Kala Kyasoneka Matesu
22 Jezú anga wa atela dingi ifika ya mukwá, wixi: 2 “O Utuminu wa dyulu, wa difwangana ni sobha wabhange fesa ya ukaza wa mon’ê. 3 Mwene utuma o abhik’ê kwixana o ajitu, phala o fesa ya ukaza, maji ene aditunu kwiza. 4 Mwene anga utuma dingi abhika engi, wixi: ‘Tangelenu o ajitu kwila, “o kúdya kwabhi kyá. Jingombe jami ni ibhaku yami yanete, yojibhe kyá, ima yoso yo yudike kyá. Zenu mu fesa ya ukaza.”’ 5 Maji o ajitu kabhana mátwi ku kixanu, mu kiki aditela njila jengi. O yú ku dibhya dyê, o mukwá ku wenji wê, 6 o ajitu a mukwá, akwata o abhika, a abeta, anga a ajibha.
7 “O sobha, njinda i mu kwata, yu watumikisa o masoladi mê, ene ajibha o ijibhangânga, anga o mbanza yâ a ite túbhya. 8 O sobha watangela o abhik’ê, wixi: ‘O fesa ya ukaza yo yudike kyá, maji o ajitu kafwamene kukala-mu. 9 Ndenu-phe mu ikoka ya mbanza, mwixane muthu woso-woso u mu sanga, phala kwiza mu fesa ya ukaza. 10 O abhika ayi mu ikoka ya mbanza, anga exana o athu oso asange, kikale athu ambote mba athu ayibha. Kyenyiki o inzo ya fesa yezala ni ajitu.*
11 “Kyoso o sobha kya bokona phala kutonginina o ajitu, wamono muthu katele izwatu ya ukaza. 12 Mwene wa mu tangela, wixi: ‘Kamba dyami, kyebhi ki wabokona mu fesa sé izwatu ya ukaza?’ Mwene-phe katena kuzwela kima. 13 Sobha anga wambela o abhik’ê, wixi: ‘Mu kutyenu o maku ni inama, mu mutexi bhu kanga bhwa vundu. Kwene kwanda kala o kudila kwê ni kudikokota ku mazu.’
14 “Kuma avulu a exana, maji a asolo, atolo.”
15 Jifalizewu-phe ayi, anga asota ndunge phala ku mu kwata mu izwelu yê. 16 Ene anga a mu tumikisa o maxibulu mâ ni akayedi a Helode, exi: “Mesene twejiya kwila u mukwá kidi, ni kwila, ulonga o kidi kya lungu ni Nzambi. Twejiya we kwila, eye kiwene musota fuma bhu pholo ya mundu, mukonda kiwene mutala o pholo ya athu. 17 Tutangele hanji: Ihi i ubanza? O kwila o athu atokala kufuta o lubhaku kwa Sézalu, inga kana?” 18 Mu kwijiya o ukexilu wâ wayibha, Jezú wa a ebhwidisa, wixi: “Enu mu akwâ mangonya! Mukonda dyahi mwandala ku ngi polovala? 19 Ngi londekesyenu o kitadi kya kufuta o lubhaku.” Anga a mu bhekela denádyu. 20 Mwene wa a ebhwidisa, wixi: “O pholo yiyi ni kidimbu kiki, kya nanyi?” 21 A mu tambwijila, exi: “Kya Sézalu.” Mwene-phe, wa atangela, wixi: “Bhanenu kwa Sézalu o ima ya Sézalu, maji kwa Nzambi o ima ya Nzambi.” 22 Kyoso ene kya k’ivu, adiwana kyavulu, anga axisa Jezú, ya amwangana.
23 Mu kizuwa kyenyókyo o Jisadusewu, yó kaxikina kwila kwene difukunukinu, eza kwa mwene, ya a mu ebhwidisa, exi: 24 “Mesene, Mozé wambele kwila: ‘Diyala se difwa sé kuvwala ana, o phang’yê watokala kukazala ni mutudi, n’a vwale ana phala kusokolola o mwiji wa phang’yê wafu.’ 25 Twakexile ni sambwadi dya jiphange ja mala. O wa dyanga wakazala, yu wafu. Kuma kavwalele mona, o muhatu waxala ni phang’yê. 26 O wa kayadi ni wa katatu afu we. Katé kyafu o sambwadi dyoso dya jiphange. 27 Mu ku suka-ku, o muhatu wafu we. 28 Mu kiki-phe, ku difukunukinu, ku sambwadi didi dya mala, mwene wanda kala muhatu wa nanyi? Mukonda mwene wexile muhatu wa ene oso.”
29 Jezú-phe wa atambwijila, wixi: “Enu mwatondala kyavulu, mukonda ki mwejiya o Mikanda Ikôla né o kutena kwa Nzambi. 30 Kuma ku difukunukinu, o mala ka kazala, o ahatu ka abhana mu ukaza, maji akala kála o jianju ku dyulu. 31 Kiluwa mutanga o ima ya zwelele Nzambi ya lungu ni difukunukinu, kyoso kyambe: 32 ‘Eme ngi Nzambi ya Mbalahamu, ngi Nzambi ya Izake, ngi Nzambi ya Jakobo’? Mwene ki Nzambi ya madifundu, maji Nzambi ya athu ala ku mwenyu.” 33 Mu kwivwa o ima yiyi, o mundu wadiwana ni ulongelu wê.
34 Kyoso o Jifalizewu kyevu kwila, Jezú wabelesa o Jisadusewu, ene oso adibundu mu kibuka kimoxi. 35 Umoxi mudyâ wexile mesene ya kulonga o Kijila, wa mu ibhula phala ku mu polovala, wixi: 36 “Mesene, kyebhi o kitumu kya betakota mu Kijila kya Mozé?” 37 Jezú wa mu tambwijila, wixi: “‘Zola Jihova Nzambi yé, ni muxima wé woso, ni mwenyu* wé woso, ni kilunji kyé kyoso.’ 38 Kiki, kyene o kitumu kya dyanga, kya betakota. 39 O kya kayadi kya difu ni kya dyanga, kiki: ‘Zola mukwenu kala ki wadizolo eye mwene.’ 40 Ku itumu iyadi yiyi, kwene kwatundu* o Kijila kyoso kya Mozé ni ulongelu wa Jipolofeta.
41 Kyoso o Jifalizewu kya dyongeka kumoxi, Jezú wa a ebhwidisa, wixi: 42 “Ihi i mu banza yalungu ni Kidistu? Mwene mon’a nanyi?” Ene a mu tambwijila, exi: “Mon’a Davidi.” 43 Jezú-phe wa a ebhwidisa: “Mukonda dyahi, bhukaxi ka nzumbi ikôla, Davidi wa mu ixana Ngana, kyoso kyambe kwila, 44 ‘Jihova watangela Ngana yami, wixi: “Xikama bhu mbandu yami ya kadilu, katé kingitula o jinguma jé, bhoxi dya inama yé”’? 45 Mu kiki-phe, se Davidi wa mwixana Ngana, kyebhi Kidistu kya kala mon’ê?” 46 Séku muthu watena ku mu tambwijila kima. Tundé mu kizuwa kyenyókyo, séku dingi muthu wa mubhange kibhwidisu phala ku mu polovala.