Ikalakalu ya Jipoxolo

4 Kyoso Phetele ni Nzwá kyakexile muzwela ni mundu, o akunji, ni kabhitangu ka tembulu ni Jisadusewu, azukama kwa ene. 2 Ene akexile ni njinda mukonda, o jipoxolo akexile mulonga o mundu ni kidi kyoso, yalungu ni difukunukinu dya Jezú. 3 Ene a akwata,* a ate mu kaleya, katé mu kizuwa kya mukwá, mukonda kwavundile kyá. 4 Maji athu avulu evwile o milongi, axikina, atenesa midi jitanu ja mayala.

5 Mu kizuwa kyakayela, o jinguvulu ni adyakime a mundu, ni jimesene ja kulonga o Kijila, adyongeka mu Jeluzaleme 6 kumoxi ni mukunji wadikota Hanaji, ni Kayafa, Nzwá, ni Xandele, ni yó oso exile jindandu ja mukunji wadikota. 7 Ene atula Phetele ni Nzwá mukaxi kâ, ya a ebhwidisa: “Ungana wahi umwala nawu phala kubhanga o kima kiki? Mwabhange o kima kiki mu dijina dya nanyi?” 8 Kyenyiki, Phetele wezala ni nzumbi ikôla, wa atambwijila:

“Enu mu jinguvulu ni adyakime a mundu, 9 lelu se mwa mu tufundisa mukonda dya kubhanga o mbote ku diyala dyexile kinema, se mwamesena we kwijiya nanyi wabhangesa o diyala didi kudisanza, 10 ijiyenu-kyu enu oso mu jingana ni mundu woso wa Izalayele kwila: O diyala didi wemana bhu pholo yenu, wadisanze, mu dijina dya Jezú Kidistu mukwa Nazalé, yó mwa mu phaphela ku taka,* maji Nzambi wa mu fukununa mw’alunga. 11 O Jezú yú, mwéne ‘o ditadi di mwaditunu enu mu atungi, dyene dya kituka o ditadi dya betakota’.* 12 O kubhuluka kikwijila ku muthu wengi, mukonda kikwala dijina dyéngi mu ngongo dyobhane ku athu mu twatokala kubhulukila.”

13 Kyoso ene kyamono o kuswina kwa Phetele ni Nzwá ni kwijiya kwila, ene exile athu oso-oso, kadilongele kyavulu,* ene adiwana. Atongolola we kwila ene endele ni Jezú. 14 Ene katenene kwa vutwila kima, mukonda akexile mumona kwila o diyala a mu sakele, wexile mwaxaxi kâ. 15 Kyenyiki, a atumu phala kutunda mu Inzo ya kufundisa, ya amateka kudikunda mudyâ, 16 exi: “Ihi i twanda bhanga ni mayala yá? Mukonda ene abhange mwéne madiwanu, athu oso mu Jeluzaleme eza mu kwijiya o maka enyá, etu kitutena kudituna-wu. 17 Phala o maka yá kadimwange dingi mwaxaxi ka mundu, twanda kwakwatesa wôma phala katangele dingi muthu woso-woso yalungu ni dijina didi.”

18 Kyenyiki a exana, a atumu phala kazwele kima kyoso-kyoso mba kulonga mu dijina dya Jezú. 19 Maji Phetele ni Nzwá a avutwila: “Se mwaxinganeka kwila, bhu pholo ya Nzambi kyafwama ku mi belesela muveji dya kubelesela Nzambi, énu kyá mwakijiya! 20 Maji etu, kitutena kudixibha mu kuzwela o ima i twamono ni ima itwevu.” 21 Kyoso kyazubha kwakusa dingi, ene a ajituna mukonda kasange kikuma kya kwa kaxtikala, ni mukonda we dya mundu, kuma enyoso akexile muximana Nzambi, mukonda dya madiwanu abhitile. 22 O diyala a musakele bhukaxi ka madiwanu yá,* wakexile ni makwinyi awana a mivu ndenge.

23 Kyoso Phetele ni Nzwá kya a eha, ene ayi mudisanga ni maxibulu amukwá, anga a atangela o ima yazwelele o akunji a makota ni adyakime a mundu. 24 Mu kwívwa o maka enyá, enyoso ni muxima umoxi adikola kwa Nzambi, exi:

“Ngana Sukeku, éye wabhange o dyulu ni ixi ni kalunga ni ima yoso yalamu, 25 bhukaxi ka nzumbi ikôla watangela o selevende yé, kukwetu Davidi, wixi: ‘Mukonda dyahi o ifuxi ya tandanganya, o athu axinganeka mu ima yakambe valolo? 26 O jisobha ja ngongo jemana, o jinguvulu ja dibhongolola phala kubhânga ni Jihova ni yó wa mu undu.’* 27 Mu kidi, Helode ni Pônsyu Pilatu, adyongeka mu mbanza mwenyumu ni mala akwa jixi jengi ni athu akwa Izalayele, phala kulungulukila o selevende yé ukôla Jezú, yó wa mu undu. 28 Ene adyongeka phala o kima ki wakanene kubhanga mu vondadi yé ni mu kutena kwé, ki dikumbidile. 29 Mu kiki-phe, Jihova, ívwa o ima ya muzwela phala ku tukwatesa wôma. Kwatekesa o jiselevende jé n’a suluke kuzwela o maka mé sé wôma, 30 kyoso ki uya ni kusununa o lukwaku lwé phala kusaka o jihaxi ni kubhanga isumwa ni madiwanu bhukaxi kaselevende yé ukôla, Jezú.”

31 Kyoso kyazubha kusamba,* o kididi mwa dyongekele kyatunguta, enyoso ezala ni nzumbi ikôla, anga amateka kuboka o maka ma Nzambi sé wôma.

32 O mundu woso waxikana, wakexile kumoxi ni muxima umoxi ngó. Sé-ku muthu mudyâ wakexile muzwela kwila o jimbote jakexile naju, ja mutokalele ngó mwene, maji akexile mu wana o ima yoso yakexile nayu. 33 Ni kuswina kwoso, o jipoxolo ja sulukile mu kubhana umbangi walungu ni difukunukinu dya Ngana Jezú. Ene oso anga akala mutambula mabesá avulu mu ngalasa ya Nzambi. 34 Sé-ku muthu mudyâ wakexile ni ibhindamu ya makota, mukonda oso akexile ni jinzo ni ibhela, akexile mu isumbisa. O kitadi 35 akexile mu kibheka ku jipoxolo. Ene anga akala mu wana o kitadi kala kyasoko o kibhindamu kya muthu. 36 Kyene we kyabhange Zuze yó amwixana ku jipoxolo Balanabé (o dijina didi dilombolola “muthu ukolokotesa akwâ”), Levita a muvwalela ku Xipele. 37 Mwene wakexile ni kibhela, wa kisumbisa, yu wabheka o kitadi ku jipoxolo.