Kala Kyasoneka Luka

9 Jezú wexana o kwinyi ni kiyadi kya jipoxolo, yu wa abhana o kutena ni ungana wa kukaya madimonyo ni kusaka mauhaxi. 2 Mwene wa atumikisa phala kuboka o Utuminu wa Nzambi ni kusaka o jihaxi, 3 yu wa ambela, wixi: “Ki mwambate kima mu njila, né mbangala, né mbwenga, né mbolo, né kitadi,* né ngó kwambata izwatu ya mukwá.* 4 Inzo yoso i mu bokona, kalenu mwenyomo katé ki mu tunda. 5 Mbanza yoso-yoso mwakamba ku mi tambulula, mu kutunda mwenyomo kukumunenu o fufuta ku inama yenu, phala kiki kikale umbangi kwa ene.” 6 Ene atundu, anyungu mu mbanza yoso, sanzala ni sanzala, mu kuboka o njimbu yambote, ni kusaka o jihaxi mu ididi yoso.

7 Helode,* o mwenexi wa mbanza ya Ngalileya, wevu o ima yoso yakexile mu bhita, yu wadiwana kyavulu, mukonda sayi athu akexile muzwela kwila, Nzwá dya Batizu a mu fukununa mw’alunga, 8 maji a mukwá akexile muzwela, Elija watukuluka, amukwá hanji exi, muthu umoxi ku jipolofeta jokulu a mu fukununa. 9 Helode wambe: “Nzwá, nga mu batula o mútwe. Nanyi-phe, wa mubhanga o ima yoso yiyi i nga mu kwívwa?” Mu kiki mwene usota kudimona-nê.

10 Kyoso o jipoxolo kyavutuka, ene atangela kwa Jezú o ima yoso ya bhangele. Mwene wayi nawu kumoxi, mu sanzala a ixana Betesayida, phala kukala ubheka wâ. 11 O kifuxi mu kwijiya o maka enyá, akayela Jezú. Mwene wa atambulula ni henda yoso, yu wamateka kwa bokela o njimbu ya Utuminu wa Nzambi ni kusaka o jihaxi. 12 Mu ngoloxi, o kwinyi ni kiyadi kya jipoxolo a mu zukama, ya a mwambela, exi: “Sula o mundu, n’ayé mu jisanzala ni mu madyembu azukama, phala kusota kúdya ni kididi kya kuzeka, mukonda mumu mu twala, mu mukáwu.” 13 Maji mwene wa avutwila, wixi: “Bhanenu-u kima phala kúdya.” Ene a mu tambwijila, exi: “Kitwala ni kúdya kwasoko, twala ngó ni mbolo jitanu ni mbiji jiyadi. O kwila etu mwéne twatokala kuya mu sumba o kúdya phala athu oso yá?” 14 Mwenyomo mwakexile midi jitanu ja mala. Mwene anga wambela o maxibulu mê, wixi: “A tuminyenu kuxikama mu ibuka ya makwinyi a tanu a athu.” 15 Ene anga a kibhanga, ya atumu athu oso kuxikama. 16 Mwene ukwata jimbolo jitanu ni mbiji jiyadi, watale ku dyulu, yu wasambe. Anga u jibukula, yu wa jibhana ku maxibulu, phala ku jiwanena o mundu. 17 Mu kiki, athu oso adi, ekuta, anga abhongolola o ibhasu ya subhuka-ku, yatenesa kwinyi ni kiyadi kya inda.

18 Mu kubhita ithangana, kyoso mwene kyakexile mu samba ubheka wê, o maxibulu a mu zukama. Mwene anga wa ebhwidisa, wixi: “O athu azwela kwila eme nanyi?” 19 O maxibulu a mu tambwijila, exi: “Sayi yá amba kwila, éye Nzwá dya Batizu, amukwá exi, éye Elija, a ka mukwá hanji exi muthu umoxi ku jipolofeta jokulu a mu fukununa.” 20 Mwene wa ebhwidisa, wixi: “Abha enu, mwene mu zwela kwila éme nanyi?” Phetele watambwijila: “Éye u Kidistu a kutumikisa kwa Nzambi.” 21 Mwene anga wa atendelesa kwila, o maka enyá ka atangele muthu. 22 Maji wambe: “O Mon’a muthu, watokala kutala hadi yavulu, ni ku mu dituna ku adyakime a mundu, ni ku akunji a makota ni ku jimesene ja kulonga o Kijila, ni ku mu jibha. Maji mu kizuwa kya katatu, anda mu fukununa.”

23 Mwene watangela ene oso; wixi: “Se muthu wamesena ku ngi kayela, aditune mwene mudyê, azangule o taka* yê izuwa yoso, n’a ngi kayele. 24 Kuma woso wamesena kubhulula o mwenyu wê, wanda ku utexi, maji woso utexi o mwenyu wê mukonda dyami, wanda ku ubhulula. 25 Mu kidi, mbote yahi imona o muthu se unganyala o ngongo yoso, maji uditalesa hadi, mba utexi o mwenyu wê? 26 Mukonda woso ukala ni jisonyi jami ni ja maka mami, o Mon’a muthu we wanda kala ni jisonyi ja mwene, kyakeza mu ungana wê, ni wa Tata, ni wa jianju jikôla. 27 Ngi mi tangela o kidi kwila, sayi yá ala bhabha kanda fwa, ande dya kumona o Utuminu wa Nzambi.”

28 Kyabhiti dinake dya izuwa, tundé kyazwelele o maka enyá, mwene wabande ku mulundu kumoxi ni Phetele, Nzwá ni Tiyaku, phala kusamba. 29 O kyakexile mu samba, o pholo yê ya lunguluka, anga o kizwatu kyê kizela ni kubhenya kwa dikota. 30 Kwenyóko kwa tukuluka kiyadi kya mala: Mozé ni Elija, anga akala mu zwela-nê. 31 Enyá eza ni kubhenya, ya amateka kuzwela yalungu ni kutunda kwê, kweji dikumbidila mu Jeluzaleme. 32 Phetele ni yó akexile-nê kumoxi, akexile ni kilu kyavulu. Maji kya phaphumuka amono o kubhenya kwê, ni kiyadi kya mala emanene ni mwene. 33 Kyoso o kiyadi kiki kya mala kyakexile mu sondoloka, Phetele wambela Jezú, wixi: “Mesene, kima kyambote kukala bhabha. Tutunge-bhu jibalaka* jitatu, imoxi phala eye, imoxi phala Mozé, o ya mukwá phala Elija.” Maji mwene kejidile o ima yakexile mu zwela. 34 Kyoso Phetele kyakexile hanji mu zwela kwa moneka dituta, anga o dituta dya avungina. Kyoso o dituta ki dya avungina, wôma wa akwata. 35 Mu dituta mu tunda dízwi, dixi: “Yú mwéne o Mon’ami, nga mu solo. Mu ivwidilyenu.” 36 Kyoso kyevu o dízwi, Jezú wakexile ubheka wê. Maji o maxibulu adixibha, mu izuwa yenyóyo, katangele muthu kima kyoso-kyoso kya monene.

37 Mu kizuwa kya mukwá kyoso kyatuluka ku mulundu, kifuxi kya dikota kyayi mu di sanga-nê. 38 Sayi diyala mu kifuxi wadikola: “Mesene, nga kudyóndo, ngitalele ngó mon’ami, mukonda mwéne mon’ami umoxi-élele. 39 O nzumbi yayibha yene mu mu kwata, mu kithangana kyenyókyo mwene udikola. Anga o nzumbi i mu vunda bhoxi ni ku mu sanyesa, mwene utunda ifulu mu kanu. Phala ku mweha, kubhonza. O nzumbi yayibha imweha ngó kyoso ki i mu kwama. 40 Nga dyondele o maxibulu mé, phala ku ikaya, maji ene a lembwa.” 41 Jezú wambe, wixi: “Mwiji wakambe o kixikanu, wadyanguka! Katé bhebhi nganda kala ni enu? Katé bhwebhi nganda mi lendukila? Mon’é, zá-nê bhabha.” 42 Kyoso o kamona kyexile mu zukama, o nzumbi i mu vunda bhoxi, anga i mu sanyesa kyavulu. Maji Jezú wabazela o nzumbi yayibha, yu wasake o kamona, anga u mu bhana kwa tat’ê. 43 Athu oso anga adiwana ni kutena kwa dikota kwa Nzambi.

Kyoso o mundu ki wakexile mu diwana ni ima yabhangele Jezú, mwene wambela o maxibulu mê, wixi: 44 “Ivwenu kyambote, lembalalenu o izwelu yiyi: O Mon’a muthu anda mubhakula bhu maku a athu.” 45 Maji ene katendela o ima yakexile muzwela mwene. Mu kidi a aswekela o ima yiyi phala ka itendele, anga akala ni wôma wa ku mwibhwidisa yalungu ni ima yazwela.

46 Kyenyiki, o maxibulu amateka kuzoka se nanyi wexile o dikota mudyâ. 47 Mu kwijiya o ima yakexile muxinganeka ku mixima yâ, Jezú wakwata kamona, yu wa katula bhu mbandu yê, 48 anga wa ambela, wixi: “Woso utambulula o kamona kaka mu dijina dyami, u ngi tambulula we eme, woso u ngi tambulula, utambulula we Yó wa ngi tumikisa. Mu kiki-phe, bhukaxi kenu woso uditulula, mwéne o dikota.”

49 Nzwá wa mwambela, wixi: “Mesene, twamono muthu kukaya madimonyo mu dijina dyé, etu twa fikisa ku mu fidisa, mukonda mwene ka mu kwenda n’etu.” 50 Maji Jezú wambe, wixi: “Kanenu ku mu fidisa, mukonda woso ka mi zembe, wala ku mbandu yenu.”

51 Kyoso kyazukama* o kithangana kya Jezú kubanda ku dyulu, mwene wamesenene kyavulu kuya mu Jeluzaleme. 52 Mwene anga utumikisa amoxi ku maxibulu mê phala ku mu twamenena. Ene anga a bokona mu sanzala ya akwa Samadiya, phala ku mu yudikila o ima. 53 Maji o akwa Samadiya ka mu tambulula, mukonda amono kwila mwene wamesenene kyavulu kuya* mu Jeluzaleme. 54 Kyoso o maxibulu, Tiyaku ni Nzwá kyamono o ima yiyi, ambe, exi: “Ngana, wamesena kwila, tutuma kulawukisa túya ku dyulu phala kwa bwikisa?” 55 Mwene-phe wasakuka, yu wa abazela. 56 Ene anga aya mu sanzala yengi.

57 Kyoso kyakexile mu kwenda, sayi muthu wa mwambela: “Ngana, nganda kukayela kwoso-kwoso ku uya.” 58 Maji Jezú wa mwambela, wixi: “O mikenge yala ni jingenda, o jinjila jala ni ikalanga, maji o Mon’a muthu, kalé ni kididi kya kutula o mútwe.” 59 Mwene watangela muthu wengi: “Kala u mukayedi wami.” O muthu wambe: “Ngana, ng’ehele hanji ngi dyange kufunda tat’etu.” 60 Jezú wa mwambela, wixi: “Ehela o madifundu kufunda o madifundu mâ. Eye-phe, ndé uboke o Utuminu wa Nzambi.” 61 Muthu wa mukwá wambe, wixi: “Ngana, nganda kukayela mwene, maji ngi dyange hanji kulekela o mwiji wami.” 62 Jezú wa mwambela: “Woso ukwata ku ditemu, anga utala kudima, kafwama kubokona mu Utuminu wa Nzambi.”