Kisumwa Kyalondekesa Kwa Nzwá

15 Ngamono kijimbwete kyengi kya dikota ku dyulu, kya madiwanu: Ngamono sambwadi dya jianju akwata sambwadi dya mabhebhu. Yá ene o mabhebhu a sukina-ku, mukonda bhukaxi ka mabhebhu enyá, o njinda ya Nzambi isuka.

2 Ngamono we kima kyadifu ni musanza wa kalunga wa vídulu wo funge ni túbhya. O yó atolola o kyama kya muxitu ni kiteka kyê ni dyalwilu dya dijina dyê, emana bhwa zukama o musanza wa vídulu, ene akwata o jimbánza* ja Nzambi. 3 Ene akexile mu kwimba o mwimbu wa mubhika wa Nzambi Mozé, ni mwimbu wa Kambudi, exi:

“Jihova Nzambi o Muteni wa Yoso, o ikalakalu yê yonene ibhangesa kudiwana. Éye u Sobha inangenena, o jinjila jê ja yuka, ja kidi. 4 Nanyi ukamba ku kukala ni wôma ni kukamba kuximana o dijina dyé, eye u Jihova? Mukonda éye ngó u fiyele! O ifuxi yoso yanda kwiza ni ku kubheza bhu pholo yé mukonda athu oso anda mona kwila eye ufundisa ni kuyuka.”

5 Kyoso kyabhiti o ima yiyi, ngamono o tembulu* ku dyulu ya jikuka, o balaka ya umbangi mwene mu yala. 6 O sambwadi dya jianju akwata o sambwadi dya mabhebhu atundu mu tembulu, ene azwata izwatu ya linyu, ate jiphonda ja ulu ku thulu. 7 Ngamono anju imoxi yatokala ku jianju jiwana, yabhana ku sambwadi dya jianju, sambwadi dya matijela a ulu ezala ni njinda ya Nzambi, yó wene-ku katé ku hádya ni hádya. 8 Mukonda dya kijingu ni kutena kwa Nzambi, o tembulu yezala ni dixi, sé-ku muthu watenene kubokona-mu katé kyeji bhita o sambwadi dya mabhebhu ala ni sambwadi dya jianju.