Dya Kayadi Dya Malunda
23 Ku muvu wa kasambwadi, Joyada mu kuswina kwê, wate kikutu ni jikabhitangu ja hama ya masoladi. O jikabhitangu jiji, enya: Azadiya mon’a Jelohamu, Ijimayele mon’a Jowanane, Azadiya mon’a Obede, Mahaseya mon’a Adaya ni Elizafate mon’a Zikidi. 2 Mukusuluka a nyungu o mbanza ya Judá, ya ongeka o Jilevita joso ja jimbanza ja Judá ni atwameni a miji a mabhata a Izalayele. Kyoso kyabhixila mu Jeluzaleme, 3 o mundu woso wate kikutu ni sobha mu inzo ya Nzambi yakidi. Mukusuluka, Joyada wa ambela:
“Talenu! O mon’a sobha wanda tumina, kala kyakanena Jihova ku an’a Davidi. 4 Bhangenu kiki: Kibuka kimoxi kya akunji ni Jilevita kyanda kalakala kya sábhalu, anda langa o mabhitu. 5 O kibuka kya kayadi, kyanda kala mu inzo ya sobha. O kibuka kya katatu, kyanda kala bhu Mwelu wa Ilumbu. O mundu woso wanda kala mu kithádi kya inzo ya Jihova. 6 Kimwehele muthu wengi kubokona mu inzo ya Jihova, kikale ngo o akunji ni Jilevita anda kalakala. Ene atena kubokona mukonda a asolo phala kubhanga ikalakalu ikôla. Maji o mundu woso wanda kala bhu kanga mu kubhanga yoso ya atumina Jihova. 7 O Jilevita atokala kukondoloka o sobha. Kala muthu ukwata o ngumba yê ni xibhata yê bhu maku. Muthu woso-woso ubokona monzo anda mujibha. Kalenu kumoxi ni sobha mu kididi kyoso-kyoso kyaditela.”*
8 O Jilevita ni athu oso akwa Judá abhange ya atendelesa o mukunji Joyada. Mukiki, kala muthu wongeka o mayala mê exile mukalakala kya sábhalu, ni yó eji nyoha kya sábhalu, mukonda o mukunji Joyada ka atumu kuya ku bhata. 9 O mukunji Joyada wabhana, o jingumba ni jingubu jatokalele kwa sobha Davidi, jexile mu inzo ya Nzambi yakidi ku jikabhitangu ja ibuka ya hama ya masoladi. 10 Watumu o mayala oso kukala mu ididi yâ, kala muthu ni ngumba yê bhu maku tunde ku mbandu ya kadilu ka inzo, kate ku mbandu ya kyasu ya inzo bhwa zukama o kalatódyu ni bhwa zukama o inzo. O mayala yá, akondolokele o sobha. 11 Kyenyiki, abheka o mon’a sobha bhu kanga, amute o kitundu kya ungana ku mútwe, a mubhana o Divulu dya Umbangi,* ya a mutumbika ku usobha. Joyada ni an’ê a mu undu kala sobha, ya ambe: “Tanaku sobha!”
12 Kyoso Ataliya kyevu o jibuya ja mundu wexile mulenga ni kuximana o sobha, wayi ni lusolo mu inzo ya Jihova mwakexile o mundu. 13 Kyenyiki, mwene wamono o sobha wemana bhu mbandu a philadi yakexile bhu mwelu. O ilamba ni yó exile muxika o jikoloneta exile kumoxi ni sobha. O mundu woso wasangulukile, exile muxika o jikoloneta. O jingimbidi exile ni iselekete ya kuxika mimbu, éne exile ku pholo mu kwimba. Mu kumona o ima yiyi, Ataliya watandula o izwatu yê, yu wadikola: “A ngilungulukila! A ngilungulukila!” 14 Kyenyiki, o mukunji Joyada watumikisa o jikabhitangu ja hama ni atwameni a masoladi, yu wa atendelesa, wixi: “Mu katulyenu mukaxi kenu, woso u mukayela mujibhyenu ni xibhata.” Mukonda o mukunji Joyada wa atangelele wixi: “Kanenu ku mujibhila mu inzo ya Jihova.” 15 Kyenyiki, a mukwata, a mwambata kate mu inzo ya sobha, bhu Mwelu wa Jikabalu. O kyabhixila bhenyobho, a mujibha.
16 Joyada wate kikutu kya kwila mwene ni sobha ni mundu, eji suluka kukala mundu wa Jihova. 17 Kyabhiti o ima yiyi, o mundu woso wayi mu inzo* ya Bahale, ya a ibulu. Abulu o jikalatódyu jê ni iteka, ya ajibha Matane, o mukunji wa Bahale, bhwakexile o jikalatódyu. 18 Mukusuluka, Joyada wabhana o kikalakalu kya kulanga o inzo ya Jihova ku akunji ni ku Jilevita. Enya ene a asolele kwa Davidi, yu wa atele mu ibuka-ibuka phala kukalakala mu inzo ya Jihova ni kubhakula jisata ja kwoha kwa Jihova, kala kyosoneke mu Kijila kya Mozé. Ene atokalele kubhanga kiki ni kisangusangu ni kwimba kala kyatendelesa Davidi. 19 Joyada wate we alangidi bhu myelu ya inzo ya Jihova, phala o muthu wakambe kudizelesa kabokone-mu. 20 Mwene wongeka o atwameni a hama ya masoladi, o jingana, o jinguvulu ni mundu woso. Ene atundu ni sobha mu inzo ya Jihova, ya a muxinjikila kate mu inzo ya sobha. Abhitila bhu mwelu wadikota, ya axikamesa o sobha ku kyandu kya ungana. 21 Kyenyiki, o mundu woso wasanguluka, mu mbanza mwexile kutululuka mukonda Ataliya a mujibha.