Dya Kayadi Dya Malunda
8 Ku disukilu dya makwinyi ayadi a mivu, kyoso Solomá kyazubha kutunga o inzo ya Jihova ni inzo* yê, 2 mwene watungulula o jimbanza ja mubhele Hilamu, yu watula-mu akwa Izalayele phala kutunga-mu. 3 Solomá wayi we mutambula o mbanza ya Hamate-Zoba. 4 Mukusuluka, watungulula o mbanza ya Tadimolo yexile mu kikangalakata ni jimbanza ja kubhakela o kudya jatungile ku Hamati. 5 Mwene watungu* we o jimbanza ja Betolone ya Thunda ni Betolone ya Lwiji. O jimbanza jiji jexile ni ilumbu ni mabhitu ala ni jiphapha. 6 Watungu we Balate ni jimbanza joso ja kubhakela o kudya kwa Solomá ni jimbanza joso ja kubhakela o makalu a ita, ni jimbanza ja akwa kwendela ku jikabalu ni ima yamukwa yamesenene kutunga Solomá mu Jeluzaleme ni ku Libanu ni mu jixi joso jexile mutumina mwene.
7 Ku athu oso asubhukile ku akwa Mamodi, ku akwa Hiti, ku akwa Mapelezi, ku akwa Mahivi ni ku akwa Jebuze, katokalele ku mundu wa Izalayele, 8 kifwa o athu asubhuka ku ifuxi yiyi, akambele ku abwika ku akwa Izalayele, Solomá wa abhange abhika phala kubhanga ikalakalu ya nguzu. Ene abhika kate mu izuwa ya lelu. 9 Maji Solomá kasolo muthu ku akwa Izalayele phala kukala mubhik’ê, mukonda éne exile o masoladi mê, o jikabhitangu ja jifixiyadi jê ni atwameni a yó akwa kwendesa o makalu a ita ni jikabalu. 10 Kwakexile hama jiyadi ni kitanu kya athu akexile ku pholo mu kwendesa o ikalakalu ya sobha Solomá. Éne exile mutumina o akalakadi.
11 Solomá wakatula muhat’wê mon’a Falawó mu Mbanza ya Davidi, yu wa mwambata mu inzo ya mutungile, mukonda mwene wambe: “Sumbala mwene muhat’wami maji katokala kukala mu inzo ya Davidi sobha ya Izalayele, mukonda o ididi mwakexile o Álaka ya Jihova ididi ikôla.”
12 Mukusuluka, Solomá wabhakula jisata ja kwoha kwa Jihova ku kalatódyu ka Jihova katungile mwene mu mbalanda ya inzo. 13 Izuwa yoso mwene wexile mubhakula o jisata kala kya kitendelesa mu kitumu kya Mozé kyalungu ni jisábhalu ni mbeji ya thethama ni jifesa jitatu jexile mubhanga ku muvu: O Fesa ya Jimbolo Jakambe o Felemendu, o Fesa ya Jisemana ni Fesa ya Jibalaka. 14 Solomá wasolo o ibuka ya akunji phala kubhanga o ikalakalu yâ, kala kya mutendelesele tat’ê Davidi. Wasolo we Jilevita phala kubhanga o ikalakalu, phala kuximana Nzambi ni kukwatekesa o akunji kala kyatokalele kubhanga kizuwa ni kizuwa. Wasolo we ibuka ya alangidi a mabhitu, phala kulangidila o mabhitu oso mukonda kyene kya mutumine kubhanga Davidi, o diyala dya Nzambi yakidi. 15 Ene kabhukumukina o kitumu kya sobha kyalungu ni akunji ni Jilevita, né mwene mu maka alungu ni ididi ya kubhakela o kudya. 16 Solomá wasokejeka kyambote o ikalakalu yoso, tunde o kizuwa kyate o kaboko ka inzo ya Jihova, kate kyazubha ku itunga. Kyenyiki, azubha kutunga o inzo ya Jihova.
17 Mukiki-phe, Solomá wayi ku Ezone-Ngabele ni ku Elate, bhu ndundu ya kalunga mu ixi ya Idomo. 18 Hilamu watumu o jiselevende jê kubhana kwa Solomá, jinaviyu ni endexi a jinaviyu ala jihete. Ene ayi kumoxi ni jiselevende ja Solomá ku Ofile, ya abheka hama jiwana ni makwinyi atanu a jitalendu* ja ulu, anga a jambata kwa sobha Solomá.