Dya Kayadi Dya Malunda
33 Manasa wexile ni dikwinyi ni kiyadi kya mivu, kyoso mwene kyamateka kutumina. Mwene watumina mu makwinyi atanu ni kitanu kya mivu mu Jeluzaleme.
2 Manasa wabhange ima yayibhila Jihova, wabhange o ima yayibha yexile mubhanga o ifuxi yakaye Jihova ku pholo ya Izalayele. 3 Mwene watungulula dingi o ididi ya kubhezela yabwikile kya tat’ê Ezekiya, watungu kalatódyu phala Bahale, yu wabhange we iteka. Mwene wafukamena o jithethémbwa joso ja dyulu, yu wa jibheza. 4 Watungu we kalatódyu mu inzo ya Jihova, o inzo yazwelele Jihova wixi: “Mu Jeluzaleme mwene mwanda kala o dijina dyami, dyene dyanda nangenena kate ku hádya ni hádya.” 5 Manasa watungu we jikalatódyu phala o ifuxi yoso ya jithethémbwa ku dyulu mu kithádi kya inzo ya Jihova. 6 Mwene woha o an’ê mu túbhya mu honga ya Mon’a Hinome, wabhange ima ya wanga, wakexile we musota akwa kuzambula ni imbanda. Mwene waswinine mu kubhanga ima yayibhila Jihova phala ku muthathamesa.
7 Manasa wabhange we kiteka phala ku kibheza, yu wakite mu inzo ya Nzambi yakidi, o inzo yazwelele Nzambi kwa Davidi ni kwa mon’ê Solomá, wixi: “O inzo yala mu Jeluzaleme i ngasolo mwaxaxi ka miji yoso ya Izalayele, nganda ta-mu o dijina dyami kate ku hádya ni hádya. 8 Akwa Izalayele, kinganda akaya dingi mu ixi i ngabhana ku jikuku jâ, se ene abelesela o Ijila, o jingonge ni itendelesu i ngabhana kwa selevende yami Mozé.” 9 Manasa wasuluka ni kunganala akwa Judá ni athu atungile mu Jeluzaleme, wa afunyisa kubhanga ima yayibha kinene, o yabhangele o ifuxi yakaye Jihova bhu pholo ya akwa Izalayele ndenge.
10 Jihova wexile mudimuna sobha Manasa ni mundu, maji ene kakexile mu mubhana mátwi. 11 Kyenyiki, Jihova wabhangesa o atwameni a kifuxi kya masoladi a sobha ya Asídya kwiza mubhânga-nawu. Akwa Asídya akwata Manasa, a mukutu ni malubhambu ayadi a ngondo, ya a mwambata ku Babilonya. 12 Mukutata kwê, mwene wadyondela Jihova Nzambi yê, yu waditulula bhu pholo ya Nzambi ya jikuku jê. 13 Manasa wasambe kwa Nzambi, Mwene wevu o kudyonda kwê, yu wa mubheka dingi mu Jeluzaleme ku ungana wê. Kyenyiki, Manasa watena kumona kwila Jihova mwéne o Nzambi yakidi.
14 Mukusuluka, Manasa watungu o ilumbu ya Mbanza ya Davidi ku mbandu ku fwila o dikumbi, mu honga ya Ngihone. Mwene wa itungu kate bhu mwelu a wixana Mwelu wa Mbiji. Wasuluka mu kutunga o ilumbu, yene yakondolokele o mbanza kate ku Ofele. O ilumbu yenyiyi yalebhele kyavulu. Manasa wasolo we atwameni a masoladi mu jimbanza joso jofikidile ja Judá. 15 Mwene watubhula bhu kanga o jinzambi ja jixi jengi ni iteka yexile mu inzo ya Jihova. Wabulu we o jikalatódyu jatungile ku mulundu wa inzo ya Jihova ni mu Jeluzaleme, yu watumu ku jitexa bhu kanga dya mbanza. 16 Watungulula o kalatódyu ka Jihova, yu wamateka kubhakula jisata ja paze ni jisata ja kusakidila. Watendelesa we akwa Judá kubheza Jihova o Nzambi ya Izalayele. 17 Maji-phe o mundu wexile hanji mubhakula jisata mu ididi ya kubhezela, sumbala akexile mu kibhanga phala Jihova Nzambi yâ.
18 O ima yamukwa yabhiti ni Manasa, o musambu wabhange kwa Nzambi yê, o ima ya mutangela Jihova, o Nzambi ya Izalayele bhukaxi ka akwa kumona o isumwa, ima yoso yosoneke mu divulu dya misoso ya izuwa ya jisobha ja Izalayele. 19 O musambu wabhange ni kyebhi kya mutambwijila ni ituxi yoso yate ni kubhukumuka kwê ni ididi yatungu ya kubhezela ni iteka yabhange ande dya kudyela o ituxi yê, ima yoso yiyi a isoneka mu divulu dya akwa kumona o isumwa. 20 Mukusuka-ku, Manasa wafu, ya a mufundu mu inzo yê. O mon’ê Amone mwéne wa mubhingana ku ungana.
21 Amone wakexile ni makwinyi ayadi ni kiyadi kya mivu, kyoso kyamateka kutumina. Mwene watumina mu Jeluzaleme mu mivu iyadi. 22 Amone wexile mubhanga ima yayibhila Jihova, kala kyabhangele tat’ê Manasa. Amone wexile mubhakula jisata ku iteka yoso yayudikile tat’ê, yu wexile mu ibheza. 23 Maji mwene kaditulula bhu pholo ya Jihova kala kyabhangele tat’ê Manasa, mwene wasuluka mu kubhanga ima yayibha. 24 Mukusuka-ku, sobha Amone a mulungulukila ku jiselevende jê, ya a mujibhila mu inzo yê mwene. 25 Maji o mundu, wajibha o mayala oso alungulukile sobha Amone, ya atumbika mon’ê Joziya ku usobha bhu kididi kyê.