Divulu Dya Dyanga Dya Jisobha
19 Mukusuluka, Akabe wayi mutangela Jezabele yoso yabhangele Elija ni kyebhi kyajibhile o jipolofeta joso ni xibhata. 2 Mukonda dyakiki, Jezabele watumikisa akunji kwa Elija phala ku mwambela: “O jinzambi a ngikaxtikale, akibhange kinene, se mungu mu ola kala yiyi, eme ngikamba ku kubhanga o kima ki wabhange ku jipolofeta jojo.” 3 Kyenyiki, wôma wa mukwata. Mukonda dya wôma, walenge phala kubhulula o mwenyu wê. Mwene wabhixila ku mbanza ya Beleseba, ku Judá, yu wa muxisa o mukwatekexi wê kwenyoko. 4 Mukusuluka, wayi mu kikangalakata yu wende kizuwa kyoso. Mu kusanga kamuxi, mwene waxikama bhoxi dya kamuxi, yu wabhingi phala kufwa. Mwene wambe: “Kwabhu kya u Jihova! Katula o mwenyu wami kindala, kuma eme kingibeta-kota o jikuku jami ndenge.”
5 Mukusuluka, mwene wazeka bhoxi dya kamuxi. Bhenyobho, sayi anju ya mubalumuna yu wa mwambela, wixi: “Balumuka, udye.” 6 Mwene anga utona, he umona mbolo ku thandu a matadi a tema ni mbinda ya menya bhu mbandu a mútwe wê. Mwene wadi, wanu yu wazeka dingi. 7 Ku pholo dya kwenda, o anju ya Jihova ya mu monekena muveji ya kayadi, ya muzambesa i ya mwambela: “Balumuka udye, se ki udi, kwanda tena kwenda o njila.” 8 Kyenyiki, mwene wabalumuka wadi, wanu, mukonda dya kudya, ukala ni nguzu. Mwene wende makwinyi awana a izuwa ni makwinyi awana a usuku kate kyabhixila ku Holebe, o mulundu wa Nzambi yakidi.
9 Kwenyoko, mwene wabokona mu dibanda yu wabhiti o usuku mwenyomo. Mu kithangana ni mbandu Jihova wa mwambela, wixi: “Elija, ihi i wa mubhanga bhabha?” 10 Mwene watambwijila wixi: “Ngene musidivila Jihova o Nzambi ya ifuxi ni kuswina kwoso, kuma o mundu wa Izalayele ka mu kumbidila o kikutu kyé, abulu o jikalatódyu jé, ya ajibha o jipolofeta jé ni xibhata, éme ngo ngasubhuka-ku. Kindala ene amesena we ku ngijibha.” 11 Mwene-phe wa mwambela: “Tubhuka bhu kanga, wimane bhu pholo ya Jihova, ku mulundu yú.” Jihova wexile mubhita, anga kukala kitembu kyadikota kyexile mubula o milundu ni matadi bhu pholo ya Jihova, maji Jihova kexile mu kitembu. Kyoso kyabhiti o kitembu, kweza kitungutu kya ixi, maji Jihova kakexile mu kitungutu. 12 Kyoso kyabhiti o kitungutu kya ixi, kwamoneka túbhya, maji Jihova kakexile mu túbhya. Kyabhiti o túbhya, wevu dízwi dya tululuka, dya lenduka. 13 Kyoso Elija kyevu o dízwi didi, mwene wavungu o pholo yê ni divunga,* watundu yu wemana bhu mwelu wa dibanda. Kyenyiki, o dízwi dya mwibhwidisa: “Elija, ihi i wa mubhanga bhabha?” 14 Mwene watambwijila wixi: “Ngene musidivila Jihova o Nzambi ya ifuxi ni kuswina kwoso, kuma o mundu wa Izalayele ka mu kumbidila o kikutu kyé, abulu o jikalatódyu jé, ya ajibha o jipolofeta jé ni xibhata, éme ngo ngasubhuka-ku. Kindala ene amesena we ku ngijibha.”
15 Jihova wa mwambela wixi: “Vutuka, ndé kate mu kikangalakata kya Damasku. Kyoso ki wanda bhixila, watokala ku unda Hazayele n’a kale sobha ya Sídya. 16 Watokala ku unda Jehú mulawula wa Nimisi, phala akale sobha ya Izalayele. Watokala we ku unda Elizewu,* mon’a Safate, mukwa Abele-Mehola phala akale polofeta bhu kididi kyé. 17 Woso yó kafu ku xibhata ya Hazayele, Jehú wanda mujibha, woso yó kafu bhu xibhata ya Jehú, Elizewu mwene wanda mujibha. 18 Ngala hanji ni sambwadi dya midi mu Izalayele yó a kambe kufukamena Bahale ni ku mubhana jinzobole.”
19 Kyenyiki, Elija watundu kwenyoko yu wasange Elizewu mon’a Safate. Elizewu wexile mudima, mwene wexile ni makwinyi ayadi ni kiwana kya jingombe, jindumbe ni akaji ku pholo yê. O jingombe jiyadi jasukina jene jexile mukalakala-naju. Kyenyiki, Elija wayi muzwela ni mwene yu wa mutula o divunga dyê ku thandu. 20 Elizewu waxisa o jingombe yu walenge kate kwa Elija, wa mwambela: “Ngehele ngiye mubhana jinzobole ku jitata jami ni ku alekela. Mukusuluka, nganda kukayela.” Elija wa mwambela, wixi: “Ndé, ihi i ngabhange phala ku kufidisa?” 21 Mukyenyiki, mwene wavutuka, wakwata ngombe jiyadi yu wa jibhakula kala sata. Wakatula o mabaya* akutile ku jingombe yu walambela-nawu o xitu, wa ibhana ku mundu, ene anga a idya. Mukusuka-ku, mwene wakayela Elija yu wamateka ku musidivila.