Zakadiya
9 Njimbu yatundu kwa Nzambi:
“Njimbu ya Jihova yakufundisa o ixi ya Hadalake,
Ni ixi ya Damasku,
Mukonda Jihova umona o athu oso mu ngongo.
Ni miji yoso ya Izalayele.
2 O njimbu yiyi yatokala we ku ixi ya Hamati, o ixi ya zukama,
Ni kwa Tilu ni Sidónya, mukonda dya unjimu wâ.
3 O akwa Tilu atungu ilumbu yamakota phala kudifikidila.
O phalata yabhakele yavudile kala fufutila,
Abhake we ulu yavulu kala malôwa mu ikoka.
4 Talesa! Jihova wanda kukatula o jimbote jé joso,
Wanda bwika o kifuxi kyé kya masoladi mu kukitakula mu musanza wa kalunga,
Wanda bwika o mbanza ni túbhya.
5 Mu kumona o ima yiyi, akwa Axikilone, wôma wanda ku akwata,
Akwa Ngaza anda tata kyavulu,
Akwa Ekolone kyene we kyanda divwa mukonda o kudyelela kwâ, kwanda kala kwa kingoho.
Akwa Ngaza kanda kala dingi ni sobha,
Ku Axikilone ki kwanda kala dingi muthu utunga-ku.
6 O mona mukwa ixi yengi, mwéne wanda tunga mu Ajidode,
Nganda bhwisa o ukumbu wa akwa Fidíxa.
7 Nganda ku akatula o manyinga mu makanu mâ,*
Ni kudya kwa kasana kwanaminina mu mazu mâ,
O yó anda subhuka, anda tokala kwa Nzambi yetu.
Mwene wanda kala kála mutwameni mu Judá,
O akwa Ekolone anda kala kála o akwa Jebuze.
8 Eme nganda kala ngi mulangidi phala kulanga o inzo yami,
Kwa yó woso utunda ni yó woso ubokona,
Kana-ku nguma wanda bhitila-mu dingi,
Mukonda eme ngamono o ima yiyi* ni mesu mami.
9 Eye u mon’a kilumba wa Ziyone, sanguluka kyavulu.
Eye u mon’a kilumba wa Jeluzaleme, ta nzongo ya kikowe.
Talesa! Sobha yé wamukwiza kokwé.
Mwene muthu wayuka, wa mubheka ubhulukilu,
Mwene walenduka wa mukwendela ku thandu dya jumendu,
Ku jumendu, kifwa, kamona ka jumendu ya mukaji.
10 Nganda bwika o makalu a ita ku Efalayíme,
Ni jikabalu mu Jeluzaleme.
Nganda bhwisa o mifula ya ita.
Mwene wanda bhana ngolokela ya paze mu ifuxi.
O utuminu wê, wanda matekena ku musanza wa kalunga, wanda suka ku musanza wa kalunga ka mukwa,
Tunde ku ngiji ya Ufalate, ndu ku maxokololo a ixi.
11 Eye u Ziyone,* mukonda dya kikutu kya manyinga ki ngate n’eye,
Nganda bhulula o mundu wê wokase mu fixi yakambe o menya.
12 Enu a mikutu, mwala ni kidyelelu, vutukenu mu mbanza yofikidile ni ilumbu.
Lelu ngikwambela:
‘Nganda kufuta mu luyadi, eye u Ziyone.
13 Nganda fokola Judá kala o mufula wami.
Efalayíme wanda kala o sosa ya mufula,
Nganda phaphumuna o twana twé, eye u Ziyone,
Phala kulwa ni twana twa Ngelexya,
Nganda kukitula kala u xibhata ya disoladi.’
14 Jihova wanda londekesa kwila wala ni mundu wê,
O sosa yê yanda tunda kala nzaji.
O Ngana Jihova Sukeku, wanda xika o koloneta,
Mwene wanda tunda phala kulwa o ita kala kitembwe kitunda ku mbandu ya lwiji.
15 Jihova dya ifuxi wanda ku azokela,
Ene anda titidila ni kujikinisa o matadi a atakwile-nawu.
Ene anda sanguluka ni kudikola kala athu anu vinyu,
Ene anda kala kála kopho yezala ni vinyu,
Kala o manyinga a azunzumuna ku jihota ja kalatódyu.
16 Jihova Nzambi yâ, wanda bhulula o mundu wê mu kizuwa kyenyokyo,
Kala kibhanga kyê kya jimbudi,
Mukonda ene anda kala kála o matadi afwama ala ku kitundu kibhenya mu ixi yâ.
17 O henda yê yadikota,
O kuwabha kwê kwavulu!