DISÁ 22
Kyebhi ki Utena Kuzwela ni Akwenu ya Lungu ni Njimbu Yambote?
Kate lelu, wadilongo kya ima yavulu ya lungu ni Bibidya. Maji nange uxinganeka: ‘Athu oso atokalele kwivwa o ima yiyi!’ Kidi mwene, athu oso atokala kwijiya o maka yá! Maji nange ukala ni hele ya kulonga akwenu o ima iwamudilonga. Mu disá didi, twandadilongamu kyebhi ki utena kutolola o wôma, wakulonga akwenu o ima iwamudilonga ni kusanguluka mu kubokela akwenu o njimbu yambote ya Bibidya.
1. Kyebhi ki utena kulonga o ima iwamudilonga ku jindandu jé ni makamba mé?
O maxibulu a Jezú ambe: ‘Kitutena kufula kutanga o ima yoso itwamono itwevwu.’ (Ikalakalu 4:20) Ene azolele kyavulu o kidi, amesenene kukitangela athu avulu. O kwila kyene we ki udivwa? Se kyene, katula mbote mu kithangana kiwala nakyu phala kuzwela o ima iwamudilonga ni jindandu jé ni makamba mé, maji kana kukibhanga ni undanda.—Tanga Kolose 4:6.
Jindunge phala kumateka
Mu kudikunda ni ndandu, utena kuzwela: “Semana yiyi ngadilongo kima kya ubhe mu Bibidya.”
Tanga velusu ya Bibidya phala kukonda o malamba a kamba dyé wakate mba wala ni maka.
Se jikoleka jé akwibhwidisa kyebhi kya bhiti o disukilu dya semana, wa atangela kima kiwadilongo mu kitangelu kyé kya Bibidya mba mu kyônge.
Londekesa o sayite jw.org ku makamba mé.
Ixana muthu phala kukayela o milongi yé ya Bibidya, mba mu londekese kyebhi kya tena kubhinga muthu bhukaxi ka jw.org, phala kumulonga o Bibidya.
2. Mukonda dyahi kima kyambote kuboka kumoxi ni jiphange ja kilunga kyé?
O maxibulu a Jezú kabokele ngó o njimbu yambote ku athu ejidile. Exile mu disokejeka we mu ibuka ibuka phala kuboka. Jezú wa atumikisa we ‘kiyadi kyadi phala ku mu twamenena mu kuboka mu jisanzala joso.’ (Luka 10:1) Kiki kya kwatekesa athu avulu kwivwa o njimbu yambote. Kumbandu yengi, kuboka kumoxi ni akwa, kwa sangulukisa o maxibulu. (Luka 10:17) O kwila utena we kuboka ni jiphange mu kilunga?
DILONGE DINGI
Dilonge dingi kyebhi ki utena kutolola o wôma wakuboka ni kusanguluka mu kubhanga mbandu mu kikalakalu kiki.
3. Jihova wandakala ku mbandu yé
Sayi athu amesena kumateka o kuboka, nange athandanganya ni kyebhi o athu kyandadivwa mu kwa bokela.
Eye wala ni wôma wakutangela akwenu o ima iwamudilonga? Mukonda dyahi, mba mukonda dyahi uzwela kiki?
Tala OVIDYU, mukusuluka bhanga o kibhwidisu kya kayela.
Kyebhi o minzangala ya Jimbangi ja Jihova a atange mu vidyu kya tolola o wôma?
Tanga Izaya 41:10, mukusuluka bhanga o kibhwidisu kya kayela:
Kyebhi o musambu utena kukukwatekesa kyoso ki ukala ni wôma wa kuboka?
Eye wakijidile?
Athu avulu Jimbangi ja Jihova lelu, exile mu fika kwila, keji tena kuboka o njimbu yambote. Tala o musoso wa phange amwixana Sergey mu ixi ya Rússia. Mwene wexile mudivwa kala kexile ni valolo. Wexile mu banza kwila, kweji mu bhonza kubokela akwa. Maji wamateka kudilonga o Bibidya. Mwene wambe: “Sumbala ni wôma ungexile nawu, ngamateka kuzwela ni akwetu ya lungu ni ima ingexile mu dilonga. O kuzwela ni athu ya lungu ni Bibidya kwabandekesa o kusanguluka kwami. Ngadiwana! Kwakolesa we o milongi ingamudilonga ku muxima wami.”
4. Londekesa kuxila mu kuzwela
Mu kuzwela ni akwenu ya lungu ni njimbu yambote, kana kubanza ngó mu ima iwandazwela, banza we kyebhi ki wandazwela. Tanga 2 Timote 2:24 ni 1 Phetele 3:15, mukusuluka bhanga o ibhwidisu ya kayela:
Kyoso ki uzwela ni athu ya lungu ni Bibidya, kyebhi ki utena kukumbidila o jivelusu jiji?
Nange sayi jindandu ni makamba kaxikina mu ima iwamudilonga. Ihi iweji bhanga? Kutokala kuzwela ihi?
Ihi ya beta o kota: kubhanga ibhwidisu ni henda, inga kujijidika o muthu kuxikina o ibanzelu yé? Mukonda dyahi?
5. Kubokela akwetu o njimbu yambote kutusangulukisa
Jihova wabhana o kikalakalu kya kuboka o njimbu yambote kwa Jezú. Kyebhi kyexile o kixinganeku kya Jezú kya lungu ni kikalakalu kiki? Tanga Nzwá 4:34, mukusuluka bhanga o ibhwidisu ya kayela:
O kudya kutubhangesa kukala kumwenyu, kutusangulukisa we. Mukonda dyahi Jezú wasokesa o kubhanga o vondadi ya Nzambi (mu kifika kuboka njimbu yambote) ni kudya?
Mudyé, mukonda dyahi o kuboka o njimbu yambote kusangulukisa?
Jindunge
Bhana matwí mu jindunge ja lungu ni kuboka o njimbu yambote, jandabhana mu kyônge kya kaxi ka semana.
Xinganeka kubhana o dijina dyé phala kubhanga mbandu mu kyônge kya kaxi ka semana. O jimbandu ja lungu ni kubhana umbangi jitena kukukwatekesa kukala dingi ni kidyelelu kya kuzwela ni akwenu ya lungu ni ima iwamudilonga.
Kalakala ni jikaxa, “Athu Avulu Amba” mba “Nange Sayi Muthu Wibhula” phala ku kukwatekesa kutambwijila o athu yó amba kwila kaxikina mu ima i uzwela.
NANGE SAYI MUTHU WIBHULA: “Sayiku njimbu ya ubhe?”
Ihi iweji bhanga phala kukwatekesa o muthu ya lungu ni milongi iwadilongo mu Bibidya?
IHI IWADILONGO
Kubokela akwenu o njimbu yambote, kubhekela kusanguluka. Kikubhonzwé kala kiwexile muxinganeka.
Kubhitulula
Mukonda dyahi twatokala kuboka o njimbu yambote ku akwetu?
Kyebhi ki utena kukibhanga ni henda?
Kyebhi ki utena kutolola o wôma wakuboka?
TOKWESA DINGI
Tala maukexilu awana akuboka o njimbu yambote ni kalatá ka jw.org.
Dilonge idifwa iwana yandakukwatekesa kuzwela ni athu ya lungu ni njimbu yambote.
“O Kwila Eye Walapolondo Phala Kukituka Mutambi a Athu?” (O Mulangidi wa Katutu wa 2020)
Tala o musoso wa Bibidya utukwatekesa o kuswina mu kuboka, né mwene se tu minzangala.
Dilonge kyebhi ki utena kuzwela ya lungu ni Bibidya ni jindandu jé kejiya Jihova.
“Tula o Njimbu ku Jindandu jê ka mu Bheza Nzambi” (O Mulangidi, 15 wa Katanu wa 2014)