Hozeya
9 “Enu mu akwa Izalayele, ki musanguluke.
Mukonda dya undumbu wenu, enu mwa disandula kwa Nzambi yenu.
Kimudikenye kala kyene mudikenya o ifuxi yengi.
Enu mwawabhela o futu ya mibhana mukonda dya undumbu u mwabhange mu ididi yoso ya kubhyatela o tiliku.
2 O kididi kya kubhyatela o tiliku ni kididi kya kukamena o vinyu,
Kikyanda midikila, kikwanda kala dingi vinyu ya ubhe.
3 Ene kanda tunga dingi mu ixi ya abhana Jihova.
Maji akwa Efalayíme anda vutuka ku Ijitu.
Mu ixi ya Asídya, ene anda dya kudya kwa kasana.
4 Ene kanda bhakula dingi jisata ja vinyu phala Jihova,
O jisata jâ, ki janda mu sangulukisa dingi.
O jisata jâ jedi kala jimbolo ajibhana mu kizuwa kya malamba,
Oso ajidya, a kasana.
O jimbolo jâ janda kala ngo mwene phala ene,
Kanda jambata mu inzo ya Jihova, kana.
5 Ihi i mwanda bhanga mu kizuwa kya kudyongeka?*
Ihi i mwanda bhanga mu kizuwa kya fesa ya Jihova?
6 Talesenu! Ene anda lenga mukonda dya kibwika.
O ixi ya Ijitu yanda kwabhongolola, o mbanza ya Mefize yanda kwafunda.
O isasa, yanda zanga o itutu yâ ya phalata.
Mu jibalaka jâ mwanda sabhuka mixi ya minya.
7 O kizuwa kya kufundisa kya mubhixila.
O kizuwa kya ku kuvutwila o phonzo, kikiza.
Izalayele wanda kwijiya o maka yá.
O polofeta yé, anda mumona kala kyôwa, o mukwa kuzambula wanda saluka.
Kuma watondala kyavulu, o kastiku kê kanda vula we.”
8 O mulangidi wa Efalayíme wexile fiyele kwa Nzambi yami.
Maji kindala, o ima yoso ibhanga o jipolofeta jâ, yedi kala mubhetu wa dinyanga dya jinjila.
Mu inzo ya Nzambi yâ, abhanga-mu ima yayibha.
9 Ene adibhakula mu kubhanga ima yayibha kala kyabhangele akwa Ngibeya.
Mwene wanda lembalala o kikuma kyâ, wanda kwa kastikala mukonda dya ituxi yâ.
10 Kyoso kingasange Izalayele , kyedile kala ngasange jiuva mu kikangalakata.
Kyoso ki ngamono o jikuku jenu, kyedile kala ngamumona jifiku jabhi ande dya kithangana kyatokala.
Maji ene akayela Bahale dya Peole.
Adibhakula mu kubheza o nzambi yiyi ikwatesa jisonyi.
Ene anda kituka kima kyayibha kinene, kala o nzambi yâ, ya mubheza.
11 O kijingu kya Efalayíme kyanda tuka, kala kituka o njila.
Kikwanda kala kuvwala, kikwanda kala we kwimita.
12 Né mwene se asasa twana,
Nganda ku akatula-u, kikwanda subhuka né ngo umoxi.
Lamba dyâ, mu kizuwa kinganda disondolola kwa ene!
13 O mbanza ya Efalayíme yakexile mu honga yezalele ni yangu yabete, yene ya difwanganene ni mbanza ya Tilu.
Kindala Efalayíme wanda bhakula o twana twê phala ku tujibha.
14 Jihova tata, bhana-wu o kima kya atokala:
Bhangesa o ahat’wâ kuselula o twana, mu mele mâ ki mutunde lete.*
15 O ituxi yâ yoso a itela ku Jidingale, kwenyoko, kwene ku ngamatekena ku azemba.
Nganda ku akaya mu inzo yami, mukonda dya ima yayibha yabhange.
Kinganda ku azola dingi,
O ilamba yâ yoso a jijila kubhanga o ima yayibha.
16 Efalayíme anda ku ibwika.
O lundanji lwê lwanda kukuta. Ene anda difwangana ni muxi ki wimi ibundu.
Né hanji avwala ana, o twana twâ twakazola nganda tubwikisa.”
17 O Nzambi yami wanda kwabhana dikunda,
Mukonda ene ka mubhana mátwi.
Ene anda lengela mu jixi jengi.