Dya Kayadi Dya Malunda

20 Ku pholo dya kwenda, akwa Mowabe ni akwa Amone ni amoxi ku akwa Amoni* eza mulwa ita ni Jozafate. 2 Ambela Jozafate, exi: “Sayi kifuxi kyadikota kyatundu mu jisanzala jala mu jimbandu ja musanza wa kalunga* wa Idomo, kya mukwiza mubhânga n’eye. Ene ala kya ku Hazeza-Tamale, kifwa, ku Engedi.” 3 Kyoso Jozafate kyakivu, wôma wa mukwata, wasoto o kitendelesu kya Jihova. Kyenyiki, watumu akwa Judá ku jejuwala. 4 O mundu wa Judá wadyongeka phala kubhinga kikwatekesu kwa Jihova. Enyoso atundu mu jimbanza ja Judá phala kwijiya o kibanzelu kya Jihova.

5 Bhenyobho, Jozafate wemana bhu pholo ya mundu wa Judá ni wa Jeluzaleme, mu kithádi kya ubhe, mu inzo ya Jihova, 6 yu wambe:

“Jihova tata, u Nzambi ya jikuku jetu, kikwene Nzambi yengi kikale eye ngo. K’eye utumina o mautuminu oso mu ngongo? Bhu maku mé, bhwala nguzu ni kutena. Seku muthu utena kubhânga n’eye. 7 Nzambi yetu tata, k’eye wakaye o mundu wa ixi yiyi bhu pholo ya mundu wé Izalayele? K‘eye wabhana o ixi yiyi kala undundu ku mbutu ya kamba dyé Mbalahamu? 8 Ene atungu mu ixi yiyi, ya atungu kalatódyu mu dijina dyé, exi: 9 ‘Se kutwiza kima kyoso-kyoso kyayibha, kala ita, kastiku, dibhebhu mba nzala, etu-phe twanda kwimana bhu pholo ya inzo yiyi ni bhu pholo yé (mukonda o inzo yiyi ijingisa o dijina dyê). Bhenyobho, twanda dikola kokwé mu kubhinga kikwatekesu mu kutata kwetu, eye-phe wanda twívwa anga u tubhulula.’ 10 Kindala tala o ima ya mubhanga akwa Amone, akwa Mowabe ni yó atungu ku mbandu ya milundu ya Seyile, u wafidisile akwa Izalayele ku atambula o jixi jâ, kyoso kyatundu ku Ijitu. Akwa Izalayele abhambuka, kabwika o ifuxi yiyi. 11 Maji o futu ya mutubhana ene, o ku tukaya mu ixi i watubhana kala undundu. 12 Nzambi yetu tata! Kiwanda fundisa o mundu yú wa mukwiza mubhânga n’etu? Etu kitwanda tena kubhânga ni kifuxi kiki kyadikota kya mukwiza mulwa ita n’etu. Kitwejiya se twanda bhanga ihi, maji o mesu metu alungila kokwé.”

13 Mukyenyiki, o mayala oso a Judá emanene bhu pholo ya Jihova, ni ahat’wâ ni twana twâ, kate mwene ni tumbonga.

14 Bhenyobho o nzumbi ya Jihova yatulukila Jahasiyele wexile mwaxaxi ka mundu. Jahasiyele wexile mon’a Zakadiya, Zakadiya wexile mon’a Benaya, Benaya wexile mon’a Jehiyele, Jehiyele wexile mon’a Mataniya, o Levita watokalele ku an’a Azafe. 15 Mwene wambe: “Ivwenu, enu mu mundu wa Judá ni wa Jeluzaleme, n’eye sobha Jozafate! Kiki kyene kyambe Jihova: ‘Kanenu kukala ni wôma, kanenu kubhuwama mukonda dya kifuxi kiki kyadikota, kuma o ita ki ya mitokala maji yatokala kwa Nzambi. 16 Mungu mu kulumuka phala kubhânga-nawu. Ene anda kwijila mu njila a ixana Ziji, enu mwanda ku asanga bhwa suku o honga yala ku pholo ya kikangalakata kya Jeluwele. 17 Mu ita yiyi, enu kimwanda bhânga. Emanenu mu ididi yenu, ni mumone kyebhi Jihova kyanda mibhulula. Enu mu akwa Judá ni enu mu akwa Jeluzaleme, kimukale ni wôma, kimubhuwame. Mungu muya mudisanga-nawu, Jihova wanda kala n’enu.’”

18 Mu kithangana kyenyokyo, Jozafate wafukama ni pholo bhoxi. O akwa Judá ni akwa Jeluzaleme afukama bhu pholo ya Jihova, mu kubheza Jihova. 19 Mukusuluka, o Jilevita atokalele ku mwiji wa akwa Kohate ni ku akwa Kolá, abalumuka phala kuximana Jihova, o Nzambi ya Izalayele ni dízwi dyaswina.

20 Ene abalumuka mu kamene kaselu, amateka kwenda, aditela mu kikangalakata kya Tekowa. Kyoso kyamateka o kwenda, Jozafate wemana yu wa ambela: “Ivwenu enu mu akwa Judá, n’enu mu akwa Jeluzaleme! Kalenu ni kixikanu kwa Jihova Nzambi yenu, phala mu kolokote. Kalenu ni kixikanu ku jipolofeta jê, ni muzediwe.”

21 Kyoso Jozafate kyazubha kudizwelesa ni mundu, wasolo mayala phala kwimbila Jihova ni ku muximana ni izwatu ikôla. Ene atwamenene o mayala akwatele o jixibhata, ya akexile mu kwimba: “Sakidilenu Jihova, kuma o henda yê inangenena kate ku hádya ni hádya.”

22 Kyoso kyamateka kwimba ni kisangu-sangu kyoso, Jihova wabhangesa o mayala akwa Amone ni akwa Mowabe ni yó atungile ku mbandu ya milundu ya Seyile ejile mutambula o ixi ya Judá, ku dilungulukila mudyâ ni kudijibha. 23 O akwa Amone ni akwa Mowabe alungulukila yó atungile ku mbandu ya milundu ya Seyile phala ku abwika. Kyoso kyazubha o kubwika akwa Seyile, ene adijibha mudyâ.

24 Kyoso akwa Judá kyabhixila mu kididi kya alangidi mu kikangalakata, ene amono o imbi yexile bhoxi, kikwexile muthu ni mwenyu. 25 Jozafate ni mundu wê ayi mukatula o imbamba ya madifundu. Ene asange jimbote javulu, imbamba, ima yavalolo yatokalele ku madifundu. O imbamba yavudile, sayi ima katena ku yambata. Ene abhange izuwa itatu ni kututa o imbamba, mukonda yavudile. 26 Mu kizuwa kya kawana, adyongeka mu honga ya Belaka, bhenyobho, aximana Jihova. Mukonda dya kiki, o kididi kyenyokyo akiluku o dijina dya honga ya Belaka,* kala kyene mu kixana kate mu izuwa ya lelu.

27 Kyenyiki, o mayala oso a Judá ni akwa Jeluzaleme, kumoxi ni Jozafate wexile ku pholo yâ, avutuka mu Jeluzaleme ni kisangu-sangu, mukonda Jihova wa abhangesa kusanguluka mu ku akwatekesa kutolola o jinguma jâ. 28 Abhixila-phe mu Jeluzaleme ni kuxika o iselekete ya tungoji, misaxi ni jingoma, ya ayi mu inzo ya Jihova. 29 Kyoso o ifuxi yoso kyevu kwila, Jihova wazokela akwa Izalayele ku jinguma jâ, wôma wa akwata. 30 Kyenyiki, mu utuminu wa Jozafate mwexile kutululuka, o Nzambi yê wasuluka ni ku mubhana kutululuka phala o jinguma ja mukondolokele kijize mubhânga ni mwene.

31 Jozafate wasuluka ni kutumina akwa Judá. Mwene wexile ni makwinyi atatu ni kitanu kya mivu kyoso kyakituka sobha, watumina mu Jeluzaleme, mu makwinyi ayadi ni kitanu kya mivu. O dijina dya manyâ dyexile Azuba, mon’a Sili. 32 Jozafate wende mu njila ya tat’ê Aza, ka ibhambuka. Mwene wabhange o ima yawabhela Jihova. 33 Maji o ididi ya kubhezela ka ibulu. O mundu ki usolele hanji ku mixima yâ kusota o Nzambi ya jikuku jâ.

34 O ima yamukwa ya musoso wa Jozafate, tunde ku dimatekenu ndu ku disukilu, a isoneka mu divulu dya Jehú mon’a Hanani ni mu Divulu dya Jisobha ja Izalayele. 35 Ku pholo dya kwenda, Jozafate sobha ya Judá wabhange ukamba ni Akaziya sobha ya Izalayele wexile mubhanga o ima yayibha. 36 Kyenyiki, ene adibundu phala kuyudika kumoxi o jinaviyu jejiya ku Talxixi, ya a jiyudikila ku Ezone-Ngabele. 37 Maji-phe, Eliyezele mon’a Dodova mukwa Malesa, wakanena ima yayibha kwa Jozafate, mu kwamba: “Kuma wabhange ukamba ni Akaziya, Jihova wanda bwika o ikalakalu yé.” Mukyenyiki, o jinaviyu kijatena kubhixila ku Talxixi mukonda jaboba mu menya.