Jobe
41 “O kwila o ngandu utena ku ikwata ni nzolo,
Mba kukuta o dimi dyê ni lungoji?
2 O kwila utena ku ita mukolo mu mazulu,
Mba ku ikubula o jinganzwanzwa ni nzolo?
3 O kwila itena ku kudyonda phala ku mukwatela henda,
Mba yanda zwela n’eye ni kulenduka?
4 O kwila yanda ta kikutu n’eye,
Ni ikale mubhik’é ku mwenyu wê woso?
5 O kwila wanda tonoka-nayu kala njila,
Mba wanda ikuta mukolo bhu xingu n’u ibhana an’é a ahatu phala kutonoka-nayu?
6 O kwila o kibuka kya atambi eji isumbisa?
O kwila eji tena kudiwanena-nayu?
7 O kwila weji tena ku ikubula ni lufwala,*
Mba ku kubula o mútwe wê ni ngumba?
8 Se u ikwata né mwene lumoxi,
Wanda dilembalala kyoso ki wabhânge-nayu, kwanda vutukila dingi ku ikwata!
9 Nguzu yoso i ubhanga phala ku itoma, hadye ngo,
Mukonda mu ku imona weji kala ni wôma wavulu.
10 Kana-ku muthu utena kudikaka ku ilokalala.
Kyenyiki-phe, nanyi utena kuzoka n’eme?
11 Nanyi wadyanga ku ngibhana kima ni ngi muvutule-kyu?
Yoso yala mu ngongo ya ngitokala.
12 Nganda suluka ni kuzwela yalungu ni inama yê,
O nguzu yê ni ukexilu wabhange o mukutu wê.
13 Nanyi wakatula kya o kikonda kyê kyedi kala kivunga-thulu?
Nanyi utena kuzukama mu dikanu dyê?
14 Nanyi utena ku ijikula o dikanu?
O mazu mê akwatesa wôma.
15 Dikunda dyê dyala ni mikalakata ya ibalabala,
Ya dikayejela kyambote.
16 Ya dibudijika i ya naminina kyambote,
O kitembwe ki kitena kubhita bhukaxi.
17 Idinaminina kumoxi, idikwata mwene kyambote,
Ki ixikina ku i mwangununa.
18 Kyoso ki ita jingaxaxa, o menya atunda mu mazulu mê asedima mukwa ni mukengeji,
O mesu mê abhenya kala mukengeji wa kamene.
19 Mu kanu dyê mutunda jinzaji,
Jiya ni kumwanga jisoso ja túbhya.
20 Mu mazulu mê mutunda dixi,
Mukwa ni dixi ditunda bhu dijiku.
21 O kubhwima kwê kuwamesa makala,
Mu kanu dyê mutunda mulengu.
22 O xingu yê yala ni nguzu yavulu,
Oso a isanga akala ni wôma wavulu.
23 O kikonda kyê mu mala kyakolo,
Kyakolo mwene mukwa ni felu, kikizambe.
24 O phumbulu yê yakolo mukwa ni ditadi,
Kyene! Yakolo mwene kala ditadi dya kuhuhila.
25 Kyoso ki ifundumuka ni mazonda ateketa ni wôma,
O ukexilu wê wa kudizambesa usasumukisa.
26 Se bhukala muthu u muvunda ni xibhata ku dikunda, ki ibokona,
Né ngumba mba sosa.
27 Mukonda yene imona o felu kala fufutila,
O ngondo u imona mukwa ni dibaya dya muxi wabolo.
28 Ki ilenge o sosa,
O matadi a kutakula ni mbalafunda,* u amona kala mafwe akukuta.
29 O mbangala u imona kala yangu yakukuta,
O jibuya ja ngumba jimwolelesa.
30 O mala mê mukwa ni itetu ya ímbya ya mavu,
Mwene udizala mu malôwa mukwa ni dibaya dyadikota.
31 Kyoso ki ibokona mu musanza wa kalunga, o menya akala ni ifulu,
Mukwa ni ímbya ya máji ya mufuluka.
32 Bhubhita mwene, bhuxala muxinda u bhenya kala mukengeji,
Kyaya ni kuzowa ubhangesa o menya kudima dyê kukala ni ifulu.
33 Séku kyama kyadifu ni mwene mu ngongo,
Nzambi wa kibhange phala ki ikale ni wôma.
34 O yama yoso idizangeleka, ka ikwatela wôma,
Mwéne o sobha mukaxi ka yama yoso ya mukáwu yala ni kutena.”