Dya Kayadi Dya Malunda
17 Kyenyiki, o mon’ê Jozafate wa mubhingana ku ungana. Mwene anga ukolesa o ungana we mu Izalayele. 2 Jozafate wate masoladi mu jimbanza joso jofikidile ja Judá ni mu ixi yoso ya Judá ni mu jimbanza ja Efalayíme jatambwile tat’ê Aza. 3 Jihova wexile ni Jozafate mukonda mwene wexile mukayela o phangu ya kukw’ê Davidi. Mwene kexile mubheza o iteka ya Bahale. 4 Muveji dya kubhanga o ima yayibha yakexile mubhanga akwa Izalayele, mwene wexile musidivila o Nzambi ya tat’ê ni kubelesela o itumu yê. 5 Jihova wakolesa o utuminu bhu maku a Jozafate. O akwa Judá exile mu mubhekela maujitu. Kyenyiki, mwene wexile ni umvwama ni fuma yavulu. 6 Mwene waswinine mu kubelesela Jihova, kate mwene wabulu mu Judá o ididi ya kubhezela, wabulu we o iteka.
7 Ku muvu wa katatu wa utuminu wê, mwene watumikisa o ilamba yê, Benehayile, Obadiya, Zakadiya, Netanayele ni Mikaya, phala ende mulonga o athu mu jimbanza ja Judá. 8 Ene ayi kumoxi ni Jilevita jiji: Semaya, Netaniya, Zebadiya, Azayele, Semilamote, Jehonata, Adoniya, Tobiya ni Tobadoniya. O akunji Elixama ni Jeholamu ayi-nawu kumoxi. 9 Ene amateka kulonga o athu atungile mu Judá, ambata o divulu dya Kijila kya Jihova, anga a nyunga mu jisanzala joso ja Judá mu kulonga o mundu.
10 O mautuminu oso azukamene ni mbanza ya Judá akexile ni wôma wavulu wa Jihova. Mukyenyiki, ene kayi mulwa ita ni Jozafate. 11 O akwa Fidíxa akexile mubheka maujitu ni kitadi kala lubhaku kwa Jozafate. O akwa Alábya a mubhekela sambwadi dya midi ni hama sambwadi dya jimbudi, abheka we sambwadi dya midi ni hama sambwadi dya isutu ya jihombo.
12 O kutena kwa Jozafate kwexile mu dibandekesa dingi. Mwene wasuluka mukutunga imbaka ni jimbanza ja kubhakela kudya mu Judá. 13 Mwene wabhange ikalakalu yavulu mu mbanza ya Judá. Jozafate wexile ni masoladi mu Jeluzaleme, ene exile mazonda a ita. 14 Ene a asokejekele mu ibuka-ibuka kala kyatokalele ku miji yâ. Ku mwiji wa Judá, kwakexile o atwameni a jimidi. O mutwameni Adana, wakexile ni hama jitatu ja jimidi ja mazonda a ita. 15 Mukusuluka, kwakexile Jowanane, o mutwameni wa hama jiyadi ni makwinyi anake a midi a mayala. 16 Kwa kayela Amaziya mon’a Zikidi, wa dibhakwile mu vondadi yê phala kubhanga o sidivisu ya Jihova. Mwene wakexile ni hama jiyadi ja jimidi ja mazonda a ita. 17 Ku mwiji wa Bejamí kwakexile Eliyada. Mwene wexile diyala dya nguzu, wexile kumoxi ni hama jiyadi ja midi a mayala akexile ni mifula ni jingubu. 18 O wa mukayela Jehozabade. Mwene wakexile ni hama ni makwinyi anake a midi a mayala adisokejekele phala o ita. 19 Enyoso yá, akexile mu kalakela o sobha, kwakexile we yó a atele mu jimbanza joso jofikidile ja Judá, kwala o sobha.