Mukanda Wadyanga wa Nzwá
5 Woso uxikana kwila Jezú mwéne o Kidistu, muthu yú mon’â Nzambi. Woso wazolo o Tata, wazolo we yó watundu kwa mwene. 2 Kyoso kituzola Nzambi ni kubelesela o itumu yê, tu londekesa kwila twazolo o an’â Nzambi. 3 O henda kwa Nzambi ilombolola kubelesela o itumu yê, o itumu yê-phe ki ibhonzo ku i belesela, 4 mukonda woso wala mon’â Nzambi utolola o mundu. O kixikanu kyetu kyene kya tu kwatekesa kutolola o mundu.
5 Nanyi utena kutolola o mundu? Ki yó uxikina kwila Jezú mwéne o Mon’â Nzambi? 6 Jezú Kidistu wejile bhukaxi ka menya ni manyinga; mwene kejile ngó bhukaxi ka menya, maji ni manyinga we. O nzumbi ikôla ibhana umbangi, mukonda o nzumbi yene o kidi. 7 Mukonda sayi ima itatu ibhana umbangi: 8 O nzumbi, o menya ni manyinga. Yene ibhana umbangi wa kima kimoxi.
9 Etu twaxikina o umbangi wa athu, maji o umbangi wa Nzambi wabeta dingi kota. Mukonda Nzambi wabhana umbangi walungu ni Mon’ê. 10 Woso ukala ni kixikanu kwa Mon’â Nzambi, ulondekesa kwila o ima ya mulongo Nzambi yala ku muxima wê. Woso kaxikina Nzambi, ulondekesa kwila Nzambi mukwa makutu, mukonda mwene kaxikina mu umbangi wabhana Nzambi walungu ni Mon’ê. 11 O umbangi wa Nzambi wenyú: Mwene watubhana o mwenyu wakalelaku, o mwenyu yú tu utambula bhukaxi ka Mon’ê. 12 Woso wala ni Mon’â Nzambi wala ni mwenyu wakalelaku, maji woso kalé ni Mon’â Nzambi kala ni mwenyu wakalelaku.
13 Nga musoneka o ima yiyi phala enu mwala ni kixikanu mu dijina dya Mon’â Nzambi, ni mwijiye kwila mwala ni mwenyu wakalelaku. 14 O kidyelelu kitwala nakyu kwa mwene kyenyiki:* Ima yoso i tubhinga mu vondadi yê, mwene u twívwa. 15 Kuma twejiya kwila mwene u twívwa mu ima yoso i tubhinga, twadyelela we kwila, wanda tubhana o ima i twabhingi, mukonda twa ibhingi kwa mwene.
16 Se muthu umona phang’yê wa muta kituxi, maji ki kituxi kibhekela o kufwa, mwene wanda mu sambela, Nzambi anga u mubhana o mwenyu. Kiki, ki kyalungu ni yó ata kituxi kibhekela o kufwa. Kuma sayi kituxi kibhekela o kufwa. Ki nga muzwela kwila, mwene watokala kusamba yalungu ni kituxi kiki. 17 Ima yoso yayibha kituxi, maji sayi kituxi ki kibhekela o kufwa.
18 Woso wala mon’â Nzambi kaxikina kuta kituxi, maji o Mon’â Nzambi* u mulanga, o kadya-phemba* katena ku mukwata. 19 Twejiya kwila, twatokala kwa Nzambi, maji o ngongo yoso yala bhu maku a kadya-phemba. 20 Etu twejiya kwila, o Mon’â Nzambi weza mu ngongo, yu watubhana unjimu* phala tukale ni kwijiya kwalungu ni Nzambi ya kidi. Bhukaxi ka Mon’ê Jezú Kidistu, twala kumoxi ni mwene. Mwéne o Nzambi ya kidi, yó ubhana o mwenyu wakalelaku. 21 Twana twami, lengenu o iteka.