Zakadiya
10 “Bhingenu mvula kwa Jihova mu kithangana kya mvula ya kungulula musoke.
Jihova mwéne ubhanga o matuta a mvula ya kitembwe kyadikota.
Ubhana mvula yavulu ku athu,
Ni idima ku athu oso.
2 O iteka* yâ, itanga makutu.
O imbanda itanga isumwa ya kunganala.
Ene atanga jinzoji jakambe valolo,
Asota kukonda o malamba mu kingoho.
Mukonda dya kiki, o athu anda nyunga-nyunga ngo kala jimbudi.
Anda tala hadi, mukonda dya kukamba mubhidi.
3 O abhidi nga akwatela njinda.
O atwameni edi kala isutu ya jihombo jateme, anda bhakula jikonda kokwami.
Mukonda Jihova dya ifuxi, walembalala dingi o jimbudi jê, o inzo ya Judá.
Mwene wanda kwakitula kala jikabalu jê ja nguzu mu ita.
4 Mwa Judá, mwéne mwanda tunda o mutwameni,
Mwéne mwanda tunda o mutwameni wanda ku akwatekesa.
Mwéne mwanda tunda o mufula wa kulwa ita.
Ni atwameni oso anda tunda kumoxi mwenyomo.
5 Ene anda kala kála masoladi,
Adyota malôwa mu ita.
Anda lwa ita mu ixi mukonda Jihova wala ni ene.
O yó endela mu jikabalu, jisonyi janda ku akwata.
6 Nganda bhangesa kwila o dibhata dya Judá dibeta-kota.
Nganda bhulula o mbutu ya Zuze.
Nganda abhangesa kuvutuka mu ixi yâ,
Mukonda nganda ku akwatela henda.
Ene anda kala kála, nuka ngaditunine-nawu.
Kuma éme ngi Jihova Nzambi yâ, nganda kwa evwa.
7 Akwa Efalayíme anda kala kála mazonda a ita,
O mixima yâ yanda sanguluka kala muthu wanu vinyu.
O twana twâ anda mona o ima yiyi, ene anda sanguluka.
O mixima yâ yanda sanguluka, mukonda dya ima i ngabhange, eme ngi Jihova.
8 ‘Nganda kwaxikila mwixi, nganda ku abhongolola.
Kuma nga abhulula, ene anda kituka mundu wavulu,
Anda kala jinga kifuxi kyadikota.
9 Sumbala nga amwange kala jimbutu mwaxaxi ka ifuxi yengi,
Ku jixi ja makanga kwayi, kwenyoko anda ngibanza,’
Ene ni twana twâ, anda swina dingi, anga avutuka.
10 Nganda ku akatula mu ixi ya Ijitu,
Ni mu ixi ya Asídya.
Nganda ku a ambata mu ixi ya Ngiliyade ni mu Libanu,
Kimwanda kala kididi kyasoko phala ene kutunga-mu.
11 Mwene wanda bhita mu musanza wa kalunga, mu kubheka jiphaxi.
Wanda tululukisa o mabhuku a musanza wa kalunga.
O menya a ngiji ya Nilu, anda kukuta.
O ukumbu wa akwa Asídya, wanda bhwa.
O mbasá ya akwa Ijitu, anda ku akatula-yu.
12 Ene anda beta-kota, akwa ndenge. Eme ngi Jihova, nganda bhangesa o ima yiyi kubhita.
Ene anda kwendela mu dijina dyami,’ kyene kyambe Jihova.”