Dya Kayadi Dya Malunda
32 Kyoso Ezekiya kyazubha kubhanga o ima yiyi ni ufiyele woso, Senakedibe sobha ya akwa Asídya, weza mubhânga ni akwa Judá. Mwene wakondoloka o mbanza yexile ni ilumbu yu wamesenene ku ibwika.
2 Kyoso Ezekiya kyevu kwila Senakedibe yu wiza mubhânga ni akwa Jeluzaleme, 3 mwene wadizwelesa ni ilamba ni masoladi mê, yu waxiti o jifixi ja menya jexile ku kanga dya mbanza, o masoladi ni ilamba axikina. 4 Exana athu avulu, alambe o jifixi joso ni kangiji kakexile mu ixi yenyoyo, ya ambe: “Kitumesena kwila, kyoso o jisobha ja Asídya kyanda kwiza kuku, asanga menya avulu.”
5 Ezekiya ni kuswina kwoso watungulula o ilumbu yobule, yu watungu we tunzo twa alangidi ku thandu a ilumbu. Mwene watungu we ilumbu yamukwa ku mbandu ya kanga. Watungulula we o Mulundu* wa Mbanza ya Davidi yu wabhange jisosa javulu ni jingubu. 6 Mukyenyiki, mwene wasolo atwameni a masoladi phala kutumina o mundu. Wongeka o mundu bhu mwelu wa mbanza, wa aswinisa, wixi: 7 “Swinenu, kanenu kukala ni wôma, kanenu kutandanganya mukonda dya sobha ya Asídya ni ya mundu wê, kuma ala n’etu avulu dingi, ala ni ene ndenge. 8 Mwene wadyelela mu nguzu ya athu, maji Jihova Nzambi yetu wala ku mbandu yetu, phala kutukwatekesa ni ku tubhângela mu ita.” Kyoso Ezekiya sobha ya Judá kyazubha kuzwela o ima yiyi, o mundu watululuka.
9 Kyoso Senakedibe sobha ya Asídya kyexile ku Lakiji ni kifuxi kyê kya masoladi, mwene watumikisa akunji phala kuya mu Jeluzaleme kwa Ezekiya sobha ya Judá ni ku mundu woso wa Judá wexile mu Jeluzaleme, phala ku atudila o njimbu yiyi:
10 “Senakedibe sobha ya Asídya wambe kiki: ‘Enu mwa mumona kwila Jeluzaleme a ikondoloka, né kiki kimwamutunda-mu. Enu mwadyelela kwa nanyi? 11 Ezekiya wa mu mitangela kwila Jihova Nzambi yenu wanda mibhulula bhu maku a akwa Asídya. “Enu ki mwa mumona kwila, mwene wa mu minganala ngo ni mufwe ni nzala ni dinyota?” 12 Ezekiya ki mwene wabulu o jikalatódyu ni ididi ya kubhezela o Nzambi yenu? Ki mwene wambela akwa Judá ni akwa Jeluzaleme kwila, mwatokala ngo kufukamena ku kalatódyu kamoxi ni kwohela-ku o jisata jenu? 13 Enu kimwejiya o ima i ngabhange eme ni jikuku jami, ku ifuxi ya jixi jengi? O kwila o jinzambi ja jixi jenyojo, jatena ku abhulula bhu mak’wami? 14 Ku jinzambi ja ifuxi yiyi jabwika o jikuku jami, nzambi yebhi yatena kubhulula o mundu wê bhu mak’wami phala mudyelele kwila o Nzambi yenu wanda tena ku mibhulula bhu mak’wami? 15 Kanenu kwehela Ezekiya ku mitobhesa! Kanenu ku muxikina, kuma séku nzambi ya ifuxi yengi mba ya utuminu wengi watena kubhulula o mundu wê bhu mak’wami ni bhu maku a jikuku jami. Kwambe dingi enu, o Nzambi yenu kanda tena ku mibhulula bhu mak’wami!’”
16 O akunji a sobha ya Asidya asuluka mu kuzwela ima yayibha kwa Jihova, o Nzambi yakidi, ni kwa selevende yê Ezekiya. 17 Mwene we wasoneka mikanda phala kulokalala Jihova, o Nzambi ya Izalayele ni ku muzwela kyayibha, wixi: “O jinzambi ja ifuxi, kijitena kubhulula o mundu wê bhu mak’wami. O Nzambi ya Ezekiya, kanda tena we kubhulula o mundu wê bhu mak’wami.” 18 Ene exile muzwela ni dízwi dyaswina mu dimi dya Jijudé jexile ku thandu a ilumbu ya Jeluzaleme, phala ku akwatesa wôma ni ku a tandanganyesa, n’atene kutambula o mbanza. 19 Exile muzwela ima yayibha ku Nzambi ya akwa Jeluzaleme, kala kyexile mubhanga ni jinzambi ja jixi jengi jobhange ku athu. 20 Maji Ezekiya ni polofeta Izaya mon’a Amonji, exile musamba mukonda dya maka enya, ni kudyondela Nzambi mu kubhinga kikwatekesu.
21 Kyenyiki, Jihova watumikisa anju imoxi yajibha o mazonda oso a ita ni atwameni a sobha ya Asídya exile mu jibalaka. Kyenyiki, o sobha ya Asídya wavutuka ni jisonyi mu ixi yê. Ku pholo dya kwenda, wabokona mu inzo* ya jinzambi jê, kwenyoko o an’ê a mujibha ni xibhata. 22 Mukiki, Jihova wabhulula Ezekiya ni athu oso atungile mu Jeluzaleme bhu maku a Senakedibe sobha ya Asidya ni bhu maku a jinguma jamukwa. Nzambi wabhana kutululuka ku mundu wê, o jinguma jâ kexile mukwiza dingi mubhânga-nawu. 23 Mukonda dya ima yiyi yabhiti, Ezekiya exile mu muxila kyavulu ku athu a ifuxi yoso. Athu avulu exile mubheka maujitu kwa Jihova mu Jeluzaleme, exile we mubheka ima yavalolo kwa Ezekiya, sobha ya Judá.
24 Mu izuwa yenyoyo, Ezekiya wakatele kyavulu, kwakambele ngo weji fwa. Kyenyiki, Ezekiya wasambe kwa Jihova. Mwene wa mutambwijila yu wa mubhana kijimbwete. 25 Maji-phe Ezekiya kasakidila o mbote ya mubhange, mwene wa dizangeleka. Mukonda dya kiki, Nzambi wa mukwatela njinda, wakwatela we njinda ku akwa Judá ni ku akwa Jeluzaleme. 26 Maji Ezekiya wadyela, yu weha o kudizangeleka. Kikale mwene ni akwa Jeluzaleme. Mukiki, Jihova kabheka o kibwika mu izuwa ya Ezekiya.
27 Ezekiya wexile ni umvwama ni fuma yavulu. Mwene watungu ididi ya kubhaka phalata, ulu, matadi afwama, máji a mazumba, jingubu ni ima yoso yavalolo. 28 Mwene watungu we ididi phala kubhaka o jimbutu, o vinyu ya ubhe ni máji, watungu we ibhanga phala o ibhaku. 29 Ezekiya watungu we jimbanza. Mwene wexile ni ibhaku yavulu, jingombe ni jimbudi mukonda Nzambi wa mubhana jimbote javulu. 30 Ezekiya mwéne waxiti o fixi yadikota ya ngiji ya Ngihone, yu wabhangesa o menya ku kunguluka ku mbandu kufwila o dikumbi kate mu Mbanza ya Davidi. Ezekiya wazediwile mu ima yoso yexile mubhanga. 31 Maji kyoso o ilamba ya Babilonya kyatumikisa akunji phala kwibhula kwa Ezekiya yalungu ni kijimbwete kyabhiti mu ixi, o Nzambi yakidi wa mwehela kubatula o maka ubheka wê. Mwene wabhange kiki phala kwijiya yoso yexile ku muxima wê.
32 O ima yamukwa yabhange Ezekiya, o henda yê ni ufiyele wê, a isoneka mu divulu dya polofeta Izaya, mon’a Amonji ni mu Divulu dya Jisobha ja Judá ni ja Izalayele. 33 Mukusuka-ku Ezekiya wafu, a mufundu ku mbandu ya milundu yala mu njila iya ku jimbila mwafundile o an’a Davidi. Kyoso Ezekiya kyafu, akwa Judá ni athu oso atungile mu Jeluzaleme a mufundu ni kijingu. Mon’ê Manasa, mwéne wakituka sobha bhu kididi kyê.