Divulu Dya Dyanga Dya Samuwele
1 Kwexile diyala mukwa Lamatayimu dya Zofi* ku milundu ya Ifalayíme, a mwixanene Elikana. Mwene wexile mon’â Jelohamu, mon’â Elihu, mon’â Tohu, mon’â Zufu mukwa Ifalayíme. 2 Mwene wexile ni ahatu ayadi, umoxi dijina dyê Ana, o mukwa Penina. Penina wexile ni twana, maji Ana kexile ni mona. 3 Mivu yoso o diyala didi wexile mutunda mu mbanza yê ni kuya kate ku Silo phala kubheza ni kubhakula jisata kwa Jihova dya ifuxi. Hofini ni Fineya, o twana tuyadi twa Elí, exile musidivila kala akunji a Jihova.
4 Sayi kizuwa kyoso Elikana kyabhakula sata, wabhana jimbandu ja xitu kwa muhat’wê Penina ni ku twana twê twa mala ni twa ahatu, 5 Maji kwa Ana, mwene wa mubhana o mbandu yadikota mukonda mwene wazolele dingi Ana. Maji-phe Jihova kabhanene twana kwa Ana.* 6 Penina* anga ukala ku mutatesa jinga phala ku mubhangesa kudivwa kyayibha mukonda dya Jihova kukamba ku mubhana twana. 7 Mivu yoso Penina wexile mubhanga kiki. Ithangana yoso, kyoso Ana kyexile muya mu inzo ya Jihova, Penina wexile mu mutatesa. Mukonda dya kiki, mwene wexile ngo mudila, kexile mudya. 8 Kyenyiki, o munum’yê Elikana wa mwibhwidisa: “Ana, mukonda dyahi wa mudila? Mukonda dyahi wafulu o kudya? Mukonda dyahi waluwala kyavulu?* Eme kingakukala kota, o dikwinyi dya ana ndenge?”
9 Kyazubha kudya ni kunwa ku Silo, Ana wabalumuka. O mukunji Elí waxikamene bhu kyalu kyê, bhu mwelu wa inzo ya Jihova.* 10 Ana wexile ni kikote ku muxima anga u mateka kusamba kwa Jihova ni kudila kyavulu. 11 Mwene wabhange o kikanenu kiki kwa Nzambi, mukwamba: “Eye u Jihova dya ifuxi, tala o hadi yoso i ngene mutala eme ngi selevende yé, se u ngilembalala ni u kambe kujimba o selevende yé, anga u ngibhana mon’â diyala, eme nganda mubhakula kwa Jihova izuwa yoso ya mwenyu wê, mwene kanda ku mubhuta o ndemba.
12 Kyoso mwene kyayi ni kusamba kyavulu kwa Jihova, Elí wexile mutalela o mizumbu yê. 13 Ana wexile muzwela ku muxima, o mizumbu yene ngo yexile mu dizambesa, maji o dízwi dyê kidyexile mutunda. Mukonda dya kiki, Elí wabanzele kwila Ana wakodiwile. 14 Elí wa mwibhwidisa: “Kate bhebhi bhu wandaya ni kunwa ni kukodiwa? Kana kunwa dingi vinyu.” 15 Ana wa mutambwijila: “Kana ngana yami, eme ngala ni kikote ku muxima, kinganu vinyu mba uhólwa wengi, maji ngamujikula o muxima wami kwa Jihova. 16 Kana kubanza kwila o selevende yé muhatu wayibha, kuma ngene musamba kate kindala mukonda ngaluwala kyavulu, ngala ni kikote ku muxima.” 17 Kyenyiki Elí wa mwambela: “Ndé ni kutululuka, o Nzambi ya Izalayele a kubhane o kima kiwamubhingi.” 18 Mwene wa mutambwijila: “O selevende yé asange ngalasa ku mesu mé.” Kyenyiki, o muhatu wayi, anga ukala mudya kya. Mwene kaluwalele dingi.
19 Kyenyiki, mu kamene kikwaki, ene a bheza Jihova anga a vutuka kubhata dyâ ku Lamá. Elikana anga uzeka ni muhat’wê Ana, Jihova u lembalala dingi Ana.* 20 Mu kubhita muvu,* Ana wemita, u vwala mon’â diyala anga u muluka o dijina dya Samuwele,* kuma mwene wambe, wixi: “Eme ngamubhingi kwa Jihova.”
21 Mu kithangana kyatokala, Elikana wayi ni mwiji wê woso phala kubhakula sata ya muvu kwa Jihova, ni kubhana sata ya kukumbidila kikanenu. 22 Maji Ana kayi kumoxi ni ene, kuma wambela mwadi wê, wixi: “Kyoso mona kinganda mubatula o kwamwa, kyene kinganda mwambata ku pholo ya Jihova, n’a xale kya mwene kwenyoko.” 23 Kyenyiki, mwad’wê Elikana, wa mwambela: “Bhanga kala kya kuwabhela.* Xala kubhata kate kiwanda mubatula o kwamwa. Jihova a kumbidile o kima kiwazwela.” Kyenyiki, o muhatu waxala kubhata mukulanga o mona kate kya mubatula o kwamwa.
24 Kyoso kya mubatula o kwamwa, wambata o mona ku Silo, kumoxi ni kangombe ka mivu itatu ni efa* imoxi ya fadinya ni mbinda ya vinyu. Anga u bhixila ni kamona mu inzo ya Jihova ku Silo. 25 Mukusuluka, ajibha o kangombe anga ambata o kamona kwa Elí. 26 Kyenyiki, o muhatu wambe: “Disesa ngana, ngiloloke, kala eye ngana kiwene ku mwenyu, o muhatu wexile musamba kwa Jihova mu kididi kiki, éme. 27 Yú o mon’â diyala u ngabhingi mu musambu. Jihova watambwijila o musambu wami. 28 Mukonda dya kiki, eme ngimubhakula* kwa Jihova. Mwene wanda tokala kwa Jihova ku mwenyu wê woso.
Kyenyiki, mwene* u fukama bhenyobho mu kubheza Jihova.