Amoji
8 O Ngana Jihova, Sukeku, wa ngibhangesa kumona kisumwa. Mu kisumwa, ngamono kisambu* kyezala ni ibundu yabhi kya.*
2 Mwene wa ngibhula, wixi: “Amoji, ihi i wa mumona?” Eme nga mutambwijila, ngixi: “Nga mumona kisambu kyezala ni ibundu yabhi kya.” Mukyenyiki, Jihova wa ngambela, wixi: O kizuwa kya kukastikala o mundu wami wa Izalayele kyabhixila kya. Kinganda ku aloloka dingi. 3 O Ngana Jihova, Sukeku, wambe: ‘Mu kizuwa kyenyokyo, o mimbu ya tembulu yanda kituka mimbu ya malamba.’ Mu ididi yoso mwanda kala imbi yavulu. Dixibhyenu!’
4 Ivwenu, enu mwene mutatesa o jingadyama,
Enu mwene mubhanga o phulu ku athu alenduka, atungu mu ixi.
5 Ene amba: ‘O jifesa ja mbeji yathethama janda bhwa thembu kuxi phala tusumbise o tiliku yetu?
O jisábhalu janda bhwa thembu kuxi, phala tusumbise o jimbundu jetu?
Mukyenyiki, twanda tena kusosolola o kizongelu kyetu kya efa,
Ni kubandekesa o kizongelu kya xikulu,
Ni kunyana o athu bhukaxi ka izongelu yetu.
6 O yó wabhindama twanda musumba ni phalata,
O ngandyama twanda musumba ni jihayi,
Twanda sumbisa we o ibhyate ya tiliku.’
7 Jihova, o kijingu kya Jakobo, waloko, wixi:
‘Kinganda jimba o ima yoso yabhange ene.
8 Mukonda dya ima yiyi, o ixi yiyi yanda tunguta,
O athu oso ala mu mbanza anda dila.
Mukyenyiki, o mavu a ka zangumuka kala o ngiji ya Nilu,
Anda zangumuka ni kutunuka kala o ngiji ya Nilu ku Ijitu kyoso ki izala.’
9 O Ngana Jihova, Sukeku wambe, wixi:
‘Mu kizuwa kyenyokyo,’ o dikumbi nganda dibobesa ku mediya,
Nganda bhangesa o ixi kuvunda mu mwanya.
10 Kimwanda bhanga dingi o jifesa jenu, maji-phe nganda mibhangesa kudila,
O mimbu yenu, yanda kala ngo mimbu ya malamba,
Mwanda dikuta jisaku mu mbunda ni kukolola o mítwe yenu,
Mwanda dila kala kidila o muthu wafundu mon’ê umoxyelele,
O disukilu dya kizuwa kyenyokyo, dyanda kala dya jiphaxi.’
11 ‘Talenu! Kizuwa kikiza, kyene kyambe Ngana Jihova Sukeku,
‘Nganda bheka nzala mu ixi yiyi,
Maji ki nzala ya kudya mbolo mba dinyota dya kunwa menya,
Maji nzala ni dinyota dya kwivwa o maka a Jihova.
12 O athu anda kwenda ni kubhendujuka tunde ku musanza wa kalunga umoxi, ndu ku musanza wa kalunga ka mukwa,
Tunde ku mbandu ya thunda, ndu ku mbandu ku tundila o dikumbi.
Anda sota o maka a Jihova mu ididi yoso, maji kanda ku asanga.
13 Mu kizuwa kyenyokyo, o ilumba* yafwama, yanda kumbama,
O minzangala ya mala, yanda kumbama we mukonda dya dinyota.
14 O yó aloka mukonda dya ituxi ya Samadiya amba, exi:
“Kala kyene ku mwenyu o nzambi yé, eye Dane!”
“Kala o njila iya ku Beleseba!”
Enyoso yá anda bwa, kanda balumuka dingi.’”