Dya Kayadi Dya Malunda
35 Joziya wabhange o fesa ya Phasu phala Jihova mu Jeluzaleme. O sata ya Phasu wa ibhakula mu kizuwa kya dikwinyi ni kiwana kya mbeji ya dyanga. 2 Mwene watumu o akunji kukala mu ididi yâ, phala kubhanga o ikalakalu yâ mu inzo ya Jihova, yu wa aswinisa. 3 Kyenyiki, mwene wambela o Jilevita, o alongexi a Izalayele, yó azelele bhu pholo ya Jihova, wixi: “Tulenu o álaka mu inzo yatungu Solomá mon’a Davidi, sobha ya Izalayele. Kimwanda bhinga dingi ku yambata bhu isuxi. Kindala sidivilenu Jihova, Nzambi yenu ni mundu wê, Izalayele. 4 Disokejekenu mu ibuka-ibuka kala ki mwatokala ku mabhata ma jitata jenu, phala kubhanga o ikalakalu, kala kyasoneka Davidi, sobha ya Izalayele ni mon’ê Solomá. 5 Kalenu bhu kididi kikôla, disokejekenu mu ibuka-ibuka, kala kyatokala o mabhata a jitata ja kifuxi kya mundu, o jiphange jenu, phala kala mwiji bhu kale kibuka kya Jilevita. 6 Bhakulenu sata ya Phasu, dizelesyenu, sokejekenu o ima phala o jiphange jenu. Bhangenu kyenyiki, phala mu kumbidile o kizwelu kyabhana Jihova kwa Mozé.”
7 Joziya wabhana makwinyi atatu a midi a tungombe ni jihombo jatundu mu kibhanga kyê, wabhana we midi jitatu ja jingombe kala sata ya Phasu phala o mundu woso wexile bhenyobho. O ibhaku yoso yiyi, sobha wa ikatula mu ibhanga yê. 8 O ilamba ya sobha abhana we maujitu mu vondadi yâ phala o mundu ni akunji ni Jilevita. Hilikiya ni Zakadiya ni Jiyele, o atwameni a inzo ya Nzambi yakidi, abhana midi jiyadi ni hama samanu a tumbudi ni jihombo, ni hama jitatu ja jingombe ku akunji, phala o fesa ya Phasu. 9 Konaniya ni jiphange jê Semaya ni Netanayele, kumoxi ni Hasabiya, Jehiyele ni Jozabade, o atwameni a mwiji wa Levi, abhana midi jitanu ja tumbudi ni jihombo ni hama jitanu ja jingombe ku Jilevita phala o Phasu.
10 Kyenyiki, azubha kusokejeka yoso. O akunji emanene mu ididi yâ, o Jilevita exile we mu ibuka-ibuka kala kyatendelesele o sobha. 11 Ajibha o ibhaku yoso ya jisata ja phasu, o akunji anyakena o manyinga atambula ku Jilevita, kyoso kyexile mutála* o ibhaku. 12 Mukusuluka, asokejeka o jisata ja kwoha, phala ku jiwanuna ku mundu kala kyatokala ku mabhata a jitata jâ, phala ku jibhakula kwa Jihova, kala kyosoneke mu divulu dya Mozé. Kyene kyabhange we ni jingombe. 13 Alambe* o xitu ya jisata ja phasu kala kituma o kijila, alambe we o xitu ya jisata jikôla mu jimbya jofele ni mu jimbya jamakota, ya a jambata ku mundu. 14 Mukusuluka, o Jilevita alambe o xitu ya phasu phala ene ni akunji, mukonda o akunji, o mbutu ya Alá, exile mubhakula jisata ja kwoha ni banya kate mu usuku. Kyenyiki, o Jilevita alambe o xitu ya sata ya phasu phala ene ni akunji, o mbutu ya Alá.
15 O jingimbidi, o an’a Azafe, exile mubhanga o ikalakalu yâ kala kya tendelesele Davidi, Azafe, Hemane ni Jedutune o mukwa kulombolola o isumwa* kwa sobha. O alangidi exile mu ididi yâ mu kulangidila o mabhitu. Ene kabhingile kuxisa o ikalakalu yá, mukonda o jiphange jâ, o Jilevita alambele kya o xitu ya sata ya phasu phala ene. 16 Mu kizuwa kyenyokyo, azubha kusokejeka o ima yoso phala kubhanga o Fesa ya Phasu, kala kyatumu Jihova. Azubha we kusokejeka o ima yoso phala kubhakula o sata ya kwoha mu kalatódyu ka Jihova, kala kya atendelesa sobha Joziya.
17 O akwa Izalayele exile bhenyobho, abhange o Fesa ya Phasu ni Fesa ya Jimbolo jakambe Felemendu mu kithangana kyenyokyo. Abhange o fesa mu sambwadi dya izuwa. 18 Tunde mu izuwa ya polofeta Samuwele, mu Izalayele kabhangele luwa Fesa ya Phasu yadifwile ni fesa yiyi. Kikwexile we sobha yengi mu Izalayele wabhangele Fesa ya Phasu yadifwile ni fesa yabhangele Joziya kumoxi ni akunji ni Jilevita ni mundu woso wa Judá ni wa Izalayele wakexile bhenyobho ni akwa Jeluzaleme. 19 O Fesa yiyi ya Phasu, a ibhange ku muvu wa dikwinyi ni kanake wa utuminu wa sobha Joziya.
20 Kyabhiti o ima yiyi, kyoso Joziya kyazubha kuyudika o tembulu,* Neku sobha ya Ijitu, wayi mubhânga ku Kakemiji bhwa zukama o ngiji ya Ewufalate. Kyenyiki, Joziya watundu phala kubhânga-nê. 21 Mukonda dya kiki, Neku watumikisa akunji phala ku mutangela, wixi: “Mukonda dyahi wa mukwiza mubhânga n’eme eye usobha ya Judá? Lelu, kingeza mubhânga n’eye, maji ngeza mubhânga ni sobha yengi. Nzambi wa ngibhingi kulenguluka. Mwene wala n’eme, eye-phe dilange phala kubhânge ni Nzambi, se u kibhanga, mwene wanda kubwika.” 22 Maji-phe Joziya wajiji mwene. Wazwata mu ukexilu wengi phala kamutungunune, yu wayi mubhânga ni Neku. Kamesenene kwivwa o izwelu ya Neku ya mutangela Nzambi. Kyenyiki, mwene wayi mubhânga-nê mu honga ya Mejidu.
23 O akwa kutakula o jisosa akwama sobha Joziya, kyenyiki mwene wambela o masoladi mê, wixi: “Ngikatulenu bhabha, mukonda a ngikwama kyavulu.” 24 O masoladi mê a mukatula mu dikalu dya ita, a mutula mu dikalu dyamukwa dya ita a mwambata mu Jeluzaleme. Bhenyobho, Joziya wafu, a mufundu mu mbila ya jikuku jê. O akwa Judá ni akwa Jeluzaleme adidi kyavulu Joziya. 25 Jelemiya wembi mwimbu wa thambi mukonda dya kufwa kwa Joziya. O jingimbidi joso ja mala ni ja ahatu, ene mutumbula we Joziya mu mimbu yâ ya thambi, kate mu izuwa ya lelu. Akwa Izalayele anga akala ni kifwa kya kwimba o mimbu yiyi, yene yosoneke mu divulu dya kuditenda.
26 O ima yamukwa yabhange Joziya, o henda yê ni ufiyele wê, ni kyebhi kyabelesela o Kijila kya Jihova, 27 ni yoso yabhange mwene tunde ku dimatekenu, ndu ku disukilu, a isoneka mu Divulu dya Jisobha ja Izalayele ni ja Judá.