Dya Kayadi Dya Malunda
36 O mundu anga u unda Jowakaji, mon’a Joziya kala sobha, bhu kididi kya tat’ê. 2 Jowakaji wexile ni makwinyi ayadi ni kitatu kya mivu kyoso kyakituka sobha, yu watumina mu Jeluzaleme mu mbeji jitatu. 3 Sobha ya Ijitu wakatula Jowakaji ku ungana mu Jeluzaleme, yu wajijidika o akwa ixi yenyoyo ku mufuta hama ya jitalendu* ja phalata ni talendu imoxi ya ulu. 4 O sobha ya Ijitu watumbika we Eliyakimi, phange ya Jowakaji, ku usobha phala kutumina mu Judá ni mu Jeluzaleme, yu wa muluku o dijina dya Nzoyakimi. Maji Neku wakwata phang’yê Jowakaji, wa mwambata ku Ijitu.
5 Nzoyakimi wexile ni makwinyi ayadi ni kitanu kya mivu, kyoso kyakituka sobha, yu watumina mu Jeluzaleme mu dikwinyi dya mivu ni umoxi. Mwene wabhange ima yayibhila Jihova, Nzambi yê. 6 Nabukodonozolo, sobha ya Babilonya, weza ni malubhambu ayadi phala ku mukuta ni ku mwambata mu Babilonya. 7 Nabukodonozolo wakatula ima mu inzo ya Jihova, yu wa yambata mu inzo yê, ku Babilonya. 8 O ima yamukwa ya musoso wa Nzoyakimi, o ima yayibha yabhange ni ukexilu wê wayibha, a isoneka mu divulu dya misoso ya jisobha ja Izalayele ni ja Judá. Mon’ê Nzowaki, mwéne wa mubhingana ku usobha.
9 Kyoso Nzowaki kyamateka o kutumina, wexile ni dikwinyi dya mivu ni dinake. Mwene watumina mu Jeluzaleme mu mbeji jitatu ni dikwinyi dya izuwa. Mwene wexile mubhanga ima yayibhila Jihova. 10 Ku dimatekenu dya muvu, sobha Nabukodonozolo watumu kwambata Nzowaki mu Babilonya, watumu we kwambata o ima yoso yavalolo yexile mu inzo ya Jihova mu ixi yê. Wasolo we Zedekiya phange ya tata ya Nzowaki, yu wa mutumbika kala sobha ya Judá ni Jeluzaleme.
11 Zedekiya wexile ni makwinyi ayadi ni umoxi a mivu kyoso kyakituka sobha, watumina mu Jeluzaleme mu dikwinyi dya mivu ni umoxi. 12 Mwene wexile mubhanga ima yayibhila Jihova, Nzambi yê. Kaditulula bhu pholo ya polofeta Jelemiya wa mutudila o njimbu ya Jihova. 13 Zedekiya wabhukumukina we sobha Nabukodonozolo, wa mutumine kulôka mu dijina dya Nzambi. Zedekiya wajiji mu kubhanga ima yayibha, waditunu kubelesela Jihova, o Nzambi ya Izalayele. 14 O atwameni oso a akunji ni kifuxi, exile mubhanga ima yayibha. Exile mubhanga o ima yayibha yabhangele o ifuxi yamukwa. Ene axidisa o inzo ya Jihova, yexile mu Jeluzaleme, yazelesele Mwene.
15 Jihova Nzambi ya jikuku jâ, wexile mu atumikisa akunji phala ku adimuna. Wa adimuna lwavulu, mukonda dya kuzola o mundu wê ni inzo yê. 16 Maji ene axongwena o akunji a Nzambi yakidi, kabhana mátwi ku maka Mê. Ene asebhulula o jipolofeta jê, kate o njinda ya Jihova ki yeza ku thandu dya mundu wê. Mukonda kikwexile dingi kayula kengi phala ku akwatekesa.
17 Kyenyiki, mwene wabhangesa o sobha ya akwa Kaladeya kwiza mu abwika. O sobha wajibha o minzangala mu kididi kikôla ni xibhata, kakwatela henda ku minzangala ni ku ilumba* ni kwa yó akukile ni ku jihaxi. Nzambi wabhakula yoso bhu maku mê. 18 Nabukodonozolo wambata mu Babilonya o ima yoso yexile mu inzo ya Nzambi yakidi, kikale o ima yamakota, kikale o ima yofele. O jimbote joso jexile mu inzo ya Jihova ni mu inzo ya sobha ni ya ilamba, wa jambata mu Babilonya. 19 O inzo ya Nzambi yakidi wa ite túbhya, wabulu o ilumbu ya Jeluzaleme, wate we túbhya ku jisabhalalu jokondolokele ni ilumbu, yu wabwika o ima yoso yexile ni valolo. 20 O yó akambele ku ajibha, a ambata ku Babilonya. Ene akala abhik’ê ni abhika a an’ê, kate kyoso sobha ya Pélesa kyamateka o kutumina. 21 Kiki kyabhiti phala ku dikumbidila o kizwelu kya Jihova kyatangele kwa Jelemiya, kate o ixi kyeji tenesa o jisábhalu jê ja kunyoha. Mu kithangana kyoso o ixi ki yexile kiphulungunzu, yene ya nyoha o jisábhalu jê kate kyatenesa makwinyi asambwadi a mivu.
22 Ku muvu wa dyanga wa Silu, sobha ya Pélesa, Jihova wate ku muxima wa Silu o kibanzelu kya kubhana ngonge mu utuminu wê woso, yu wa isoneka. Kiki kyabhite phala o izwelu ya Jihova kwa Jelemiya idikumbidile. O ngonge yambele kiki: 23 “Silu sobha ya Pélesa wambe kiki: “Jihova, o Nzambi ya dyulu wa ngibhana o mautuminu oso a ngongo, wa ngisolo phala kutunga o inzo yê mu Jeluzaleme yala mu Judá. Nanyi mwaxaxi k’enu watokala ku mundu wê? Jihova Nzambi yenu akale ni mwene. Mukyenyiki, abande kwenyoko!”’