Dya Kayadi Dya Malunda
26 O mundu woso wa Judá watumbika Uziya ku usobha bhu kididi kya tat’ê Amaziya, kyoso mwene kyexile ni dikwinyi ni samanu dya mivu. 2 Kyoso sobha Amaziya kyafu, Uziya watungulula dingi o mbanza ya Elate yu wa ivutula kwa Judá. 3 Uziya wexile ni dikwinyi ni samanu dya mivu kyoso kya mutumbika ku usobha, yu watumina mu makwinyi atanu a mivu ni kiyadi mu Jeluzaleme. O dijina dya manyâ dyexile Jekodiya, mukwa Jeluzaleme. 4 Mwene wexile mubhanga ima yambote bhu pholo ya Jihova, kala kyabhangele tat’ê Amaziya. 5 Mwene wexile mubheza Nzambi kyoso Zakadiya kyexile ku mwenyu, mukonda wa mulongo kuxila o Nzambi yakidi. Kyoso kyexile musidivila Jihova, o Nzambi yakidi, mwene wexile mu mubesowala.
6 Mwene wayi mulwa ita ni akwa Fidíxa, wabhange dibhululu ku ilumbu ya Ngate ni ku ilumbu ya Jabine ni ku ilumbu ya mbanza ya Ajidode. Kyenyiki, mwene watungu jimbanza mu ixi ya Ajidode ni mu ixi ya akwa Fidíxa. 7 O Nzambi yakidi wasuluka ni ku mukwatekesa kulwa ita ni akwa Fidíxa ni akwa Meunime ni akwa Alábya, atungile ku Ngulu-Bale. 8 O akwa Amone amateka kufuta lubhaku kwa Uziya. Uziya anga ufumana kate ku Ijitu mukonda mwene wexile ni kutena kwavulu. 9 Uziya watungu o inzo ya matala ya alangidi mu Jeluzaleme, bhwa zukama ni Mwelu wala ku hota ni ku Mwelu wa Honga, bhwa zukama we ni ilumbu, yu wa ifikidila. 10 Mwene watungu we jinzo ja alangidi mu kikangalakata, wakande ixima yavulu ya menya (mukonda mwene wexile ni ibhaku yavulu), wabhange we kyenyiki mu Sefelá ni mu honga. Mwene wakexile ni idimakaji ku milundu ni ku Kalumelu, mayala exile mu kalakala mu mabhya mê a mividi, mukonda mwene wa wabhelele kudima.
11 Uziya wakexile ni kifuxi kya masoladi kyadisokejekele kya phala o ita. Mu kuya mu ita, ene exile mudisokejeka mu ibuka-ibuka. O seketa Jehiyele ni Mahaseya, o kabhitangu, asoto kwijiya se kwexile masoladi akuxi ya asoneka o majina mâ kala kya atumu Hananiya, o kilamba kya sobha. 12 O mayala exile ku pholo mu kutumina o mazonda a ita, atenesene midi jiyadi ni hama jisamanu. 13 O masoladi oso exile mu atumina, atenene hama jitatu ni sambwadi a midi ni hama jitanu ja mayala adisokejekele phala o ita, kifwa nzungule ya masoladi exile polondo phala kukwatekesa o sobha kulwa ita ni jinguma jê. 14 Uziya wabhana ku kifuxi kya masoladi jingubu ni jingumba ni jikapasete ni ivunga-thulu ni mifula ni jimbalafunda phala kutakula matadi. 15 Mwene watumu we kubhanga jimakina ja ita mu Jeluzaleme ku athu exile ni uhete wa kubhanga o jimakina jiji. Jene ajitula mu jinzo ja matala ja alangidi ni mu jihota ja ilumbu. O jimakina jiji, jexile mutakula jisosa ni matadi a makota. Kyenyiki o fuma ya Uziya yadimwange mu jixi joso, mukonda mwene watambula kikwatekesu kyadikota, yu wexile ni kutena kwavulu.
16 Maji kyoso kyexile kya ni kutena kwavulu, mwene wadizangeleka. Kiki kya mubhekela divuwa. Mwene wabhukumukina Jihova Nzambi yê, wabokona mu tembulu ya Jihova phala kwoha wasu wadizumba mu kalatódyu. 17 Mu kithangana kyenyokyo, o mukunji Azadiya wa mukayela kudima ni lusolo anga ubokona ni makwinyi anake a akunji a Jihova, ene exile mayala a nguzu. 18 Ene afidisa sobha Uziya ya a mwambela, exi: “Sobha Uziya, eye kwala ni ujitu wa kwoha wasu wadizumba phala Jihova! O akunji ene ngo atokala kwoha wasu wadizumba mukonda éne o mbutu ya Alá, yó a asolo. Tunda mu kalatódyu mukonda eye wabhukumukina Nzambi, eye kiwanda tambula ujitu kwa Jihova Nzambi mukonda dya kima kiki ki wabhange.”
19 Bhenyobho, Uziya njinda ya mukwata. Mwene wakwatele bhu maku o kyenga kya kwohela o wasu wadizumba phala kwoha o wasu. Kyoso mwene kya thathamene hanji, dibhute dya mukwata bhu dibhômo mu inzo ya Jihova, ku mbandu a kalatódyu ka wasu wadizumba. 20 Kyoso o mukunji wadikota Azadiya ni akunji oso kyamutale, amono kwila mwene wexile ni dibhute bhu dibhômo. Mukyenyiki, a mutubhula bhu kanga ni lusolo, mwene we watundu ni lusolo mukonda wamono kwila Jihova wa mukwama.
21 Sobha Uziya wasuluka ni dibhute kate kyafu. Kuma wexile mukwa dibhute, mwene wadikexidila mukonda katokalele kubokona mu inzo ya Jihova. O mon’ê Jotamu, mwene wexile mutambula konda ya dibhata ni kufundisa o milonga ya mundu.
22 O ima yamukwa yabhange Uziya, tunde ku dimatekenu kate ku disukilu, a isoneka kwa polofeta Izaya mon’a Amonji. 23 Ku pholo dya kwenda Uziya wafu, a mufundu bhu kididi bhwa fundile o jikuku jê, maji a mufundu bhu kididi kyazukamene ni jimbila ja jisobha mukonda, ambe: “Mwene mukwa dibhute.” O mon’ê Jotamu, mwene wa mubhingana bhu kididi kyê kya usobha.