixi: “Ndenu! Mu kubhita izuwa itatu vutukenu.” Mukiki, o mundu wayi. 6 Sobha Lobowamu wayi mudikunda ni adyakime exile mubhana jindunge kwa tat’ê Solomá, kyoso mwene kyexile hanji ku mwenyu. Mwene wa ebhwidisa, wixi: “Kyebhi ki ngatokala kutambwijila o mundu yú?” 7 Ene a mutambwijila, exi: “Se ubhanga mbote ku mundu yú, anga ubhanga yakubhingi ene ni kwatambwijila kyambote, ene anda kusidivila jinga.”
8 Maji mwene waditunu o jindunge ja adyakime, yu wayi musota o jindunge ja minzangala akudile-nê kumoxi, exile o akwatekex’yê. 9 Mwene wa ebhwidisa, wixi: “Ndunge yebhi i mu ngibhana? Kyebhi ki ngatokala kutambwijila o mundu yú wa ngambela: ‘Kana kubhonzesa o mwenyu wetu kala kyabhangele tat’enu?’” 10 O minzangala akudile-nê kumoxi, a mutambwijila, exi: “O mundu wa kwambela kwila, ‘tat’enu wabhonzesa kyavulu o mwenyu wetu, maji eye ngana kutokala kubhonzesa dingi o mwenyu wetu,’ eye wa atambwijila kiki: ‘Eme nganda bhonzesa dingi kyavulu o mwenyu wenu, tat’etu ndenge. 11 Tat’etu wabhonzesa o myenyu yenu, maji eme-phe nganda mibhonzesa dingi. Tat’etu wa mibeta ni jixikote ja kambe o minya, eme nganda mibeta ni jixikote jala ni minya.’”
12 Jelobowamu ni mundu woso ayi muzwela ni Lobowamu mu kizuwa kya katatu, kala kyazwelele o sobha, kyoso kyambe: “Mukubhita izuwa itatu vutukenu.” 13 Maji-phe o sobha wa atambwijila kyayibha. Kyenyiki, o sobha Lobowamu kabhana mátwi ku jindunge ja adyakime. 14 Mu kukayela o jindunge ja minzangala, mwene wambe: “Eme nganda bhonzesa dingi o mwenyu wenu, nganda mibhonzesa mwene kinene. Tat’etu wa mibeta ni jixikote ja kambe o minya, eme nganda mibeta ni jixikote jala ni minya.” 15 Kyenyiki, o sobha kevu o mundu, mukonda o ima yexile mubhita yatundu kwa Nzambi yakidi, phala kukumbidila o izwelu yazwelele Jihova kwa Ahiya mukwa Silo yalungu ni Jelobowamu mon’a Nebate.
16 Kuma waditunu kwivwa o mundu, Izalayele yoso yambela o sobha, exi: “Mbandu yahi itwala-nayu kwa Davidi? Kitwala ni undundu kwa mon’a Jesé! Kala muthu avutuke ku jinzambi jê, enu mu akwa Izalayele. Kindala Davidi alange o inzo yê!” Akwa Izalayele anga avutuka ku jinzo jâ.*
17 Maji-phe, Lobowamu wasuluka ni kutumina o akwa Izalayele atungile mu jimbanza ja Judá.
18 Ku pholo dya kwenda, Hadolamu wexile ku pholo ya yó a exanene phala kubhanga o ikalakalu ya sobha a mutumikisa kwa sobha Lobowamu, phala kuya ku akwa Izalayele, maji ene a mububa ni matadi kate kyafu. O sobha Lobowamu watena kubanda mu dikalu dyê dya ita, yu walengela mu Jeluzaleme. 19 Akwa Izalayele abhukumukina o inzo ya Davidi, ya asuluka kyenyiki kate mu izuwa ya lelu.