Divulu Dya Kayadi Dya Samuwele
12 Kyenyiki, Jihova watumikisa Natane kwa Davidi. Natane wayi mu zwela-nê, yu wambe: “Kwakexile mayala ayadi atungile mu mbanza imoxi. Umoxi wexile mvwama, o mukwa wexile ngadyama. 2 O diyala wexile mvwama wexile ni jimbudi ni jingombe javulu. 3 Maji o diyala wexile ngadyama, wexile ngo ni kambudi kamoxi ka mukaji kasumbile. Mwene wexile mu kasasa, kene kakudila kumoxi ni twana twê. O kambudi kexile mudya ku kakudya koso kadya mwene, kene kanwa mu kopho yê, kazeka bhu jihata jê. Kene kadibhange kala mon’ê. 4 Sayi kizuwa o diyala wexile mvwama, watambula mujitu kubhata dyê. Maji kamesenene kujibha mbudi mba ngombe mu kibhanga kyê phala kulambela o mujitu weza kubhata dyê. Muveji dyakiki, mwene wakatula o kambudi katokalele ku diyala wexile ngadyama, yu wakalambela o mujitu.
5 Kyenyiki, Davidi njinda i mukwata mukonda dya kima kyabhange o diyala dyenyodyo, anga wambela Natane, wixi: “Kala Jihova kyene ku mwenyu, o diyala didi watokala kufwa! 6 Mwene watokala kufuta o kambudi mu luwana, mukonda ka londekesa henda.”
7 Kyenyiki, Natane wambela Davidi, wixi: “O diyala didi, eye mwene ngana! ‘Jihova o Nzambi ya Izalayele wambe kiki: “Eme nga ku undu kala u sobha ya Izalayele, eme ngakubhulula bhu maku a Sawulu. 8 Eme ngamesenene ku kubhana o dibhata dya ngana yé, ni ahatu a ngana yé, eme ngakubhana o inzo ya Izalayele ni Judá. Ko ima ngo yiyi, ngejibhanga dingi ima yavulu phala o mbote yé. 9 Mukonda dyahi wakambe kuxila o kizwelu kya Jihova mukubhanga o ima yayibha ku mesu mê? Eye wajibha Udiya mukwa Hiti ni xibhata ya akwa Amone. Kiwazubha ku mujibha, wa kazala ni muhat’wê. 10 Kyenyiki, o ujibhanganga ki wandabhwa mu inzo yé.* Mukonda kungixila kyoso ki watambula o muhatu wa Udiya mukwa Hiti, phala kukala muhat’wé.’ 11 Kiki kyene kyambe Jihova: ‘Nganda kubheka divuwa bhukaxi ka akwa dibhata dyé. Nganda kutambula o ahatu’é ni kwa abhana ku diyala dyengi* bhu pholo yé, mwene wanda zeka nawu mu mwanya watu. 12 Eye wakibhangela mu kaswekele, maji eme nganda kibhanga ku pholo ya Izalayele yoso mu mwanya watu.’”
13 Davidi wambela Natane, wixi: “Ngate kituxi kwa Jihova.” Natane watambwijila Davidi, wixi: “Jihova waloloka o kituxi kyé. Eye kiwanda fwa. 14 Maji kuma eye kuxila Jihova mu maka yá, o mon’ê a muvwala kindala wanda fwa mwene.”
15 Mukusuluka, Natane wayi kubhata dyê.
Jihova wabhangesa o mon’â Davidi a muvwala ni muhatu’a Udiya kukwata uhaxi; mwene wakatele kyavulu. 16 Davidi wadyondela o Nzambi yakidi mukonda dya mona, yu wafulu o kudya. Davidi wexile mubokona mu xilu yê, ni kuzeka bhoxi usuku woso. 17 O adyakime adibhata dyê, exile bhu mbandu yê mu kusota ku mu balumuna bhoxi bhwazeka. Maji mwene wakexile mudituna, kamesenene kudya kumoxi ni ene. 18 Mu kizuwa kya kasambwadi o mona wafu. Kyenyiki, o jiselevende ja Davidi akexile ni wôma wa ku mutangela kwila, o mona wafu. Ene a dizwelesa mudya, exi: “Kyoso o mona kyakexile ku mwenyu, mwene katwivu. Mukiki-phe, kyebhi ki twanda mutangela kwila o mona wafu? Mwene nange utena kubhanga kima kyayibha kinene.”
19 kyoso Davidi kyamono kwila o jiselevende jê a mudifwetela mudya, mwene watongolola kwila o mona wafu. Davidi webhwidisa o jiselevende jê: “O kwila o mona wafu?” Ene a mutambwijila: “Xe, wafu.” 20 Mukusuluka, Davidi wabalumuka bhoxi, wazowo, wadiwaye máji a mazumba, yu wate izwatu yengi. Anga uya mu inzo ya Jihova ku mubheza. Mukusuluka wavutuka monzo,* wabhingi kudya, a mubhana-ku, yu wadi. 21 O jiselevende jê a mwibhwidisa, exi: “O kiki kilombolola ihi? Kyoso o mona kyakexile hanji ku mwenyu, eye ngana wafulu o kudya, eye wadidi. Maji kyoso o mona kyafu, eye ngana wabalumuka eye wadi.” 22 Mwene watambwijila: “Kyoso o mona kyakexile hanji ku mwenyu, nga jejuwala, ngadidi, mukonda nga xinganeka: ‘Nange Jihova u ngikwatela henda, phala kehele o mona kufwa.’ 23 Maji kuma mwene wafu kyá, ngi jejuwala dingi phalahi? O kwila ngitena ku mubheka dingi ku mwenyu? Eme ngandaya kwayi mwene, maji mwene katena dingi kuvutuka kokwami.
24 Kyenyiki, Davidi wakondo o malamba a muhat’wê Bateseba. Wayi kwa mwene, yu wazeka-nê. Mu kubhita thembu o muhatu wavwala mon’a diyala, a muluku o dijina dya Solomá.* Jihova wa muzolele kyavulu. 25 Bhukaxi ka polofeta Natane, mwene wa mutangela phala ku muluka o dijina dya Jedediya,* mukonda Jihova wa muzolele.*
26 Jowabe wasuluka ni kubhanga ita ni akwa Laba ya Amone, yu watambula o mbonge ya jisobha. 27 Kyenyiki, Jowabe watumikisa akunji kwa Davidi yu wa mutangela: “Ngabhânge ni akwa Laba, eme ngatambula o mbonge ya menya.* 28 Kindala bhongolola o masoladi axala-bhu, kondolokenu o mbanza ni ku itolola, phala eme ki ngi itolole, anga o fuma ikala yami.”*
29 Davidi wabhongolola o masoladi moso, anga uya ku Laba, ulwa ni ene, yu wa atolola. 30 Kyenyiki, mwene wakatula o kitundu ku mútwe wa Malakane,* kyene kyakexile munema talendu* imoxi ya ulu, kumoxi ni matadi afwama, ya atula mu mútwe wa Davidi. Mwene wambata we nzungule ya imbamba yakatula mu mbanza. 31 Mwene wambata o athu exile mu mbanza, wa ate mu kikalakalu kyakubatula matadi ni kukalakala ni jifalamenda ja felu jatu ni makuwa a felu ni kubhanga jitijolo. Kyene kyabhange ni jimbanza joso ja akwa Amone. Kudisukilu, Davidi ni masoladi mê moso, avutuka mu Jeluzaleme.