Daniyele

1 Ku muvu wa katatu wa utuminu wa Nzoyakimi sobha ya Judá, Nabukodonozolo sobha ya Babilonya, wabhixila mu mbanza ya Jeluzaleme yu wa ikondoloka ni masoladi. 2 Mu kubhita thembu, Jihova o Nzambi yakidi, wabhakula sobha Nzoyakimi mukwa Judá ni imbamba yoso yatokalele mu inzo* yê bhu maku a Nabukodonozolo. Nabukodonozolo wambata o imbamba mu ixi ya Xinale* mu inzo ya nzambi yê, wa itula mu kididi kya kubhakela o jimbote.

3 Bhenyobho, sobha watendelesa Aspenaze, o kabhitangu-kê, phala kubheka o an’a Izalayele, kate mwene o an’a jisobha ni an’a ilamba. 4 Atokalele kukala minzangala yadisanze, awabha o pholo, ala ni unjimu, kwijiya ni kutetuluka, atena kukalakala mu inzo ya sobha. Aspenaze watokalele ku alonga kusoneka ni kuzwela o dimi dya akwa Kaladeya. 5 Kikyene ngo, o sobha watendelesa we ku abhana vinyu ni kudya kwexile mudya o sobha izuwa yoso. Ene atokalele we ku alonga mu mivu itatu. O kudisukilu dya mivu yiyi, ejiya mukalakala mu inzo ya sobha.

6 Mwaxaxi ka minzangala yá, mwexile we minzangala yatokalele ku mwiji wa Judá. Majina mâ, enyá: Daniyele,* Hananiya,* Mizayele* ni Azadiya.* 7 O kabhitangu Aspenaze, wa aluku majina engi.* Daniyele wa muluku Beltexazale, Hananiya wa muluku Sadalake, Mizayele wa muluku Mizake, Azadiya wa muluku Abedeneku.

8 Maji Daniyele wate kikutu ni muxima wê kya kwila, keji dya o kudya ni kunwa o vinyu ya sobha phala kakasane. Kyenyiki, mwene wabhingi ku kabhitangu phala kamubhane o ima yiyi yeji mukasanesa. 9 O Nzambi yakidi-phe, wabhangesa o kabhitangu kukwatela henda kwa Daniyele ni ku mubhangela mbote. 10 Maji o kabhitangu wambela Daniyele, wixi: “Ngala ni wôma wa ngana yami, o sobha, wa ngitumu ku mibhana o kudya kuku ni uhôlwa yú. Abha se mwene umona kwila, o minzangala yamukwa yadisanze dingi enu ndenge? Mukonda dyé, o sobha wanda ngibatula o mútwe.” 11 O kabhitangu wasolele mulangidi phala kulanga Daniyele, Hananiya, Mizayele ni Azadiya. Bhenyobho, Daniyele wambela o mulangidi, wixi: 12 “Ngakudyondo, fikisa hanji kiki: Jiselevende jé u abhana ngo kudya kwa mabhya ni menya, mu dikwinyi dya izuwa, 13 ni usokese o jipholo jetu ni jipholo ja minzangala yene mudya o kudya kwene mudya o sobha. Mu yoso i wanda mona, éye kya wejiya i wanda bhanga n’etu tu jiselevende jé.”

14 O mulangidi waxikina, yu wafikisa mu dikwinyi dya izuwa. 15 Kyabhiti o dikwinyi dya izuwa, ene abetele kota mu kuwabha ni kuneta, o minzangala yexile mudya o kudya kwa sobha ndenge. 16 Kyenyiki, o mulangidi wasuluka ni ku abhana ngo kudya kwa mabhya, muveji dya ku abhana vinyu ni kudya kwexile mudya o sobha. 17 O Nzambi yakidi wabhana unjimu, kwijiya ni kutetuluka kwalungu ni maukexilu oso akusoneka ku minzangala iwana yiyi. Daniyele watambula kutena kwa kutongolola o isumwa ni jinzoji ja maukexilu oso.

18 Kyabhu o mivu itatu yatendelesele o sobha, o kabhitangu wa abheka bhu pholo ya Nabukodonozolo. 19 Kyoso sobha kyazwela ni minzangala, mu kibuka kyoso kimwexile muthu wasokele ni Daniyele, Hananiya, Mizayele ni Azadiya. Kyenyiki, ene asuluka kwenyoko ni kukalakalela o sobha. 20 Kyoso sobha kyexile musota kubatula maka abhingile unjimu ni kutetuluka, mwene wexile mumona kwila, o minzangala iwana yiyi yabetele dingi kota, o akunji oso abhanga o ipheteka ya wanga ni akwa kuzambula mu utuminu wê ndenge. 21 Daniyele ukala jinga mwenyomo kate ku muvu wa dyanga, wa utuminu wa sobha Silu.