Hozeya
10 “Akwa Izalayele adifwangana ni muxi wa muvidi wa mubola, maji wa
mukwima hanji ibundu.
Kyoso ki wima ibundu yavulu, ene abandekesa dingi o jikalatódyu jâ.
Kyoso o mavu mâ kyabhana idima yavulu, ene afwamesa dingi o iteka yâ, ya kubheza.
2 Ene a kituka akwa mangonya.
Kindala anda ku abalakala.
Sayi muthu wanda bula o jikalatódyu jâ ni kubula o iteka yâ.
3 Mukiki ene anda zwela, ‘kitwala ni sobha. Mukonda Jihova ki tu mukwatela wôma.
Ne mwene se twexile ni sobha, ihi yeji bhanga mwene phala kutukwatekesa?
4 Ene azwela ima ya kingoho. Alonga makutu anga ata ikutu.
Mukonda dya kiki, o ukexilu wâ wa kufundisa, wedi kala isasa ifwisa athu isabhuka mu mukáwu.
5 Akwa Samadiya anda teketa ni wôma mukonda dya kiteka kya kangombe kyala ku Bete-Avene.
O mundu wanda dila mukonda dyê,
O akunji a jinzambi ja jixi jengi, exile musanguluka mukonda dyê ni mukonda dya fuma yê, anda dila we.
Mukonda kyene anda kyambata ni kukikwikila dikanga.
6 Ene anda kyambata ku Asídya, anda kibhana kala ujitu kwa sobha yadikota.
Efalayíme anda mukwatesa jisonyi,
Akwa Izalayele jisonyi janda ku akwata, mukonda dya kukayela o jindunge jayibha.
7 O sobha ya Samadiya ni mundu wê, anda jimuka,
Kala kijimuka o kalutangu kyoso kya kakungulula ku menya.
8 O ididi ya kubhezela yala ku Bete-Avene, ibhangesa akwa Izalayele kuta ituxi, anda ku ibwika.
O ku thandu dya jikalatódyu jâ, kwanda sabhuka minya ni holokoso.
O athu anda kwambela o milundu, ‘tuvunginyenu!’
O athu anda zwela ku tumilundu twofele, ‘lundumukenu ku thandu dyetu!’
9 Tunde kyabhiti o maka ku Ngibeya, enu mu akwa Izalayele mwene muta ituxi.
Ene ajijila mu kuta ituxi.
O ita kiyabwika o mundu* wabhukumuka wala ku Ngibeya.
10 Mu kithangana kyatokala, nganda ku akastikala.
Ifuxi yavulu yanda kwiza mubhânga ni ene,
Kyoso ki nganda ku akastikala mukonda dya kutondala mu luyadi.
11 Efalayíme wadifwanganene ni kangombe ka mukaji, kolonge kutitidila o tiliku, mwene wa wabhelele kubhanga o kikalakalu kiki.
Mukonda dya kiki, o xingu yê yafwama ki ngi ikutu ni kima.
Kindala Efalayíme nganda mubhangesa kudima.
Judá wanda dima; Jakobo wanda sokelesa o mavu odime.
12 Kunenu o kuyuka ni mubhongolole o henda ya kalelaku.
Dimenu o mavu akambe hanji kwa adima,
Kyoso ki mwala hanji ni kithangana kya kusota Jihova
Kate kyanda kwiza mwene ku milonga ni kuyuka kwoso.
13 Maji enu mwakunu kuyibha,
Mwabhongolola kituxi.
Mwadi o ibundu yejila mu makutu menu.
Mukonda enu mwa didyelela.
Mwadyelela we ku ndumba yenu ya masoladi.
14 Mwaxaxi ka mundu wê mwanda kala jibuya ja ita.
O jimbanza jofikidile anda jibwika,
Kala Xalumane kyabwika o inzo ya Halubele,
Kyoso o ahatu kya abwika ni twana twâ mu kizuwa kya ita.
15 Kiki kyene kyanda bhita n’enu mu akwa Betele mukonda dya ituxi yavulu i mwate.
O sobha ya Izalayele anda mujibha mu kamene-mene.”