Phaulu a mu Tumikisa ku Ixi ia Loma

O njila ia katatu ia ukunji ua Phaulu ia sukina mu Jeluzaleme. Kuenhoko a mu kutu anga a mu ta mu kaleia. Mu kisuma Jezú ua mu tangela uixi: ‘Eie ua-ndaia mu ixi ia Loma phala kuboka.’ Phaulu a mu katula mu Jeluzaleme, anga a muambata mu Sezaleia ia a mu tele mu kaleia mu mivu iiadi. Kioso kia kexile mu mu fundisa kuala o Nguvulu Festu, Phaulu uambe: ‘Ngehe a ngi fundise kua Sézalu mu ixi ia Loma.’ Festu uambe: “Eie ua fundila kubhixila kua Sézalu, kua Sézalu kuene muene ku uia.” Phaulu a mu tula mu naviiu phala kuia mu ixi ia Loma, o phange jiiadi Luka ni Aristarko ai-nê kumoxi.

Kioso kia kexile mu kalunga, kua moneka kitembu kia dikota mu izuua iavulu. Athu oso a banzele kuila eji fua. Maji Phaulu uambe: ‘Enu akuetu, sai anju ua ngi tangela mu nzoji uixi: Kana kukala ni uôma Phaulu. Eie ua-nda bhixila katé mu ixi ia Loma, athu oso ala kumoxi n’eie a-nda bhuluka ue. Ki mu kale ni uôma! Ki tua-nda fua kana.’

O kitembu kia dikota kia bhange 14 kia izuua. Mu kusuka-ku, a mono o kikolo kia Melita. O naviiu ia budijika, maji o 276 ja athu a kexile mu naviiu a bhuluka. Amoxi a zouo phala kubhuluka, a mukuá a kuata ku mabaia a naviiu anga ai katé ku ndundu ia kalunga. O athu akua Melita, a a lange ia a uika túbhia phala ene kuota.

Mu kubhita mbeji jitatu, o masoladi ambata Phaulu mu ixi ia Loma mu naviiu ia mukuá. Kioso muene kia bhixila, o jiphange ai mu mu menekena. Mu kua mona Phaulu ua sakidila Jihova, kiki kia mu suínisa kiavulu. Sumbala Phaulu ua kexile pelezu, a muehele kukala ku bhata, maji ni ku mu langidila ku disoladi. Muene ua kexile kuenhoko, mu mivu iiadi. Athu avulu akexile muia mu mu kunda, mukonda dia kiki muene ua kexile mua longa ia lungu ni Utuminu ua Nzambi, ni maka a lungu ni Jezú. Kuenhóko Phaulu ua sonekene ue mikanda phala o ilunga ia Ázia Menor ni ia Judeia. Sé phata Phaulu uexile falamenda bhu maku a Jihova phala kutula o njimbu iambote mu jixi joso.