Mukanda Wadyanga wa Nzwá
3 Talesenu o henda yadikota ya tukwatela o Tata, mu kutubhana o ujitu wa ku twixana tu an’ê! Etu twala mwéne tu an’â Nzambi. Kyene o mundu kyakambe ku twijiya, mukonda kejiya Nzambi. 2 Enu akwetu ngamizolo, kindala twala tu an’â Nzambi, maji kitwejiya luwa kyebhi kitwanda kala ku hádya. Twejiya ngó kwila, kyoso mwene kyanda tukuluka, twanda difwangana-nê mukonda twanda mona o kidifwa kyê. 3 Woso wala ni kidyelelu kiki, watokala uzela, mukonda mwene wazele.
4 Muthu woso uta kituxi, wa muxibhaka o kijila, mukonda o kituxi kilombolola kuxibhaka o kijila. 5 Enu mwejiya we kwila, mwene watukuluka phala kukatula o ituxi yetu, mukonda mwene kale ni kituxi. 6 Woso unangenena kumoxi ni Jezú kate jinga kituxi, woso uta kituxi ka mumono, ka mwijiya we. 7 Twana twami, kimwehele muthu ku mi jimbidisa. Woso ubhanga o ima yayuka, mwene we muthu wayuka kala Jezú. 8 Woso uta jinga kituxi watokala kwa Dyabhu, mukonda o Dyabhu wene muta ituxi tundé kudimatekenu.* Mukonda dya kiki o Mon’â Nzambi weza phala kubwikisa o ikalakalu ya Dyabhu.
9 Muthu woso wala mon’â Nzambi kate jinga kituxi, mukonda mwene wala ni nzumbi ikôla* ya Nzambi. Mwene katena we kuta kituxi mukonda mon’â Nzambi. 10 O kima ki tubhangesa kwijiya o an’â Nzambi ni an’â Dyabhu kyenyiki: Woso ukamba kubhanga o ima yayuka ni yó woso kazolo phang’yê, ka tokala kwa Nzambi. 11 Mukonda o njimbu i mwevu tundé kudimatekenu yenyiyi: Twatokala kudizola mudyetu. 12 Kitukale kala Kayini, watokalele kwa Dyabhu, yu wajibha phang’yê. Mukonda dyahi wa mujibha? Mukonda o ikalakalu yê yexile yayibha, maji o ya phang’yê yexile yayuka.
13 Jiphange, ki mudiwane kwila o mundu wamizembe. 14 Twejiya kwila, twatundu mw’alunga, étu tweza ku mwenyu mukonda twazolo o jiphange jetu. Woso kazolo o jiphange jê, unangenena mw’alunga. 15 Woso wazembe phang’yê, mwene kijibhangânga. Enu mwejiya kwila o kijibhangânga kanda tambula o mwenyu wakalelaku. 16 Twejiya o henda mukonda mwene wabhana o mwenyu wê bhu kididi kyetu, etu we twatokala kubhana o mwenyu wetu bhu kididi kya jiphange jetu. 17 Maji se muthu wala ni jimbote mu ngongo mumu anga umona phang’yê wabhindama, maji udituna ku mu londekesa henda, kyebhi mwene kyatena kuzwela kwila wazolo Nzambi? 18 Twana twami, o henda yetu ki yatokala kukala ngó mu ima i tuzwela, maji yatokala ikala henda ya kidi, tu ilondekesa mu ima yoso i tubhanga.
19 Mukonda dya kiki, twanda kwijiya kwila tu akwa kidi. Kyenyiki, né mwene se o muxima wetu u tufundisa, 20 tutena ku utululukisa bhu pholo yê, mukonda Nzambi wala kota o muxima wetu ndenge, mwene wejiya o ima yoso. 21 Enu akwetu phange jami, se muxima wetu ukamba ku tufundisa, tutena kuzwela ni Nzambi ni muxima wazele. 22 Yoso i tubhinga kwa mwene, twanda itambula mukonda twa mu belesela o itumu yê ni kubhanga o ima ya mu wabhela. 23 O kitumu kya Nzambi kyenyiki: Tukale ni kixikanu mu dijina dya Mon’ê Jezú Kidistu ni kudizola mudyetu, kala kya tutumu mwene. 24 Woso ubelesela o itumu yê ukala kumoxi ni Nzambi, o Nzambi ukala we kumoxi ni mwene. Kuma watubhana o nzumbi yê, twejiya kwila mwene wala kumoxi n’etu.