Dya Kayadi Dya Malunda
21 Kyabhiti o ima yoso yiyi, Jozafate wafu, a mufundu mwafundile o jikuku jê mu Mbanza ya Davidi. Mon’ê Jeholamu mwene wa mubhingana ku ungana. 2 O jiphange jê, o ana Jozafate enya: Azadiya, Jiyele, Zakadiya, Azadiya, Mingyedi ni Sefatiya. Enyoso yá exile ana Jozafate, sobha ya Izalayele. 3 O tata yâ wa abhana phalata yavulu, ulu ni ima yavalolo. Wa abhana we jimbanza jofikidile mu Judá, maji o utuminu wa ubhana kwa Jeholamu mukonda mwéne wexile o mona wa dyanga.
4 Kyoso Jeholamu kyakexile kya mutumina, wajibha o jiphange jê joso ni amoxi ku ilamba ya Izalayele phala kunangenena ku ungana. 5 Jeholamu wakituka sobha kyoso kyexile ni makwinyi atatu ni kiyadi kya mivu, yu watumina mu Jeluzaleme mu dinake dya mivu. 6 Mwene wakayela o phangu yayibha ya jisobha ja Izalayele, kala kyabhangele akwa dibhata dya Akabe, mukonda mwene wasakanene ni mon’a Akabe. Jeholamu wabhange ima yayibhila Jihova. 7 Maji Jihova kamesenene kubwika o dibhata dya Davidi mukonda watele kikutu ni Davidi. Kuma wa mukanene kwila, o mbutu yê yeji tumina kate ku hádya ni hádya.
8 Mu izuwa ya Jeholamu, akwa Idomo abhukumukina akwa Judá, ya asolo sobha phala ene. 9 Mukonda dya kiki, Jeholamu ni masoladi mê ayi ni makalu oso a ita, ku Idomo. Mu usuku, mwene wayi mulwa-nawu ita, yu watolola akwa Idomo a mukondolokele mwéne ni jikabhitangu ja makalu mê a ita. 10 Mukyenyiki, o mvunda ya akwa Idomo ni akwa Judá, yasuluka kate mu izuwa ya lelu. Mu kithangana kyenyokyo, akwa Libina abhukumukina we Jeholamu, mukonda mwene wabhana dikunda kwa Jihova o Nzambi ya jikuku jê. 11 Jeholamu wabhange we ididi ya kubhezela ku milundu ya Judá phala kubhangesa akwa Jeluzaleme kubhukumukina Nzambi ni kubheza jinzambi jengi. Mwene watondalesa we akwa Judá.
12 Mu kiki, mwene watambula mukanda wasoneka polofeta Elija, wambe: “Jihova, o Nzambi ya kukwé Davidi wambe kiki: ‘Eye kiwakayela o phangu ya tat’é Jozafate, ne ngo kukayela o phangu ya Aza sobha ya Judá. 13 Maji wakayela o phangu yayibha ya jisobha ja Izalayele, wa mubhangesa we akwa Judá ni akwa Jeluzaleme kubhukumukina Nzambi, mu kubheza jinzambi jengi kala kyabhangele o dibhata dya Akabe. Eye wajibha kate mwene o jiphange jé atokala ku dibhata dya tat’enu, athu awabhele dingi o muxima, eye ndenge. 14 Mukonda dya kiki, Jihova wanda bwika o mundu wé woso, o an’é, o ahat’wé ni jimbote jé joso. 15 Wanda kala ni mauhaxi avulu. O uhaxi wanda kukwata mu mala, wandaya ni kudibandekesa kizuwa ni kizuwa kate o midya kiyanda tunda kukanga.’”
16 Jihova wabhangesa akwa Fidíxa ni akwa Alábya atungile bhwa zukama ni akwa Itiyopya kwiza mulwa ita ni Jeholamu. 17 Ene abokona mu mbanza ya Judá ambata o jimbote joso jasange mu inzo ya sobha, ambata we o an’ê ni ahat’wê. Kwaxala ngo mon’ê Jowakaji,* wexile o kasule. 18 Kyabhiti o ima yiyi, Jihova wabhangesa Jeholamu kukwata uhaxi wabhonzo ku midya, uhaxi ki uxikina ku usaka. 19 Mu kubhita mivu iyadi, o midya yatundu, mukonda dya uhaxi. Mwene watale hadi yavulu mukonda dya uhaxi, yu wafu. Mu ku mufunda, o mundu wê kamwohela máji a mazumba, kala kyabhangele ku jikuku jê. 20 Kyoso mwene kyakituka sobha, wexile ni makwinyi atatu ni kiyadi kya mivu, mwene watumina mu Jeluzaleme mu dinake dya mivu. Kyoso mwene kyafu seku muthu wa mudidi. Kyenyiki, a mufundu mu Mbanza ya Davidi, maji ka mufundu mu jimbila ja jisobha.