Dya Kayadi Dya Malunda
4 Kyenyiki, mwene wabhange o kalatódyu ka ngondo kexile ni makwinyi ayadi a jikovadu mu kulebha ni makwinyi ayadi a jikovadu mu kuzanza ni dikwinyi dya jikovadu mu kitala.
2 Mukusuluka, wabhange mbasiya yadikota ya menya, a ixana Musanza wa Kalunga. O mbasiya yiyi yexile ni dikwinyi dya jikovadu, tunde ku mbandu imoxi ndu ku mbandu yamukwa, ni jikovadu jitanu mu kulebha. Phala ku ijinguluka, kwabhingile mukolo wa kuzonga wa makwinyi atatu a jikovadu. 3 Mu jimbandu joso ja mbasiya, afwamesa-mu ni jifikula ja jimbinda jexile ni dikwinyi dya jikovadu, jajingulukile o mbasiya yoso. O jimbinda jexile mu minonono iyadi mu mbasiya imoxi ngo. 4 O mbasiya yadikota a ixana Musanza, yexile ku thandu a dikwinyi ni kiyadi kya jingombe ja ngondo. Jingombe jitatu jalungile o jipholo ku mbandu ya thunda, jingombe jitatu jamukwa, jalungile o jipholo ku mbandu ku fwila o dikumbi. O jingombe jitatu jamukwa, jalungile o jipholo ku mbandu ya lwiji, o jingombe jitatu jamukwa, jalungile o jipholo ku mbandu ku tundila o dikumbi. O mbasiya yexile ku thandu a jingombe, o jimbunda ja jingombe jexile koxi dya mbasiya. 5 O mbasiya mu kukoma yasokele ni dikanda dya lukwaku,* o muzumbu wê wadifwanganene ni muzumbu wa kopho, wedile kala kithulu. Phala ku izalesa kubhinga midi jitatu ja jibatu.*
6 Mwene wabhange we dikwinyi dya jimbasiya. jimbasiya jitanu wa jitula ku mbandu ya kadilu ka inzo, o jimbasiya jitanu ja mukwa, wa jitula ku mbandu ya kyasu. O akunji exile musukula mu jimbasya jiji o iima yoso yakexile mukalakala-nayu phala kubhakula o jisata ja kwoha. Maji o mbasiya yadikota a ixana Musanza, bhwene bhwexile mudisukula o akunji.
7 Wabhange dikwinyi dya tundeya twa ulu kala kya mutendelesele, yu wa tutula mu tembulu. Ku mbandu ya kadilu wate-ku tundeya tutanu, ku mbandu ya kyasu wate-ku we tundeya tutanu.
8 Wabhange we dikwinyi dya jimeza, yu wa jitula mu tembulu. Ku mbandu ya kadilu wate-ku kitanu kya jimeza, ku mbandu ya kyasu wate-ku we kitanu kya jimeza. Wabhange we hama ya matijela a ulu.
9 Mukusuluka, wabhange o kithádi kya akunji ni kithádi kyadikota ni mabhitu a kithádi kyadikota. O mabhitu wa afwamesa ni ngondo. 10 O mbasiya wa itula ku mbandu ya kadilu ka inzo, ku mbandu ya lwiji.
11 Hilamu wabhange we o itutu, o ivotelu ni matijela.
Kyenyiki, Hilamu wazubha o kikalakalu kyoso kya mubhana sobha Solomá phala o inzo ya Nzambi yakidi. 12 Wabhange o jiphiladi jiyadi ni jikapitele* jê ku thandu, jexile mu ukexilu wa ditijela. Wabhange we o mawanda ayadi exile muvungina o jikapitele jiji. 13 Hilamu wabhange we, hama jiwana ja jilomá phala o mawanda ayadi. Kala wanda wexile ni minonono iyadi ya jilomá phala kuvungina o jikapitele jiyadi jexile mu ukexilu wa ditijela, jexile ku thandu a jiphiladi jiyadi. 14 Wayudika o dikwinyi dya tumakalu* ni dikwinyi dya jimbasiya jexile ku thandu a tumakalu. 15 Wabhange o mbasiya yadikota a ixana Musanza wa kalunga ni dikwinyi ni kiyadi kya jingombe ja ngondo jexile koxi dya mbasiya yiyi yadikota. 16 Wabhange o itutu ni ivotelu ni jingalufu ni matijela ni imbamba yoso yamukwa. Hilamu-Abive wabhange o ima yiyi ni ngondo, phala sobha Solomá ni inzo ya Jihova. 17 Sobha watumu kubhanga o ima yiyi bhu kididi bhwexile o utuma, mu mbambe ya Njolodá bhukaxi ka Sukote ni Zelede. 18 Solomá wabhange ndumba dya ima yiyi. O ngondo kakexile dingi mu izonga.
19 Solomá wabhange o ima yoso phala o inzo ya Nzambi yakidi, o kalatódyu ka ulu ni jimeza mwexile mutula o jimbolo jikôla, 20 o matudilu a tundeya ni tundeya twê twa ulu yambote, phala kumwikina o dixilu dya hota kala kya mutendelesele. 21 Wabhange we o ithulu, o tundeya ni ijiminu ya ulu, kifwa, ya ulu yambote, 22 o jitezola ni matijela ni jikopho ni ididi ya kutula o makala yobhange ni ulu yambote, o mwelu wa inzo, o mabhitu phala o Kididi Kikôla Kinene ni mabhitu a tembulu.* Ima yoso yiyi wa ibhange ni ulu.