Dya Kayadi Dya Malunda
24 Jowaji wexile ni sambwadi dya mivu kyoso kya mutumbika ku usobha, mwene watumina mu Jeluzaleme mu makwinyi awana a mivu. Dijina dya manyâ dyexile Zibiya mukwa Beleseba. 2 Kyoso o mukunji Joyada kyexile hanji ku mwenyu, Jowaji wexile mubhanga ima yawabhela Jihova. 3 Joyada wasolo ahatu ayadi phala akale ahatu a Jowaji, mwene wavwala an’a mala ni ana ahatu.
4 Ku pholo dya kwenda, Jowaji wamesenene kutungulula o inzo ya Jihova. 5 Kyenyiki, wongeka o akunji ni Jilevita yu wa ambela: “Ndenu mu mbanza ya Judá, athu oso mu Izalayele a mibhane kitadi phala kuyudika o ima yazanganya mu inzo ya Nzambi yenu, mu muvu ni muvu. Mwatokala kukibhanga ni lusolo.” Maji-phe o Jilevita kakibhange ni lusolo. 6 Mukyenyiki, sobha wexana o mukunji Joyada yu wa mwibhula: “Mukonda dyahi kiwatumu o Jilevita n’a bheke o kitadi kyeji bhana akwa Judá ni akwa Jeluzaleme, o lubhaku lweji bhana akwa Izalayele phala o balaka ya Umbangi kala kyatumu Mozé, o selevende ya Jihova? 7 Mukonda o ana a muhatu yó wayibha Ataliya, abokonene mu inzo ya Nzambi yakidi, ya akatula o ima yoso ikôla mu inzo ya Jihova phala kubhezela-nayu o iteka ya Bahale.” 8 Kyenyiki, sobha watumu kuyudika ngonga, ya a itula bhu mbandu a mwelu wa inzo ya Jihova. 9 Abhana ngolokela mu Judá yoso ni mu Jeluzaleme phala kubheka kwa Jihova o lubhaku lwatumu Mozé, o selevende ya Nzambi yakidi, kyoso akwa Izalayele kyakexile mu kikangalakata. 10 O ilamba ni mundu woso wa Judá wasangulukile. Ene exile mubheka o kitadi ni kukita mu ngonga kate ki yexile mu kwizala.*
11 Kyoso o Jilevita kyakexile mumona kwila mu ngonga mwala kitadi kyavulu, exile mukwambata o ngonga kwa sobha. O seketa ya sobha ni mukunji wadikota exile mukatula o kitadi kiki ni kuvutula o ngonga bhu kididi kyê. Ene exile mubhanga kiki izuwa yoso, exile mubhongolola kitadi kyavulu. 12 Mukusuluka, o sobha ni Joyada akexile mubhana o kitadi kwa yó exile ku pholo dya kikalakalu kya inzo ya Jihova. Ni kitadi kyenyokyo, o mayala enya akexile mufuta o akwa kubula o matadi ni asongi a mabaya phala ayudike o inzo ya Jihova. Exile we mufuta akwa kukalakala ni felu phala kuyudika o inzo ya Jihova. 13 O akexile ku pholo amateka o ikalakalu, ene anga asuluka mu kukala ku pholo dya ikalakalu. Ene ayudika o inzo ya Nzambi yakidi, kala ki yexile mukulu. Yene a ifikidila kyambote. 14 Kyoso kyazubha kuyukika o inzo, o kitadi kyasubhukile a kyambata kwa sobha ni kwa Joyada. Ni kitadi kyenyiki, abhange itutu phala o inzo ya Jihova, abhange itutu phala o ikalakalu mu tembulu ni itutu ya kubhakula-nayu jisata. Abhange we jikopho ja ulu ni ja phalata. Mu izuwa yoso ya Joyada o jisata ja kwoha akexile mu jibhakula mu inzo ya Jihova.
15 Joyada anga ukuka kyavulu, maji wazediwile ku mwenyu. Mwene wafu, kyoso kyexile ni hama ya mivu ni makwinyi atatu. 16 Kyenyiki, a mufundu mu Mbanza ya Davidi mwakexile mufunda o jisobha, mukonda wabhangele mbote ku akwa Izalayele ni kwa Nzambi yakidi ni ku inzo Yê.
17 Kyoso Joyada kyafu, o ilamba ya mbanza ya Judá, eza kwa sobha ya a mufukamena, o sobha anga wa evwa. 18 Ene axisa o inzo ya Jihova, o Nzambi ya jikuku jâ, ya amateka kubheza o iteka. Kyenyiki, o njinda ya Nzambi yeza ku akwa Judá ni ku akwa Jeluzaleme, mukonda dya ituxi yâ. 19 Jihova wexile mutumikisa jipolofeta phala ku adimuna n’a vutuke kokwê. Maji ene kakexile mu mwivwa.
20 O nzumbi ya Nzambi yeza ku thandu a Zakadiya mon’a mukunji Joyada. Zakadiya wemana bhu kididi kyadileka yu wambela o mundu, wixi: “Kiki kyene kyambe o Nzambi yakidi: ‘Mukonda dyahi mwa mubhukumukina o itumu ya Jihova? Enu kimwanda zediwa. Kuma enu mwaxisa Jihova, mwene wanda mixisa we.’” 21 Maji ene ate kikutu kya ku mujibha. Kyenyiki, sobha watumu ku mububa ni matadi mu kithádi kya inzo ya Jihova, mwene yu wafu. 22 Sobha Jowaji kalembalala o henda ya mukwatela Joyada, tata ya Zakadiya, maji mwene wajibha Zakadiya mon’a Joyada. Kyoso kyexile mufwa, Zakadiya wambe: “Jihova amone o ima i wa mubhanga, mwene a kuvutule-yu.”
23 Ku dimatekenu dya muvu, o kifuxi kya masoladi kya akwa Sídya, kyeza mubhânga ni Jowaji. O kifuxi kyabokona mu mbanza ya Judá ni mu Jeluzaleme. Kyenyiki, ene ajibha o ilamba yoso, akatula o ima yâ, a itumikisa kwa sobha ya Damasku. 24 Sumbala o kifuxi kya akwa Sídya kyatolele, Jihova wabhakula o kifuxi kyadikota kya akwa Judá bhu maku mâ, mukonda axisa Jihova o Nzambi ya jikuku jâ. Kyenyiki, Nzambi wabhangesa akwa Sídya kukastikala Jowaji. 25 Ene akwama Jowaji ya ayi. O jiselevende ja Jowaji ja mulungulukila, mukonda dya kujibha o an’a* mukunji Joyada. A mujibhila mu hama yê mwene. Kyenyiki, a mufundu mu Mbanza ya Davidi, maji kamufundu mu jimbila ja jisobha.
26 O athu ate o kikutu kya kujibha Jowaji, enya: Zabadi mon’a Simeyate mukwa Amone ni Jehozabade mon’a Simiyate mukwa Mowabe. 27 Yoso yalungu ni an’a Jowaji ni ithangana yoso ya mudimuna o jipolofeta ni ikalakalu yabhange phala kutungulula o inzo ya Nzambi yakidi, a isoneka mu Divulu dya Jisobha. Mon’ê Amaziya mwéne wa mubhingana bhu kididi kyê kya usobha.