Dya Kayadi Dya Malunda
2 Solomá watumu kutunga inzo phala kujingisa o dijina dya Jihova ni inzo* phala mwene kutumina-mu. 2 Solomá wasolo makwinyi asambwadi a midi a akalakadi kexile ni uhete,* wasolo we makwinyi anake a midi a mayala exile mubula o matadi ku milundu ni midi jitatu ni hama jisamanu ja mayala exile ku pholo ya ikalakalu. 3 Solomá watumikisa njimbu kwa Hilamu sobha ya Tilu, yambe: “Ngikwatekese kala ki wakwatekesa tat’etu Davidi kyoso ki wa mubhana mabaya a mixi ya sédulu n’a tunge inzo* phala mwene. 4 Nganda tunga inzo phala kujingisa o dijina dya Jihova Nzambi yami, ni ngibhakule jisata kwa mwene, ni kwoha wasu wa dizumba dinuha kyambote phala mwene ni kubhana jinga jimbolo jikôla ni kubhakula jisata ja kwoha mu kamene ni mu usuku, mu jisábhalu ni mu ithangana ya mbeji ya thethama ni mu ithangana ya jifesa ja Jihova Nzambi yetu. Kiki kyene kyanda kala mubhanga jinga akwa Izalayele. 5 O inzo i nganda tunga, yanda kala inzo yadikota, mukonda o Nzambi yetu yabeta-kota, o jinzambi joso jamukwa ndenge. 6 Nanyi weji tena ku mutungila inzo? Kuma o dyulu dya madyulu mwene katena kusoka-mu. Kyenyiki-phe, éme nanyi phala ku mutungila inzo? O inzo i nganda mutungila, yanda kala ngo kididi phala kwohela-mu jisata phala mwene. 7 Mukiki-phe, ngitumikise mayala ala ni ufunu wa kukalakala ni ulu, phalata, ngondo, felu, jidinya ja púlupula, jidinya jakusuka ni jidinya ja azulu. Ngitumikese we mayala ejiya kuseta. Ene anda kalakala mu Judá ni mu Jeluzaleme kumoxi ni asongi’ami a mabaya a ngibhanene tat’etu Davidi. 8 Ngitumikise we mabaya a mixi ya sédulu, a junípelu ni mabaya a muxi wa sandalu a muxitu wa Libanu. Mukonda ngejiya kwila, o akalakad’yé ala ni uhete wa kubatula o mixi ya Libanu. O akalakadi ami anda kalakala kumoxi ni akalakad’yé, 9 phala asokejeke mabaya avulu mukonda o inzo i nganda tunga yanda kala inzo yonene. 10 Nganda bhana kudya phala o akalakad’yê anda batula o mixi phala kubhanga o mabaya: Makwinyi ayadi a midi a jikolu* ja tiliku, makwinyi ayadi a midi a jikolu ja Sevada, makwinyi ayadi a midi a jikolu ja vinyu ni makwinyi ayadi a midi a jibatu* ja máji.”
11 Mukiki, Hilamu sobha ya Tilu watumikisa mukanda kwa Solomá mwexile o njimbu yambele kiki: “Kuma Jihova wazolo o mundu wê, kyene kya kusolela kala u sobha yâ.” 12 Hilamu wambe dingi, wixi: “Jihova Nzambi wabhange o dyulu ni ixi a muximane, mukonda wabhana kwa sobha Davidi mona wala ni unjimu, wala ni kwijiya ni kutetuluka. Mwene wanda tunga inzo phala Jihova ni inzo phala mwene kutumina-mu. 13 Nga mutumikisa mukalakadi wala ni uhete, wala ni kwijiya, a mwixana Hilamu-Abihu. 14 O man’yâ mukwa Dane, o tat’ê mukwa Tilu. Mwene wala ni uhete wa kukalakala ni ulu, phalata, ngondo, felu, matadi, mabaya ni jidinya ja púlupula ni jidinya ja azulu ni milele yambote ni jidinya jakusuka. Mwene wejiya kyambote o kikalakalu kya kuseta, kabasa kikalakalu ki mu mubhana mwene wanda kibhanga. Mwene wanda kalakala kumoxi ni asong’yé a mabaya ni asongi a mabaya a ngana yami Davidi, tat’enu. 15 Mukiki-phe ngana yami, tumikisa o ima i wakanena kubhana ku abhik’é, o tiliku ni Sevada ni máji ni vinyu. 16 Etu twanda batula o mixi yoso ya Libanu i wabhindamena, twanda ikuta ni ku itumikisa mu ulungu mu musanza wa kalunga, kate ku Jope. Kwenyoko, eye wanda yambata mu Jeluzaleme.”
17 Solomá wasoto kwijiya se kwexile mayala akuxi akwa jixi jengi atungile mu Izalayele kala kyabhangele tat’ê Davidi. Enyoso atenesa hama ni makwinyi atanu ni kitatu kya midi ni hama jisamanu. 18 Kyenyiki, Solomá wasolo makwinyi asambwadi a midi a akalakadi kexile ni uhete,* makwinyi anake a midi a mayala exile mubatula o matadi ku milundu ni midi jitatu ni hama jisamanu ja mayala exile mutumina o mundu kukalakala.