Kala Kyasoneka Matesu

21 Kyoso ene kyazukama mu mbanza ya Jeluzaleme, mu sanzala ya Betefaje ku Mulundu wa Midiva, Jezú utumikisa kiyadi kya maxibulu mê. 2 Mwene anga u atangela, wixi: “Ndenu mu sanzala i mwa mu mona, mwanda sanga-mu jumendu yokute ni mon’ê. Mu ji jituna ni mu jibheke kokwami. 3 Se bhu kala muthu u mi ebhwidisa, mwatokala ku mu tangela kwila, ‘o Ngana yetu wa ji bhindamena.’ Mwene wanda mi ehela ku j’ambata.”

4 Kiki, kyabhiti phala ku di kumbidila o izwelu ya polofeta, kyoso kyambe: 5 “Tangelenu o mon’a muhatu wa Ziyone: ‘Talesa! Sobha yé yu wiza kokwé, mwene walenduka, wendela kuthandu dya jumendu, kamona ka jumendu.’”

6 O maxibulu ayi, anga abhanga kala kya atendelesa Jezú. 7 Abheka o jumendu ni kamona kê, ya ate o izwatu yâ kuthandu dyâ, mwene anga uxikama ku kamona ka jumendu. 8 Athu avulu azale o izwatu yâ mu njila, amukwá abatula isalale ya maye, anga a izale we mu njila. 9 O mundu wa mu twamenena ni yó akexile mu mu kayela, akexile mu dikola, exi: “Nzambi, twa kudyóndo, bhulula* o Mon’a Davidi! Atane-ku yó wiza mu dijina dya Jihova! Mu bhulule, twa kudyóndo, eye wene ku dyulu!”

10 Kyoso mwene kyabokona mu Jeluzaleme, athu oso mu mbanza a thandanganya, ya amateka kudikola, exi: “Nanyi mwenyú?” 11 O mundu wa tambwijila, wixi: “Yú polofeta Jezú dya Nazalé, mukwá Ngalileya!”

12 Jezú wabokona mu tembulu, anga ukaya-mu oso akexile mu sumba ni kusumbisa, ulundumuna o jimeza ja akwa kutolokala kitadi, ni yalu ya akwa kusumbisa o madyembe.* 13 Mwene wa atangela, wixi: “Kyósoneke mu Mikanda Ikôla kwila: ‘Inzo yami anda ixana inzo ya kusamba,’ maji enu mwa ibhange kididi kya kuswamena-mu miyi.” 14 Mu kyenyiki, o ifofo ni inema i mu zukama mu tembulu, mwene anga u asaka.

15 Kyoso o akunji amakota, ni jimesene ja kulonga o Kitumu kyamono o madiwanu akexile mu bhanga mwene, ni an’a ndenge akexile mu dikola mu tembulu, exi: “Nzambi, twa kudyóndo, bhulula o Mon’a Davidi!” Njinda ya akwata. 16 Ene anga a mwambela, exi: “Wa mu kwívwa ya mu zwela o twana tutu?” Jezú-phe wa a tambwijila, wixi: “Kyene! Enu kiluwa mutanga kwila: ‘Mu dikanu dya an’a ndenge ni dya tubwetele, Eye wabhangesa kutunda-mu diximanu’?” 17 Kyoso mwene kya axisa, watundu mu mbanza wayi mu sanzala ya Betanya, anga uzekela mwenyómo.

18 Mu kimenemene, kyoso kyakexile mu vutuka mu mbanza, nzala ya mu kwata. 19 Mwene anga umona muxi wa mufiku ku mbandu a njila, yu wayi-ku maji wasange ngó máfwe. Mwene anga uzwela, wixi: “Kana kwima dingi ibundu.” Mu kithangana kyenyókyo o muxi wakukuta. 20 O maxibulu-phe kyamono kiki, adiwana, anga adikola, exi: “Kyebhi mu kindala kiki o muxi wakukuta?” 21 Jezú wa atambwijila: “Ngi mi ambela o kidi kwila, se mu kala ni kixikanu kyakolo ni mu kambe o jiphata, ki mwanda bhanga ngó o kima ki nga bhange ni muxi yú wa mufiku. Maji se mu tangela we o mulundu yú kwila, ‘tunda bhabha, uditakule mu musanza wa kalunga,’ kiki kyanda bhita. 22 Ima yoso i mu bhinga ni kixikanu, mwanda itambula.”

23 Kyabokona mu tembulu, o akunji a makota ni adyakimi a mundu eza, a musange yu ulonga, ene anga a mu ibhwidisa, exi: “Ungana wahi u wala nawu, phala kubhanga o ima yiyi? Nanyi wakubhana o ungana yú?” 24 Jezú wa atambwijila, wixi: “Eme wami nganda mi ibhwidisa kima, se mu ngi tambwijila, nganda mi tangela se ungana wahi u ngala nawu phala kubhanga o ima yiyi. 25 O ungana wa Nzwá wa kubatizala watundile kwa Nzambi,* inga ku athu?” Ene anga amateka kuxinganeka mudyâ, exi: “Se twamba, ‘watundile kwa Nzambi,’ mwene wanda zwela kwila, ‘mukonda dyahi-phe, ki mwa mu xikina?’ 26 Maji se tuzwela kwila ‘ku athu,’ twala ni wôma wa mundu yú mukonda ene oso axikina kwila, Nzwá wexile polofeta.” 27 Mu kiki a mu tambwijila, exi: “Ki twa kijiya.” Jezú we wa avutwila, wixi: “Eme wami ki nganda mi tangela se ungana wahi u ngala nawu phala kubhanga o ima yiyi.

28 “Ihi i mu banza? Sayi diyala dya kexile ni ana kiyadi, mwene watangela o mona wa dyanga, wixi: ‘Mon’ami, lelu ndé wa kalakale mu dibhya dya mividi.’ 29 O mona wa mu tambwijila, wixi: ‘Ngwami,’ maji mu kubhita tu ithangana mwene wadyela, yu wayi. 30 O tata wazukama ku mona wa kayadi, anga u mu tangela ya zwelele ku mona wa dyanga. O mona u mu tambwijila, wixi: ‘Kyene Ngana,’ maji kayé. 31 Bhu kiyadi kiki, nanyi wabhange o vondadi ya tata?” A mu tambwijila, exi: “O mona wa dyanga.” Jezú wa atangela, wixi: “Ngi mi ambela o kidi kwila, o akwa kutambula o lubhaku ni idyanzunga, éne anda mi twamenena mu Utuminu wa Nzambi. 32 Mukonda Nzwá wejile kokwenu mu njila ya kuyuka, maji enu ki mwa mu xikana. Maji, o akwa kutambula o lubhaku ni idyanzunga a mu xikana. Né mwene ni kumona o ima yiyi, enu ki mwadyela o ituxi yenu ni ku mu xikana.

33 “Ivwenu o kifika kya mukwá: Sayi diyala dya kexile ni dibhya dya mividi. Mwene wa di kondolola ni ilumbu, anga u kanda-mu ditangi dya kubhanga vinyu, ni kutunga-mu inzo ya matala phala o alangidi, anga udibhana ku idimakaji, phala ku di langa, yu wayi ku ixi yengi. 34 Kyoso kyabhixila o kithangana kya kubhongolola, mwene watumikisa o abhik’ê phala kutambula o ibundu ku idimakaji. 35 O idimakaji-phe ya kwata o abhika, o wa dyanga a mu beta, o wa kayadi a mu jibha, o wa katatu a mu buba ni matadi. 36 Mwene anga utumikisa abhika amukwá, o adyangele ndenge. Maji o idimakaji yiyi a bhange we kala kya bhangele kwa yó a dyangele. 37 Mu kusuka-ku watumikisa mon’ê, yu wambe, wixi: ‘Ene anda xila mon’ami.’ 38 Kyoso o idimakaji kyamono o mona, ene ambe, exi: ‘Yú mwéne o mulundudi. Zenu tu mu jibhe ni tu xale ni undundu wê!’. 39 O idimakaji-phe, akwata o mona, a mu takula bhu kanga dya dibhya dya mividi, anga a mu jibha. 40 Kyoso o ngana ya dibhya kyanda bhixila, ihi yanda bhanga ku idimakaji yiyi?” 41 Ene a mu tambwijila, exi: “Kuma ene athu ayibha, wanda kwa bwikisa, ni kubhana o dibhya ku idimakaji yengi, yanda mu bhana o idima mu kithangana kyatokala.”

42 Jezú wa atangela, wixi: “Kiluwa mu tanga mu Mikanda Ikôla kwila, ‘o ditadi dya ditunu o atungi, dyene dya kituka o ditadi dya betakota?* O ditadi didi dya tundu kwa Jihova, dyene madiwanu ku mesu metu’. 43 Mukonda dya kiki, o Utuminu wa Nzambi anda ku mi tambula-wu, ni ku ubhana ku athu engi abhana idima yambote.* 44 Woso udibhala ku ditadi didi, wanda bukujuka, o yó woso o ditadi di mu lundumukina wanda sasujuka.”

45 Kyoso o akunji a makota ni Jifalizewu kyevu o ifika yiyi, ene a mono kwila mwene wakexile mu zwela yalungu ni ene. 46 Sumbala a mesenene ku mu kuta, maji ene akexile ni wôma wa kifuxi, mukonda ene axikina Jezú kala polofeta.