Kala Kyasoneka Luka

10 Kyabhiti o ima yiyi, Ngana wasolo dingi makwinyi a sambwadi, yu wa atumikisa kiyadi-kiyadi phala ku mu twamenena mu jisanzala joso ni mu ididi mweji kuya. 2 Mwene wa atangela: “O idima yavulu phala ku ibhongolola, maji o akalakadi atolo. Kyenyiki, dyondelenu kwa Ngana mukwa díbhya, atumikise akalakadi ku díbhya dyê. 3 Ndenu! Ngi mi tumikisa kala mu jimbudi, mw’axaxi ka imbungu. 4 Ki mwambate mbwenga ya kitadi, né huta, né jihayi. Ki mu menekene muthu* mu njila. 5 Inzo yoso i mu bokona, dyangenu kuzwela: ‘O kutululuka kukale mu dibhata didi.’ 6 Se ki mukala mukwa paze, o kutululuka kwenu ku mi vutukile. Maji se mukala mukwa paze, o kutululuka kwenu kukale kuthandu dyê. 7 Kalenu mu inzo yenyiyi. Yoso ya mibhana yene i mudya, yene i munwa, mukonda o mukalakadi wafwama kutambula o futu yê. Ki mukale mu kwila, mutunda inzo, muya inzo.

8 “Mbanza yoso i mubokona, se athu a mi tambulula, dyenu o ima yoso ya mibhana. 9 Sakenu o jihaxi ji mu sanga-mu, anga mwa atangela, mwixi: ‘O Utuminu wa Nzambi wazukama.’ 10 Mbanza yoso i mubokona, anga o athu akamba ku mi tambulula, muya mu ikoka ya mbanza yenyóyo, muzwela, mwixi: 11 ‘Katé mwene ni fufuta ya mbanza yenu ya tu naminina ku inama, tu mi kukumwina-yu phala kikale umbangi kokwenu. Maji xalenu mu kwijiya kwila, o Utuminu wa Nzambi wazukama.’ 12 Ngi myambela kwila, mu kizuwa kyenyókyo, o kaxitiku ka mbanza yiyi, kanda betakota, o ka Sodoma ndenge.

13 “Lamba dyé Kolazine! Lamba dyé Betesayida! Mukonda o madiwanu abhiti momwenu, se abhitile mu jimbanza ja Tilu ni Sidónya, ene eji dyela kyá ukulu ni kuzwata izwatu ya jisaku* ni kuxikama mu uthôkwa. 14 Kyenyiki, mu kizuwa kya kufundisa, o kaxitiku kenu kanda betakota, o ka mbanza ya Tilu ni Sidónya ndenge. 15 Abha eye Kafalanawú, o kwila anda kuzangeleka katé ku dyulu? Wanda kuya Mw’alunga!*

16 “Woso u m’ivwa, u ng’ivwa we eme. Woso ukamba ku m’ivwa, ukamba we ku ng’ivwa eme. Woso ukamba ku ng’ivwa eme, ukamba we kwívwa Yó wa ngi tumu.”

17 O makwinyi a sambwadi a maxibulu avutuka ni kusanguluka, ya ambe, exi: “Ngana, katé mwene ni madimonyo a tu tumaka, kyoso ki tu tumbula o dijina dyé.” 18 Mwene wa ambela, wixi: “Ngi mona kyá Satanaji kulawuka ku dyulu kala nzaji. 19 Ivwenu! Eme nga mibhana kutena kwa kudyota jinyoka, mazalala ni kutolola o kutena kwoso kwa jinguma. Sé-ku kima kitena ku mibhanga kyayibha. 20 Ki mu sanguluke kwila, o jinzumbi jayibha ja mu mi tumaka, maji mu sanguluka mukonda o majina m’enu o soneke ku dyulu.” 21 Mu kithangana kyenyókyo, Jezú wa sanguluka kyavulu bhukaxi ka nzumbi ikôla, yu wambe, wixi: “Tata, Ngana ya dyulu ni ixi, ngi kuximana bhu pholo ya athu oso, mukonda wasweka o ima yiyi ku jinjimu ni kwa yó adimuka, éye wa ijidisa ku an’a ndenge. Kyene Tata, mukonda kyene kya ku wabhela ku kibhanga. 22 Ima yoso a ngi bhana-yu kwa Tata yami. Sé-ku muthu wejiya se o Mona nanyi, kikale ngó o Tata. Sé-ku we muthu wejiya se o Tata nanyi, kikale ngó o Mona, ni yó woso o Mona usola ku mwijidisa.”

23 Kyoso kyakexile ubheka ni maxibulu mê, mwene wa atangela: “Azediwa yó amona o ima i mwa mu mona. 24 Mu kiki, ngi myambela kwila, jipolofeta javulu ni jisobha amesenene kumona o ima i mwa mu mona, maji ka imwene, ni kwívwa o ima i mwa mu kwívwa, maji ka ivwile.”

25 Sayi mesene ya Kijila, wabalumuka phala ku mu londa yu wa mwibhwidisa: “Mesene, ihi i nga tokala kubhanga phala kutambula o mwenyu wakalelaku?” 26 Jezú wa mwambela: “Ihi yosoneke mu Kijila? Eye wene mutanga kyebhi?” 27 Mwene wa mu tambwijila: “‘Zola Jihova Nzambi yé, ni muxima wé woso ni mwenyu wé woso, ni nguzu yé yoso, ni kilunji kyé kyoso,’ ni kwila, ‘zola mukwenu kala ki wadizolo eye mwene.’” 28 Jezú wa mwambela, wixi: “Watambwijila kyambote, kolokota mu kubhanga kyenyiki phala utambule o mwenyu wakalelaku.”

29 Kuma o mesene ya Kijila wa mesenene ku dilondekesa kwila muthu wayuka, webhwidisa Jezú, wixi: “O mukwetu nanyi?” 30 Jezú wa mu tambwijila: “Sayi diyala wakexile mutunda mu Jeluzaleme, anga ukala mu kulumuka mu Jedikó, yu a mukwata ku ifumbe. O ifumbe ya muzula, ya mubeta, yi ayi, a muxisa wa kumbama. 31 Sayi we mukunji wakexile mu kulumuka mu kikoka kyenyókyo, kyoso kya mumono, wabhitila ku mbandu. 32 Kyene we kimoxi, Levita kyabhixila bhu kididi kyenyókyo, wa mumono, anga ubhitila ku mbandu yengi. 33 Maji sayi diyala mukwá Samadiya wakexile mubhita mu kikoka kyenyókyo, wamusange, mu ku mu mona, henda ya mukwata. 34 Mwene wa mu zukama, wakutu o jifidila jê, anga utamu máji ni vinyu. Wa mutula kuthandu dya kibhaku kyê, wa mwambata mu inzo ya kuzalela o athu, anga u mu tambula konda. 35 Ki kwaki, mwene wabhana madenádyu ayadi ku mulangi, yu wa mwambela: ‘Mulange kyambote. Yoso i ungastala, ngi kuvutwila-yu kyoso ki nganda vutuka.’ 36 Mu kitatu kiki, nanyi wamufika kwila, mukwâ wa yó a mu kwatele ku ifumbe?” 37 O mesene ya Kijila wa mu tambwijila, wixi: “Yó wa mu kwatela o henda.” Jezú anga u mwambela: “Ndé, ubhange we kyenyiki.”

38 Kyakala mu kwenda, Jezú wabokona mu sanzala. Mwenyomo mwakexile muhatu amwixana, Málata, wa mu tambulula mu inzo yê. 39 Mwene wakexile we ni phang’yê amwixana, Madiya, wa xikamene bhu inama ya Jezú, mu kwívwa o maka mê. 40 Málata anga utandanganya ni kubhanga ima yavulu. Mwene wazukama kwa Jezú, yu wa mwambela, wixi: “Ngana, phang’yami wang’ehela kubhanga o ima yoso ubheka wami. Ki wanda zwela kima? Mutangele n’eze mu ngi kwatekesa.” 41 O Ngana wa mu vutwila, wixi: “Málata, Málata, eye wa tandanganya ni ima yavulu! 42 Twabhingi ngó ima yofele, mba kimoxi ngó. Madiya wasolo o mbandu yambote,* katena ku mu tambula-yu.”